មេ​បញ្ជាការ​​ខ្មែរ​ចាត់​វិធានការ​ការពារ​ការណ៍​សម្ងាត់​យោធា​នៅ​ក្បែរ​ប្រាសាទ​ព្រះវិហារ

មេបញ្ជាការ​កងយោធា​ខ្មែរ​ដែល​គ្រប់គ្រង​តំបន់​ប្រឈម​មុខ​ដាក់​គ្នា​ដោយ​អាវុធ​ជិត​ប្រាសាទ​ព្រះវិហារ កាល​ពី​ថ្ងៃ​ពុធ ទី​៨ តុលា បាន​រៀបចំ​ផែនការ​ឲ្យ​សមត្ថកិច្ច​ប្រមូល​យក​ស៊ីម (SIM) ទូរស័ព្ទ​ចល័ត​របស់​ក្រុមហ៊ុន​ថៃ​ដែល​ពលរដ្ឋ​ខ្មែរ​នៅ​តំបន់​នោះ​កំពុង​ប្រើប្រាស់​មក​រក្សា​ទុក​មួយ​រយៈ​ដើម្បី​រក្សា​ការណ៍​សម្ងាត់​ផ្នែក​យោធា​ដែល​អាច​ថា មាន​អ្នក​ខ្លះ​ក្នុង​ចំណោម​អ្នក​ប្រើប្រាស់ ផ្ដល់​ព័ត៌មាន​ទៅ​ឲ្យ​ប្រទេស​ថៃ។

0:00 / 0:00

តាម​មន្រ្តី​យោធា​ខ្មែរ​មួយ​រូប​ប្រចាំ​ទិស​ជាំក្សាន្ដ​ដែល​សុំ​មិន​បញ្ចេញ​ឈ្មោះ បាន​មាន​ប្រសាសន៍​ឲ្យ​ដឹង​កាល​ពី​ព្រឹក​ថ្ងៃ​ពុធ​ថា មេបញ្ជាការ​ខ្មែរ​ដែល​កំពុង​គ្រប់គ្រង​តំបន់​ប្រឈម​មុខ​ដាក់​គ្នា​ដោយ​យោធា​នោះ បាន​មាន​វិធានការ​ឲ្យ​ប្រមូល​យក​ស៊ីម​ទូរស័ព្ទ​ចល័ត​របស់​ក្រុមហ៊ុន​ថៃ ពី​ប្រជាពលរដ្ឋ​ណា​ដែល​កំពុង​ប្រើប្រាស់​ដែល​មិន​មាន​ការចាំបាច់។

មន្រ្តី​ដដែល​បាន​មាន​ប្រសាសន៍​ទៀត​ថា ក្នុង​ចំណោម​អ្នក​ប្រើប្រាស់​ស៊ីម​ទូរស័ព្ទ​ថៃ អាច​មាន​អ្នក​ខ្លះ​ផ្ដល់​ព័ត៌មាន​ពី​យោធា​ខ្មែរ​ទៅ​ឲ្យ​ថៃ ដែល​ប៉ះពាល់​ដល់​ការណ៍​សម្ងាត់​របស់​យោធា ៖ «លោក​មេ​បញ្ជាការ​សមរភូមិ គាត់​មាន​វិធានការ​ឲ្យ​យក​របស់​សៀម ដែល​ប្រើប្រាស់​នៅ​លើ​ប្រាសាទ​ព្រះវិហារ​ទាំង​អស់ ដែល​គ្មាន​ការ​ចាំបាច់។ អាហ្នឹង​ជា​ការងារ​មួយ​ដែល​ត្រូវ​តែ​ប្រុង​ប្រយ័ត្ន ព្រួយ​បារម្ភ​ទាក់ទង​ទៅ​នឹង​ការងារ​សម្ងាត់​របស់​កងទ័ព​យើង នៅ​តំបន់​ប្រាសាទ ដូចជា​ជួរមុខ​នៅ​តាម​បណ្ដោយ​ព្រំដែន។ នេះ​ជា​រឿង​ប្រទេស​ជាតិ បើ​គិត​ទៅ​ជា​រឿង​សំខាន់​បំផុត»

ទោះ​យ៉ាង​ណា​កាល​ពី​ថ្ងៃ​ពុធ ប្រជាពលរដ្ឋ​ខ្លះ​ដែល​កំពុង​រស់នៅ​ជិត​ប្រាសាទ​ព្រះវិហារ ហើយ​កំពុង​ប្រើប្រាស់​ស៊ីម​ទូរស័ព្ទ​ចល័ត​របស់​ថៃ បាន​សម្ដែង​ការ​មិន​សប្បាយ​ចិត្ត​ដោយ​មិន​ចំហ​ចំពោះ​ការហាម​ឃាត់​ប្រើប្រាស់​នោះ។

