សាវតាររឿង៖
លោក ឈុត វុទ្ធី ប្រធានអង្គការការពារធនធានធម្មជាតិ ត្រូវបានមន្ត្រីកងរាជអាវុធហត្ថម្នាក់ដែលយាមល្បាតទីតាំងកាប់ឈើមួយ ក្នុងខេត្តកោះកុង បាញ់សម្លាប់នៅថ្ងៃទី២៦ ខែមេសា ឆ្នាំ ២០១២។
ការបាញ់ប្រហារនេះ ខណៈដែលលោក និងអ្នកកាសែត ឌឹ ខេមបូឌា ដេលី (The Cambodia Daily)បានចូលទៅកាន់ទីតាំងកាប់ឈើមួយ ក្នុងចំណុចវាល៣ ភូមិកោះប៉ោ ឃុំប៉ាក់ខ្លង ស្រុកមណ្ឌលសីមា។
នាយរងការិយាល័យកណ្ដាលយុត្តិធម៌នៃស្នងការដ្ឋានខេត្តកោះកុង លោក គង់ យ៉ាន ដែលចុះទៅដល់កន្លែងកើតហេតុនៅរសៀលថ្ងៃទី២៦ មេសា ថ្លែងថា តាមការធ្វើសម្ភាសន៍ជាមួយអ្នកកាសែត ឌឹ ខេមបូឌា ដេលី ២រូប ដែលបានទៅជាមួយលោក ឈុត វុទ្ធី នៅក្នុងហេតុការណ៍នោះ ឲ្យដឹងថា ការស្លាប់របស់លោក ឈុត វុទ្ធី គឺដោយសារតែមន្ត្រីកងរាជអាវុធហត្ថបានបាញ់ទៅលើលោកដែលគ្មានអាវុធនៅក្នុងដៃ។
លោកបន្តថា មន្ត្រីកងរាជអាវុធហត្ថការពារទីតាំងនោះ បានចាប់ដកហូតម៉ាស៊ីនថតរូបពីលោក ឈុត វុទ្ធី និងអ្នកកាសែតទាំងពីរនាក់នោះ។ លោកបន្តថា ក្រោយពីការដកម៉ាស៊ីនថតនោះ លោក ឈុត វុទ្ធី នៅតែព្យាយាមបើករថយន្តចូលទៅក្នុងទីតាំងកាប់ព្រៃឈើនោះដដែល ហើយអ្នកការពារក្រុមហ៊ុននោះបានបាញ់លោក ឈុត វុទ្ធី ស្លាប់នៅលើរថយន្តភ្លាមៗតែម្ដង។
លោក គង់ យ៉ាន៖ «ប្រធានអង្គការហ្នឹងមកថា សុំចូលមើលកន្លែងដែលគេស្តុកឈើគ្រញូង ហើយប៉េអិមយាមហ្នឹងគេមិនឲ្យចូល ដល់មិនឲ្យចូល ពួកហ្នឹងសុំថត ដល់ថត ប៉េអិមអ្នកយាមហ្នឹងក៏មកទាញយកកាមេរ៉ាយកអី ថាយកទៅខេត្ត។ ឮពាក្យសម្ដីទាស់គ្នា... មករារាំង គាត់ក៏ចុះទៅថតម្ដងទៀត មានទំនាស់ក៏គាត់ឡើងលើឡាន ពេលដកកាមេរ៉ាពួកបរទេសហើយហ្នឹង ខាងអាវុធហត្ថក៏បាញ់។ បាញ់ ៣គ្រាប់ ត្រូវឡានប្លាត១គ្រាប់មកត្រូវខ្លួនឯង ងាប់ខ្លួនឯង»។
លោក គង់ យ៉ាន ពុំបានបញ្ជាក់ប្រាប់ឈ្មោះ ទីតាំងកាប់ឈើនោះទេ។
អ្នកនាំពាក្យកងរាជអាវុធហត្ថលើផ្ទៃប្រទេស លោក ខេង ទីតូ មានប្រសាសន៍ថា មន្ត្រីកងរាជអាវុធហត្ថដែលបានស្លាប់នោះ មានឈ្មោះ អ៊ិន រតនា។
ប្រភពពីអ្នកធ្វើការជិតស្និទ្ធជាមួយ លោក ឈុត វុទ្ធី បានអះអាងថា រយៈពេលមួយថ្ងៃមុនប្រព្រឹត្តិការណ៍នេះ លោក ឈុត វុទ្ធី បានប្រាប់លោកថា លោកនឹងទៅទីកន្លែងកើតហេតុនោះ។
លោក ឈុត វុទ្ធី ជាសកម្មជនការពារព្រៃឈើដែលតែងតែចូលរួមតវ៉ា ធ្វើយុទ្ធនាការការពារព្រៃឈើ និងដីធ្លីរបស់ប្រជាពលរដ្ឋនៅតំបន់ព្រៃឡង់ ខេត្តកំពង់ធំ ក្រចេះ ព្រះវិហារ និងខេត្តកោះកុងជាដើម។ លោក ឈុត វុទ្ធី ក៏ធ្លាប់បានអាជ្ញាធរខេត្តក្រចេះ និងខេត្តកំពង់ធំ គំរាម និងភ្ជង់កាំភ្លើងបាញ់ទារយកម៉ាស៊ីនអារឈើវិញ បន្ទាប់ពីលោកចូលទៅក្នុងព្រៃ ដើម្បីបង្ក្រាបបទល្មើសកាប់ឈើនោះ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។