ប្រជាពលរដ្ឋនៅក្រុងប៉ោយប៉ែត ខេត្តបន្ទាយមានជ័យកាន់តែច្រើនឡើង បាននាំគ្នាដើររើសអេតចាយលក់យកប្រាក់ដោះស្រាយជីវភាពប្រចាំថ្ងៃ ដោយសារគ្មានការងារធ្វើ បណ្ដាលមកពីការរាតត្បាតជំងឺកូវីដ១៩។ ក្នុងស្ថានភាពនេះ គេសង្កេតឃើញមានកុមារនៅក្នុងគ្រួសារខ្លះមានមុខមាត់ស្លេកស្លាំងដោយសារហូបអាហារមិនគ្រប់គ្រាន់។
ប្រជាពលរដ្ឋនៅក្រុងប៉ោយប៉ែតលើកឡើងស្រដៀងគ្នាថា ជីវភាពរបស់ពួកគាត់កាន់តែដុនដាបខ្លាំង ហើយអ្នកខ្លះស្ទើរតែគ្មានអង្ករច្រកឆ្នាំង ដោយសារមួយរយៈពេលនេះ មានអ្នកដើររើសអេតចាយកាន់តែច្រើនឡើង ដែលធ្វើឱ្យពិបាកដល់ការរកប្រាក់ចំណូលប្រចាំថ្ងៃ។
ប្រជាពលរដ្ឋរស់នៅភូមិព្រៃព្រិច សង្កាត់ប៉ោយប៉ែត លោកស្រី កង វត្តី រៀបរាប់ប្រាប់អាស៊ីសេរីថា គ្រួសាររបស់លោកស្រីដើររើសអេតចាយបានប្រាក់កាន់តែតិចទៅ ដោយសារអ្នកប្រកបរបរមួយនេះកើនឡើងច្រើនស្ទើរទ្វេដង។ បច្ចុប្បន្នគ្រួសារលោកស្រីដើររើសអេតចាយពេញមួយយប់ ហើយលក់បានប្រាក់ប្រមាណ ១ម៉ឺន ៥ពាន់រៀល (១៥.០០០) ប៉ុណ្ណោះ។ ស្ត្រីវ័យ ៤២ឆ្នាំ រូបនេះប្រាប់ថា ប្រាក់ចំនួននេះមិនគ្រប់សម្រាប់ប្រើប្រាស់ប្រចាំថ្ងៃនោះទេ។ បញ្ហានេះបានប៉ះពាល់យ៉ាងខ្លាំងដល់ជីវភាពរស់នៅប្រចាំថ្ងៃរបស់លោកស្រីធ្វើឱ្យគ្មានអាហារហូបចុកគ្រប់គ្រាន់ ជាពិសេសសម្រាប់កូនតូចៗ ដែលបណ្ដាលឱ្យប៉ះពាល់ដល់ការលូតលាស់របស់ពួកគេ៖ «ទើបតែម៉ាកូវីដហ្នឹងទេ ស្គាល់ជាតិលំបាកខ្លាំងហ្មង ថាដកដង្ហើមលែងចង់ចេញ។ ដេកមើលមុខកូនចង់យំដែរហ្នឹង អាសូរកូនដែរហ្នឹងពេលព្រឹកឡើងគ្នាទារលុយទិញទឹកដោះគោមួយដបមួយពាន់។ គ្មានលុយឱ្យ កូនចង់យំ ហើយប្ដីទៅរកដល់ភ្លឺបានគ្នាមក ហើយមកដល់គ្នាគ្មានអីហូបចូលទៅដេក បានជ្រែអេតចាយហើយយកទៅលក់ទៅគ្រាន់បានទិញបាយទិញអង្ករដាំទៅ»។
