ក្រុមយុវជនចលនាមាតាធម្មជាតិចេញផ្សាយវីដេអូមួយនៅលើបណ្ដាញសង្គមនៅថ្ងៃទី៨ ខែកុម្ភៈ ដោយបង្ហាញពីវិបត្តិសំរាមរ៉ាំរ៉ៃនៅមាត់ស្ទឹងសង្កែ។ វីដេអូនេះបង្ហាញឱ្យឃើញសំរាមប្លាស្ទិកស្អេកស្កះនៅលើច្រាំងស្ទឹងប្រវែងរាប់សិបគីឡូម៉ែត្របន្តរហូតដល់មាត់បឹងទន្លេសាប ស្ថិតក្នុងស្រុកឯកភ្នំ ខេត្តបាត់ដំបង។
ក្រុមយុវជនបានផ្ញើសារចោទសួររដ្ឋមន្ត្រីក្រសួងបរិស្ថាន លោក អ៊ាង សុផល្លែត ថា តើលោកដោះស្រាយបញ្ហានេះដែរឬទេ ដើម្បីកាត់បន្ថយផលប៉ះពាល់សុខភាពពលរដ្ឋ និងកុមារ ដែលប្រើប្រាស់ទឹកស្ទឹងសង្កែប្រចាំថ្ងៃ?
ក្រុមយុវជនស្រឡាញ់បរិស្ថានរកឃើញថា ពលរដ្ឋជាច្រើនពាន់គ្រួសារ រស់នៅអមសងខាងដងស្ទឹងសង្កែ ក្នុងឃុំព្រែកនរិន្ទ និងឃុំព្រែកហ្លួង ស្រុកឯកភ្នំ នៅមិនទាន់មានកន្លែងទុកដាក់សំរាមត្រឹមត្រូវនៅឡើយទេ មកទល់ពេលនេះ។
ពលរដ្ឋមួយចំនួនបានយកសំរាមទៅចាក់គរចោលតាមមាត់ទឹកស្ទឹងសង្កែ ហើយនៅពេលមានទឹកជំនន់ សំរាមទាំងនោះអណ្ដែតចូលទឹក ហូរឆ្ពោះទៅកាន់បឹងទន្លេសាប។ នៅពេលទឹកស្រកទៅវិញ សំរាមខ្លះទើរតាមដើមឈើជាប់មាត់ស្ទឹងធ្វើឱ្យខូចសោភណភាពមាត់ស្ទឹង និងប៉ះពាល់អារម្មណ៍ភ្ញៀវទេសចរ ដែលតែងតែជិះទូកកម្សាន្ត។
វីដេអូជាង ២នាទីរបស់សកម្មជនចលនាមាតាធម្មជាតិ (Mother Nature Cambodia) បានរៀបរាប់ពីបញ្ហាសំរាមតាមបណ្តោយច្រាំងស្ទឹងសង្កែថា មិនត្រឹមតែប៉ះពាល់សុខភាពពលរដ្ឋប៉ុណ្ណោះទេ ថែមទាំងធ្វើឱ្យដងស្ទឹងសង្កែដែលមានសម្រស់ស្រស់ស្អាតទាក់ទាញភ្ញៀវទេសចរ អាចនឹងប្រែក្លាយជាដងស្ទឹងសំរាមនៅថ្ងៃខាងមុខ។
ក្រុមយុវជនចលនាមាតាធម្មជាតិ កញ្ញា ញាម មុនីរស្មី ដែលបានចុះស្រាវជ្រាវរឿងនេះ ចោទសួររដ្ឋមន្ត្រីក្រសួងបរិស្ថានថ្មី លោក អ៊ាង សុផល្លែត ថា ក្រោយពីឃើញវីដេអូនេះហើយ តើលោកនឹងប្រើប្រាស់លុយពន្ធរបស់ពលរដ្ឋដោះស្រាយបញ្ហាសំរាម ក្នុងតំបន់នេះដែរឬទេ?
