សកម្មជនបរិស្ថាន រិះគន់អាជ្ញាធរខេត្តកែបថា អសមត្ថភាពក្នុងការទប់ស្កាត់បញ្ហាបង្ហូរទឹកស្អុយចូលសមុទ្រនៅម្ដុំច្រកចូលសិលាចាំប្ដី ដែលធ្វើឱ្យប៉ះពាល់ដល់ភ្ញៀវទេសចរណ៍មកលេងកម្សាន្តនៅទីនោះ។ ប៉ុន្តែអាជ្ញាធរខេត្តកែប បដិសេធលើការចោទប្រកាន់នេះ។
សកម្មជនបរិស្ថាន និងប្រជាពលរដ្ឋមួយចំនួនរិះគន់អាជ្ញាធរខេត្តកែបថា បណ្ដែតបណ្ដោយឱ្យមានបញ្ហាសំរាមនៅផ្សារក្ដាម និងការបង្ហូរទឹកស្អុយចូលសមុទ្រ ដែលហូរចេញពីសណ្ឋាគារ។ ពួកគាត់ថា ទឹកស្អុយ និងសំរាមទាំងនោះ នឹងប៉ះពាល់ដល់សុខភាពពលរដ្ឋ ដែលទៅលេងកម្សាន្តនៅទីនោះ។ ការលើកឡើងនេះ គឺក្រោយពីពួកគាត់បានទៅឃើញផ្ទាល់នៅទីនោះ កាលពីថ្ងៃ១៩ ខែកុម្ភៈ។
វីដេអូ និងរូបភាពដែលវិទ្យុអាស៊ីសេរីទទួលបានកាលពីថ្មីៗនេះ បង្ហាញថា ការបង្ហូរទឹកស្អុយចេញពីលូចូលទៅសមុទ្រនោះកំពុងកើតមាននៅទីតាំងជាប់នឹងច្រកចូលរូបសំណាកស្រីស ឬដែលគេតែងតែហៅតៗគ្នាថា រូបសំណាកសិលាចាំប្ដី។ ទឹកស្អុយទាំងនោះមានពណ៌ខ្មៅ រួមដោយកាកសំណល់សំរាមប្លាស្ទិក បានអណ្ដែតលើមាត់សមុទ្រ។ ទឹកស្អុយហូរចូលសមុទ្រនេះ មានចម្ងាយប្រហែល៥ម៉ែត្រពីកន្លែងដែលពលរដ្ឋលេងទឹក។ ចំណែកផ្សារក្ដាមដែលមានទីតាំងជាប់នៅមាត់សមុទ្រដែរនោះ ទីនោះក៏មានសំរាមប្លាស្ទិកអណ្ដែតតាមទឹក និងលើដីពាសពេញយ៉ាងអនាធិបតេយ្យ ដោយពុំមានការដោះស្រាយពីអាជ្ញាធរឡើយ។
សកម្មជនបរិស្ថាននៃចលនាមាតាធម្មជាតិ កញ្ញា ធួន ស្រី ពៅ ដែលបានចុះដោយផ្ទាល់ដើម្បីពិនិត្យមើលពីស្ថានភាពនៅទីនោះកាលពីថ្មីៗនេះ ប្រាប់វិទ្យុអាស៊ីសេរីនៅថ្ងៃទី២១ ខែកុម្ភៈថា កញ្ញាព្រួយបារម្ភពីសុខភាពពលរដ្ឋដែលទៅលេងទឹកកម្សាន្តនៅក្នុងសមុទ្រខេត្តកែប នាពេលបច្ចុប្បន្ន។ កញ្ញាបានឃើញមានការបង្ហូរទឹកស្អុយចូលសមុទ្រចេញពីសណ្ឋាគារក្បែរនោះយ៉ាងអនាធិបតេយ្យ៖
«យើងស្ទើរតែអត់ជឿថា ស្ថានភាពឆ្នេរសមុទ្រមានពណ៌ខ្មៅដល់ថ្នាក់ហ្នឹង។ ខ្ញុំមានការព្រួយបារម្ភមែនទែន ដោយសារតែម្ខាងនៃគម្លាតហ្នឹង ប្រជាពលរដ្ឋគាត់លេងបែបសប្បាយរីករាយ គាត់អត់បាន ជារឿងមួយដែលគាត់អត់បានគិតមកលើបញ្ហាផ្សេងៗដែល ការបង្ហូរលូទឹកស្អុយចូលឬក៏ស្ថានភាពទឹកម្ខាងទៀតដែលវានៅខុសពីកន្លែងដែលគាត់លេងវាអាចបង្កជាជំងឺផ្សេងៗទៅដល់ស្បែករបស់គាត់ទៅសុខភាពរបស់គាត់ជាច្រើនហ្នឹង»។
