កម្មករ​រោងចក្រ​សំលៀក​បំពាក់ ស្តារឡៃថ៍ (Starlight) នៅ​ខេត្ត​កណ្ដាល​ផ្ទុះ​ការ​តវ៉ា​ក្រោយ​ថៅកែ​ព្យួរ​ការងារ​រយៈ​ពេល ២ខែ

0:00 / 0:00

កម្មករ​រោងចក្រ​សំលៀកបំពាក់ ស្តារឡៃថ៍ អឹភែរឹល មេនូហ្វេកឆឺរីង (Starlight Apparel Manufacturing Co., Ltd.) នៅ​ខេត្ត​កណ្ដាល ជិត ៣ពាន់​នាក់ នៅ​ថ្ងៃ​ទី១២ មិថុនា តវ៉ា​នៅ​មុន​រោងចក្រ​ទាមទារ​ឱ្យ​ថៅកែ​ទទួល​ពួកគេ​ចូល​ធ្វើ​ការងារ​វិញ ក្រោយ​ថៅកែ​ព្យួរ​ការងារ​រយៈ​ពេល ២ខែ និង​កេង​ចំណេញ​កម្លាំង​ពលកម្ម​លើ​កម្មករ។ អ្នក​ឃ្លាំ​មើល​សិទ្ធិ​ការងារ​យល់​ឃើញ​ថា ក្រសួង​ការងារ​គួរតែ​ចុះ​មក​ត្រួត​ពិនិត្យ​វិវាទ​ការងារ​នេះ​ឱ្យ​បាន​ម៉ត់ចត់ ដើម្បី​ដោះស្រាយ​ឱ្យ​បាន​ឆាប់។

កម្មករ​បម្រើ​ការ​នៅ​រោងចក្រ​កាត់​ដេរ ស្តារឡៃថ៍ អឹភែរឹល មេនូហ្វេតឆឺរីង ស្ថិត​នៅ​ភូមិ​សេដា ឃុំ​វិហារសួគ៌ ស្រុក​ខ្សាច់​កណ្ដាល ខេត្ត​កណ្ដាល ផ្ទុះ​ការ​តវ៉ា​នេះ គឺ​បន្ទាប់​ពី​ថៅកែ​រោងចក្រ​ព្យួរ​ការងារ​កម្មករ​ប្រមាណ ៣ពាន់​នាក់ រយៈ​ពេល ២ខែ​ក្រោយ​ពួក​គេ​ទាមទារ​លក្ខខណ្ឌ​ការងារ​សមរម្យ​ជូន​ក្រុម​កម្មករ ដែល​ភាគ​ច្រើន​ជា​ស្ត្រី។ ក្រុម​កម្មករ​អះអាង​ថា ពួកគេ​ទាមទារ​លក្ខខណ្ឌ​ការងារ ៩ចំណុច ដោយ​ស្នើ​ឱ្យ​ថ្នាក់​ដឹក​នាំ​សហជីព​ចូល​ធ្វើការ​វិញ កុំ​ព្យួរ​ការងារ​ស្ត្រី​មាន​ផ្ទៃពោះ និង​ទូទាត់​ប្រាក់​សំណង​ឱ្យ​ក្រុម​កម្មករ​តាម​ច្បាប់​ស្ដីពី​ការងារ ប្រសិន​បើ​មាន​ការ​បញ្ឈប់​កម្មករ និង​ស្នើ​ឱ្យ​ថៅកែ​រោងចក្រ​បញ្ឈប់​ប្រធាន​រដ្ឋបាល និង​ប្រធាន​គ្រប់គ្រង ២នាក់ ដោយសារ​ពួក​គេ​គាប​សង្កាត់​សិទ្ធិ​ក្រុម​កម្មករ។ រោងចក្រ​នេះ​មាន​កម្មករ​ធ្វើ​ការ​សរុប​ជាង ៤ពាន់នាក់ (៤.០៣១) ក្នុង​នោះ​ជាង ៣រយ​នាក់ កំពុង​ធ្វើ​ការ ហើយ​ជាង ៣០០នាក់​បាន​បញ្ឈប់​ពី​ការងារ និង ៧០០នាក់ កំពុង​ព្យួរ​ការងារ ព្រមទាំង​គ្រោង​បញ្ឈប់​កម្មករ ១៥០នាក់​បន្ថែម​ទៀត ដោយសារ​ពួកគេ​ចេញ​មុខ​តវ៉ា​ទាមទារ​សិទ្ធិ​ការងារ។