បន្ទាប់ពីទទួលបានដំណែងជារដ្ឋមន្ត្រីក្រសួងបរិស្ថាន តាមរយៈសែស្រឡាយ លោក អ៊ាង សុផល្លែត តាមរយៈទំព័រហ្វេសបុករបស់ក្រសួងតែងតែបង្ហោះអួតសរសើរថ្ងៃនេះ ខ្ញុំមិនប្រើថង់ប្លាស្ទិកទេ។
សកម្មជនការពារបរិស្ថាន ដែលធ្វើដំណើរដល់ទីតាំងជាក់ស្តែងប្រទះឃើញ សំរាមខ្លះស្អុយរលួយតាមគុម្ពឈើ និងខ្លះទៀតពលរដ្ឋគរទុក រួចដុតចោលជាប់មាត់ស្ទឹង ហូរកាកសំណល់ចូលទឹក។
ពួកគាត់បានបង្ហោះរូបភាពលើអាកាសថត ដោយប្រើឧបករណ៍ដ្រូន (Drone) និងកាមេរ៉ាទូរស័ព្ទដៃ ដើម្បីបង្ហាញភស្តុតាងជាក់ស្តែង រូបភាពសំរាម ថង់ប្លាស្ទិក (Plastic) ដបទឹក ខោអាវចាស់ៗ និងខោកូនក្មេង ជាដើម រាយប៉ាយតាមច្រាំង ដោយគ្មានការបោសសំអាតត្រឹមត្រូវនោះទេ ជាច្រើនឆ្នាំមកហើយ។
កញ្ញា ញាម មុនីរស្មី ប្រាប់វិទ្យុអាស៊ីសេរីថា គោលបំណងរបស់ក្រុមយុវជន ចង់ឱ្យពលរដ្ឋរស់នៅតាមបណ្តោយដងស្ទឹងសង្កែ ទុកដាក់សំរាមឱ្យបានត្រឹមត្រូវ ហើយអាជ្ញាធរគួររៀបចំកន្លែងដាក់សំរាម និងប្រមូលសំរាមជាប្រចាំ។
កញ្ញាបន្ថែមថា ដងស្ទឹងសង្កែជាកន្លែងទាក់ទាញភ្ញៀវទេសចរដ៏ល្បីល្បាញ ក្នុងខេត្តបាត់ដំបង ដែលអាជ្ញាធរគួរតែរៀបចំសោភ័ណភាពស្ទឹងឱ្យស្អាតគ្រប់ច្រកល្ហក។
កញ្ញា ញាម មុនីរស្មី៖ «ស្ទឹងសង្កែជាកន្លែងទាក់ទាញមិនថា ភ្ញៀវជាតិ និងអន្តរជាតិទេ។ ជិះទូកជិះអី ដើម្បីធ្វើដំណើរកម្សាន្តតាមហ្នឹង វាមានភ្ញៀវ សំរាមពេលភ្ញៀវទេសចរច្រើនពោរពេញដោយសំរាម វាគួរមានការចូលរួមដោះស្រាយ បើមានការបណ្តែតបណ្តោយសំរាមនឹងខ្លាំងជាងហ្នឹងទៀត»។
វិទ្យុអាស៊ីសេរីមិនទាន់អាចទាក់ទង សុំការបំភ្លឺរឿងនេះ ពីអភិបាលខេត្តបាត់ដំបង លោក សុខ លូ បាននៅឡើយទេ កាលពីថ្ងៃទី៨ កុម្ភៈ។ រីឯរដ្ឋមន្ត្រីក្រសួងបរិស្ថាន លោក អ៊ាង សុផល្លែត ក៏មិនទាន់អាចសុំការបំភ្លឺបានដែរ។
ជុំវិញរឿងនេះ នាយកប្រតិបត្តិអង្គការបណ្ដាញការពារទន្លេបី លោក លាង ប៊ុនលាភ ពន្យល់ថា ការបោះសំរាមចូលទឹកស្ទឹង នឹងបណ្តាលឱ្យទឹកមានជាតិពុល បំផ្លាញជីវចម្រុះក្នុងទឹក ប៉ះពាល់បម្រែបម្រួលទឹក និងខូចសុខភាពមនុស្ស និងសត្វ ដែលជាផ្នែកមួយប៉ះពាល់ប្រាក់ចំណូលពលរដ្ឋ និងវិស័យទេសចរណ៍ក្នុងតំបន់។ «»
អនុក្រឹត្យលេខ ២៧ ឆ្នាំ ១៩៩៩ ស្តីពីការត្រួតពិនិត្យការបំពុលទឹក មាត្រា២៩ ចែងថា ក្នុងករណីឃើញថា តំបន់ទឹកសាធារណៈទទួលរងការបំពុល បង្កឱ្យមានការគំរាមកំហែង ដល់ជីវិតមនុស្ស និងជីវចម្រុះ ក្រសួងបរិស្ថានគួរធ្វើការផ្សព្វផ្សាយជាសាធារណៈជាបន្ទាន់ និងទប់ស្កាត់ការបំពុលទឹក ហើយស្ដារគុណភាពទឹកតំបន់សាធារណៈនោះឡើងវិញ។
ស្ទឹងសង្កែធ្លាប់តែមានឈ្មោះល្បីថា ស្រស់ស្អាតតាមរយៈបទចម្រៀងបែបមនោសញ្ចេតនារបស់កវីនិពន្ធកាលពីអំឡុងទសវត្សរ៍៦០។ ស្ទឹងនេះមានប្រវែង ២៥០គីឡូម៉ែត្រ ហូរកាត់ស្រុកចំនួន ៦ក្នុងខេត្តបាត់ដំបង មុននឹងហូរចូលបឹងទន្លេសាប ។ ស្ទឹងនេះហូរកាត់ទីប្រជុំជន ក្រុងបាត់ដំបង ដែលជាប្រភពទឹកយ៉ាងសំខាន់សម្រាប់មនុស្សសត្វ និងស្រោចស្រពដំណាំ ស្រែចម្ការ។ ស្ទឹងសង្កែ មានប្រភពចេញពីតំបន់ភ្នំ ខ្ពង់រាប ខេត្តប៉ៃលិន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។