សមាគម​គ្រូបង្រៀន​កម្ពុជា​ឯករាជ្យ​ស្នើ​រដ្ឋាភិបាល​ដំឡើង​ប្រាក់ខែ​ដល់​គ្រូបង្រៀន

0:00 / 0:00

សមាគម​គ្រូបង្រៀន​កម្ពុជា​ឯករាជ្យ​ស្នើ​រដ្ឋាភិបាល​ដំឡើង​ប្រាក់ខែ​ដល់​គ្រូបង្រៀន​ឱ្យ​បាន ៣​លាន​រៀល​ក្នុង​មួយ​ខែ ដើម្បី​ឱ្យ​ជីវភាព​គ្រូបង្រៀន​ប្រសើរ​ឡើង និង​ធ្វើ​ឱ្យ​ការ​បង្រៀន​មាន​ប្រសិទ្ធភាព។

សមាគម​គ្រូបង្រៀន​កម្ពុជា​ឯករាជ្យ នៅ​ព្រឹក​ថ្ងៃទី៧ តុលា បាន​ដាក់​ញត្តិ​ទៅ​កាន់​រដ្ឋសភា​ខុទ្ទកាល័យ​នាយករដ្ឋមន្ត្រី និង​ក្រសួង​អប់រំ យុវជន និង​កីឡា ដើម្បី​ទាមទារ​ដំឡើង​ប្រាក់ខែ​គ្រូបង្រៀន​ឱ្យ​បាន ១​ភាគ​៤ នៃ​ប្រាក់ខែ​តំណាងរាស្ត្រ ឬ​ប្រមាណ ៧​រយ​ដុល្លារ​អាមេរិក​ក្នុង​មួយ​ខែ​ទើប​អាច​ឱ្យ​គ្រូ​បង្រៀន​មាន​ជីវភាព​សមរម្យ។

ប្រធាន​សមាគម​គ្រូបង្រៀន​កម្ពុជា​ឯករាជ្យ អ្នកស្រី អ៊ុក ឆាយ៉ាវី លើកឡើង​ថា គ្រូបង្រៀន​មាន​តួនាទី​ស្នូល​ក្នុង​ការបង្កើត និង​ពង្រឹង​ធនធានមនុស្ស ប៉ុន្តែ​ពួកគាត់​នៅតែ​មាន​ជីវភាព​ខ្វះខាត​ដែល​ទាមទារ​ឱ្យ​រដ្ឋាភិបាល​យកចិត្តទុកដាក់​ជា​បន្ទាន់។ អ្នកស្រី​ថា ស្ថានភាព​មាន​វិបត្តិ​សេដ្ឋកិច្ច​នា​ពេល​បច្ចុប្បន្ន​នេះ​បាន​ធ្វើ​ឱ្យ​ទំនិញ​គ្រប់មុខ​លើ​ទីផ្សារ មានតម្លៃ​ខ្ពស់​ឆ្ងាយ​ជាង​ប្រាក់ខែ ដែល​គ្រូ​បង្រៀន​ទទួល​បាន​ប្រមាណ​ពី ១​លាន ទៅ ២​លាន​រៀល។

អ្នកស្រី អ៊ុក ឆាយ៉ាវី ថា ការ​ស្នើសុំ​ដំឡើង​ប្រាក់ខែ​គ្រូបង្រៀន​នេះ​ធ្វើឡើង​ជាច្រើន​ឆ្នាំ​មក​ហើយ ប៉ុន្តែ​រដ្ឋាភិបាល​នៅតែ​មិន​អើពើ​នឹង​ការ​ស្នើសុំ​របស់​គ្រូបង្រៀន​នោះ​ទេ។ អ្នកស្រី​ថា កាលណា​ជីវភាព​គ្រូបង្រៀន​នៅ​មិនទាន់​ល្អ​ប្រសើរ​ទេ គឺ​ធ្វើ​ឱ្យ​គ្រូបង្រៀន​មួយចំនួន​បង្ខំចិត្ត​ធ្វើ​ការងារ​ក្រៅ​ម៉ោង​បន្ថែម​ដែល​នាំ​ឱ្យ​ប៉ះពាល់​ដល់​ម៉ោង​ការងារ គុណភាព​អប់រំ និង​ប៉ះពាល់​កិត្តិយស របស់​គ្រូ​បង្រៀន។

អ្នកស្រី អ៊ុក ឆាយ៉ាវី៖ «ហើយ​យើង​មើល​ថា សូម្បី​សព្វថ្ងៃ អ្នក​ដែល​មាន​ធនធាន​ល្មមៗ ក៏​គាត់​មិនអាច​ឱ្យ​កូន​គាត់​មក​រៀន​នៅ​សាលា​រដ្ឋ​ដែរ គាត់​សុខចិត្ត​ឱ្យ​កូន​គាត់​រៀន​នៅ​សាលា​ឯកជន ហ្នឹងហើយ​យើង​ឃើញ​កត្តា​ទាំងអស់​ហ្នឹងហើយ​ដែល​ធ្វើ​ឱ្យ​ពួកគាត់​ជា​គ្រូបង្រៀន​ហ្នឹង​មាន​ពេលវេលា​ក្នុង​ការ​ស្រាវជ្រាវ ដើម្បី​នឹង​ជួយ​ជំរុញ​ធនធានមនុស្ស​ជា​យុវជន​បន្តវេន»។