អនុ​ប្រធាន​សហជីព​អំណាច​យុវជន​កម្ពុជា ប្រចាំ​ក្រុមហ៊ុន​ស្តារឡៃថ៍ លោក រស់ សំបូរ ប្រាប់​វិទ្យុ​អាស៊ី​សេរី​ថា ការ​តវ៉ា​នេះ​គឺ​ទាមទារ​ឱ្យ​ថៅកែ​រោងចក្រ​ដក​ប្រធាន​រដ្ឋបាល លោក ស៊ុន វាសនា និង ប្រធាន​គ្រប់គ្រង​ទូទៅ លោក ម៉េង សុជាតិ ចេញ​ពី​រោងចក្រ ដោយសារ​ពួកគាត់​គាប​សង្កាត់​លើ​ក្រុម​កម្មករ​ដោយ មិន​បើក​ប្រាក់​បំណាច់​ឆ្នាំ​ដល់​កម្មករ និង​ដាក់​កំណត់​ចំនួន​ការងារ​បើ​មិន​ធ្វើ​តាម​ត្រូវ​កាត់​ប្រាក់​ជាដើម។ លោក​បន្ត​ថា ចាប់​តាំង​ពី​មាន​ប្រធាន​រដ្ឋបាល​ថ្មី​ចូល​មក មាន​កម្មករ​ជា​ច្រើន​នាក់​ត្រូវ​បញ្ឈប់​ទាំង​អយុត្តិធម៌ និង​កម្មករ​ខ្លះ​ទៀត​ត្រូវ​ព្យួរ​ការងារ​ដោយ​មិន​បញ្ជាក់​ប្រាប់​ពី​ហេតុផល​ឱ្យ​ច្បាស់លាស់។

លោក រស់ សំបូរ៖«សូម​ឱ្យ​អាជ្ញាធរ ដែល​ពាក់ព័ន្ធ​សូម​ឱ្យ​ឆាប់​មក​ដោះ​ស្រាយ​ឱ្យ​កម្មករ​ផង ព្រោះ​អី​អាណិត​ពួក​គាត់ ហាលថ្ងៃ​ហាល​ក្ដៅ​អត់​បាយ​អត់​ទឹក ដើម្បី​ទាមទារ​លក្ខខណ្ឌ​ការងារ​របស់​ពួកគាត់​ឱ្យ​វា​សមស្រប កន្លង​មក​ពួក​ខ្ញុំ ក៏​បាន​ថយ​មួយ​ជំហាន​ដែល ពួក​កម្មករ​អត់​ប្រកាន់​គោល​ជំហរ​ថា​ត្រូវ​តែ​ដក​ទេ​សូម​ឱ្យ​ថៅកែ​ហ្នឹង​ដាក់​អ្នក​គ្រប់គ្រង​ថ្មី​មក​ហើយ​តំណែង​ប្រធាន​រដ្ឋបាល​ពី​មុន​ហ្នឹង​ឱ្យ​គាត់​ចុះ​មក​ត្រឹម​ប្រធាន​រដ្ឋបាល​ហ្នឹង​មក​ប៉ុន្តែ​ខាង​គេ​គឺ​ប្រកាន់​គោល​ជំហរ​គឺ​មិន​ថយ»។

លោក រស់ សំបូរ បន្ថែម​ថា​នៅ​ថ្ងៃ​ដដែល​នេះ លោក និង​ក្រុម​កម្មករ​គ្រោង​នឹង​ឡើង​មក​ដាក់​ញត្តិ​នៅ​ក្រសួង​ការងារ និង​ខុទ្ទកាល័យ​នាយក​រដ្ឋមន្ត្រី ក៏​ប៉ុន្តែ​ត្រូវ​អាជ្ញាធរ​តាម​គំរាមកំហែង​ថា នឹង​មាន​បញ្ហា​ប្រសិន​បើ​ក្រុម​កម្មករ​នៅ​តែ​ទៅ​ដាក់​ញត្តិ​នៅ​នៅ​តាម​ក្រសួង​នៅ​រាជធានី​ភ្នំពេញ។

