កម្មករ​រោងចក្រ ស្តារឡៃថ៍ នៅ​ខេត្ត​កណ្ដាល​បន្ត​ការ​តវ៉ា​ឱ្យ​ថៅកែ​ប្ដូរ​អ្នក​គ្រប់គ្រង​ថ្មី

0:00 / 0:00

កម្មករ​រោងចក្រ​កាត់​ដេរ​សំលៀក​បំពាក់ ស្តារឡៃថ៍ អឹភែរឹល មេនូហ្វេកឆឺរីង (Starlight Apparel Manufacturing) ឃុំ​វិហារសួគ៌ ស្រុក​ខ្សាច់​កណ្ដាល ខេត្ត​កណ្ដាល ជាង ៣ពាន់​នាក់​បន្ត​ប្រមូល​ផ្ដុំ​គ្នា​តវ៉ា​នៅ​ខាង​មុខ​រោងចក្រ នៅ​ថ្ងៃ​ទី ១៣មិថុនា ទាមទារ​ឱ្យ​ថៅកែ​ដក​អ្នក​គ្រប់គ្រង​ថ្មី​ចេញ​ពី​រោងចក្រ ដែល​បាន​បញ្ឈប់​កម្មករ និង​ព្យួរ​ការងារ​ពួកគេ​ទាំង​គ្មាន​កំហុស។ មន្ត្រី​សង្គម​ស៊ីវិល​យល់​ឃើញ​ថា អាជ្ញាធរ​គួរតែ​ពន្លឿន​ការ​ដោះស្រាយ​កុំ​ពន្យារ​រហូត​ធ្វើ​ឱ្យ​កម្មករ​ជួប​ជីវភាព​ខ្វះខាត។

ក្រុម​កម្មករ​រោងចក្រ​កាត់​ដេរ ប្រមាណ ៣ពាន់​នាក់ លើក​ឡើង​ថា រយៈ​ពេល​ជិត ១ឆ្នាំ​មក​នេះ ក្រុម​កម្មករ​ជា​ច្រើន​នាក់​បាន​បង្ខំ​ដាក់​ពាក្យ​លាឈប់ និង​ប្រឈម​នឹង​បញ្ហា​សុខភាព​ដោយសារ​តែ អ្នក​គ្រប់គ្រង​ថ្មី​បង្កើត​ច្បាប់​ក្នុង​រោងចក្រ​គាបសង្កត់​ឱ្យ​ក្រុម​កម្មករ​ធ្វើ​ការ​លើស​កម្លាំង ហើយ​កម្មករ​ដែល​ធ្វើ​មិន​បាន​តាម​ការ​កំណត់​នោះ នឹង​ត្រូវ​កាត់​ប្រាក់ខែ។ ក្រុម​កម្មករ​សោកស្ដាយ​ដែល​ថៅកែ​រោងចក្រ​គ្មាន​វិធានការណ៍​ដោះស្រាយ​បញ្ហា​នេះ​ដែល​ធ្វើ​ឱ្យ​កម្មករ​ជា​ច្រើន​នាក់​បាត់បង់​ការងារ។

កម្មករ​រោងចក្រ ស្តារឡៃថ៍ លោកស្រី រស់ ហន ប្រាប់​វិទ្យុ​អាស៊ី​សេរី​ថា អ្នក​គ្រប់គ្រង​ថ្មី ២នាក់ លោក ស៊ុន វាសនា និង​លោក ម៉េង សុជាតិ បាន​ដាក់​សម្ពាធ​ឱ្យ​លោកស្រី​ធ្វើ​ការ​ដេរ​ខោអាវ​ច្រើន​ក្នុង​មួយៗ ថ្ងៃ ប៉ុន្តែ​មិន​បន្ថែម​ប្រាក់​ឈ្នួល​ឱ្យ​ឡើយ។ ផ្ទុយ​ទៅ​វិញ លោកស្រី​ថា ប្រសិន​បើ​កម្មករ​ធ្វើ​ការ​មិន​បាន​ដូច​ការ​កំណត់​របស់​អ្នក​គ្រប់គ្រង​ទេ​នោះ ពួក​គាត់​នឹង​ត្រូវ​កាត់​ប្រាក់ខែ ហើយ​បង្ខំ​ឱ្យ​ផ្តិល​មេដៃ​ព្យួរ​ការងារ។

