ពាក់ព័ន្ធនឹងវិស័យអប់រំ ក្រោយពីបើកបវេសនកាលពីដើមខែតុលា រហូតមកដល់ពេលនេះ មានរយៈពេលជាងមួយខែមកហើយ នៅមានសិស្សានុសិស្សមួយចំនួនមិនទាន់បានចូលរៀនគ្រប់គ្នានៅឡើយទេ ដោយសារសាលានៅលិចទឹក និងបញ្ហាហេដ្ឋារចនាសម្ព័ន្ធមិនទាន់បានជួសជុលហើយអស់នៅឡើយ។
មន្ត្រីជាន់ខ្ពស់នៃគណៈកម្មាធិការជាតិគ្រប់គ្រងគ្រោះមហន្តរាយបានឲ្យដឹងនៅថ្ងៃពុធ ទី៩ វិច្ឆិកា ថា ក្នុងចំណោមសាលាប្រមាណ ៤ពាន់កន្លែងដែលបានលិចទឹកជំនន់នៅឆ្នាំ២០១១ នេះ អាចបើកបវេសសនកាលបានចំនួន ២ពាន់សាលាហើយ ហើយនៅចំនួន ២ពាន់សាលាទៀតនៅលិចទឹកនៅឡើយ។
លោក ញឹម វណ្ណដា អនុប្រធានទីមួយនៃគណៈកម្មាធិការជាតិគ្រប់គ្រងគ្រោះមហន្តរាយ មានប្រសាសន៍បញ្ជាក់ថា សាលាទាំង ២ពាន់ដែលនៅលិចទឹកនៅឡើយនោះ នឹងបើកឲ្យសិស្សបានចូលរៀននៅពេលទឹកស្រកអស់នៅពេលដ៏ឆាប់ខាងមុខនេះ៖ «ពីរពាន់ខ្នងទៀតនេះនៅខេត្តជុំវិញ គេហៅថា ផ្ទៃក្នុងនៅខាងផ្ទៃដីនៅក្នុងឃុំ ឬក៏នៅក្នុងទន្លេសាប ហើយនៅតាមដងស្រុកឃុំមួយចំនួន ឬសាលានៅតាមទន្លេមេគង្គក្រោម ហើយនិងទន្លេបាសាក់ជាដើមអីៗអ៊ីចឹងទៅ»។
លោក យឿង រិទ្ធី ប្រធានភូមិស្ទឹងសែន ខេត្តកំពង់ធំ ដែលជាខេត្តមួយមានទឹកជំនន់ខ្លាំងជាងគេបន្ទាប់ពីខេត្តកំពង់ចាម លោកបានសម្ដែងក្ដីព្រួយបារម្ភពីគុណភាពសិក្សាកូនៗរបស់អ្នកភូមិដែលបានចូលរៀនយឺតពេលនោះថា អាចប៉ះពាល់ដល់គុណភាពសិក្សាធ្លាក់ចុះ ឬអាចរៀនមិនទាន់សិស្សដែលបានចូលរៀនមុនហើយអាចមានលំបាកនៅពេលប្រឡងនាចុងឆ្នាំ។
លោក យឿង រិទ្ធី៖ «អាហ្នឹងយើងក៏បារម្ភដែរ ការរៀនសូត្ររបស់វា គេរៀនមុនឡើងមួយខែហើយ។ យើងព្រួយបារម្ភហើយ ការរៀនវាមិនទាន់ ប៉ុន្តែយើងមិនដឹងដោះស្រាយយ៉ាងម៉េចចេញ អាហ្នឹងវា បើយើងនិយាយអោយចំ យើងទាល់តែយើងជួយជំរុញ ហើយនិងជួយធ្វើផែនការមួយទៀត គឺចាក់ដីចាក់អីហ្នឹងអោយវាបាននេះទៅ។ ដល់រដូវវស្សាទឹកជំនន់ យើងអាចសិស្ស វាអត់នេះ ព្រោះគំរោងហ្នឹងខ្ញុំធ្វើទៅស្នើច្រើនសាដែរ ហើយអារឿងបញ្ហាហ្នឹងតាំងពីស្អីៗ សាលាហ្នឹងការខ្វះខាត ព្រោះវាមិនទាន់បានមកគ្រប់ចំនួនសិស្សដែរ។ ខ្ញុំបារម្ភដែរហ្នឹង»។