ស្រដៀង​គ្នា​នេះ​ដែរ​កម្មករ​រោងចក្រ​ម្នាក់​ទៀត លោកស្រី សាយ តាំងអ៊ីម ថ្លែង​ថា លោកស្រី​ធ្វើ​ការ​នៅ​រោងចក្រ​នេះ​រយៈ​ពេល ១០ឆ្នាំ មក​ហើយ លោកស្រី​មិន​ចង់​ទាមទារ​អ្វី​នោះ​ទេ គឺ​គ្រាន់​តែ​ស្នើ​ឱ្យ​ថៅកែ​រោងចក្រ​គោរព​សិទ្ធិ​ការងារ ជាពិសេស ស្ត្រី​មាន​ផ្ទៃ​ពោះ​សូម​កុំ​ឱ្យ​ពួក​គាត់​ធ្វើ​ការ​លើស​កម្លាំង។ លោកស្រី​បន្ត​ក្រុម​កម្មករ​បាន​ស្នើ​ទៅ​ថៅកែ​រោងចក្រ​ចំនួន ៩ចំណុច​នោះ មាន ៨ចំណុច​ថៅកែ​បាន​ព្រមព្រៀង​រួច​ហើយ ប៉ុន្តែ​នៅ​ចំណុច​ទី៩ ដែល​ក្រុម​កម្មករ​ស្នើ​ឱ្យ​ដក​ប្រធាន​រដ្ឋបាល​ចេញ​គឺ​ថៅកែ​មិន​ព្រម​នោះ​ទេ​ដូច្នេះ​បាន​ជា​ក្រុម​កម្មករ​ផ្ទុះ​ការ​តវ៉ា។

លោកស្រី សាយ តាំងអ៊ីម៖«ពិបាក​សព្វ​គ្រប់​បែប​យ៉ាង​ណា​ប្រាក់ខែ​អត់​បាន​ច្រើន​ដូច​ពី​មុន ហើយ​គាប​សង្កត់​ពួក​ខ្ញុំ ហើយ​ខ្ញុំ​ចំណាយ​ថ្លៃ​ផ្ទះ​ជួល​ផង ថ្លៃ​ហូប​ផង​អត់​គ្រាន់តែ​អ៊ីចឹង ខ្ញុំ​គ្រាន់តែ​សុំ​ប្ដូរ​អ្នក​ដឹកនាំ ពីព្រោះ​គាត់​ដឹក​នាំ​អត់​ល្អ អ៊ីចឹង​គាត់​នៅ​ធ្វើ​អី​ទៀត សម្រាប់​គាត់​អ្នក​មាន​គាត់​អត់​បញ្ហា​ទេ ប៉ុន្តែ​ប្រជាពលរដ្ឋ​ដែល​ក្រីក្រ​នេះ ដូច​ពួក​ខ្ញុំ​នេះ​មក​ធ្វើ​ការ ដើម្បី​ចង់​បាន​លុយ​ហើយ ចុះ​បើ​គាត់​កាត់​លុយ​គ្រប់​ពេល​បែប​យ៉ាង​ថ្ងៃសៅរ៍ ក៏​កាត់ អី ក៏​កាត់ ឱ្យ​តែ​ទៅ​ផ្ទះ ដឹង​តែ​កាត់​រហូត»។

កន្លង​មក​ក្រុម​កម្មករ​ស្វែង​រក​កិច្ច​អន្តរាគមន៍​ពី​ក្រុម​ភាគី​ពាក់ព័ន្ធ​ជាពិសេស​ក្រសួង​ការងារ ប៉ុន្តែ​គ្មាន​ដំណោះស្រាយ​សមរម្យ​អាច​ឱ្យ​ពួកគាត់​ទទួល​យក​បាន ផ្ទុយ​ទៅ​វិញ​មាន​តែ។

