មេធាវីការពារក្តីឲ្យលោក សោម ឯក ដែលរងការចោទប្រកាន់ថា បានប្រព្រឹត្តអំពើភេរវកម្មចំនួន ២លើកមិនបានសម្រេចកាលពីឆ្នាំ២០០៧ និងឆ្នាំ២០០៩ កន្លងទៅនោះ នៅក្នុងទីក្រុងភ្នំពេញ បានឲ្យដឹងថា លោកបានដាក់ពាក្យបណ្ដឹងទៅតុលាការសាលាឧទ្ធរណ៍រួចហើយ កាលពីថ្ងៃទី១៣ ខែតុលា ថ្មីៗនេះ ដើម្បីប្ដឹងទាស់នឹងសាលក្រមរបស់តុលាការក្រុងភ្នំពេញ ដែលបានកាត់ទោសឲ្យកូនក្ដីរបស់លោកជាប់គុក ១៨ឆ្នាំ ដោយគ្មានភស្តុតាង។
បច្ចុប្បន្នជនជាប់ចោទរូបនេះកំពុងតែជាប់ឃុំខ្លួននៅក្នុងគុក ប៉េហ្ស៊ី (PJ) របស់ប៉ូលិស នៅក្នុងទីក្រុងភ្នំពេញ។
មេធាវីរបស់លោក សោម ឯក គឺលោក អ៊ឹម សុជាតិ ដែលបានការពារសំណុំរឿងទី១ បានមានប្រសាសន៍ប្រាប់វិទ្យុអាស៊ីសេរីនៅថ្ងៃទី១៤ ខែតុលាថា លោកនិងកូនក្ដីរបស់លោកមិនអាចទទួលយកបានទេនូវសាលក្រមរបស់តុលាការក្រុងភ្នំពេញកន្លងមកនេះ។
លោក អ៊ឹម សុជាតិ បន្ថែមថា ៖ «ផ្ដន្ទាទោសលើកូនក្ដីរបស់ខ្ញុំមិនទាន់មានភាពយុត្តិធម៌ដល់កូនក្ដីរបស់ខ្ញុំ។ ទើបបានទទួលលេខសាលក្រមពីម្សិលមិញ (១៣ តុលា) ហើយក៏ដាក់ប្ដឹងឧទ្ធរណ៍ម្សិលមិញតែម្ដងទៅ»។
មេធាវីម្នាក់ទៀតរបស់លោក សោម ឯក គឺលោក សំ សុគង់ ដែលបានការពារក្ដីសំណុំរឿងទី២ បានមានប្រសាសន៍ថា ៖ «លោក សោម ឯក មានរឿងពីរ ហើយគាត់ប្ដឹងឧទ្ធរណ៍ទាំងពីរ ហើយអ្នកផ្សេងៗគាត់មានរឿងតែមួយ គាត់ប្ដឹងឧទ្ធរណ៍ដែរ»។
កាលពីថ្ងៃទី១ ខែតុលា កន្លងទៅនេះ តុលាការក្រុងភ្នំពេញ បានកាត់ទោសឲ្យលោក សោម ឯក ជាប់គុករយៈពេល ២៨ឆ្នាំ ក្រោមបទចោទថា លោកមានការពាក់ព័ន្ធនៅក្នុងអំពើភេរវកម្ម បង្កៃគ្រឿងផ្ទុះចំនួន ៣គ្រាប់ នៅក្នុងទីក្រុងភ្នំពេញ កាលពីថ្ងៃទី២ ខែមករា ឆ្នាំ២០០៩ និងបានកេណ្ឌក្រុមភេរវជន និងបណ្ដុះបណ្ដាលនៅចន្លោះឆ្នាំ២០០៥ និងឆ្នាំ២០០៩។ សំណុំរឿងនេះបានការពារក្តីដោយលោក សំ សុគង់។
ជនជាប់ចោទចំនួន ៣នាក់ទៀត មានលោក ពៅ វណ្ណរ៉ា លោក ជា គឹមយ៉ា និងលោក ទ្បឹក ប៊ុនញៀន ត្រូវបានតុលាការក្រុងភ្នំពេញ បានកាត់ទោសឲ្យជាប់គុកម្នាក់ៗ ២០ឆ្នាំ។ ប៉ុន្តែតុលាការនេះបានលើកលែងការចោទប្រកាន់ និងដោះលែងលោក ភី សាវឹង ឲ្យមានសេរីភាព ដោយសារតែគ្មានភស្តុតាង។
ជនជាប់ចោទលោក សោម ឯក ដដែល បានរងការកាត់ទោសដោយតុលាការក្រុងភ្នំពេញក្នុងមួយករណីផ្សេងទៀត កាលពីថ្ងៃទី២២ ខែកញ្ញា ឲ្យជាប់គុក ១៨ឆ្នាំ ក្រោមបទចោទថា លោកជាមេខ្លោងនៃចលនារណសិរ្សរួបរួមជាតិ ឬកងទ័ពខេមរជាតិ រូបសញ្ញា ក្បាលខ្លា ដែលបានបង្កៃគ្រឿងផ្ទុះកាលពីថ្ងៃទី២៩ ខែកក្កដា ឆ្នាំ២០០៧ ដើម្បីបំផ្លាញស្តូបមិត្តភាពកម្ពុជា-វៀតណាម នៅក្នុងទីក្រុងភ្នំពេញ ប៉ុន្តែមិនបានសម្រេច។ សំណុំរឿងនេះបានការពារក្តីដោយលោក អ៊ឹម សុជាតិ។
សរុបមកទោសចំនួន ២ករណីខាងលើនេះ គឺលោក សោម ឯក ត្រូវជាប់គុកចំនួន ៤៦ឆ្នាំ។
ជនជាប់ចោទ លោក សោម ឯក កន្លងមកបានប្រាប់អ្នកសែតក្រោយពីការកាត់ទោសនោះថា ពួកលោក មិនបានប្រព្រឹត្តអំពើភេរវកម្មដូចការចោទប្រកាន់នោះទេ គឺជារឿងទម្លាក់កំហុស និងចោទប្រកាន់ខុសការពិត ដោយសារអាជ្ញាធរនគរបាលកម្ពុជា និងតុលាការ៕