ប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន មានប្រសាសន៍កត់សម្គាល់ឃើញថា មានបញ្ហាជាច្រើនដែលធ្វើឲ្យប៉ះពាល់ដល់ការសិក្សារបស់សិស្ស ដូចជាបញ្ហាការចូលរៀនមិនទាន់គ្នា ពេលម៉ោងសិក្សាមិនគ្រប់គ្រាន់ ប៉ះពាល់ដល់គុណភាពអប់រំ ខ្វះសម្ភារៈសិក្សា ព្រោះមានសាលាខ្លះត្រូវខូចខាតសម្ភារៈ និងឯកសារបង្រៀនទាំងស្រុងតែម្ដង។
លោក រ៉ុង ឈុន៖ «យើងដឹងហើយថា សាលាដែលមិនបានចូលបង្រៀនអោយទាន់ពេលវេលាហ្នឹងវាប៉ះពាល់ហើយជាស្រេចហើយជុំវិញកម្មវិធីសិក្សា ដូចជាការធ្វើសំណួរសរសេរអីសព្វបែបយ៉ាងហ្នឹង អ៊ីចឹងហើយអ្នកដែលគ្រប់គ្រងនៅតាមសាលា ក៏ដូចជាក្រសួងអប់រំហ្នឹង ត្រូវបង្កើតកម្មវិធីដើម្បីធ្វើយ៉ាងណាបន្ថែម បន្ថែមម៉ោងទៅលើសាលាដែលថា មិនបានរៀនទាន់ពេលវេលា ធ្វើម៉េចអោយវាទាន់ដែលថា កម្មវិធីនៅពេលបញ្ចប់ឆ្នាំអោយចប់កម្មវិធីដូចគេដែរ»។
លោកបន្តថា នៅមានបញ្ហាជាច្រើនទៀតដែលក្រសួងត្រូវយកចិត្តទុកដាក់ខ្ពស់ក្នុងការពិនិត្យដោះស្រាយជាបន្ទាន់៖ «ឧបមាជាងមួយខែនេះ យើងឃើញថា ភាគច្រើននៅបឋមសិក្សា ក៏ដូចជាមធ្យមសិក្សា ការផ្ដល់សម្ភារៈ ដូចជាសៀវភៅសម្រាប់សិស្ស សម្រាប់គ្រូហ្នឹងមិនបានគ្រប់គ្រាន់។ បាទ! មកដល់ពេលនេះហើយ ឃើញថា ក្រសួងមិនទាន់បានទម្លាក់អោយបានគ្រប់គ្រាន់ ដែលជាចំណុចយើងមើលឃើញហើយ»។
ឆ្លើយតបនឹងបញ្ហានេះ ប្រធាននាយកដ្ឋានមធ្យមសិក្សាចំណេះទូទៅ លោក អ៊ឹង ង៉ោហុក មានប្រសាសន៍ថា ដើម្បីដោះស្រាយបញ្ហាសិស្សចូលរៀនមិនបានស្មើគ្នា ដោយសារគ្រោះទឹកជំនន់នេះកាលពីខែតុលា ក្រសួងបានធ្វើវិមជ្ឈការកម្មវិធីសិក្សា ដើម្បីសម្រួលទៅតាមលទ្ធភាពជាក់ស្ដែងទៅតាមសាលានីមួយៗដែលមិនបានបើកបវេសនកាលបានទាន់ពេលវេលា ឬសិស្សចូលរៀនយឺតជាងសាលាដទៃ ធ្វើយ៉ាងណាឲ្យការសិក្សារបស់សិស្សទាំងអស់នៅទូទាំងប្រទេសបានទទួលចំណេះដឹងស្មើៗគ្នា។