លោកស្រី រស់ ហន៖ « ខ្ញុំ​គ្រាន់តែ​ចង់​តែ​រឿង​ហ្នឹង ចង់​ដឹង​តែ​ថា​ពួកគាត់​យក​មេដៃ​ពួក​ខ្ញុំ​យក​ទៅ​ធ្វើ​អី​ឱ្យ​ប្រាប់​ឱ្យ​ច្បាស់​មក គាត់​និយាយ​ថា​យក​មេដៃ​ពួក​ខ្ញុំ​ទៅ​ព្យួរ​ការងារ ១ខែ ឬ​ក៏ ២ខែ​ឱ្យ​ច្បាស់​ថា​គាត់​និយាយ​អ៊ីចឹង​មក ឬ​មួយ​ក៏​បញ្ឈប់​ពួក​ខ្ញុំ ក៏​បញ្ឈប់​ទៅ​ឱ្យ​ច្បាស់ អ៊ីចឹង​បាន​ពួក​ខ្ញុំ​នៅ​តែ​ទទូច​ដដែលៗ ចង់​ឱ្យ​គាត់​ឆ្លើយ​ឱ្យ​ច្បាស់​មក​ថា ឥឡូវ​ខាង​ក្រុមហ៊ុន​យក​មេ​ដៃ​កម្មករ​ទាំង​គ្នា​យក​ទៅ​ព្យួរ​ឈ្មោះ ១ខែ ឬ​ក៏ ២ខែ​ពួក​ខ្ញុំ​ចង់​ដឹង​តែ​អ៊ីចឹង​ទេ »

លោកស្រី រស់ ហន បន្ថែម​ថា លោក ស៊ុន វាសនា និង លោក ម៉េង សុជាតិ ប្រាប់​ឱ្យ​កម្មករ​ដែល​តវ៉ា​ទាំង​នោះ​ផ្តិល​មេដៃ​ប្រសិន​បើ​ចង់​ធ្វើ​ការងារ​បន្ត ប៉ុន្តែ ក្រុម​កម្មករ​មិន​យល់​ព្រម​ឡើយ ដោយសារ​តែ​នៅ​ក្នុង​ច្បាប់​ស្ដីពី​ការងារ​ពុំ​មាន​ចែង​ឱ្យ​កម្មករ​ផ្ដិត​មេដៃ​ដើម្បី​ចូល​ធ្វើ​ការងារ​វិញ​នោះ​ទេ។

ស្រដៀង​គ្នា​នេះ​ដែរ អនុ​ប្រធាន​សហជីព​អំណាច​យុវជន​កម្ពុជា ប្រចាំ​ក្រុមហ៊ុន​ស្តារឡៃថ៏ លោក រស់ សំបូរ ថ្លែង​ថា អ្នក​គ្រប់គ្រង​ថ្មី​នោះ​ពួកគាត់​គ្រោង​ព្យួរ​ការងារ​កម្មករ​ជាង ៣ពាន់នាក់ ដោយសារ​តែ​កម្មករ​តវ៉ា​ទាមទារ​ឱ្យ​ថៅកែ​ប្ដូរ​ពួកគាត់​ចេញ​ពី​ការងារ ។ លោក​បន្ត​ថា លោក ម៉េង សុជាតិ បាន​គំរាម​ថ្នាក់​ដឹកនាំ​សហជីព និង​កម្មករ​ថា នឹង​មាន​វិធាន​ការ​ច្បាប់​ប្រសិន​ជា​កម្មករ​មិន​ឈប់​ធ្វើ​កូដកម្ម​នោះ​ទេ។ លោក បញ្ជាក់​ថា​នៅ​ក្នុង​ថ្ងៃ​ដដែល​នេះ​អភិបាល​ខេត្ត​កណ្ដាល លោក គង់ សោភ័ណ្ឌ ចុះ​មក​ជួយ​សម្រប​សម្រួល​ឱ្យ​ក្រុម​កម្មករ ក៏​ប៉ុន្តែ​ពុំ​ទាន់​មាន​ដំណោះស្រាយ​ណា​មួយ​ឡើយ។