គ្រួសារនេះមានសមាជិក ៤នាក់ ក្នុងនោះកុមារតូច ២នាក់ គឺក្មេងអាយុជាង ២ឆ្នាំម្នាក់ និងទារកអាយុជិត ២ខែម្នាក់។ លោកស្រី កង វត្តី និយាយថា កូនរបស់លោកស្រីទាំង ២នាក់នេះ មានសភាពស្គមស្លេកស្លាំង ជាពិសេស ទារកដែលទើបកើតមិនមានការលូតលាស់ទេ ដោយសារលោកស្រីហូបអាហារមិនគ្រប់គ្រាន់ ធ្វើឱ្យមិនមានទឹកដោះបំបៅកូន និងគ្មានប្រាក់ទិញទឹកដោះគោ និងចំណីឱ្យកូនញ៉ាំ។ លោកស្រីព្រួយបារម្ភខ្លាចបញ្ហានេះធ្វើឱ្យពាល់ដល់សតិបញ្ញា និងការធំលូតលាស់របស់កូននៅពេលខាងមុខ៖ «ដល់ហើយទៅកូនវាស្វិតទៅៗ វាអត់លូតលាស់ និយាយរួមទៅលំបាកណាស់ លុយតែមួយម៉ឺនលំបាកណាស់មិនដឹងថាមុខអីខ្លះទេ យើងលៃសព្វបែបយ៉ាងហើយកូនខ្ញុំ អាយុ ២ឆ្នាំនោះវានៅបៅអាទឹកដោះគោ ចុះលក់មួយថ្ងៃចាយមួយថ្ងៃទុកដល់ស្អែកមិនបានផង។ និយាយរួមទៅគាត់អាណិតកូនអាណិតប្រពន្ធបើគាត់មិនរើសអត់មានអីហូបដល់អីចឹងទៅ ចេះតែតស៊ូទៅ។ ខ្ញុំប្រាប់គាត់ដែរបើយើងអស់កម្លាំងយើងដេកទៅ តែគាត់ចេះតែទៅទាំងឈឺទាំងជាទាំងហាលភ្លៀងហាលខ្យល់ចេះតែទៅ ដើម្បីកូនដើម្បីប្រពន្ធ»។
គ្រួសារមួយនេះដើររើសអេតចាយជិតមួយឆ្នាំមកហើយ ពោលគឺចាប់តាំងពីអាជ្ញាធរកម្ពុជា និងថៃបិទច្រកទ្វារព្រំដែនប្រទេសទាំង២រហូតមក។ បច្ចុប្បន្ន នៅក្រុងប៉ោយប៉ែត មានប្រជាពលរដ្ឋប្រមាណ ៣០០នាក់ដើររើសអេតចាយលក់យកប្រាក់ដោះស្រាយជីវភាពប្រចាំថ្ងៃ។
ស្រដៀងគ្នានេះដែរ ពលរដ្ឋរស់នៅសង្កាត់ប៉ោយប៉ែតម្នាក់ទៀត គឺលោកស្រី សៅ ធាវី ថ្លែងថា គ្រួសារលោកស្រីមានសមាជិក ៤នាក់ បានដើររើសអេតចាយជិតមួយឆ្នាំមកហើយ ដោយសារអត់ការងារធ្វើ បណ្ដាលមកពីអាជ្ញាធរកម្ពុជា និងថៃបិទច្រកទ្វារព្រំដែនអន្តរជាតិប៉ោយប៉ែត។ លោកស្រីប្រាប់ថា គ្រួសារលោកស្រីទាំង ៤នាក់ ដើររើសអេតចាយពេញមួយយប់ លក់បានប្រាក់ប្រមាណ ២ម៉ឺនរៀល។ ស្ត្រីវ័យ ៣០ឆ្នាំប្លាយរូបនេះ ព្រួយបារម្ភខ្លាចនៅថ្ងៃណាមួយមានសមាជិកក្នុងគ្រួសារ ជាពលរដ្ឋនៅភូមិព្រៃព្រិច សង្កាត់ប៉ោយប៉ែត ដើររើសអេតចាយលក់យកប្រាក់ដោះស្រាយជីវភាពគ្រួសារ។
ប្រជាពលរដ្ឋទាំងនោះអះអាងថា បើទោះជាពួកគាត់ជួបការលំបាកយ៉ាងនេះក្ដី ក៏អាជ្ញាធរពាក់ព័ន្ធមិនសូវអើពើជួយដល់ពួកគាត់ដែរ ពោលគឺចាប់តាំងពីបិទច្រកទ្វារអន្តរជាតិប៉ោយប៉ែតមក អាជ្ញាធរទើបតែផ្ដល់អង្ករ ១០គីឡូក្រាម ទឹកស៊ីអ៊ីវ ទឹកត្រី និងមីកញ្ចប់បន្តិចបន្តួចឱ្យពួកគាត់បានម្ដងប៉ុណ្ណោះ។
