ប្រធានអង្គការសកម្មភាពដើម្បីកុមារនៅក្នុងប្រទេសកម្ពុជា ឬហៅថា Action Pour Les Enfants លោក សំណាង សីលា បានមានប្រសាសន៍ប្រាប់វិទ្យុអាស៊ីសេរីថា ៖ «ជនជាតិអូស្ត្រាលីម្នាក់ត្រូវបានឃាត់ខ្លួននៅខេត្តព្រះសីហនុ នៅយប់ថ្ងៃទី១៧ ដោយមានការសង្ស័យពាក់ព័ន្ធទៅនឹងអង្គហេតុដែលគាត់នាំកុមារីជនជាតិវៀតណាមក្រុមអាយុ ៣នាក់ ទៅស្នាក់នៅផ្ទះសំណាក់មួយជាមួយនឹងជនបរទេសដែលជាមិត្តភក្ដិរបស់គាត់ ២នាក់ទៀតដែលជាជនជាតិអាមេរិកាំងនិងជនជាតិនូវែលហ្សេឡង់។ នៅក្នុងនោះប៉ូលិសខេត្តព្រះសីហនុ គ្រាន់តែធ្វើការឃាត់ខ្លួនដោយសង្ស័យពីការនាំកុមារចូលទៅស្នាក់នៅក្នុងផ្ទះសំណាក់ ប៉ុន្តែប៉ូលិសនៃនាយកដ្ឋានប្រឆាំងការជួញដូរមនុស្ស និងការពារអនីតិជននៃក្រសួងមហាផ្ទៃនៅឯក្រុងភ្នំពេញឯណេះ គឺបានស៊ើបអង្កេតករណីហ្នឹងអស់រយៈពេលជាយូរ មុនពេលដែលគាត់ត្រូវបានឃាត់ខ្លួននៅខេត្តព្រះសីហនុ»។
សមត្ថកិច្ចបានបើកការស៊ើបអង្កេតជនបរទេសទាំងបីនាក់នោះជាច្រើនខែមកហើយ រហូតដល់មានការចាប់ខ្លួនកាលពីថ្ងៃទី១៧ ខែមីនា កន្លងទៅនៅខេត្តព្រះសីហនុ។
កុមារីជនជាតិវៀតណាមដែលរងគ្រោះនោះ មានចំនួន ៣នាក់ មានអាយុប្រមាណ ១៦ឆ្នាំ។ បច្ចុប្បន្នអាជ្ញាធរកម្ពុជាក៏កំពុងតែស៊ើបអង្កេតលើឯកសារក្នុងម៉ាស៊ីនកុំព្យូទ័រជាច្រើនគ្រឿង ដែលមានរូបភាពអនាចារ និងរូបភាពអាសអាភាសលើកុមារីដែលថា ជាកូនចិញ្ចឹមរបស់ជនជាតិអូស្ត្រាលីរូបនោះផង។
កាលពីថៃ្ងទី១ ខែមីនា កន្លងទៅថ្មីៗនេះ លោក John T. Morton ជាឧបការីក្រសួងសន្តិសុខមាតុភូមិ សហរដ្ឋអាមេរិក ដែលបានមកបំពេញទស្សនកិច្ចនៅក្នុងប្រទេសកម្ពុជា បានប្រកាសថា លោកបានចុះហត្ថលេខាទ្វេភាគីមួយ ជាមួយលោក នេត សាវឿន អគ្គស្នងការនគរបាលជាតិកម្ពុជា ដើម្បីធ្វើបត្យាប័ន ដោយចាប់បញ្ជូនពលរដ្ឋអាមេរិកាំងណាដែលមកប្រព្រឹត្តអំពើឧក្រិដ្ឋកម្ម ឬរួមភេទជាមួយកុមារនៅក្នុងប្រទេសកម្ពុជា ឲ្យត្រឡប់ទៅអាមេរិកវិញ ដើម្បីទទួលការកាត់ទោស។ អាជ្ញាធរកម្ពុជា បានគាំទ្រនិងសាទរជាមួយនឹងកិច្ចព្រមព្រៀងរវាងប្រទេសទាំងពីរ៕