លោក រស់ សំបូរ៖ « ប៉ះពាល់​បង​ពីព្រោះ​អី​កម្មករ​យើង​ជីវភាព​មិន​សូវ​ធូរធារ​ទេ៩៩ . ៩៩ភាគរយ​ពួកគាត់​ជំពាក់​បំណុល​ធនាគារ​អ៊ីចឹង​វា​ធ្វើ​ឱ្យ​ប៉ះពាល់​ជីវភាព​គ្រួសារ​ពួកគាត់​យ៉ាង​ធ្ងន់ធ្ងរ ហើយ​មាន​ប្រធាន​ភូមិ មេ​ឃុំ​ដើរ​ប្រាប់​កម្មករ​រោងចក្រ​ស្តារឡៃថ៍​តាម​ភូមិ​ហ្នឹង​អត់​ឱ្យ​ទៅ​ទេ​មិន​ឱ្យ​ទៅ​ទេ បើ​ទៅ​នឹង​មាន​ការ​ចាប់​ការ​ចង​ពី​អាជ្ញាធរ​នេះ​កម្មករ​ដែល​គ្រោង​ហែ​ញត្តិ​ទៅ​ដាក់​នៅ​រាជធានី​ភ្នំពេញ »

រោងចក្រ​នេះ​មាន​កម្មករ​ធ្វើ​ការ​សរុប​ជាង ៤ពាន់​នាក់ (៤.០៣១) ក្នុង​នោះ​ជាង ៣រយ​នាក់ កំពុង​ធ្វើ​ការ ហើយ​ជាង ៣០០នាក់ផ្សេង​ទៀត បាន​បញ្ឈប់​ពី​ការងារ និង ៧០០នាក់ កំពុង​ព្យួរ​ការងារ ព្រមទាំង​គ្រោង​ព្យួរ​ការងារ​កម្មករ​ជាង ៣ពាន់ នាក់​បន្ថែម​ទៀត ដោយសារ​ពួក​គេ​ចេញ​មុខ​តវ៉ា​ទាមទារ​សិទ្ធិ​ការងារ។ ក្រុម​កម្មករ​ព្រួយ​បារម្ភ ប្រសិនបើ​ប្រធាន​គ្រប់គ្រង​ទូទៅ លោក ម៉េង សុជាតិ ព្យួរ​ការងារ​កម្មករ​ជាង ៣ពាន់​បន្ត​ទៀត នោះ​រោងចក្រ​នឹង​ត្រូវ​បិទទ្វារ កម្មករ​ទាំង​អស់​ប្រឈម​នឹង​គ្មាន​ការងារ​ធ្វើ។

វិទ្យុ​អាស៊ីសេរី​មិន​អាច​ទាក់​ទង​ប្រធាន​រដ្ឋបាល​រោងចក្រ​កាត់​ដេរ​សំលៀកបំពាក់​ស្តារឡៃថ៏ លោក ស៊ុន វាសនា និង​អភិបាល​ខេត្ត​កណ្ដាល លោក គង់ សោភ័ណ្ឌ ដើម្បី​សុំ​អត្ថាធិប្បាយ​ជុំវិញ បញ្ហា​នេះ​បាន​នៅ​ទេ នៅថ្ងៃទី១៣ មិថុនា។

ជុំវិញ​រឿង​នេះ​អ្នក​នាំ​ពាក្យ​សមាគម​ការពារ​សិទ្ធិ​មនុស្ស អាដហុក (Adhoc) លោក ស៊ឹង សែនករុណា យល់​ឃើញ​ថា ការ​តវ៉ា​ទាមទារ​ឱ្យ​ថៅកែ​រោងចក្រ​ប្ដូរ​អ្នក​គ្រប់គ្រង២នាក់​ចេញ​ពី​ការងារ​គឺ​សិទ្ធិ​របស់​កម្មករ ហើយ​អាជ្ញាធរ​ពាក់ព័ន្ធ​គួរតែ​ជួយ​ដោះស្រាយ​បញ្ហា​នេះ​ឱ្យ​បាន​ឆាប់។ លោក​បន្ត​ថា​ប្រសិន​បើ​រក​ឃើញ​ថា​អ្នក​គ្រប់គ្រង​រោងចក្រ​ពិត​ជា​រំលោភ​សិទ្ធិ​ការងារ​លើ​កម្មករ​ភាគ​ច្រើន​ជា​ស្ត្រី ជាពិសេស​គឺ​ស្ត្រី​មាន​ផ្ទៃពោះ​នោះ អាជ្ញាធរ​គួរតែ​ដាក់​ទោស​ទាន់​តាម​ច្បាប់ ដើម្បី​ជា​ការ​ព្រមាន​កុំ​ឱ្យ​មាន​ការ​រំលោភ​សិទ្ធិ​ការងារ​កម្មករ​បែប​នេះ​ទៀត។