អាស៊ីសេរីមិនទាចទាក់ទងអភិបាលក្រុងប៉ោយប៉ែត លោក គាត ហ៊ុល និងអភិបាលខេត្តបន្ទាយមានជ័យ លោក អ៊ុំ រាត្រី ដើម្បីសុំអត្ថាធិប្បាយជុំវិញបញ្ហានេះបានទេនៅថ្ងៃទី១៤មីនា ដោយទូរស័ព្ទចូលជាច្រើនដងពុំមានអ្នកទទួល។
អាជ្ញាធរកម្ពុជា និងថៃបានបិទច្រកទ្វារព្រំដែនប្រទេសទាំងពីរកាលពីខែមីនា ឆ្នាំ២០២០ រហូតមក ដើម្បីទប់ស្កាត់ការរាតត្បាតជំងឺកូវីដ១៩ ហើយមកទល់ពេលនេះមិនទាន់បើកដំណើរឡើងវិញនៅឡើយទេ។
ការបិទច្រកព្រំដែនកម្ពុជាថៃ បានប៉ះពាល់យ៉ាងខ្លាំងដល់ជីវភាពរស់នៅរបស់ប្រជាពលរដ្ឋរស់នៅតំបន់ព្រំដែន ធ្វើឱ្យពួកគាត់បាត់បង់ប្រាក់ចំណូលទាំងស្រុង ដោយសារគ្មានការងារធ្វើ។
កាលពីមិនទាន់មានជំងឺកូវីដ១៩ ក្រុមប្រជាពលរដ្ឋទាំងនោះ ប្រកបរបរអូសរទេះ និងស៊ីឈ្នួលលីសែងនៅតំបន់ព្រំដែនកម្ពុជាថៃ។ កន្លងទៅ ពួកគាត់អាចរកប្រាក់ចំណូលបានប្រហែលពី ៦ម៉ឺន ទៅ ១០ម៉ឺនរៀល ក្នុងមួយថ្ងៃ ដែលអាចចិញ្ចឹមជីវភាពគ្រួសារបាន ដោយមិនលំបាកដូចបច្ចុប្បន្ននោះទេ។
ប្រជាពលរដ្ឋទាំងនោះអះអាងថា បើទោះជាពួកគាត់ជួបការលំបាកយ៉ាងនេះក្ដី ក៏អាជ្ញាធរពាក់ព័ន្ធមិនសូវអើពើជួយដល់ពួកគាត់ដែរ ពោលគឺចាប់តាំងពីបិទច្រកទ្វារអន្តរជាតិប៉ោយប៉ែតមក អាជ្ញាធរទើបតែផ្ដល់អង្ករ ១០គីឡូក្រាម ទឹកស៊ីអ៊ីវ ទឹកត្រី និងមីកញ្ចប់បន្តិចបន្តួចឱ្យពួកគាត់បានម្ដងប៉ុណ្ណោះ។
អាស៊ីសេរីមិនទាចទាក់ទងអភិបាលក្រុងប៉ោយប៉ែត លោក គាត ហ៊ុល និងអភិបាលខេត្តបន្ទាយមានជ័យ លោក អ៊ុំ រាត្រី ដើម្បីសុំអត្ថាធិប្បាយជុំវិញបញ្ហានេះបានទេ នៅថ្ងៃទី១៤ មីនា ដោយទូរស័ព្ទចូលជាច្រើនដងពុំមានអ្នកទទួល។
ប៉ុន្តែចៅសង្កាត់ប៉ោយប៉ែត លោក ភោគ លន់ ប្រាប់អាស៊ីសេរីយ៉ាងខ្លីថា លោកពុំទាន់ទទួលព័ត៌មានជុំវិញពីទុក្ខលំបាករបស់ពលរដ្ឋទាំងនោះនៅឡើយទេ៖ «មិនមានប្រជាពលរដ្ឋណាប្រឈមនឹងការអត់បាយមិនទាន់មានទេ ព្រោះអីតែខ្វះខាតអីមេភូមិរាយការណ៍មកខ្ញុំហើយ ខ្ញុំចុះទៅមើលហើយ។ហ្នឹងអត់អីទេ ដល់មានបញ្ហាអីឱ្យបងប្អូនប្រជាពលរដ្ឋរាយការណ៍ទៅមេភូមិ ហើយមេភូមិរាយការណ៍មកខ្ញុំ និងទៅក្រុងដោះស្រាយអត់អីទេ»។
