គណបក្សប្រជាធិបតេយ្យមូលដ្ឋាន (GDP) ទាមទារឲ្យរដ្ឋាភិបាល សិក្សាស្រាវជ្រាវនិងបង្ហាញ ជាសាធារណៈអំពីគម្រោងអភិវឌ្ឍកោះនរាដែលឈានដល់លុបទន្លេមេគង្គក្រោមជិតពាក់កណ្តាល ក្បែរទីក្រុងរណបកោះពេជ្រ ដោយក្រុមហ៊ុន អូ.ស៊ី.អាយ.ស៊ី(OCIC)។ គណបក្សមួយនេះព្រួយបារម្ភថា ការលុបទន្លេមេគង្គនេះ នឹងបណ្ដាលឲ្យមានផលប៉ះពាល់ធំធេងដល់សង្គម និងបរិស្ថាន។
គណបក្សប្រជាធិបតេយ្យមូលដ្ឋាន ពិនិត្យឃើញថា សកម្មភាពចាក់ថ្ម និងខ្សាច់លុបទន្លេមេគង្គ ក្រោមជិតពាក់កណ្ដាលចាប់ពីចំណុចកោះនរា ស្ថិតក្នុងខណ្ឌច្បារអំពៅរហូតដល់កោះប្រាក់ស្ថិតក្នុងស្រុកកៀនស្វាយ ខេត្តកណ្ដាលនោះ គឺដើម្បីបម្រើផលប្រយោជន៍ឯកជនសុទ្ធសាធ ដែលផ្ទុយនឹងច្បាប់ ហើយខុសឆ្ងាយពីផ្ទាំងបិទប្រកាសព័ត៌មានអំពីគម្រោងអភិវឌ្ឍកោះនរានោះ។
គណបក្សប្រជាធិបតេយ្យមូលដ្ឋាន ព្រួយបារម្ភថា ការលុបផ្ទៃទឹកទន្លេមេគង្គធំធេងនេះ នឹងអាចបង្កផលប៉ះពាល់ធ្ងន់ធ្ងរដល់បរិស្ថាន ជាពិសេស ការរារាំងផ្លូវមច្ឆាជាតិ បង្កទឹកជំនន់ និងការបាក់ច្រាំងទន្លេនាពេលអនាគត។ គណបក្សមួយនេះ ទាមទារឲ្យក្រសួងបរិស្ថានបញ្ជូនក្រុមការងារបច្ចេកទេសចុះវាយតម្លៃជាបន្ទាន់ និងស្នើសុំឲ្យលោកនាយករដ្ឋមន្ត្រី ហ៊ុន សែន យកចិត្តទុកដាក់ពិនិត្យរឿងនេះ ឲ្យបានដិតដល់ចៀសវាងបន្សល់ទុកមរតកបំផ្លាញទន្លេមេគង្គក្រោមដល់កូនខ្មែរជំនាន់ក្រោយ។
អ្នកនាំពាក្យគណបក្សប្រជាធិបតេយ្យមូលដ្ឋាន លោក ឡឹក សុធារ លើកឡើងថា គណបក្សលោក នឹងមិននៅស្ងៀមឈរឱបដៃមើលការអភិវឌ្ឍដែលប៉ះពាល់ដល់បរិស្ថាន និងអាយុជីវិតប្រជាពលរដ្ឋបែបនេះឡើយ៖ «
ផ្ទៃទឹកទន្លេមេគង្គដែលក្រុមហ៊ុន អូ.ស៊ី.អាយ.ស៊ី របស់ឧកញ៉ា ពុង ឃាវសែ កំពុងចាក់លុបនោះ មានទទឹង ៤០០ ទៅ ៥០០ម៉ែត្រពីច្រាំងទន្លេ និងបណ្ដោយមានប្រវែងខ្ទង់ ៤គីឡូម៉ែត្រ ដែលគិតជាផ្ទៃក្រឡាអាចលើសពី ១០០ហិកតារ។
អាស៊ីសេរី បានព្យាយាមសុំការឆ្លើយតបជាច្រើនលើកពីប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន និងអ្នកនាំពាក្យក្រសួងបរិស្ថាន លោក នេត្រ ភក្ត្រា ព្រមទាំងអគ្គនាយករងក្រុម ហ៊ុន អូ.ស៊ី.អាយ.ស៊ី (OCIC) លោក ទូច សំណាង ប៉ុន្តែទូរស័ព្ទចូលពុំមានអ្នកទទួល។