លោក អ៊ឹង ង៉ោហុក៖ «គេប្រើពាក្យបច្ចេកទេសមួយថា ធ្វើវិមជ្ឈការកាលវិភាគ។ អាហ្នឹងបើនិយាយសាមញ្ញ ថែមម៉ោងអោយគ្រប់ទៅតាមចំនួនដែលកំណត់តាមកម្មវិធីសិក្សា ជៀសវាងការប៉ះពាល់ហ្នឹងហើយ ដែលគណៈរដ្ឋមន្ត្រីក៏បានណែនាំមកក្រសួងក្នុងការប្រជុំរបស់ខ្លួនដែរ គឺអោយសម្រួលអារឿងវិញ្ញាសាប្រឡងអីណាកុំអោយចេញហួសពេក ពីព្រោះយើងគិតថា សិស្សវារៀនមិនទាន់ដល់»។
ទាក់ទងសម្ភារៈសិក្សា លោកបានបញ្ជាក់ឲ្យដឹងថា អង្គការមូលនិធិសហប្រជាជាតិសម្រាប់កុមារ (UNICEF) បានចំណាយទឹកប្រាក់ប្រមាណ ៣០ម៉ឺនដុល្លារដើម្បីជួយឧបត្ថម្ភលើសម្ភារៈសិក្សាផ្សេងៗជាបន្ទាន់ និងចាំបាច់ចំពោះសាលាណាដែលខ្វះខាត ឬត្រូវទឹកលិចឯកសារ និងសម្ភារៈទាំងនោះខូចអស់។
ទាក់ទងនឹងបញ្ហាសុខភាពសិស្សនៅក្រោយទឹកស្រក លោកបានពន្យល់ថា ក្រសួងកំពុងយកចិត្តទុកដាក់លើបញ្ហានេះ និងបានចេញនូវសេចក្ដីណែនាំមួយដល់សាលាទាំងអស់ក្រោយទឹកស្រកអស់ ឬមុនឲ្យសិស្សចូលរៀន ត្រូវរៀបចំសម្អាតថ្នាក់រៀន និងទីធ្លាសាលាឲ្យបានល្អ ជាពិសេសបញ្ហាបរិស្ថានទូទៅនៅតាមសាលានីមួយៗត្រូវតែយកចិត្តទុកដាក់ពិនិត្យ និងតាមដានជាប្រចាំ។
របាយការណ៍របស់ក្រសួងអប់រំយុវជន និងកីឡា ដែលវិទ្យុអាស៊ីសេរីទទួលបាននៅថ្ងៃទី១ ខែតុលា បង្ហាញថា សាលារៀនចំនួនជាង ៩០០កន្លែង ស្ថិតនៅតាមខេត្តចំនួន១៥ បានខូចខាត និងនៅលិចទឹក និងមានសិស្សចំនួនជាង ១ម៉ឺននាក់ (១០.៥០០នាក់) ខកខានមិនអាចចូលរៀនបានក្នុងពេលដែលសិស្សានុសិស្សនៅទូទាំងប្រទេសចាប់ផ្ដើមចូលកងក្នុងឆ្នាំថ្មីវិញនៅដើមខែតុលា ឆ្នាំ២០១១។
សាលារៀនដែលខូចខាត និងនៅលិចទឹកនៅឡើយនោះ មានដូចជារាជធានីភ្នំពេញ មាន ២២កន្លែង ខេត្តកណ្ដាល ១៣៣កន្លែង កំពង់ឆ្នាំង ៣១កន្លែង ខេត្តពោធិ៍សាត់ ១៤កន្លែង បាត់ដំបង ២កន្លែង បន្ទាយមានជ័យ១៦ ឧត្តរមានជ័យ ២៥ ខេត្តព្រះវិហារ ១៤ ខេត្តសៀមរាប ៦៥កន្លែង ខេត្តកំពង់ធំ ១៧៨ ខេត្តកំពង់ចាម ២៣០កន្លែង ព្រៃវែង ៨២ ស្ទឹងត្រែង ១៩ និងខេត្តក្រចេះ ៧៣កន្លែង។ ខេត្តដែលរងគ្រោះខ្លាំងជាងគេ គឺខេត្តកំពង់ចាម និងកំពង់ធំ។
