រដ្ឋាភិបាលកាណាដាកាលពីថ្ងៃទី១៧ខែមីនា បានក្រើនរំឮកជាថ្មីដល់ពលរដ្ឋខ្លួន ឱ្យបង្កើនការប្រុងប្រយ័ត្នខ្ពស់ នៅពេលធ្វើដំណើរចូលប្រទេសកម្ពុជា ដោយអះអាងថា កម្ពុជាកំពុងប្រឈមនឹងការកើនឡើងនៃបទល្មើសជាច្រើន ដូចជា ករណីចោរលួច ឆក់ប្លន់ អំពើហិង្សាកាប់ចាក់ ការឆបោក ការជួញដូរមនុស្ស និងបញ្ហាចរាចរណ៍ ជាពិសេសគឺករណីឆបោកតាមអនឡាន (Online) នៅខេត្តព្រះសីហនុ និងក្រុងប៉ោយប៉ែត។
គេហទំព័រផ្លូវការរដ្ឋាភិបាលកាណាដាបន្តថា ករណីចោរឆក់បានកើតឡើងជាញឹកញាប់នៅក្នុងប្រទេសកម្ពុជា ហើយក្រុមជនល្មើស តែងធ្វើសកម្មភាពឆក់ទូរស័ព្ទឬកាបូប ពីភ្ញៀវទេសចរបរទេស នៅពេលដើរតាមដងផ្លូវ ជិះម៉ូតូ ឬម៉ូតូកង់បី ដែលភាគច្រើនកើតឡើងនៅម្ដុំបឹងកេងកង ក្នុងរាជធានីភ្នំពេញ ខេត្តសៀមរាប និងខេត្តព្រះសីហនុ។ លើសពីនេះ របស់របរភ្ញៀវទេសចរ ដែលរក្សាទុកក្នុងបន្ទប់ចាក់សោ ជាពិសេសក្នុងបន្ទប់ស្នាក់នៅដែលមានតម្លៃថោក រួមទាំងអីវ៉ាន់ទុកលើរថយន្តក្រុងធ្វើដំណើរទៅមកពីភ្នំពេញទៅសៀមរាប ក៏ត្រូវបានគេលួចយកជារឿយៗដែរ។
រដ្ឋាភិបាលកាណាដាបន្ថែមថា ចំពោះករណីហិង្សាកាប់ចាក់ ដែលកើតឡើងម្ដងម្កាលនៅក្នុងប្រទេសកម្ពុជា គឺភ្ញៀវទេសចរបរទេស ពិបាកដាក់ពាក្យបណ្ដឹងទៅកម្លាំងសមត្ថកិច្ច ដោយសារតែគ្មានវិន័យ។ កាណាដាបញ្ជាក់ទៀតថា នៅក្នុងនោះ ក៏មានសេចក្ដីរាយការណ៍ ពីទីតាំងប្រតិបត្តិការបទល្មើសដែលមានការរៀបចំជាក្រុម នៅតាមរមណីយដ្ឋានមាត់សមុទ្រក្នុងខេត្តព្រះសីហនុ និងតំបន់សេដ្ឋកិច្ចពិសេស ដូចជាករណីឆបោកតាមរយៈការងារ ករណីជួញដូរមនុស្ស និងគ្រឿងញៀន។ ជាងនេះទៅទៀត កម្ពុជាក៏ធ្លាប់រាយការណ៍ជាបន្តបន្ទាប់ ពីករណីចាប់រំលោភដែលបានកើតមានឡើងលើភ្ញៀវទេសចរបរទេសជាស្ដ្រីនៅតាមសណ្ឋាគារដែរ។
បញ្ហាចរាចរណ៍នៅតាមដងផ្លូវ ក៏បានបណ្ដាលឱ្យពលរដ្ឋកាណាដា ស្លាប់និងរបួសធ្ងន់ធ្ងរពីមួយឆ្នាំទៅមួយឆ្នាំនៅក្នុងប្រទេសកម្ពុជាដែរ ដោយសារអ្នកបើកបរយានយន្តមួយចំនួន ជាពិសេស អ្នកបើកបរម៉ូតូ មិនគោរពច្បាប់ បើកបរបញ្ច្រាសទិស និងចូលទៅគន្លងផ្លូវថ្មើរជើងជាដើម ហើយគ្រោះថ្នាក់ចរាចរណ៍កើតឡើងនៅពេលមានពិធីបុណ្យទាន។
ប្រឈមទៅនឹងបញ្ហាសុវត្ថិភាពទាំងនេះ រដ្ឋាភិបាលកាណាដា អំពាវនាវឱ្យពលរដ្ឋខ្លួនចៀសវាងការដើរតែម្នាក់នៅពេលយប់ ត្រូវបង្កើតការប្រុងប្រយ័ត្នខ្ពស់នៅពេលត្រូវទៅដកលុយតាមទូរ អេ.ធី.អឹម (ATM) នៅទីសាធារណៈ និងត្រូវបញ្ចៀសការផ្ដល់ព័ត៌មានផ្ទាល់ខ្លួន និងផ្ទេរលុយ ទៅឱ្យបុគ្គលដែលហៅតាមទូរស័ព្ទហើយអះអាងថា ជាសមត្ថកិច្ចមូលដ្ឋានឬជាស្ថាប័នហិរញ្ញវត្ថុ។
ការក្រើនរំឭកឱ្យប្រុងប្រយ័ត្នពីបញ្ហាសុវត្ថិភាពនៅកម្ពុជារបស់រដ្ឋាភិបាលកាណាដានេះ កើតឡើងបន្ទាប់ពីមានករណីចោរឆក់លើគូដណ្ដឹងរបស់អ្នកផលិតមាតិកាតាមបណ្ដាញសង្គមជាជនជាតិអាមេរិកាំងម្នាក់ឈ្មោះ គ្រីស្ដ (Christ) នៅក្បែរវត្តភ្នំ កាលពីថ្ងៃទី១៥ ខែមីនា។ ប៉ុន្តែដោយសារលោក គ្រីស្ដ ជាអ្នកផលិតមាតិកាដ៏ល្បីឈ្មោះ ដែលមានអ្នកទស្សនារាប់លាននាក់ និងបានជួយផ្សព្វផ្សាយតំបន់ទេសចរណ៍ និងពីវប្បធម៌ខ្មែរ រួមទាំងប្រតិកម្មពីពលរដ្ឋខ្មែរប្រើប្រាស់បណ្ដាញសង្គមផងទើបកម្លាំងសមត្ថកិច្ចចាប់បានជនល្មើសជាចោរឆក់ភ្លាមៗហើយបានប្រគល់ឯកសារនិងលុយកាក់ ដល់ជនរងគ្រោះវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។