យុវជននៃចលនាមាតាធម្មជាតិដែលចុះទៅអង្កេតនៅខេត្តព្រះសីហនុ ឱ្យដឹងថា សំណង់កាស៊ីណូ ជីនទីង (Jingding) នៅលើកោះរ៉ុងសន្លឹម មិនទាន់ត្រូវបានរុះរើចេញនៅឡើយទេ។ អ្នកនាំពាក្យសាលាខេត្តព្រះសីហនុថា លោកនឹងទាក់ទងទៅអាជ្ញាធរមូលដ្ឋានអំពីករណីនេះ។
ក្រុមយុវជននៃចលនាមាតាធម្មជាតិថា ពួកគេភ្ញាក់ផ្អើលពេលឃើញកាស៊ីណូ ជីនទីង នៅតែបង្ហាញវត្តមាននៅលើឆ្នេរខ្សាច់កោះរ៉ុងសន្លឹមដដែល។ ពួកគេស្នើទៅអាជ្ញាធរខេត្តព្រះសីហនុ ឱ្យមានភាពក្លាហានរុះរើសំណង់កាស៊ីណូ ជីនទីង ដូចខ្លួនឈូសឆាយផ្ទះសំបែងពលរដ្ឋនាពេលកន្លងមក ដែលអាជ្ញាធរចោទថា សង់រំលោភដីរដ្ឋនោះផងដែរ។
សកម្មជនចលនាមាតាធម្មជាតិ កញ្ញា ឡុង គន្ធា ឱ្យអាស៊ីសេរីដឹងថា សំណង់កាស៊ីណូ ជីនទីង គ្រាន់តែមានការរុះរើស្លាកយីហោចេញប៉ុណ្ណោះ ប៉ុន្តែសំណង់អគារនៅដដែល។ កញ្ញាបន្តថា ក្រុមយុវជននឹងធ្វើសកម្មភាពទាមទារឱ្យអាជ្ញាធរខេត្ត ឱ្យរុះរើសំណង់កាស៊ីណូនេះបន្តទៀត៖ «បើសិនជានិយាយថា គាត់ភ្លេចដូចជាមិនសមស្របដែរ ព្រោះកាស៊ីណូហ្នឹងប៉ុណ្ណាណីនៅលើដីឆ្នេរមើលឃើញឡើងច្បាស់ក្រឡែតហ្នឹង ហើយយើងមើលឃើញថា អាជ្ញាធររដ្ឋបាលខេត្តព្រះសីហនុកន្លងមកដូចជាមិនសូវមានឆន្ទៈនៅក្នុងការដោះស្រាយរឿងហ្នឹង»។
អាជ្ញាធរខេត្តព្រះសីហនុបានដាក់ឱសានវាទឱ្យម្ចាស់ កាស៊ីណូ ជីនទីង ត្រូវរុះរើសំណង់របស់ខ្លួនចេញ និងរៀបចំសម្អាតឆ្នេរនៅទីនោះ ឱ្យបានស្អាតឡើងវិញ ត្រឹមថ្ងៃទី២៨ ខែកុម្ភៈ ឆ្នាំ២០២០ ជាកំហិត។
អ្នកនាំពាក្យសាលាខេត្តព្រះសីហនុ ឃាង ភារម្យ និយាយថា លោកមិនទាន់ទទួលបានព័ត៌មានពីអាជ្ញាធរមូលដ្ឋាននៅឡើយទេ ទាក់ទងការមិនទាន់រុះរើសំណង់កាស៊ីណូ ជីនទីងនេះ។ លោកស្នើសុំទទួលបានរបាយការណ៍ពីមន្ត្រីជំនាញជាមុនសិន មុននឹងធ្វើការបកស្រាយ។
អាស៊ីសេរីបានព្យាយាមសុំការបំភ្លឺករណីនេះ ពីចៅសង្កាត់កោះរ៉ុង លោក ឡុក វ៉ាន់ណារិន នៅថ្ងៃទី០៧ ខែឧសភា ប៉ុន្តែលោកមិនលើកទូរស័ព្ទនោះទេ។
អ្នកសម្របសម្រួលសមាគមអាដហុក (Adhoc) ប្រចាំខេត្តព្រះសីហនុ អ្នកស្រី ជៀប សុធារី ស្នើទៅអាជ្ញាធរខេត្ត អនុវត្តច្បាប់ឱ្យបានស្មើភាពគ្នារវាងពលរដ្ឋខ្លួនឯង និងឈ្មួញចិន។ អ្នកស្រីថា អាជ្ញាធរ គួរកោះហៅថៅកែកាស៊ីណូ ជីនទីង មកសាកសួរអំពីមូលហេតុដែលមិនព្រម រុះរើសំណង់នេះ៖ «បើសិនជាអាជ្ញាធរមិនមានវិធានការទេ យើងមើលឃើញទាំងអស់គ្នាថា ការអនុវត្តនេះដូចជាមានការដូចគេចំណាំទូទៅថា ស្តង់ដារពីរណា»។
កាលពីខែឧសភា ឆ្នាំ២០១៩ សមត្ថកិច្ចចម្រុះខេត្តព្រះសីហនុ ដោយមានការសម្របសម្រួលពីតំណាងអយ្យការខេត្តបានចុះបិទទីតាំងមជ្ឈមណ្ឌលកម្សាន្ត និងកាស៊ីណូ ជីនទីង នៅលើកោះរ៉ុងសន្លឹម ដោយសារសំណង់នេះបានរំលោភលើដីចំណីឆ្នេរ និងបានលួចបង្ហូរទឹកកខ្វក់ចូលសមុទ្រ។ ប៉ុន្តែជាញឹកញាប់ម្ចាស់សំណង់តែងសុំពន្យារពេល ដោយលើកហេតុផលថា រកទីតាំងថ្មីមិនទាន់បាន។ កញ្ញា ឡុង គន្ធា ឱ្យដឹងថា យុវជនចលនាមាតាធម្មជាតិ នឹងដាក់ពាក្យប្តឹងទៅតុលាការខេត្តព្រះសីហនុ ឱ្យបើកការស៊ើបអង្កេតលើម្ចាស់កាស៊ីណូនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។