លោក កឹម វីសុទ្ធ ប្រធានមន្ទីរអប់រំខេត្តកំពង់ធំ មានប្រសាសន៍ថា នៅខេត្តកំពង់ធំ មានសាលាលិចទឹកសរុបចំនួន ២១០សាលា ក្នុងចំណោមសាលាទាំងអស់ចំនួន ៥៦០ ហើយមកដល់ពេលនេះនៅសល់សាលាចំនួន ៤២ទៀត ដែលនៅលិចទឹកនៅឡើយ។
លោកបន្តថា ចំពោះសិស្សដែលចូលរៀនយឺតជាងគេ សាលានីមួយៗបានអនុវត្តតាមផែនការកម្មវិធីសិក្សាថ្មីរបស់ក្រសួង គឺត្រូវបង្រៀនបន្ថែមម៉ោង៖ «រៀងរាល់ឆ្នាំបើមានអ៊ីចឹង យើងធ្វើវិមជ្ឈការកាលវិភាគ ដោយអោយរៀនថ្ងៃព្រហស្បតិ៍បន្ថែម។ យើងយកគ្រប់ព្រហស្បតិ៍អោយរៀន តែលើកលែងព្រហស្បតិ៍ខ្លះដែលយើងចាំបាច់អោយប្រជុំត្រូវប្រជុំ»។
បើគិតតួលេខសាលាខូចខាតធ្ងន់ធ្ងរជាងគេ គឺខេត្តកំពង់ចាម ស្ថិតនៅកម្រិតលេខមួយ ខណៈខេត្តកំពង់ធំ នៅចំណាត់ថ្នាក់ខូចខាតលេខ២។
មន្ត្រីក្រសួងអប់រំយុវជននិងកីឡា មានប្រសាសន៍ថា គ្រោះទឹកជំនន់ឆ្នាំ២០១១នេះ បានធ្វើឲ្យសាលាខូចខាតតិចជាងពេលព្យុះកេតសាណាឆ្នាំ២០០៩ ដែលកាលនោះបានធ្វើឲ្យខូចសាលារៀនចំនួន ១.១៦៩កន្លែង។
អនុប្រធានគណៈកម្មាធិការជាតិគ្រប់គ្រងគ្រោះមហន្តរាយ លោក ញឹម វណ្ណដា បានប៉ាន់ស្មានថា ទំហំខូចខាតនៃប្រព័ន្ធធារាសាស្ត្រ ប្រឡាយទឹក ផ្លូវលំ ផ្លូវជាតិ និងស្រូវខូចខាតនោះ គឺមានតម្លៃសរុបជាង ៥០០លានដុល្លារអាមេរិក។ ប្រជាពលរដ្ឋចំនួន ១,៥លាននាក់ ប៉ះពាល់ដោយសារទឹកជំនន់។ លោកបានឲ្យដឹងទៀតថា ស្ថានភាពទឹកជំនន់ក្នុងឆ្នាំ២០១១នេះ បានបង្កឲ្យមនុស្សស្លាប់ប្រមាណ ២៥០នាក់គិតមកត្រឹមថ្ងៃទី៩ វិច្ឆិកា ឆ្នាំ២០១១។
បើប្រៀបធៀបគ្រោះទឹកជំនន់ឆ្នាំនេះទៅនឹងគ្រោះទឹកជំនន់កាលពីឆ្នាំ២០០១ គឺមានទំហំខូចខាតមានចំនួនច្រើនជាងកាលពីឆ្នាំ២០០១ ដែលបានបង្កឲ្យខូចខាតគិតជាទឹកប្រាក់ប្រមាណ ២០០លានដុល្លារសហរដ្ឋអាមេរិក៕