តុលាការកំពូលប្រទេសកម្ពុជា នៅថ្ងៃទី២ ខែសីហានេះ បានបើកសវនាការជម្រះក្តី លើសំណុំរឿងរដ្ឋប្បវេណីមួយ រវាងប្រជាពលរដ្ឋ ចំនួន២គ្រួសារ អតីតអ្នករស់នៅកោះពេជ្រ ដែលមានសាលាក្រុងភ្នំពេញ គឺជាអ្នកដើមបណ្ដឹង គឺពួកគាត់មិនទាន់បានទទួលប្រាក់សំណងជំងឺចិត្ត ពីសាលាក្រុងភ្នំពេញនៅឡើយ ក្រោយពីសាលាក្រុងបានរឹបអូសយកដីរបស់ពួកគាត់នៅកោះពេជ្រ តាំងពីឆ្នាំ២០០៤មក។
ក៏ប៉ុន្តែតុលាការកំពូលនេះ មិនទាន់បានប្រកាសសាលដីកាទេ នៅថ្ងៃទី២ ខែសីហានេះ ហើយគេនឹងប្រកាសសាលដីកានេះ នៅថ្ងៃទី៦ ខែសីហាខាងមុខ។
ប្រជាពលរដ្ឋចំនួន២គ្រួសារ មានឈ្មោះ សូវ ហាក់ និង សូវ ឆាយ បានបញ្ជាក់នៅក្នុងសវនាការថា លោកបានទិញដីធ្លីចំនួនជាង ២ហិកតារ នៅលើកោះពេជ្រនោះ នៅឆ្នាំ២០០៤កន្លងមក ដោយមានការដឹងឮ និងទទួលស្គាល់ជាលាយលក្ខណ៍អក្សរ ពីអាជ្ញាធរដែនដី ដូច្នេះសាលាក្រុងត្រូវតែដោះស្រាយសំណងជំងឺចិត្តតាមតម្លៃទីផ្សារសេរី។
មេធាវីការពារក្ដីឲ្យគ្រួសារចំនួន២គ្រួសារ គឺលោក ចាន់ សុជាតិ បានមានប្រសាសន៍ក្រោយពីសវនាការនោះថា ៖ «បើសិនជារដ្ឋចេះតែរឹបអូសយកដីកោះអ៊ីចឹង។ ការរស់នៅរបស់ប្រជាពលរដ្ឋ ប៉ះពាល់ភាគច្រើនណាស់ ព្រោះថា ស្រុកខ្មែរយើងមានកោះច្រើន នៅដែនទន្លេ និងដែនសមុទ្រដែរ»។
កាលពីឆ្នាំ២០០៤ សាលាក្រុងភ្នំពេញ បានរឹបអូសយកដីទំហំជាង១០០ហិកតារពីប្រជាជនចំនួន ៣០៧គ្រួសារនៅកោះពេជ្រ ដើម្បីឲ្យក្រុមហ៊ុនឯកជនអភិវឌ្ឍ ដោយផ្ដល់សំណងជំងឺចិត្តក្នុងតម្លៃថោក។ តែយ៉ាងណាក្តី ប្រជាជនទាំងអស់ បានយល់ព្រមទទួលសំណងនោះដោយបង្ខំចិត្ត លើកលែងតែពីរគ្រួសារនេះ។
រឿងវិវាទដែលអូសបន្លាយច្រើនឆ្នាំមកនេះ គ្រួសារចំនួនពីរនេះ មានដីធ្លីសរុបជាង២ហិកតារ នៅតែបន្តទាមទារប្រាក់សំណងជំងឺចិត្ត ចំនួន២៥ដុល្លារអាមេរិកក្នុងមួយម៉ែត្រការ៉េ លើផ្ទៃដីជាង២ហិកតាររបស់ពួកគាត់ ដោយផ្អែកតាមការវាយតម្លៃដីធ្លីរបស់ក្រុមហ៊ុន PLCកន្លងមក។
សាលាក្រុងភ្នំពេញបានចេញថ្លៃសងជំងឺចិត្តក្នុងតម្លៃ ៦.៧៥ដុល្លារអាមេរិក ក្នុង១ម៉ែត្រការ៉េ សម្រាប់គ្រួសារដទៃទៀតកន្លងមក។
សាលាក្រុងភ្នំពេញ គឺជាដើមបណ្ដឹង។ រីឯប្រជាពលរដ្ឋ ២គ្រួសារដែលរងការប្ដឹងនោះ មានឈ្មោះ សូវ ហាក់ និង សូវ ឆាយ ជាឪពុក និងកូន។
ព្រះរាជអាជ្ញានៃតុលាការកំពូល លោក ហ៊ីង ធិរិទ្ធ បានបន្ទោសថា ដើមភ្លើងដែលនាំឲ្យមានជម្លោះដីធ្លីករណីនេះ គឺបណ្ដាលមកពីអាជ្ញាធរដែនដី បានទទួលស្គាល់ការទិញ និងលក់ដីធ្លី ជាទ្រព្យសម្បត្តិរបស់រដ្ឋ មានដូចជាកោះជាដើម។
មេធាវីការពារក្តីឲ្យសាលាក្រុងភ្នំពេញ គឺលោក យឹម សារី បានមានប្រសាសន៍ថា ៖ «វាសំខាន់ វានៅតែតម្លៃទេ។ អត់មានអីខុសប្លែកពីហ្នឹងទេ វាតម្លៃទេ។ ខ្ញុំអត់ដឹងជាសេចក្ដីសម្រេចរបស់តុលាការ»។
សាលាក្រុងភ្នំពេញ បានសម្រេចជួលកោះពេជ្រនេះ ទំហំជាង១០០ហិកតារ ឲ្យទៅក្រុមហ៊ុនឯកជនមួយ ឈ្មោះ OCIC ក្នុងតម្លៃ ៦៣ដុល្លារអាមេរិក ក្នុង១ម៉ែត្ររការ៉េ សម្រាប់រយៈពេល៩៩ឆ្នាំ។
កោះពេជ្រនេះ នៅក្នុងសង្កាត់ទន្លេបាសាក់ ខណ្ឌចំការមន ក្រុងភ្នំពេញ។ បច្ចុប្បន្នក្លាយជាមជ្ឈមណ្ឌលពាណិជ្ជកម្ម និងកន្លែងកម្សាន្តដ៏ទំនើប៕