អភិបាលខេត្តរតនគិរី លោក ថង សាវុន ថ្លែងថា ជម្លោះនៅតែកើតមានច្រើន រវាងពលរដ្ឋ និង ក្រុមហ៊ុនសម្បទានសេដ្ឋកិច្ច ព្រមទាំងជម្លោះព្រំប្រទល់សហគមន៍ និងសហគមន៍ ជាដើម។ លោកបញ្ជាក់ថា ជម្លោះដីធ្លីផ្ទុះឡើង ដោយសារពលរដ្ឋផ្លាស់ប្ដូរទីលំនៅ និងលួចទន្ទ្រានដីសាធារណរបស់រដ្ឋ ដោយខុសច្បាប់។ លើសពីនេះទៀត លោកថា ដើម្បីដោះស្រាយបញ្ហានេះ រដ្ឋបាលខេត្ត និងស្ថាប័នពាក់ព័ន្ធ នឹងបន្តអប់រំពលរដ្ឋ ដោយប្រើរយៈពេលយូរអង្វែង។ លោកបញ្ជាក់ថា រដ្ឋបាលខេត្ត នឹងខិតខំប្រឹងប្រែង ដោះស្រាយជម្លោះដីធ្លី នៅតំបន់ព្រៃអភិរក្ស ដោយត្រូវបង្កើតក្រុមការងារ សហការជាមួយអន្តរក្រសួង ចុះពិនិត្យជាក់ស្ដែង ធ្វើយ៉ាងណា ត្រូវដោះស្រាយដោយសុក្រឹត្យ និងត្រឹមត្រូវ៖ «មានការទន្ទ្រានរំលោភយកដីរដ្ឋខុសច្បាប់ ហើយយើងមានការអប់រំផ្សព្វផ្សាយជាច្រើនតាមរយៈ អង្គភាពជំនាញទាំងអស់ មានបរិស្ថាន មានអាជ្ញាធរស្រុក / ក្រុង ទាំងអស់ ចូលរួមផ្សព្វផ្សាយ។ យើងតាមអនុសាសន៍ របស់សម្តេច តេជោ ធ្វើយ៉ាងណាដោះស្រាយដីធ្លី ពាក់ព័ន្ធតំបន់ឧទ្យានជាតិ និងតំបន់អភិរក្ស។ នៅពេលខាងមុខនេះ យើងនឹងរៀបចំគណៈកម្មការជំនាញ សហការជាមួយក្រសួង ចុះទៅពិនិត្យជាក់ស្ដែង។ អាហ្នឹងយើងអនុវត្តឱ្យបានត្រឹមត្រូវ និងសុក្រឹត្យ»។
លោក ថង សាវុន ថ្លែងបែបនេះ ក្នុងសន្និសីទសារព័ត៌មាន ដែលរៀបចំឡើងដោយអង្គភាពអ្នកនាំពាក្យរដ្ឋាភិបាល នៅព្រឹកថ្ងៃទី១៣ ខែកក្កដានេះ នៅទីក្រុងភ្នំពេញ។ លោកបន្ថែមថា អាជ្ញាធរមូលដ្ឋានខ្លះ នៅតែលួចស៊ីញេ ធ្វើពាក្យស្នើសុំកាន់កាប់ដីធ្លី ក្នុងព្រៃសាធារណរបស់រដ្ឋ និងព្រៃអភិរក្ស។ លើសពីនេះទៀត គណៈកម្មការចម្រុះ នឹងរៀបចំប្លង់ផែនការមេមួយ ដើម្បីធ្វើការ ឃ្លុំតំបន់អភិរក្ស និងចេញប័ណ្ណកម្មសិទ្ធិដីធ្លីឱ្យបានត្រឹមត្រូវ។ ចំណែកជនជាតិដើមភាគតិច សង្កេតឃើញថា វិធានការការពារដីព្រៃសាធារណរបស់រដ្ឋ និងព្រៃអភិរក្ស របស់អាជ្ញាធរខេត្តនេះ នៅទន់ខ្សោយខ្លាំង មិនសូវអើពើអនុវត្តច្បាប់លើជនល្មើសដែលមានអំណាច និងវិអាជ្ញាធរភូមិ/ឃុំ ទាំងឡាយដែលឃុបឃិតលក់ដីព្រៃអភិរក្សខុសច្បាប់នោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។