អង្គភាពប្រឆាំងអំពើពុករលួយច្រានចោលពាក្យបណ្ដឹងរបស់ពលរដ្ឋដែលស្នើឱ្យលោកនាយករដ្ឋមន្ត្រី លោក ហ៊ុន ម៉ាណែត ដោះស្រាយបញ្ហាដីបឹងពោធិ៍ នៅខេត្តកំពង់ឆ្នាំង ដោយថា ពាក្យបណ្ដឹងនោះ គ្មានព័ត៌មានច្បាស់លាស់។ ពលរដ្ឋថា ការច្រានចោល គឺជារឿងមិនត្រឹមត្រូវ ព្រោះនេះ ជាតួនាទីរបស់អង្គភាពប្រឆាំងអំពើពុករលួយដើម្បី បើកការស៊ើបអង្កេតបន្តរកភស្តុតាងជាក់លាក់។
ពលរដ្ឋចំនួន ៦នាក់ នៅឃុំតាជេស ស្រុកកំពង់ត្រឡាច បានឡើងមកភ្នំពេញ ដើម្បីឆ្លើយបំភ្លឺបញ្ហាដីបឹងពោធិ៍ ដែលត្រូវបានក្រុមហ៊ុនឯកជនរំលោភយក ធ្វើសកម្មភាពបូមខ្សាច់លក់ ដែលបង្កផលប៉ះពាល់ដល់ជីវភាពពួកគាត់។ ការឡើងមកឆ្លើយបំភ្លឺរបស់ពលរដ្ឋនេះ តាមការអញ្ជើញរបស់អង្គភាពប្រឆាំងអំពើពុករលួយ ក្រោយពីពួកគាត់បានដាក់ពាក្យបណ្ដឹងកាលពីថ្ងៃទី៨ ខែកុម្ភៈកន្លងទៅ។
តំណាងពលរដ្ឋ ដែលបានចូលរួមឆ្លើយបំភ្លឺនៅអង្គភាពប្រឆាំងអំពើពុករលួយ នៅថ្ងៃទី២០ ខែកុម្ភៈ លោក ស្ងួន ញឿន ប្រាប់វិទ្យុអាស៊ីសេរីថា លោកខកចិត្ត ដែលអង្គភាពប្រឆាំងអំពើពុករលួយ ច្រានចោលពាក្យបណ្ដឹង របស់ពួកលោកហើយថា ពុំធ្វើការស៊ើបអង្កេត ឬដោះស្រាយ បញ្ហាដីបឹងពោធិ៍ ដោយអះអាងថា ពាក្យបណ្ដឹងនោះ គ្មានព័ត៌មានគ្រប់ជ្រុងជ្រោយ ជាពិសេស ព័ត៌មានពាក់ព័ន្ធ ឈ្មោះក្រុមហ៊ុន និងអាជ្ញាប័ណ្ណបូមខ្សាច់ថា តើមាន ឬក៏អត់។
ទោះយ៉ាងនេះក្ដី លោក ស្ងួន ញឿន ពន្យល់ថា ពាក្យបណ្ដឹងរបស់ពួកលោក គ្រាន់តែជាមូលដ្ឋានគ្រឹះ ដើម្បីជំរុញឱ្យអង្គភាពប្រឆាំងអំពើពុករលួយធ្វើការស៊ើបអង្កេតបន្ត ដោយសារតែពលរដ្ឋ ពុំអាចមានលទ្ធភាពប្រមូលព័ត៌មានបានច្រើន ដូចការចង់បាននោះទេ។ លោកបន្តថា កន្លងទៅ អាជ្ញាធរ មូលដ្ឋានតែងតែព្យាយាមលាក់បាំងព័ត៌មានទាំងនោះ។
វិទ្យុអាស៊ីសេរីមិនអាចទាក់ទងអ្នកនាំពាក្យអង្គភាពប្រឆាំងអំពើពុករលួយ លោក សយ ច័ន្ទវិចិត្រ និងប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា ដើម្បីបកស្រាយជុំវិញរឿងនេះបានទេ នៅថ្ងៃទី២០ ខែកុម្ភៈ។