កាលពីថ្ងៃទី២៦ ឧសភា ក្រុម​កម្មករ​ពាក្យ​បណ្ដឹង​ទៅ​មន្ទីរ​ការងារ​នៅ​ខេត្ត​កណ្ដាល ដើម្បី​សុំ​កិច្ច​អន្តរាគមន៍ ក៏​ប៉ុន្តែ​ពុំ​មាន​អាជ្ញាធរ​ណា​ហ៊ាន​ដោះស្រាយ​វិវាទ​ការងារ​នេះ​ជូន​ក្រុម​កម្មករ​ឡើយ ដោយ​ទុក​ឱ្យ​ពួក​គេ​បន្ត​អត់​ការងារ​ធ្វើ​គ្មាន​ប្រាក់​ចំណូល។ ក្រុម​កម្មករ​អះអាង​ថា អ្នក​គ្រប់គ្រង​ថ្មី គឺ​លោក ស៊ុន វាសនា និង​លោក ម៉េង សុជាតិ ចូល​មក​ធ្វើ​ការងារ​ជាង ១ឆ្នាំ​នេះ ធ្វើ​ឱ្យ​រង​រោងចក្រ​គ្មាន​អ្នក​បញ្ជា​ទិញ​ដោយសារ និង​កម្មករ​គ្មាន​ការងារ​ធ្វើ​ដែល​ប្រឈម​នឹង​ការ​បិទ​ទ្វារ​រោងចក្រ។

ក្រុម​កម្មករ​បញ្ជាក់​ដូចៗ គ្នា​ថា ពួកគេ​ត្រូវ​អ្នក​គ្រប់គ្រង​ប្រើ​ឱ្យ​ធ្វើ​ការងារ​ហួស​កម្លាំង និង​មិន​ឱ្យ​ហូប​អាហារ ឬ​ផឹក​ទឹក​ក្នុង​រោងចក្រ​ឡើយ។ លើស​ពី​នេះ សូម្បី​ស្ត្រី​មាន​ផ្ទៃ​ពោះ ដែល​ពួក​គាត់​ត្រូវ​ការ​ចូល​បន្ទប់​ទឹក​ក៏​មិន​ឱ្យ​ចូល​នោះ​ដែល ក៏​ខាង​ក្រុម​រោងចក្រ​មិន​អនុញ្ញាត​ឱ្យ​ដែរ ដោយ​គំរាម​ថា​នឹង​ត្រូវ​កាត់​ប្រាក់ខែ។ ក្រៅពី​នេះ​នៅ​មាន​បង្ខំ​ឱ្យ​កម្មករ​ដាក់​ពាក្យ​លាឈប់​ដោយ​ខ្លួន​ឯង និង​ព្យួរ​កម្មករ​ដោយ​គ្មាន​ការ​ជូន​ដំណឹង និង​ទូទាត់​ប្រាក់​សំណង​តាម​ច្បាប់​ស្ដីពី​ការងារ​ជាដើម។

វិទ្យុ​អាស៊ី​សេរី​មិន​អាច​ទាក់ទង​ប្រធាន​រដ្ឋបាល​រោងចក្រ​កាត់​ដេរ​សំលៀកបំពាក់​ស្តារឡៃថ៍ លោក ស៊ុន វាសនា និង អគ្គលេខាធិការ​រង នៃ​គណៈ​ធម្មាធិការ​សម្រាប់​ដោះស្រាយ​បញ្ហា​កូដកម្ម​បាតុកម្ម​នៃ​ក្រសួង​ការងារ លោក ទេស ទុក្ខាផល ដើម្បី​អធិប្បាយ​ជុំវិញ​បញ្ហា​នេះ​បាន​ទេ នៅ​ថ្ងៃ​ទី១២ មិថុនា។

ជុំវិញ​បញ្ហា​នេះ​ប្រធាន​សហព័ន្ធ​សហជីព​ឯករាជ្យ (INTUFE) លោក សិទ្ធីណែត មាន​ប្រសាសន៍​ថា ក្រសួង​ការងារ​គួរតែ​ចុះ​ត្រួត​ពិនិត្យ​នៅ​តាម​រោងចក្រ​ឱ្យ​បាន​ជា​ប្រចាំ​ចៀសវាង​មាន​ការ​រំលោភ​សិទ្ធិ​ការងារ និង​ធ្វើ​ឱ្យ​កម្មករ​ជួប​ទុក្ខ​លំបាក​ផ្នែក​ជីវភាព។ លោក​បន្ត​ថា កាលណា​ក្រសួង​ការងារ​មិន​ចាត់​វិធានការ​ឱ្យ​បាន​ទាន់​ពេលវេលា​ទេ ការ​រំលោភ​សិទ្ធិ​ការងារ​លើ​កម្មករ​ខ្មែរ​កាន់​តែ​កើន​ឡើង ហើយ​បញ្ហា​ទាំង​នេះ​នឹង​ធ្វើ​ឱ្យ​កម្មករ​អស់​ជំនឿ​លើ​ក្រសួង​ការងារ។