អ្នកស្រី អ៊ុក ឆាយ៉ាវី ថា មន្ត្រី​របស់​ក្រសួង​អប់រំ រដ្ឋសភា ខុទ្ទកាល័យ​នាយករដ្ឋមន្ត្រី​ចេញ​មក​ទទួល​ញត្តិ ប៉ុន្តែ​ពួកគាត់​មិនបាន​បញ្ជាក់​ថា នឹង​ឆ្លើយតប​ការ​ស្នើ​សុំ​នេះ​បែប​ណា​នោះ​ទេ។

ចំណែក​គ្រូបង្រៀន​នៅ​សាលា​គរុកោសល្យ និង​វិក្រឹត្យការ​ខេត្តសៀមរាប លោក ហ៊ី សម្បត្តិ លើកឡើង​ថា ប្រាក់ខែ​របស់​លោក​ទទួល​បាន​ចំនួន ២​លាន​រៀល ដែល​ជា​ចំនួន​តិចតួច ហើយ​លោក​ថា ចំនួន​ប្រាក់ខែ​មាន​ទាប​ជាង​តម្រូវការ​ជាក់ស្ដែង​រួមមាន​អាហារ​បរិភោគ​ប្រចាំថ្ងៃ ផ្គត់ផ្គង់​ការ​ការ​សិក្សា​ដល់​កូនៗ និង​តម្រូវ​ការចាំបាច់​ផ្សេងទៀត​។ លោក​ទទូច​ដល់​រដ្ឋាភិបាល​ពិចារណា​គិតដល់​ជីវភាព​គ្រូបង្រៀន​ដែល​ប្រៀប​ដូចជា ការ​គិត​ដល់​ធនធាន​មនុស្ស​ដែរ។

លោក ហ៊ី សម្បត្តិ៖ «ប្រហែលជា​៧​ទៅ​៨​រយ​អីហ្នឹង​ជួយ​ឱ្យ​ជីវភាព​គ្រូបង្រៀន​ប្រសើរ​ឡើង ហើយ​ពេលនោះ​គួរ​បង្រៀន​អីហ្នឹង​កាត់បន្ថយ​ឱ្យ​អស់ អ៊ីចឹង​សព្វថ្ងៃ​ការ​បង្រៀន​គួរ​នៅតែ​មាន​តើ យើង​មិន​ឱ្យ​បង្រៀន​គួរ​នៅក្នុង​សាលា គេ​បង្រៀន​គួរ​នៅ​ក្រៅ​សាលា​ក្បែរៗ​ផ្ទះ អ៊ីចឹង​វា​ជា​បញ្ហា​មួយ​ប៉ះពាល់​ទៅដល់​កុមារ ប៉ះពាល់​ទៅដល់​ឪពុកម្ដាយ​សិស្ស​មួយចំនួន​ដែរ សម្រាប់​កូន​អ្នក​ដែល​ខ្វះខាត​ហ្នឹង​គឺ​នៅ​មាន​បញ្ហា​នៅឡើយ»។

ទាក់ទិន​បញ្ហា​នេះ​វិទ្យុ​អាស៊ីសេរី​មិន​អាច​ទាក់ទង​អ្នកនាំពាក្យ​ក្រសួង​អប់រំ យុវជន និង​កីឡា អ្នកស្រី ឃួន វិច្ឆិកា និង​អ្នកនាំពាក្យ​នាយករដ្ឋមន្ត្រី លោក មាស សោភ័ណ្ឌ ដើម្បី​សុំ​ការ​អត្ថាធិប្បាយ​ជុំវិញ​រឿង​នេះ​បាន​ទេ នៅ​ថ្ងៃ​ទី​៧ ខែ​តុលា។

សមាគម​គ្រូបង្រៀន​កម្ពុជា​ឯករាជ្យ និង​លោកគ្រូ​អ្នកគ្រូ​មកពី​តាម​បណ្ដា​ខេត្ត​ប្រមាណ​២០០​នាក់ កាលពី​ថ្ងៃទី​០៥ ខែតុលា បាន​ប្រារព្ធ​ទិវា​គ្រូបង្រៀន​ពិភពលោក​នៅ​ទីស្នាក់ការ​សមាគម​គ្រូបង្រៀន​កម្ពុជា​ឯករាជ្យ​ស្ថិតនៅ​ខណ្ឌមានជ័យ រាជធានី​ភ្នំពេញ​ដើម្បី​លើកឡើង​ពី​ក្ដី​កង្វល់​របស់​គ្រូបង្រៀន និង​ការចូលរួម​លើកកម្ពស់​ក្របខ័ណ្ឌ​ការងារ​ជា​គ្រូបង្រៀន​ជាដើម។ ពួកគាត់​ជំរុញ​ភាគី​ពាក់ព័ន្ធ​គ្រប់​ស្ថាប័ន​យកចិត្តទុកដាក់​ដោះស្រាយ​បញ្ហា​របស់​គ្រូបង្រៀន និង​បើក​លំហ​សិទ្ធិ​សេរីភាព​ឱ្យ​បាន​ពេញលេញ ខណៈ​បញ្ហា​ប្រាក់ខែ​ទាប​បាន​ជំរុញ​គ្រូបង្រៀន​មួយ​ចំនួន​ទៀត​ឆ្លៀតពេល​ទៅ​រក​ការងារ​ក្រៅ​ម៉ោង​ដូចជា បង្រៀន​គួរ​ក្រៅ​ម៉ោង និង​រត់​ម៉ូតូឌុប​ដើម្បី​យក​ប្រាក់​ផ្គត់ផ្គង់​ជីវភាព​ក្នុង​គ្រួសារ​នៅតែ​បន្ត​កើតមាន​ដែល​បញ្ហា​នេះ​ពួកគាត់​ថា​ធ្វើ​ឱ្យ​ប៉ះពាល់​ដល់​គុណភាព​នៃ​ការ​អប់រំ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។