ធនាគារពិភពលោកព្យាករណ៍ថាសេដ្ឋកិច្ចកម្ពុជានឹងមានកំណើនជិន៤ភាគរយនៅក្នុងឆ្នាំ២០២១ ខាងមុខ ដោយសារតែមាន សញ្ញាជាច្រើនបង្ហាញថាសកម្មភាពសេដ្ឋកិច្ចកំពុងកម្រើកឡើងវិញ។
របាយការណ៍បច្ចុប្បន្នភាពសេដ្ឋកិច្ចកម្ពុជាចេញផ្សាយនៅថ្ងៃទី១៦ ខែធ្នូ ដោយធនាគារពិភពលោកគូសបញ្ជាក់ថា សេដ្ឋកិច្ចរបស់កម្ពុជាបន្តរងគ្រោះដោយសារឥទ្ធិពលនៃការរាតត្បាតជំងឺកូវីដ-១៩ បណ្ដាលឲ្យរួញទំហំប្រមាណដក២ភាគរយ (-២%)ក្នុងឆ្នាំ២០២០នេះ ប៉ុន្តែក៏ត្រូវបានគេមើលឃើញថា នៅពេលវិធានការរក្សាសុវត្ថិភាពសង្គមបានធូរស្រាលបន្តិច សកម្មភាពសេដ្ឋកិច្ចក្នុងស្រុក នឹងវិលទៅរកប្រក្រតីភាពបន្តិចម្តងៗ វិញ។
ធនាគារពិភពលោករំពឹងថា សេដ្ឋកិច្ចកម្ពុជានឹងលូតលាស់ក្នុងឆ្នាំ២០២១ នោះ ដោយសំអាងហេតុផលមួយចំនួន ដែលរួមមាន៖ វិធានការរដ្ឋាភិបាលដែលបានទ្រទ្រង់ផ្នែកប្រើប្រាស់ឱ្យនៅស្ថិតស្ថេរ គ្រប់គ្រងបាននូវអតិផរណា ការបន្តកើនឡើងលំហូរនៃការវិនិយោគផ្ទាល់ពីបរទេសក្នុងគម្រោងក្រៅឧស្សាហកម្មកាត់ដេរ និងវិស័យកសិកម្ម។ ធនាគារនេះកត់សម្គាល់ដែរថា នៅពេលដែលផលិតផលវាយនភណ្ឌ និងកាត់ដេរបានរងការប៉ះទង្គិចពីជំងឺកូវីដ-១៩ ក៏នៅតែមានការនាំចេញផលិតផលផ្សេងៗ រួមមាន កង់, គ្រឿងផ្គុំអគ្គិសនី និងគ្រឿងបន្លាស់រថយន្ត និងគ្រឿងផ្សំនានា ហើយការនាំចេញអង្ករ និងផលិតផលកសិកម្មផ្សេងទៀតនៅមានសន្ទុះខ្លាំងក្លា។ ជាមួយគ្នានេះទេសចរណ៍ក្នុងស្រុកបានជួយមួយផ្នែកក្នុងការធ្វើឱ្យឧស្សាហកម្មទេសចរណ៍ និងការធ្វើដំណើរ កម្រើកឡើងវិញដែរ។
បើទោះជាយ៉ាងណា លោកស្រី អ៊ីងហ្គូណា ដូប្រាចា (Inguna Dobraja) នាយិកាគ្រប់គ្រងប្រចាំប្រទេសរបស់ធនាគារពិភពលោក មានប្រសាសន៍ថា៖ ចក្ខុវិស័យកំណើនរបស់កម្ពុជានៅប្រឈមនឹងភាពមិនប្រាកដប្រជាច្រើនណាស់។
ករណីនេះធនាគារពិភពលោកស្នើឱ្យបង្កើនការវិនិយោគសាធារណៈដែលជួយដល់ជនក្រីក្រ និងកម្មវិធីជំរុញកំណើននានា តាមដានឱ្យបានដិតដល់ភាពងាយរងគ្រោះផ្នែកសេដ្ឋកិច្ចពីវិស័យសំណង់ និងអចលនទ្រព្យ។ ធនាគារពិភពលោកថាការបាត់បង់ចំណូលនៅតែមានទំហំធំធេងនៅឡើយ បើទោះជាការធ្លាក់ចុះចំណូលគ្រួសារថយល្បឿនបន្តិចវិញក្រោយពីរដ្ឋាភិបាលបានដាក់ចេញកម្មវិធីថ្មីមួយសម្រាប់ផ្ទេរសាច់ប្រាក់ទៅជួយគ្រួសារក្រីក្រ និងងាយរងគ្រោះ។
កាលពីខែឧសភាកន្លងទៅ ធនាគារពិភពលោកព្យាករថា ពលរដ្ឋខ្មែរជិត ២លាននាក់បន្ថែមទៀត នឹងធ្លាក់ខ្លួនក្រីក្រ ដោយសារវិបត្តិជំងឺរាតត្បាតជាសាកលកូវីដ១៩ (Covid-19) ក្នុងឆ្នាំ២០២០ នេះ។ ស្ថាប័ននេះព្រមានថា ការអភិវឌ្ឍរបស់កម្ពុជាក្នុងរយៈពេល ៣០ឆ្នាំកន្លងមកនេះ ត្រូវរងការគំរាមកំហែងខ្លាំងបំផុត ហើយជំរុញឱ្យកម្ពុជាងាកទៅខ្ចីបុល បរទេសបន្ថែមទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។