លោក សិទ្ធីណែត៖«រដ្ឋាភិបាល​គួរតែ​មាន​យុទ្ធការ​ក្នុង​ជំរុញ​ឱ្យ​មាន​ការ​ត្រួត​ពិនិត្យ​លក្ខខណ្ឌ​ការងារ​នៅ​តាម​រោងចក្រ ទន្ទឹម​នឹង​ដែល​អ្វី​ដែល​ខ្ញុំ​ចង់​ស្នើ​វិញ គឺ​ថា សូម​ជំរុញ​ឱ្យ​មាន​ការ​គោរព​ច្បាប់ ដែល​មាន​ហើយ​សូម​ឱ្យ​ច្បាប់ ច្បាប់​ដែល​មាន​ហើយ​គោរព គឺ​ការ​ល្អ​ប្រសើរ​ដូចជា​គោរព​សិទ្ធិ​ការងារ​កម្មករ​ដែល​មាន​ចែង​ក្នុង​ច្បាប់​ហើយ»។

នៅ​ដើម​ឆ្នាំ​២០២៣​នេះ មាន​រោងចក្រ​ចំនួន​១០ បាន​បិទ​ទ្វារ ខណៈ​រោងចក្រ​ចំនួន​៧១ ព្យួរ​កិច្ច​សន្យា​ការងារ និង​រោងចក្រ​៦០​ផ្សេង​ទៀត បាន​កាត់​បន្ថយ​កម្មករ ដែល​ធ្វើ​ឱ្យ​ប៉ះពាល់​ដល់​កម្មករ​ជាង​៣ម៉ឺន ២ពាន់​នាក់ (៣២.០០០) និង​ច្រើន​នាក់​ទៀត​បាន​បាត់បង់​ការងារ​ធ្វើ​ទាំង​ស្រុង។ រដ្ឋាភិបាល​បាន​លើកឡើង​ថា បណ្ដាល​ពី​សង្គ្រាម​រុស្សី (Russia) និង​អ៊ុយក្រែន (Ukraine) ទើប​ធ្វើ​ឱ្យ​ការ​បញ្ជា​ទិញ​ធ្លាក់​ចុះ។ ប៉ុន្តែ​អ្នក​វិភាគ​មើល​ឃើញ​ថា បណ្ដាល​មក​ពី​ការ​បាត់បង់​ប្រព័ន្ធ​អនុគ្រោះ​ពន្ធ​របស់​សហគមន៍​អឺរ៉ុប​ និង​វិបត្តិ​នយោបាយ​កម្ពុជា ដែល​ធ្វើ​ឱ្យ​អ្នក​វិនិយោគ​បាត់បង់​ផល​ចំណេញ និង​ទំនុក​ចិត្ត​លើ​ការ​បណ្ដាក់​ទុន​រកស៊ី​នៅ​លើ​ទឹកដី​កម្ពុជា​បន្ត​ទៀត។

ក្រុម​កម្មករ​លើក​ឡើង​ថា ពួកគេ​មិន​ចូល​ធ្វើ​ការ​វិញ​នោះ​ទេ​បើសិនជា​ថៅកែ​រោងចក្រ​មិន​ព្រម​ដក​ប្រធាន​រដ្ឋបាល លោក ស៊ុន វាសនា និង ប្រធាន​គ្រប់គ្រង​ទូទៅ លោក ម៉េង សុជាតិ ចេញ​រោងចក្រ​នោះ​ទេ ហើយ​ពួកគេ​នឹង​តែ​បន្ត​ការ​តវ៉ា​នេះ​រហូត​ទទួល​បាន​ដំណោះ​ស្រាយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។