មេធាវីការពារក្ដីឲ្យឈ្មោះ សោម ឯក គឺលោក សំ សុគង់ បានមានប្រសាសន៍ប្រាប់វិទ្យុអាស៊ីសេរី នៅថ្ងៃទី១៦ ខែកញ្ញាថា លោកបានត្រៀមខ្លួនរួចហើយក្នុងការតទល់ក្ដីនេះនៅក្នុងសវនាការខាងមុខ។
លោក សំ សុគង់ មានប្រសាសន៍បញ្ជាក់ដូច្នេះ ៖ «អត់មានភស្តុតាងអីជាក់លាក់ដែលបង្ហាញថា កូនក្ដីខ្ញុំបានប្រព្រឹត្តនូវបទល្មើសដូចការចោទប្រកាន់របស់តុលាការនោះទេ ដោយសារតែពាក់ព័ន្ធនឹងការបង្កើតជាចលនា ឬគណបក្សនយោបាយ ដើម្បីប្រកួតប្រជែងនៅក្នុងការបោះឆ្នោតជាតិ»។
សវនាការនៅថ្ងៃទី១៧ ខែកញ្ញា គឺជាសវនាការលើកទី៥ហើយ ក្រោយពីសវនាការជាបន្តបន្ទាប់ធ្វើឡើងតាំងពីឆ្នាំ២០០៩មក។
ជនសង្ស័យចំនួន ៥នាក់នោះ មានដូចជាទី១ ឈ្មោះ សោម ឯក ជាមេខ្លោង ទី២ឈ្មោះ ភី សុវឹង ទី៣ ឈ្មោះ ទ្បឹក ប៊ុនញៀន ទី៤ ឈ្មោះ ពៅ វណ្ណារ៉ា និងទី៥ ឈ្មោះ ជា កឹមយ៉ាន ដែលរងការចាប់ខ្លួននៅទីកន្លែងផ្សេងៗគ្នាកាលពីឆ្នាំ២០០៩ កន្លងទៅ នៅក្នុងស្រុកកៀនស្វាយ ខេត្តកណ្ដាល និងនៅក្រុងប៉ោយប៉ែត ខេត្តបន្ទាយមានជ័យជាដើម ដោយសមត្ថកិច្ចកម្ពុជា។
ជនសង្ស័យឈ្មោះ សោម ឯក ឬហៅ ទីតូ ដែលជាអតីតមន្ត្រីយោធាផងដែរនោះ ត្រូវបានចាប់ខ្លួនកាលពីឆ្នាំ២០០៩ ជាមួយនឹងភស្តុតាង ដូចជាសារធាតុផ្សំគ្រឿងផ្ទុះ និងឯកសារនានា ស្ដីពីរូបមន្តផ្សំគ្រឿងផ្ទុះជាដើម។ ក្នុងសវនាការកន្លងមកលោកបានឆ្លើយថា លោកបានបង្កើតចលនាក្បាលខ្លារំដោះ ឬរណសិរ្សរួបរួមជាតិប្រឆាំងនឹងរដ្ឋាភិបាលកម្ពុជា ដោយចោទថា ជារដ្ឋាភិបាលពុករលួយ និងរណបប្រទេសវៀតណាម។
លោក សោម ឯក និងជនសង្ស័យមួយចំនួនទៀត ក៏ត្រូវបាននគរបាលកម្ពុជា បានចោទប្រកាន់ផងដែរក្នុងការពាក់ព័ន្ធនឹងការបង្កៃគ្រឿងផ្ទុះមិនបានសម្រេចដើម្បីបំផ្លាញស្តូបមិត្តភាពកម្ពុជា-វៀតណាម នៅក្នុងទីក្រុងភ្នំពេញ កាលពីថ្ងៃទី២៩ ខែកក្កដា ឆ្នាំ២០០៧ កន្លងទៅ។
ភរិយារបស់ជនសង្ស័យឈ្មោះ ទ្បឹក ប៊ុនញៀន គឺលោកស្រី ម៉ុក ណារី អាយុ ៤០ឆ្នាំ បានថ្លែងថា ៖ «ជួយរកយុត្តិធម៌ឲ្យប្ដីខ្ញុំផង ពីព្រោះប្ដីខ្ញុំគាត់មិនបានធ្វើអ្វីខុសទេ»។
នៅមុនការបើកសវនាការរបស់តុលាការក្រុងភ្នំពេញ នៅថ្ងៃទី១៧ ខែកញ្ញា មន្ត្រីអ្នកនាំពាក្យរបស់អគ្គស្នងការដ្ឋាននគរបាលជាតិកម្ពុជា គឺលោកឧត្ដមសេនីយ៍ឯក គៀត ចន្ថារិទ្ធ បានមានប្រសាសន៍ថា ៖ «ស្ថាប័នអនុវត្តច្បាប់ គឺចង់ឲ្យធ្វើម៉េចឲ្យតុលាការអនុវត្តតាមច្បាប់ទៅតែប៉ុណ្ណឹង។ រឿងធ្ងន់ស្រាលអីនោះ យើងមិនហ៊ាននិយាយទេ គឺជារឿងតុលាការ ពីព្រោះតុលាការឯករាជ្យ»។
អាជ្ញាធរនគរបាលកម្ពុជា ធ្លាប់បានចាប់ខ្លួនជនសង្ស័យរាប់សិបនាក់របស់ក្រុមចលនាកងទ័ពសេរីកម្ពុជា ឬកាត់ជាភាសាអង់គ្លេសថា CFF បានដឹកនាំដោយលោក ឈុន យ៉ាសិទ្ធិ ដែលបានបើកការវាយប្រហារកាលពីឆ្នាំ២០០០ កន្លងទៅ ដើម្បីផ្ដួលរំលំរដ្ឋាភិបាលកម្ពុជា ប៉ុន្តែមិនបានសម្រេច។
ជនសង្ស័យរាប់សិបនាក់នោះ ត្រូវបានតុលាការក្រុងភ្នំពេញ បានកាត់ទោសឲ្យជាប់គុកមួយជីវិត ក្នុងនោះមានលោក រីឆាត គីរីគីម (Richard Kirikim) ផងដែរ ជាខ្មែរអាមេរិកាំង។
លោក ឈុន យ៉ាសិទ្ធិ អាយុ ៥៣ឆ្នាំ ជាមេខ្លោងដែលជាខ្មែរអាមេរិកាំងផងដែរនោះ ត្រូវបានតុលាការសហរដ្ឋអាមេរិក បានកាត់ទោសឲ្យលោកជាប់គុកមួយជីវិត កាលពីខែសីហា ឆ្នាំ២០០៨ កន្លងទៅ ក្រោមបទបានប្រព្រឹត្ត និងរៀបចំសកម្មភាពយោធាក្រៅសហរដ្ឋអាមេរិក៕