លោក ស៊ឹង សែនករុណា៖ « ស្ត្រី​ត្រូវ​បាន​ទាំង​នៅ​សកល​លោក​គេ​យក​ចិត្ត​ទុក​ដាក់​ណាស់​ក្នុង​ការ​ការពារ និង​លើក​ស្ទួយ​សិទ្ធិ​ស្ត្រី​ទាំងអស់​នេះ ហើយ​បើ​ការ​បំពារបំពាន​សិទ្ធិ​ពួក​គាត់​ក្នុង​លក្ខខណ្ឌ​នេះ​វា​ជា​សម្ពាធ​មួយ​ដែល​ធ្វើ​ឱ្យ​ប៉ះពាល់​ទៅ​ដល់​សិទ្ធិ​របស់​ពួកគាត់​ផង​ហើយ​ទាំង​ផ្នែក​សុខភាព​របស់​ពួកគាត់​ផង​ដែរ​ដូច្នេះ​ការ​បំពេញ​ការងារ​មិន​ត្រូវ​មាន​លក្ខខណ្ឌ​តឹងរ៉ឹង​បែប​នេះ​ទេ ការណ៍​ដែល​តឹងរ៉ឹង​បែប​នេះ​គឺជា​ការ​បំពាន​ទៅ​ដល់​សិទ្ធិ​ពួកគាត់ »

ក្រុម​កម្មករ​ស្នើ​ទៅ​ថៅកែ​រោងចក្រ​ចំនួន៩ចំណុច រួម​ទាំង កុំ​ព្យួរ​ការងារ​ស្ត្រី​មាន​ផ្ទៃពោះ និង​ថ្នាក់ដឹកនាំ​សហជីព ត្រូវ​ទូទាត់​ប្រាក់​សំណង​តាម​ច្បាប់​ស្ដីពី​ការងារ​រាល់​កម្មករ​ដែល​ព្យួរ និង​បញ្ឈប់ ព្រមទាំង​ស្នើ​ឱ្យ​ដក​ប្រធាន​គ្រប់គ្រង​ថ្មីទាំង២​នាក់​ចេញ​ជាដើម។ ក៏​ប៉ុន្តែ​ក្នុង​ចំណោម៩ចំណុច​ថៅកែ មិន​ព្រម​ដក គឺ លោក ស៊ុន វាសនា និង លោក ម៉េង សុជាតិ ចេញ​នោះ​ទេ។ ទោះ​ជា​យ៉ាង​ណា​ក្រុម​កម្មករ​អះអាង​ថា អ្នកគ្រប់គ្រង២នាក់នោះ អសមត្ថភាព​ដោះស្រាយ​បញ្ហា​ជូន​កម្មករ ដោយ​ធ្វើ​ឱ្យ​រោងចក្រ​គ្មាន​អ្នក​បញ្ជា​ទិញ ប្រឈម​នឹង​ការ​បិទ​ទ្វារ​រោងចក្រ និង​បង្ខំ​ឱ្យ​កម្មករ​ឱ្យ​ធ្វើ​ការ​លើស​កម្លាំង។

ក្រុម​កម្មករ​នៅ​តែ​រក្សា​ជំហរ​នឹង​បន្ត​ការ​តវ៉ា​ប្រសិន​បើ​ថៅកែ​រោងចក្រ​មិន​ព្រម​ដោះស្រាយ​វិវាទ​ការងារ​នេះ​ជូន​ពួកគាត់។ លើស​ពី​នេះ​ពួកគេ​នឹង​មិន​ចូល​ធ្វើ​វិញ​ជា​ដាច់​ខាត​ដរាប​ណា​ថៅកែ​មិន​ប្ដូរ​អ្នក​ដឹកនាំ​ថ្មី៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។