ក្នុងអត្ថបទចុះផ្សាយក្នុងទំព័រវ៉ឹបសាយនៃអង្គការ UNESCO កាលពីថ្ងៃ១០ ខែកញ្ញា បានឲ្យដឹងថា សំណុំឯកសារសំខាន់ៗនៅក្នុងមន្ទីរស-២១ ឬគុកទួលស្លែង នៃរបបកម្ពុជាប្រជាធិបតេយ្យខ្មែរក្រហម ក្នុងអំឡុងពីឆ្នាំ១៩៧៥ ដល់ ១៩៧៩ រួមមានសំណុំឯកសាររបស់អ្នកជាប់ទោសជាង១ម៉ឺន៥ពាន់នាក់ ឯកសារចម្លើយសារភាពចំនួន៤១៨៦ករណីរបស់អ្នកទោសពេលធ្វើទារុណកម្ម ប្រវត្តិរូបរបស់អ្នកទោសជាង៦០០០នាក់ រូបថតអ្នកទោសរាប់ម៉ឺនសន្លឹក របាយការណ៍នៃសកម្មភាពស្រាវជ្រាវ អគារសាលារៀន ដែលរុះរើធ្វើជាកន្លែងដាក់ឃុំខ្លួនអ្នកទោស ព្រមទាំងរូបថតអ្នកទេសចរណ៍ដែលមកទស្សនានៅសារមន្ទីរគុកទួលស្លែងនេះផងដែរ។
ប្រភពដដែលបន្តថា ដោយសារតែបុគ្គលិកខ្មែរមានការខ្វះខាតនូវជំនាញបច្ចេកទេសនិងការចាត់ចែងអភិរក្សនៅសារមន្ទីរគុកទួលស្លែង ការិយាល័យអង្គការយូណេស្កូនៅក្រុងភ្នំពេញ ដោយមានសហការជាមួយគណៈកម្មការជាតិកម្ពុជាសម្រាប់អង្គការយូណេស្កូនិងសារមន្ទីរជាតិនឹងរៀបចំជាសិក្ខាសាលា៤ថ្ងៃចាប់ពីថ្ងៃ១៤ ខែកញ្ញា ដល់ថ្ងៃ១៧ ខែកញ្ញា ឆ្នាំ២០០៩ខាងមុខនេះ ដល់បុគ្គលិកខ្មែរប្រមាណជា៣០នាក់។
ក្នុងសិក្ខាសាលានេះ បុគ្គលិកទាំងនោះនឹងរៀនហ្វឹកហ្វឺនអំពីការថែរក្សាកិច្ចគាំពារពីការចេះពន្យល់បង្ហាញនូវសំណុំឯកសារប្រវត្តិសាស្ត្រទាំងនោះ ហើយទៅថ្ងៃអនាគតបុគ្គលិកទាំង៣០នាក់នោះនឹងក្លាយជាសមាជិករបស់គណៈកម្មាធិការពិភពលោកនៃការចងចាំថ្នាក់ជាតិទៀតផង៕