ទោះជាយ៉ាងណា លោក ផៃ ស៊ីផាន បានបង្ហោះសារ លើទំព័រហ្វេសប៊ុករបស់លោក កាលពីថ្ងៃទី១៧ ខែកក្កដាថា ក្រុមហ៊ុនអូ.ស៊ី.អាយ.ស៊ី គ្មានភាពចាំបាច់ ដើម្បីរាយការណ៍ ឬឆ្លើយតបរឿងនេះជាមួយសកម្មជនបរិស្ថាន និងស្ថាប័នព័ត៌មានអាស៊ីសេរីនោះទេ។ លោកបានជេរប្រមាថអ្នក ដែលមិនពេញចិត្ត ចំពោះការអភិវឌ្ឍលុបទន្លេដ៏ធំល្វឹងល្វើយនេះថា ជាក្រុមតិរច្ឆានទៀតផង។
ស្ថាបនិកចលនាមាតាធម្មជាតិ លោក អាឡិចហាន់ដ្រូ ហ្គន់សាឡេស ដេវីតសុន (Alejandro Gonzalez Davidson) មានប្រសាសន៍ថា មន្ត្រីរដ្ឋាភិបាល គួរតែឆ្លើយតបឲ្យបានត្រឹម ត្រូវចំពោះក្តីកង្វល់នានារបស់ប្រជាពលរដ្ឋ មិនគួរឆ្លើយតបមិនចំចំណុច និងមានចរិតដូចជើងកាងនោះទេ។ សកម្មជនបរិស្ថានរូបនេះ សង្កេតឃើញថា អ្នកដែលព្រួយបារម្ភអំពីផលប៉ះពាល់បរិស្ថាន និងសង្គមដោយសារគម្រោងអភិវឌ្ឍន៍កោះនរានេះ គឺមានចំនួនច្រើនលើសលុប ហើយការ ដែលក្រុមមន្ត្រីរដ្ឋាភិបាលរក្សាភាពស្ងៀមស្ងាត់ មិនឆ្លើយបំភ្លឺឲ្យបានត្រឹមត្រូវបែបនេះ គឺបង្ហាញ ពីការអភិវឌ្ឍន៍ដែលគ្មានតម្លាភាព និងអាចពាក់ព័ន្ធនឹងអំពើពុករលួយលាងលុយកខ្វក់របស់ក្រុមអ្នកមានអំណាចកំពូលៗ នៅកម្ពុជា៖ «
តំណាងក្រុមហ៊ុន អូ.ស៊ី.អាយ.ស៊ី លោក ទូច សំណាង ធ្លាប់ប្រាប់កាសែតក្នុងស្រុកថា ក្រុមហ៊ុនទទួលបានសិទ្ធិវិនិយោគពីរដ្ឋាភិបាល ដើម្បីអភិវឌ្ឍកោះនរា ជាទីក្រុងទំនើបលើផ្ទៃដី ប្រមាណ ១០០ហិកតារ ដែលបានមកពីការលុបទន្លេមេគង្គ និងមានលក្ខណៈស្រដៀងគ្នានឹងទីក្រុងរណបកោះពេជ្រដែរ។ គម្រោងនេះ នឹងចំណាយទឹកប្រាក់ប្រមាណពីរពាន់ (២.០០០) លាន ដុល្លារអាមេរិក ដែលនឹងបញ្ចប់ការសាងសង់ទាំងស្រុងនៅឆ្នាំ២០២៣ ខាងមុខ។ បច្ចុប្បន្ន ក្រុមហ៊ុន អូ.ស៊ី.អាយ.ស៊ី កំពុងប្រើប្រាស់កម្មករខ្មែរ និងវៀតណាមជាច្រើននាក់ ព្រមទាំងសាឡង់ និងរថយន្តរាប់សិបគ្រឿងដឹកជញ្ជូនខ្សាច់ និងថ្មភ្នំ ដើម្បីចាក់លុបទន្លេយ៉ាងមមាញឹកបំផុត។ ទោះជាយ៉ាងណា មកទល់នឹងពេលនេះ ក្រុមហ៊ុន និងមន្ត្រីរដ្ឋាភិបាល នៅមិនទាន់បង្ហាញតម្លាភាព ឬបញ្ជាក់ថា មានការសិក្សាពីផលប៉ះពាល់ផ្នែកសង្គម និងបរិស្ថានដូចដែលច្បាប់កំណត់នៅឡើយទេ មុននឹងសម្រេចអនុញ្ញាតឱ្យចាក់ដីលុបទន្លេ ដើម្បីបង្កើតកោះសិប្បនិមិតបែបនេះ៕