ពលរដ្ឋរស់នៅខេត្តស្ទឹងត្រែងចោទមន្ត្រីបរិស្ថានមួយចំនួនដែលប្រចាំការក្នុងស្រុកថាឡាបរិវ៉ាត់ថា ប្រព្រឹត្តអំពើពុករលួយដោយបានជំរិតទារប្រាក់ពីពលរដ្ឋជាច្រើនលានរៀល ជាថ្នូរនឹងការដោះលែងឱ្យមានសេរីភាព។
ចាប់តាំងពីឆ្នាំ២០២៣ រហូតមកទល់នេះ ពលរដ្ឋអះអាងថា យ៉ាងហោចណាស់មានអ្នកភូមិ ៥នាក់ហើយ ដែលឆ្មាំអភិរក្សរបស់ក្រសួងបរិស្ថានខេត្តស្ទឹងត្រែង ប្រឌិតសំណុំរឿងមិនពិត ដើម្បីឃាត់ខ្លួនពលរដ្ឋស្លូតត្រង់ជំរិតទារលុយ ជាថ្នូរនឹងការដោះលែងឱ្យមានសេរីភាព។
ក្នុងចំណោមអ្នកភូមិ ៥គ្រួសារនោះ មានពលរដ្ឋ ២គ្រួសារ រស់នៅឃុំកាំងចាម ស្រុកថាឡាបរិវ៉ាត់ ខេត្តស្ទឹងត្រែង បានចោទមន្ត្រីបរិស្ថានម្នាក់ឈ្មោះ អ៊ីវ ឆេន និងបក្ខពួកថា បានចាប់ខ្លួនសមាជិកគ្រួសាររបស់ពួកគាត់យ៉ាងអយុត្តិធម៌ ដោយជំរិតទារប្រាក់ជាច្រើនលានរៀល ប្រសិនបើពួកគាត់គ្មានលុយបង់ឱ្យពួកគេទេ នឹងបញ្ជូនសំណុំរឿងទៅតុលាការ។
ពលរដ្ឋរស់នៅភូមិកាំងក្ងោក ឃុំកាំងចាម លោកស្រី ឃុត ខឿន ប្រាប់វិទ្យុអាស៊ីសេរីនៅថ្ងៃទី៨ តុលាថា មន្ត្រីបរិស្ថានឈ្មោះ អ៊ីវ ឆេន ហៅ ឈក បានឃាត់ខ្លួនប្ដី របស់លោកស្រីឈ្មោះ សេក សាក់ យ៉ាងអយុត្តិធម៌ ដោយចោទប្រកាន់ពីបទកាប់រុនរានដីព្រៃ ហើយបញ្ជូនឃុំខ្លួននៅមន្ទីរបរិស្ថានខេត្តស្ទឹងត្រែង។
លោកស្រីបញ្ជាក់ថា មន្ត្រីបរិស្ថានរូបនេះ បានទូរស័ព្ទប្រាប់លោកស្រីថា បើចង់ឱ្យប្ដីមានសេរីភាពវិញ ត្រូវយកលុយ ៧លានរៀល ឬជិត ២ពាន់ដុល្លារមកបង់ឱ្យពួកគេ នៅមន្ទីរបរិស្ថានខេត្ត បើមិនដូច្នេះទេនឹងបញ្ជូនទៅឃុំខ្លួននៅពន្ធនាគារ។
លោកស្រី ឃុត ខឿន៖«គាត់ថាឥឡូវប្អូនយកលុយមកលស់ប្ដី ៧លានមក អត់ស្គាល់ពូ ឈក ទេអី?ពូអើយកុំថាឡើយ ៧លាន សូម្បី ២០ម៉ឺនរៀលក្នុងកាបូបក៏ខ្ញុំគ្មានដែរ ព្រោះប្ដីខ្ញុំទៅស៊ីឈ្នួលគេទេ។ គាត់ថា បើគ្មានលុយមកលស់ប្ដីក្នុងពេលវេលានេះទេ ថ្ងៃស្អែកឡើងនឹងបញ្ជូនទៅទៀតហើយ និងតេមកគំរាមដល់ក្រុមគ្រួសារខ្ញុំទៀត»។
ស្ត្រីដដែលបន្ថែមថា ដោយសារតែគ្មានប្រាក់លស់ប្ដី មន្ត្រីបរិស្ថានបានបញ្ជូនគាត់ទៅឃុំខ្លួនក្នុងពន្ធនាគារជិត ៦មកហើយ។ លោកស្រីអះអាងថា ប្ដីរបស់លោកស្រីមិនបានប្រព្រឹត្តកំហុសដូចការចោទប្រកាន់ឡើយ ដោយគាត់គ្រាន់តែស៊ីឈ្នួលធ្វើជាកម្មករកាប់ចម្ការសំអាតដីឱ្យគេ ដើម្បីរកប្រាក់កម្រៃផ្គត់ផ្គង់ជីវភាព។
ចំណែកឯពលរដ្ឋម្នាក់ទៀត ឈ្មោះ វ៉ែន វុទ្ធី ដែលធ្លាប់ត្រូវបានប្រធានមន្ទីរបរិស្ថានខេត្តស្ទឹងត្រែងលោក ស្រេង ជាហេង បញ្ជាកូនចៅឱ្យចាប់ខ្លួន កាលពីខែកញ្ញា ឆ្នាំ២០២៣ ដើម្បីជំរិតទារលុយ ៤ពាន់ដុល្លារ ជាថ្នូរដោះលែងឱ្យរួចខ្លួន ក៏បង្ហាញពីភាពអយុត្តិធម៌ក្នុងរឿងនេះដែរ។
