ជនភៀសខ្លួននិងពលករខ្មែរមួយចំនួននៅប្រទេសថៃគ្រោងធ្វើយុទ្ធនាការទាមទាររដ្ឋាភិបាលកម្ពុជាឱ្យអន្តរាគមន៍ទៅធនាគារ និងស្ថាប័នមីក្រូហិរញ្ញវត្ថុឱ្យពន្យារពេលពលរដ្ឋសងប្រាក់រយៈពេលមួយឆ្នាំ។ ពួកគេលើកឡើងថា សព្វថ្ងៃនេះពលរដ្ឋជួបវិបត្តិសេដ្ឋកិច្ចធ្ងន់ធ្ងរពុំមានលទ្ធភាពរកប្រាក់សងធនាគារបានឡើយ។
ជនភៀសខ្លួនខ្មែរនិងពលករនៅប្រទេសថៃគ្រោងធ្វើយុទ្ធនាការនេះ ចាប់ពីថ្ងៃទី៧ វិច្ឆិកាតទៅ ដោយថ្ងៃដំបូងពួកគេនឹងប្រមូលផ្ដុំគ្នាប្រមាណ៥០ នាក់ សម្ដែងមតិនៅសួនសាធារណៈមួយកន្លែងនៅទីក្រុងបាងកក (Bangkok) ហើយបង្ហោះសារតាមបណ្ដាញសង្គមហ្វេសប៊ុក (Facebook)។
មន្ត្រីគណបក្សប្រឆាំង ដែលកំពុងភៀសខ្លួននៅប្រទេសថៃ លោក ខឹម មុន្នីកុសល ប្រាប់វិទ្យុអាស៊ីសេរីនៅថ្ងៃទី៦ វិច្ឆិកាថា គោលបំណងនៃការជួបជុំគ្នានេះ ដើម្បីធ្វើយុទ្ធនាការទាមទារឱ្យរដ្ឋាភិបាលអន្តរាគមន៍ទៅស្ថាប័នមីក្រូហិរញ្ញវត្ថុពន្យារពេលឱ្យពលរដ្ឋសងប្រាក់ត្រឡប់រយៈពេលមួយឆ្នាំ។លោកបញ្ជាក់ថា អ្នកចូលរួមនឹងឡើងបង្ហាញពីមតិទុក្ខកង្វល់របស់ខ្លួននៅក្នុងប្រទេសថៃផង និងពីក្រុមគ្រួសារនៅកម្ពុជាផង។
លោក ខឹម មុន្នីកុសល៖ «ដោយសារតែបំណុលធនាគារនឹងហើយបានធ្វើពលរដ្ឋចាកឆ្ងាយពីប្រទេស ដើម្បីមករកការងារធ្វើ។ ហើយឥឡូវនេះលក្ខខណ្ឌការងារក៏វាពិបាក ហើយពួកកាត់ជំពាក់បំណុលកាន់តែកើនឡើង ដីធ្លីស្រែចម្ការនឹងក៏បានបង់ជាបណ្ដើរៗ ទៅទៀត។ ដូច្នេះហើយ នៅក្នុងស្ថានភាពសេដ្ឋកិច្ចលំបាកលំបិនបែបនេះពលករក៏ដូចជាពលរដ្ឋខ្មែរនឹង គឺច្បាស់ជាមិនមានលទ្ធភាពសងបំណុលធនាគារទេ»។
ស្រដៀងគ្នានេះដែរ ពលករខ្មែរធ្វើការនៅប្រទេសថៃ ដែលគ្រោងចូលរួមធ្វើយុទ្ធនាការនេះ លោក ប៉ែន ប៊ុនថន ថ្លែងថា ស្ថានភាពជីវភាពពលរដ្ឋសព្វថ្ងៃនេះជួបវិបត្តិសេដ្ឋកិច្ចធ្ងន់ធ្ងរ ហើយពុំមានលទ្ធផលរកប្រាក់សងធនាគារបាននោះទេ ដូច្នេះហើយទើបលោកចូលរួមទាមទារឱ្យរដ្ឋាភិបាលជួយអន្តរាគមន៍ទៅស្ថាប័នមីក្រូហិរញ្ញវត្ថុ។
លោក ប៉ែន ប៊ុនថន៖ «ធនាគារនៅតែឱ្យពលរដ្ឋបង់ប្រាក់បន្តរហូត គាត់អត់មានអនុគ្រោះឱ្យ ឬបន្ធូរបន្ថយក្នុងរយៈពេលមួយរយៈឬយ៉ាងណា គឺអត់មានវិធានការកន្លែងនឹងទេ ហើយណាមួយរដ្ឋាភិបាល ក៏គាត់មិនឃើញអើពើជូនដល់ពលរដ្ឋ ដែលរងគ្រោះនឹងផង។ កន្លែងហ្នឹងហើយ ដែលធ្វើឱ្យពួកខ្ញុំ ដែលមានចិត្តអាណិតដល់ប្រជាពលរដ្ឋ ហើយខ្ញុំ ក៏ជាប្រជាពលរដ្ឋម្នាក់ ដែលបានរងគ្រោះរឿងជំពាក់ប្រាក់ធនាគារនឹង»។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងសេដ្ឋកិច្ចនិងហិរញ្ញវត្ថុ លោក មាស សុខសេនសាន ដើម្បីសុំអត្ថាធិប្បាយជុំវិញបញ្ហានេះបានទេនៅថ្ងៃទី៦ វិច្ឆិកា។
