អាជ្ញាធរខែត្រក្រចេះ សម្រេចលុបរណ្តៅជីករ៉ែមាសមួយកន្លែង និងមិនអនុញ្ញាតឲ្យធ្វើអាជីវកម្ម ក្រោយពីកម្មករជីករ៉ែម្នាក់ស្លាប់ និងម្នាក់របួសធ្ងន់កាលពីយប់ថ្ងៃទី២៨ សីហា។
អធិការរងស្រុកសំបូរ លោក ណយ ស៊ីផាច ឲ្យដឹងនៅថ្ងៃទី២៩ សីហា ថា កម្មករ ៥នាក់បានចូលក្នុងរណ្តៅរ៉ែមាសជម្រៅ ៥០ម៉ែត្រនៅយប់ថ្ងៃទី២៨ សីហា បំណងស្វែងរករ៉ែមាស ត្រូវដុំថ្មធ្លាក់សង្កត់លើបុរសពីរនាក់បណ្តាលឲ្យកម្មករម្នាក់ស្លាប់ និងម្នាក់របួសធ្ងន់។ បុរសដែលស្លាប់ឈ្មោះ ហួត វាសនា វ័យ ៣៣ឆ្នាំ មានស្រុកកំណើតនៅខែត្រកំពង់ធំ និងម្នាក់ទៀតឈ្មោះ ញ៉ែត ផាត វ័យ ២៣ឆ្នាំ មានស្រុកកំណើតនៅខែត្រតាកែវ៖ « គឺភាគហ៊ុនក្នុង ការធ្វើ ពុំមែន អ្នកណា មួយថៅកែទេ។ វាពុំមែនបាក់ដីទេ គឺរបេះថ្មសង្កត់លើ ហើយក្នុងរណ្តៅមានគ្នាដល់ទៅ ៥នាក់ ។ ដល់ពេល ចឹង ៣នាក់ទៀតដល់ពេលពីរនាក់របួស នាំគ្នាយកឡើងមក »។
លោក ណយ ស៊ីផាច បន្ថែមថា តំបន់ដែលកម្មករជួបគ្រោះថ្នាក់នោះ គឺឋិតនៅភូមិអូរពោរ ឃុំក្បាលដំរី ស្រុកសំបូរ ដែលក្រុមហ៊ុនចិន ធ្លាប់ធ្វើអាជីវកម្មរ៉ែមាស ហើយពលរដ្ឋនៅមូលដ្ឋានធ្វើជាកម្មករឲ្យក្រុមហ៊ុន ក៏ប៉ុន្តែក្រុមហ៊ុនចិន បានផ្អាកអាជីវកម្មមួយរយៈ បន្សល់រណ្តៅជីករ៉ែមាស និងកាកសំណល់ផ្សេងៗ ដែលក្រុមកម្មករទាំងនោះនៅបន្តមុខរបរនេះរហូតដល់បច្ចុប្បន្ន។ លោកថា សាកសពជនរងគ្រោះបានបញ្ជូនទៅស្រុកកំណើត ដើម្បីធ្វើបុណ្យតាមប្រពៃណីរួចរាល់ហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។