លោក វ៉ែន វុទ្ធី ប្រាប់វិទ្យុអាស៊ីសេរីនៅថ្ងៃទី១៣ កញ្ញាថា លោក និងពលរដ្ឋម្នាក់ទៀត ឈ្មោះ វ៉ន ថា រងភាពអយុត្តិធម៌ម្ដងហើយម្ដងទៀត ដោយត្រូវមន្ត្រីបរិស្ថានឈ្មោះ អ៊ីវ ឆេន ហៅ ឈក ចាប់ខ្លួនបញ្ជូនទៅ ឃុំខ្លួនក្នុងមន្ទីរបរិស្ថានខេត្តកាលពីដើមខែកញ្ញាឆ្នាំ២០២៣ ខណៈពួកលោកមិនបានប្រព្រឹត្តកំហុសដូចការចោទប្រកាន់ឡើយ។
លោកអះអាងថា លោកបានបង់លុយឱ្យមន្ត្រីបរិស្ថានម្នាក់ៗ ២ ពាន់ដុល្លារ សរុប ៤ ពាន់ដុល្លារ ក៏ប៉ុន្តែមន្ត្រីបរិស្ថានបែរជាសរសេររបាយការណ៍បំភ្លៃ ក្នុងលិខិតថា ពួកគេទទួលប្រាក់ពីពួកលោកតែជិត ៨ លានរៀលប៉ុណ្ណោះ។
លោក វ៉ែន វុទ្ធី៖«គេយកម្នាក់៨លាន បើយើងមិនឱ្យទេ គេចាប់ញាត់គុកហ្នឹងហើយ តែមុននឹងឡើងតុលាការនិងជាប់គុក ខ្ញុំក៏ចង់ឱ្យមានយុត្តិធម៌ និងមានគេដឹងឮខ្លះផង ថាយើងមិនបានខុសផងគេចាប់ដាក់គុកដែរ»។
កន្លងទៅ ប្រធានដែនជម្រកសត្វព្រៃឡង់ខេត្តស្ទឹងត្រែង លោក ទូច វិចិត្រ បានសរសេរលិខិតបំភ្លឺថ្លែងការពារ ប្រធានមន្ទីរបរិស្ថានខេត្តស្ទឹងត្រែង លោកស្រេង ជាហេង ដែលរងការចោទថា ដឹកនាំមន្ត្រីក្រោមឱវាទជំរិតទារលុយពីពលរដ្ឋ ២នាក់ ចំនួន ៤ពាន់ដុល្លារ ជាថ្នូរដោះលែងឱ្យរួចខ្លួនវិញ។
លោក ទូច វិចិត្រ អះអាងថា ជនសង្ស័យ ២នាក់ ឈ្មោះ វែន វុទ្ធី និងឈ្មោះ វ៉ន ថា ត្រូវបានមន្ត្រីជំនាញពិន័យអន្តរការណ៍បង្គាប់ឱ្យបង់ប្រាក់ជិត ៨លានរៀល (៧.៩៧០.០០០) ឬស្មើជិត ២ពាន់ដុល្លារអាមេរិក ដើម្បីយកថវិកាចូលរដ្ឋ ផ្អែកតាមច្បាប់ និងអប់រំណែនាំធ្វើកិច្ចសន្យា។
វិទ្យុអាស៊ីសេរីមិនទាន់អាចទាក់ទង សុំការបំភ្លឺរឿងនេះពីប្រធានមន្ទីរបរិស្ថានខេត្តស្ទឹងត្រែង លោក ស្រេង ជាហេង បាននៅឡើយទេនៅថ្ងៃទី៨ តុលា ដោយសារទូរស័ព្ទហៅចូល តែគ្មានអ្នកលើក។ រីឯមន្ត្រីបរិស្ថាន លោក អ៊ីវ ឆេន ហៅ ឈក ក៏មិនទាន់អាចទាក់ទងបានដែរនៅថ្ងៃដដែលនេះ។
ជុំវិញរឿងនេះ មន្ត្រីពង្រឹងសិទ្ធិអំណាចសហគមន៍មូលដ្ឋាននៃសមាគមអាដហុក លោក ប៉ែន ប៉ុណ្ណារ៍ ពន្យល់ថា ប្រសិនបើមន្ត្រីបរិស្ថានជំរិតទារលុយពីពលរដ្ឋ គឺជាអំពើពុករលួយដែលទាមទារឱ្យអាជ្ញាធរខេត្តត្រូវស៊ើបអង្កេត និងស្រាវជ្រាវករណីទាំងអស់នេះឱ្យច្បាស់លាស់ ដើម្បីផ្តល់យុត្តិធម៌ជូនពលរដ្ឋ ៖
លោក ប៉ែន ប៉ុណ្ណារ៍៖«ការជំរិតទារប្រាក់ប្រជាពលរដ្ឋវាស្ថិតនៅក្នុងអំពើពុករលួយ បើតាមផ្លូវច្បាប់មន្ត្រីទាំងនោះត្រូវតែទទួលខុសត្រូវនៅមុខច្បាប់ ហើយអ្នកទីបីដែលឃើញហេតុការណ៍នោះគួរតែប្ដឹងទៅតំណាងអយ្យការចាប់ពួកគេទៅតាមផ្លូវច្បាប់»។
មន្ត្រីសង្គមស៊ីវិលរូបនេះបារម្ភថា ប្រសិនបើរដ្ឋាភិបាលមិនពន្លឿនដោះស្រាយបញ្ហានេះទេ មន្ត្រីខិលខូចនៅតែធ្វើបាបពលរដ្ឋស្លូតត្រង់តាមទំនើងចិត្ត និងប្រព្រឹត្តអំពើពុករលួយដុះស្លែ នាំឱ្យកើនឡើងវប្បធម៌និទ្ទណ្ឌភាពឬទម្លាប់ឱ្យជនល្មើសរួចទោស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។