ទោះជាយ៉ាងណាប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជា លោក ឌិន ពុទ្ធី មានប្រសាសន៍ថា ពលរដ្ឋនៅក្រុងប៉ោយប៉ែតមានជីវភាពខ្វះខាតស្ទើរគ្រប់ផ្នែក ហើយសូម្បីតែអាជីវករខ្មែរមានតូបលក់ដូរនៅផ្សាររ៉ុងក្លឿ ប្រទេសថៃខ្លះ ក៏ដើររើសអេតចាយលក់យកប្រាក់ដោះស្រាយជីវភាពដែរ។ លោកកត់សំគាល់ទៀតថា កន្លងទៅពលរដ្ឋទាំងនោះភាគច្រើន មិនបានទទួល ស្បៀងអាហារអ្វីពីអាជ្ញាធរឡើយ។ លោកអះអាងថា អាជ្ញាធរតែងតែចែកអំណោយប្រកាន់បក្សពួក ដោយចែកឱ្យតែក្រុមដែលគាំទ្រគណបក្សកាន់អំណាច និងសាច់ញាតិរបស់អាជ្ញាធរមូលដ្ឋាន ចំណែកពលរដ្ឋក្រីក្រដែលគាំទ្រគណបក្សប្រឆាំង និងអ្នកដែលធ្លាប់ចូលរួមតវ៉ាទាមទារឱ្យមានយុត្តិធម៌សង្គមកន្លងទៅ អាជ្ញាធរមិនបានចែកអំណោយដល់ពួកគាត់ឡើយ៖ «ខ្ញុំស្នើសុំឱ្យរដ្ឋាភិបាលជួយស្រង់អ្នកក្រីក្រពិតប្រាកដជាពិសេសអ្នករើសអេតចាយកម្មករអូសរទេះហ្នឹង ជួយពួកគាត់ជាអាទិភាពមុនគេ ព្រោះពួកគាត់ហ្នឹងខ្វះខាតធ្ងន់ធ្ងរមែនទែន។ មិនបាច់ចាំមានសៀវភៅគ្រួសារអត្តសញ្ញាណប័ណ្ណ អ្នកខ្លះទៅស្រង់គ្នាទាល់តែមានសៀវភៅគ្រួសារមានអត្តសញ្ញាណប័ណ្ណអីច្បាស់លាស់ បើគ្នារកតែបាយហូបមិនបានផង ឯកសារសៀវភៅគ្រួសារធ្វើមិនបានទៀត។ ជួនកាលដាក់ស្នើទៅធ្វើហ្នឹង អស់លុយច្រើនទៀត។ អីចឹងយើងកុំផ្ដោតទៅលើឯកសារពេក ផ្ដោតទៅលើជីវភាពជាក់ស្ដែងរបស់ពួកគាត់ ហើយហ្នឹងស្ថានភាពរស់នៅរបស់ពួកគាត់ជាក់ស្ដែង»។
អាជ្ញាធរកម្ពុជា និងថៃបានបិទច្រកទ្វារព្រំដែនប្រទេសទាំងពីរកាលពីខែមីនា ឆ្នាំ២០២០ រហូតមក ដើម្បីទប់ស្កាត់ការរាតត្បាតជំងឺកូវីដ១៩ ហើយមកទល់ពេលនេះមិនទាន់បើកដំណើរឡើងវិញនៅឡើយទេ។ ការបិទច្រកព្រំដែនកម្ពុជាថៃ បានប៉ះពាល់យ៉ាងខ្លាំងដល់ជីវភាពរស់នៅរបស់ប្រជាពលរដ្ឋរស់នៅតំបន់ព្រំដែន ធ្វើឱ្យពួកគាត់បាត់បង់ប្រាក់ចំណូលទាំងស្រុង ដោយសារគ្មានការងារធ្វើ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។