ប៉ុន្តែអ្នកនាំពាក្យគណបក្សកាន់អំណាច លោក សុខ ឥសាន ប្រាប់វិទ្យុអាស៊ីសេរីថា បញ្ហានេះកន្លងមកអតីតនាយករដ្ឋមន្ត្រីលោក ហ៊ុន សែន បានអំពាវនាវឱ្យស្ថាប័នពាក់ព័ន្ធដោះស្រាយបញ្ហានេះរួចហើយ។ លោកបញ្ជាក់ថា ការសុំពន្យារពេលសងប្រាក់ធនាគាររយៈពេល ១ឆ្នាំមិនអាចទៅរួចនោះទេ ព្រោះនឹងធ្វើឱ្យប៉ះពាល់ធ្ងន់ធ្ងរដល់ការរកស៊ីរបស់ស្ថាប័នមីក្រូហិរញ្ញវត្ថុ។
លោក សុខ ឥសាន៖ «អាហ្នឹងវាត្រូវតែសងហើយ ពីព្រោះយើងធ្វើកិច្ចសន្យាខ្ចីគេ ក៏ប៉ុន្តែវិបត្តិនឹងមិនមែនតែវិបត្តិតែបងប្អូនពលរដ្ឋទូទៅទេ វាវិបត្តិទាំងធនាគារទៅទៀត។ អីចឹងបានឱ្យភាគីពាក់ព័ន្ធនឹងត្រូវពិភាក្សាគ្នារកច្រកដោះស្រាយ តាមនយោបាយឈ្នះឈ្នះដូចដែលសម្ដេច ហ៊ុន សែន លោកធ្លាប់តែអនុវត្តគោលការណ៍ឈ្នះឈ្នះនឹងឯង ហើយបើឱ្យយកឈ្នះតែ ម្ខាងឱ្យម្ខាងលិចលង់យ៉ាងម៉េចនឹងកើតអានឹង»។
ទោះជាយ៉ាងណាមន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបាត់ដំបង និងខេត្តប៉ៃលិន លោក យិន ម៉េងលី មានប្រសាសន៍ថា បញ្ហានេះរដ្ឋាភិបាលគួរតែដោះស្រាយតាមសំណើរបស់ពលរដ្ឋ ដូចប្រទេសជិតខាង ដែលជួយអន្តរាគមន៍ទៅធនាគារឱ្យពន្យារពេលពលរដ្ឋសងប្រាក់ត្រឡប់រយៈពេល ៣ឆ្នាំ។
លោក យិន ម៉េងលី៖ «យើងប្រៀបធៀបថា ហេតុអីបានជារដ្ឋាភិបាលប្រទេសថៃថ្មីឡើងមក គេមានគោលនយោបាយភ្លាម ពាក់ព័ន្ធនឹងបញ្ហាសេដ្ឋកិច្ចដោយសារគាត់នៅទីនោះ គាត់មើលឃើញ ហើយលើកយកមក ហើយរដ្ឋាភិបាលខ្មែរថា ទេ!មិនអាចធ្វើបានទេ មិនដឹងគេធ្វើរបៀបយ៉ាងម៉េច?យើងមើលប្រទេសជិតខាង តើគេធ្វើរៀបម៉េច។ យើងជារដ្ឋាភិបាលមួយថ្មីដែរ ជាប្រទេសមានអធិបតេយ្យភាពដែរ ហេតុអីយើងធ្វើមិនបាន។ អ៊ីចឹង យើងខំប្រឹងមើលចំណុចណាខ្លះ ដែលរដ្ឋាភិបាលយើងធ្វើមិនបាន បើដូចគេទាំងស្រុងទេ ឱ្យវាប្រហាក់ប្រហែលគ្នា វា ៧០ ទៅ ៨០ភាគរយអ៊ីចឹងទៅបាទ»។
មួយរយៈពេលចុងក្រោយនេះកម្មករនៅតាមរោងចក្រប្រឈមនឹងបំណុលវ័ណ្ឌក។ចំណែក ប្រជាពលរដ្ឋ អាជីវករ និងអតិថិជនទិញផ្ទះបុរី វិញមានចំនួនកាន់តែច្រើនឡើងៗបានជួបបញ្ហាសេដ្ឋកិច្ចគ្មានប្រាក់សងធនាគារ ហើយក្លាយជាជនរងគ្រោះនៃអត្រាការប្រាក់កើនឡើងខ្ពស់ជាប្រចាំ។ បន្ថែមពីនេះមានពលរដ្ឋខ្លះត្រូវបានបុគ្គលិកស្ថាប័នមីក្រូហិរញ្ញវត្ថុមួយចំនួនបង្ខំឱ្យលក់ផ្ទះនិងដីយកប្រាក់សង់បំណុលក៏មានដែរ។
មន្ត្រីសង្គមស៊ីវិលលើកឡើងថា បញ្ហានេះប្រសិនបើរដ្ឋាភិបាលមិនជួយអន្តរាគមន៍ដល់ពលរដ្ឋតាមការស្នើសុំទេនោះ អាចនឹងកើតមានវិបត្តិសង្គមធ្ងន់ធ្ងរនៅថ្ងៃខាងមុខដោយសារពលរដ្ឋធ្វើចំណាកស្រុកទៅក្រៅប្រទេសកាន់តែច្រើនដើម្បីរកប្រាក់សងធនាគារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។