មន្រ្តីសង្គមស៊ីវិលនិយាយថា សាលាដំបូងខេត្តកោះកុង កំពុងរៀបចំគំរោងកោះហៅអ្នកយកព័ត៌មាន ២រូប របស់កាសែត ឌឹ ខេមបូឌា ដេលី ដែលត្រូវគេចាត់ទុកថា ជាសាក្សីដ៏សំខាន់នៅក្នុងសំណុំរឿងដែលមានជាប់ពាក់ព័ន្ធទៅនឹងព្រឹត្តិការណ៍ឃាតកម្មលើប្រធានអង្គការការពារធនធានធម្មជាតិ និងមន្ត្រីប៉េអិមម្នាក់ កាលពីចុងខែមេសា កន្លងទៅនេះ។
លោក នាង បូរ៉ាទីណូ មន្រ្តីសម្របសម្រួលសមាគមការពារសិទ្ធិមនុស្សអាដហុក (Adhoc) ប្រចំាខេត្តកោះកុង។ លោកមានប្រសាសន៍នៅថ្ងៃទី៧ ខែឧសភា ឆ្នាំ២០១២ ថា ព្រះរាជអាជ្ញារងនៃសាលាដំបូងខេត្តកោះកុង លោក ស្រី មាក់នី គ្រោងនឹងចេញដីកាកោះឲ្យអ្នកយកពត៌មាន ២រូប គឺកញ្ញា ផន បុប្ផា និងអ្នកជនជាតិកាណាដា របស់កាសែត ឌឹ ខេមបូឌា ដេលី ម្នាក់ទៀត ឆ្លើយបំភ្លឺនៅថ្ងៃទី១៧ ខែមេសា ឆ្នាំ២០១២ ខាងមុខនេះ។
លោក នាង បូរ៉ាទីណូ៖ «បាទ! ពិតប្រាកដហើយ ករណីដែលកោះហៅថ្ងៃ១៧ ហ្នឹង គឺខាងអយ្យការសាលាដំបូងជាអ្នកកោះហៅ។ អ៊ីចឹងយើងគិតថា រឿងហ្នឹងវាស្ថិតនៅក្នុងករណីសម្លាប់លោក ឈុត វុទ្ធី ហើយ»។
ករណីសាលាដំបូងខេត្តកោះកុង ចេញដីកាកោះឲ្យអ្នកយកព័ត៌មាន ២រូប របស់កាសែត ឌឹ ខេមបូឌា ដេលី ចូលខ្លួនបំភ្លឺក្នុងសប្តាហ៍ខាងមុខនោះ ក៏ព្រោះតែអ្នកទាំងពីរនេះបានស្ថិតក្នុងហេតុការណ៍ដោយផ្ទាល់ក្នុងរឿងបាញ់សម្លាប់លោក ឈុត វុទ្ធី នៅខេត្តកោះកុង កាលពីថ្ងៃទី២៦ ខែមេសា ឆ្នាំ២០១២។
វិទ្យុអាស៊ីសេរីពុំអាចស្នើបំភ្លឺពីលោក ស្រី មាក់នី ព្រះរាជអាជ្ញារងខេត្តកោះកុង ដែលកាន់សំណុំរឿងដ៏ចម្រងចម្រាសមួយនេះបានទេ ដោយទូរស័ព្ទរបស់លោករោទិ៍ជាច្រើនដងតែពុំមានអ្នកទទួល។
ចំណែកចៅក្រមស៊ើបសួរ លោក ម៉ីន មករា បដិសេធមិនធ្វើអត្ថាធិប្បាយទេ ដោយលោកអះអាងយ៉ាងខ្លីថា វាជាដំណាក់កាលនៃនីតិវិធីច្បាប់៖ «សូមទោស! អាការងារអ៊ីចឹងគឺជាការងារសម្ងាត់ មិនអាចឆ្លើយជូនបានទេ សូមទោស! ព្រោះអាហ្នឹងហាមប្រាមដោយច្បាប់»។
វិទ្យុអាស៊ីសេរីពុំអាចស្នើសុំការអត្ថាធិប្បាយជុំវិញដីកាកោះនេះពីកញ្ញា ផន បុប្ផា និងកញ្ញា ផ្លូកឃី (Plokhii) ជនជាតិកាណាដា បានទេ។
កូនប្រុសច្បងរបស់លោក ឈុត វុទ្ធី គឺលោក ឆឺយ ឧត្តមរស្មី។ លោកប្រាថ្នាចង់ឃើញយុត្តិធម៌អាចផ្តល់ភាពត្រឹមត្រូវមួយសម្រាប់ជនរងគ្រោះក្នុងអំពើឃាតកម្មនេះ និងអាចស្វែងរកជនដៃដល់យកទៅផ្ដន្ទាទោសតាមផ្លូវច្បាប់៖ «ខ្ញុំចង់ឲ្យតុលាការហ្នឹង ឲ្យអ្នកកាសែតហ្នឹង និយាយការពតិ ដែលសកម្មភាពដែលបានឃើញនៅពេលគេធ្វើទៅលើគាត់ ព្យាយាមនិយាយការពិត។ ទីមួយខ្ញុំចង់អ៊ីចឹង។ ខ្ញុំចង់ឲ្យយ៉ាងម៉េចឲ្យមានតម្លាភាព កុំឲ្យមានភាពថា លំអៀងមិនពិតប្រាកដ»។
ការចេញដីកាកោះនេះ ធ្វើឡើងនៅបន្ទាប់ពីគណៈកម្មការស៊ើបអង្កេតចម្រុះរបស់រដ្ឋាភិបាល បានបិទបញ្ចប់សំណុំរឿង ដោយមានការរិះគន់ដ៏ចម្រូងចម្រាសពីក្រុមអង្គការសង្គមស៊ីវិល កាលពីថ្ងៃសៅរ៍ ទី៥ ខែមេសា ឆ្នាំ២០១២ កន្លងទៅថ្មីៗនេះ។ លទ្ធផលនៃការស៊ើបអង្កេតនេះ បានរកឃើញថា អំពើឃាតកម្មលើលោក ឈុត វុទ្ធី និងលោក អ៊ិន រតនា គឺជាទំនាស់បុគ្គល។
អំពើឃាតកម្មដែលបណ្តាលឲ្យលោក ឈុត វុទ្ធី ប្រធានអង្គការការពារធនធានធម្មជាតិស្លាប់ កើតឡើងកាលពីថ្ងៃទី២៦ ខែមេសា នៅចំណុចវាលបី ស្រុកមណ្ឌលសីមា ខេត្តកោះកុង ខណៈលោក អ៊ិន រតនា ជាមន្ត្រីប៉េអិមព្យាយាមរារាំង បន្ទាប់ពីលោក ឈុត វុទ្ធី ថតគំនរឈើមួយរបស់ក្រុមហ៊ុន ដែលគេស្គាល់ឈ្មោះថា ធីមប៊ឺ ហ្គ្រីន (Timber Green) ដែលទទួលបានសិទ្ធិពីរដ្ឋាភិបាលក្នុងការស្ដារបាតអាងដើម្បីធ្វើវារីអគ្គិសនីក្នុងស្រុកថ្មបាំង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។