នៅក្នុងព្រះរាជប្រកាសមួយពីទីក្រុងប៉េកាំងដែលជាព្រះរាជចំណារលើអត្ថបទមួយនៃកាសែតចិនប្រចាំថ្ងៃ ឈ្មោះ China Daily ព្រះមហាវីរក្សត្របានមានព្រះរាជឧង្ការថា មានសារព័ត៌មានមួយចំនួនបានចោទសួរថា ហេតុអ្វីបានជាព្រះអង្គធ្វើការប្រកាសពីព្រះរាជទ្រព្យកាលពីពេលថ្មីៗនេះ ?។
ព្រះមហាវីរក្សត្របានមានព្រះរាជឧង្ការបញ្ជាក់ថា បញ្ហានេះគឺទីមួយដោយសារតែសារព័ត៌មានចិន China Daily បានផ្សាយពីព្រះរាជានិងរាជវង្សដែលមានទ្រព្យសម្បត្តិមហាសាលនៅលើពិភពលោក និងទីពីរគឺក្នុងព្រះនាមព្រះអង្គជាព្រះមហាក្សត្រដែលចូលនិវត្តន៍ទៅហើយនោះ ព្រះអង្គក៏ធ្លាប់បានពួក លន់ នល់ និយម និងពួកខ្មែរសាធារណរដ្ឋនិយម ធ្លាប់បានចោទប្រកាន់ព្រះអង្គថាមានទ្រព្យសម្បត្តិដ៏ស្តុកស្តម្ភនោះដែរ ដូច្នេះទើបព្រះអង្គប្រកាសជាសាធារណៈថា ទ្រព្យសម្បត្តិព្រះអង្គមានតែប៉ុណ្ណឹង។
គួរបញ្ជាក់ថាកាលពីថ្ងៃសៅរ៍ ទី២៣ ខែសីហាកន្លងទៅនេះ អតីតព្រះមហាក្សត្រ ព្រះបាទ សម្តេចព្រះនរោត្តម សីហនុ ពីទីក្រុងប៉េកាំង បានប្រកាសប្រាប់ពីព្រះរាជទ្រព្យដែលព្រះអង្គមានទាំងអស់ក្នុងខណៈនេះ គឺប្រាក់ដែលព្រះអង្គបានផ្ញើក្នុងធនាគារប៉ាឡាទីន ក្រុងប៉ារីស ប្រទេសបារាំង មានចំនួន៣០.៣១៣,២៨អឺរ៉ូលុយអឺរ៉ុប ស្មើនឹងជិត ៤៥.០០០ដុល្លារសហរដ្ឋអាមេរិក។
ក្រៅពីនេះអតីតព្រះមហាក្សត្រទ្រង់ក៏មានកូនវីឡាមួយនៅក្រុងសៀមរាប ដែលបន្ទាប់ពីព្រះអង្គសោយទិវង្គតទៅនឹងក្លាយជាមត៌ករបស់ព្រះអគ្គមហេសី នរោត្តម មុនីនាថ សីហនុ ហើយក៏នឹងជាកេរដំណែលថ្វាយព្រះមហាក្សត្រ នរោត្តម សីហមុនី បន្ទាប់ពីព្រះមាតាទ្រង់ចូលទិវង្គត។
រីឯផ្ទះកំណើតទីដែលព្រះអង្គប្រសូតនៅក្បែរវិមានឯករាជ្យហើយដែលព្រះអង្គបានអនុញ្ញាតឲ្យសាធារណរដ្ឋប្រជាមានិតកូរ៉េប្រើប្រាស់រហូតដល់ឆ្នាំ ២០១៤ នោះ នឹងប្រទានជាសម្បត្តិរដ្ឋ ហើយចាប់ពីឆ្នាំ ២០១៤ តទៅ ក៏នឹងបើកជាសារមន្ទីរជាតិមួយទៀត។
ចំណែកឯវាំងនៅកូរ៉េខាងជើងនិងដំណាក់លួងនៅក្រុងប៉េកាំងនោះពុំមែនជាទ្រព្យសម្បត្តិរបស់ព្រះអង្គទេ តែជាផ្ទះសំណាក់សម្រាប់ភ្ញៀវរបស់រដ្ឋនៃប្រទេសទាំងពីរ។
ព្រះអង្គម្ចាស់ ស៊ីសុវត្ថិ ធម្មិកោ មន្ត្រីខុទ្ទកាល័យព្រះបរមរាជវាំងបានមានបន្ទូលថា ព្រះអង្គក៏មិនអាចដឹងចំនួនព្រះរាជទ្រព្យរបស់ព្រះមហាក្សត្រសោយរាជ្យបច្ចុប្បន្ន គឺព្រះបាទ នរោត្តម សីហមុនី នោះដែរ តែអាចដឹងបានថាព្រះអង្គពិតជាមានតិចតួច។
ព្រះអង្គម្ចាស់ ស៊ីសុវត្ថិ ធម្មិកោ បានមានបន្ទូលថា ៖ «ខ្ញុំដឹងថាព្រះរាជដំណាក់ដែលលោកមាននៅប្រទេសបារាំងហ្នឹង គឺរដ្ឋាភិបាលបារាំងបានថ្វាយទៅលោក ដូចតែគេជួលផ្ទះឲ្យប្រជារាស្ត្រក្រីក្ររបស់គេអ៊ីចឹង»។
ការប្រកាសពីព្រះរាជទ្រព្យរបស់ព្រះមហាវីរក្សត្របានធ្វើឡើងបន្ទាប់ពីមានការផ្សាយរបស់ទស្សនាវដ្តី Forbes ដែលបានធ្វើតារាងព្រះរាជានិងរាជវង្សដែលមានជាងគេ ១៥អង្គ នៅលើពិភពលោក ដែលទស្សនាវដ្ដីនោះបានចំណាត់ថ្នាក់ព្រះមហាក្សត្រថៃ ភូមិបុល អាឌុល យ៉ាដេត ដែលព្រះអង្គមានព្រះរាជទ្រព្យនាពេលបច្ចុប្បន្ននេះមានតម្លៃ៣៥ពាន់លានដុល្លារសហរដ្ឋអាមេរិក៕