បើ​តាម​ប្រជាពលរដ្ឋ​បាន​បង្ហើប​ឲ្យ​ដឹង​ថា នៅ​ភូមិ​ខាង​មុខ​ប្រាសាទ​ព្រះវិហារ មាន​អ្នក​ប្រើប្រាស់​ស៊ីម​ទូរស័ព្ទ​ចល័ត​របស់​ថៃ ប្រភេទ DTAC, 1-2-call និង GSM ប្រមាណ​ជាង ៧០​នាក់ ដែល​ភាគ​ច្រើន​ជា​ស្រ្តី​ក្មេងៗ។

ការប្រើប្រាស់​ស៊ីម​ទូរស័ព្ទ​ចល័ត​របស់​ក្រុមហ៊ុន​ថៃ គឺ​ដោយសារ​តំបន់​ពួក​គេ​កំពុង​រស់នៅ​គ្មាន​សេវា​ទូរស័ព្ទ​ចល័ត​របស់​ប្រទេស​ខ្មែរ​ទេ។

ផែនការ​ប្រមូល​យក​ស៊ីម​ទូរស័ព្ទ​ចល័ត​របស់​ក្រុមហ៊ុន​ថៃ​នោះ បាន​ធ្វើ​ឡើង​នៅ​ស្រប​ពេល​ដែល​កងទ័ព​ខ្មែរ​ជិត​តំបន់​ប្រាសាទ​ព្រះវិហារ​បាន​បង្កើន​ការប្រុង​ប្រយ័ត្ន​ផ្នែក​យោធា​បន្ថែម​ទៀត បន្ទាប់​ពី​មាន​ស្ថានការណ៍​ទាហាន​ថៃ នៅ​តែ​ប៉ុនប៉ង​ដណ្ដើម​យក​តំបន់​ព្រលាន​ឥន្រ្ទី​ចម្ងាយ​ជាង ៣​គីឡូម៉ែត្រ ភាគ​ខាង​លិច​ពី​ប្រាសាទ​ព្រះវិហារ។

តាម​មេបញ្ជាការ​វរៈ​៤៣១ ចំណុះ​ឲ្យ​កងពល​ថ្មើរ​ជើង​លេខ​៤៣ លោក​វរសេនីយ៍​ទោ នូ សារ៉ាត់ បាន​មាន​ប្រសាសន៍​ថា រហូត​មក​ដល់​ថ្ងៃ​ពុធ ស្ថានការណ៍​នៅ​ឯ​ព្រលាន​ឥន្រ្ទី ថ្វីត្បិត​តែ​ស្ងៀមស្ងាត់ ប៉ុន្តែ​ស្ថិត​នៅ​ក្នុង​សភាព​តឹងតែង ដោយ​កង​ទាហាន​ខ្មែរ នៅ​តែ​បញ្ជា​ឲ្យ​មាន​ការប្រុង​ប្រយ័ត្ន​គ្រប់​ម៉ោង។

លោក​វរសេនីយ៍​ទោ នូ សារ៉ាត់ មាន​ប្រសាសន៍​ថា ៖ «តាំង​ពី​ថ្ងៃ​មុន មក​ដល់​ថ្ងៃ​នេះ នៅ​ក្នុង​ចំណុច​ឈរ​ជើង យើង​តែងតែ​រៀបចំ​ការ​ការពារ​ភូមិសាស្រ្ត​ហ្នឹង​ឲ្យ​បាន។ យើង​អត់​មាន​លូកលាន់​ទេ យើង​នៅ​ត្រឹម​ណា​នៅ​ត្រឹម​ហ្នឹង ការពារ។ ជា​គោល​គំនិត​របស់​គេ គេ​ត្រូវ​ក្ដោប​អាហ្នឹង​ឲ្យ​បាន​ដូច​ខ្ញុំ​ប្រាប់​ថ្ងៃ​មុន​អ៊ីចឹង។ ស្ថានភាព​ជុំវិញ​ហ្នឹង តឹងតែង​ណាស់»

សូម​រំឭក​ថា ចាប់តាំង​តែ​ពី​ថ្ងៃ​ទី​៣ ខែ​តុលា ទាហាន​ឈុត​ខ្មៅ​របស់​ថៃ​បាន​ចូល​មក​លុកលុយ​តំបន់​នោះ ដោយ​ព្យាយាម​បណ្ដេញ​ឲ្យ​ទាហាន​ខ្មែរ​ចាក​ចេញ​និង​មាន​ការប៉ះ​ទង្គិច​គ្នា​ដោយ​អាវុធ​បណ្ដាល​ឲ្យ​ទាហាន​ខ្មែរ​ម្នាក់​និង​ទាហាន​ថៃ​២​នាក់​រង​របួស។ ហើយ​ជា​លើក​ទី​២ កាល​ពី​ថ្ងៃ​ទី​៦ ខែ​តុលា មាន​ការអះអាង​ថា ទាហាន​ថៃ​បាន​ព្យាយាម​ជម្រុល​ចូល​ទៅ​តំបន់​នោះ​ម្ដង​ទៀត បណ្ដាល​ឲ្យ​ផ្ទុះ​មីន​ចំនួន ២​គ្រាប់ រង​របួស​ទាហាន​ថៃ ២​នាក់​ទៀត​ផង៕