ទាក់ទិនរឿងនេះ អ្នកការពារសិទ្ធិមនុស្ស និងបរិស្ថាន លោក ម៉ា ចិត្រា ថ្លែងថា ការច្រានចោលពាក្យបណ្ដឹងរបស់ពលរដ្ឋជុំវិញបញ្ហាដីបឹងពោធិ៍ពីសំណាក់អង្គភាពប្រឆាំងអំពើពុករលួយ គឺជាទង្វើមិនត្រឹមត្រូវ ហើយធ្វើឱ្យពលរដ្ឋកាន់តែ អស់ជំនឿលើស្ថាប័នរដ្ឋ។ លោកបន្តថា អង្គភាពប្រឆាំងអំពើពុករលួយគួរតែយកពាក្យបណ្ដឹងទាំងនោះ ទៅស៊ើបអង្កេតបន្ត ទើបត្រឹមត្រូវ ព្រោះពលរដ្ឋ ពុំអាចមានលទ្ធភាពប្រមូលព័ត៌មានបានគ្រប់ជ្រុងជ្រោយទាំងអស់ទេ។
បឹងពោធិ៍ ស្ថិតភូមិឡពាង ឃុំតាជេស ជាបឹងធម្មជាតិដ៏សំខាន់របស់ប្រជាកសិករអាស្រ័យផល យកទឹកធ្វើស្រូវប្រាំង នេសាទត្រី និងប្រមូលផលផ្សេងៗ ដូចជា បេះព្រលឹត និងច្រូតស្មៅ ដើម្បីចិញ្ចឹមគោក្របីជាដើម។ បឹងនេះមានទំហំ ៤៧,២២ហិកតារ ហើយផ្ដល់ប្រយោជន៍ដល់ពលរដ្ឋជិត ៣០០គ្រួសារនៅភូមិឡពាង ភូមិសូវង្ស និងភូមិសំរោង ស្រុកកំពង់ត្រឡាច ខេត្តកំពង់ឆ្នាំង។
ប៉ុន្តែ រយៈពេលជាង ៥ឆ្នាំចុងក្រោយនេះ បឹងពោធិ៍កាន់តែរាក់ ហើយខ្វះទឹកប្រើប្រាស់នៅរដូវប្រាំងស្ទើរតែរាល់ឆ្នាំ ស្របពេលបច្ចុប្បន្ន បឹងនេះកំពុងតែមានគ្រឿងចក្រ និងម៉ាស៊ីនបូមខ្សាច់យ៉ាងអនាធិបតេយ្យ។ ថ្មីៗ នេះ ពលរដ្ឋចោទអាជ្ញាធរមូលដ្ឋានថា បានឃុបឃិតគ្នា លក់ដីបឹងទៅឱ្យម្ចាស់ក្រុមហ៊ុន ឈ្មោះ ថាន់ សុជាតិ ដោយគ្មានការជូនដំណឹងដល់ពលរដ្ឋជាមុន ហើយអាជ្ញាធរព្យាយាមលាក់បាំងព័ត៌មាន ពេលពលរដ្ឋតាមសួរនាំ។
ទោះជាបែបនេះក្ដី ពលរដ្ឋលើកឡើងថា ពួកគាត់នៅតែប្ដេជ្ញាចិត្តបន្តសកម្មភាពតវ៉ា ឱ្យអាជ្ញាធរពាក់ព័ន្ធដោះស្រាយបញ្ហាបឹងពោធិ៍នេះឱ្យបានឆាប់ តាមរយៈការធ្វើសន្និសីទព័ត៌មាន និងការដើរដាក់ញាតិទៅតាមស្ថាប័នពាក់ព័ន្ធទាំងអស់ ចាប់ពីថ្នាក់ខេត្ត និងរាជធានីភ្នំពេញ រហូតទាល់តែមានដំណោះស្រាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។