ខេត្តកែបជាខេត្តដែលតូចជាងនៅកម្ពុជា។ ភ្ញៀវទេសចរដែលមកលេងតែងតែងូតទឹកសមុទ្រ ដើរតាមឆ្នេរខ្សាច់ និងបរិភោគគ្រឿងសមុទ្រស្រស់ៗជាដើម។ របាយការណ៍រដ្ឋបាលខេត្តបង្ហាញថា ភ្ញៀវទេសចរមកលេងកម្សាន្តក្នុងមួយឆ្នាំៗ កាលពីឆ្នាំ ២០២២ បង្ហាញថា ជាង៩ម៉ឺននាក់ (៩៦,៤៧១នាក់)។
ពលរដ្ឋមួយរូបលើកឡើងថា លោកក៏បារម្ភពីបញ្ហាបង្ហូរទឹកស្អុយចូលសមុទ្រនេះដែរ។ លោកថា បញ្ហានេះប្រជាពលរដ្ឋធ្លាប់ស្នើឱ្យអាជ្ញាធរពាក់ព័ន្ធទប់ស្កាតម្ដងរួចមកហើយ ប៉ុន្តែមិនឃើញមានអាជ្ញាធរដោះស្រាយឱ្យបានត្រឹមត្រូវនោះទេ។ លោកស្នើដល់អាជ្ញាធរចាត់វិធានការទប់ស្កាតឱ្យបានឆាប់ ដើម្បីជួយកែលម្អតំបន់ទេសចរណ៍មាត់សមុទ្រនេះ ឱ្យស្រស់ស្អាតឡើងវិញ៖
«ចំពោះការបង្ហូរទឹកស្អុយចូលទៅក្នុងសមុទ្រនេះ ខ្ញុំគិតថាវាប៉ះពាល់ដល់អ្នកទេសចរណ៍ ព្រោះវាធ្វើឱ្យទឹកមាននូវមេរោគ ទឹកវាអត់ស្អាត អ្នកងូតទឹក ទៅលេងទឹកលេងអ៊ីមានរោគរមាសស្បែក។ អ៊ីចឹងអាជ្ញាធរគួរតែចាត់វិធានការជាបន្ទាន់ចំពោះការបង្ហូរទឹកស្អុយចូលទៅក្នុងមាត់សមុទ្រនេះ»។
ឆ្លើយតបរឿងនេះ អភិបាលក្រុងកែប លោក ខេង យ័ន ប្រាប់វិទ្យុអាស៊ីសេរីថា ការចោទប្រកាន់របស់សកម្មជនបរិស្ថាន ដែលថាមានការបង្ហូរទឹកស្អុយចូលសមុទ្រនោះមិនមែនជាការពិតនោះទេ។លោកថា អាជ្ញាធរបានយកចិត្តទុកដាក់ទប់ស្កាត់បានត្រឹមត្រូវអស់ហើយ។ ប៉ុន្តែចំពោះបញ្ហាសំរាមប្លាស្ទិកវិញ លោកថា អាចនឹងមានខ្លះ ដោយសារតែភ្ញៀវទេសចរដែលមកលេងកម្សាន្ត មួយចំនួន មិនសូវយល់ដឹងពីរបៀបទុកដាក់សំរាមឱ្យបានត្រឹមត្រូវ៖
«តាមពិតទៅនៅក្នុងឆ្នេរនោះមិនមែនការបង្ហូរទឹកស្អុយចូលទេ ប្រហែលជាគាត់ឃើញទឹកដែលកក់នៅតាមធ្លុងហ្នឹងវា កាលមុនមានស្លឹកកាប៉ាង គឺវានៅយូរទៅវាអាចមើលឃើញខ្មៅនៅលើតាមធ្លុងទេ ប៉ុន្តែមិនមានការបង្ហូរទឹកស្អុយចូលទៅសមុទ្រទេ។ ហើយនិយាយរួមអត់មានលូបង្ហូរចូលសមុទ្រទេពាក់ព័ន្ធទឹកស្អុយហ្នឹង ខ្ញុំអត់ដឹងថាគាត់ឃើញទឹកស្អុយនឹងហូរពីណាទៅ ដោយសារក្នុងនាមខ្ញុំជាអាជ្ញាធរ គឺមិនមានទេ គឺយើងច្បាស់ណាស់ អត់មានការបង្ហូរទឹកស្អុយចូលសមុទ្រ»។
ថ្វីដ្បិតមានការអះអាងបែបនេះពីសំណាក់អាជ្ញាធរក្ដី ក៏សកម្មជនបរិស្ថានឱ្យដឹងថា នៅតំបន់ដែលមានការបង្ហូរទឹកស្អុយចូលសមុទ្រនោះ ទឹកបានប្រែពណ៌ខ្មៅខ្លាំង និងមានក្លិនស្អុយ ខណៈដែលស្ថានភាពដីខ្សាច់ដែលនៅជាប់នឹងមាត់សមុទ្រវិញ ធ្លាប់តែមានពណ៌សបានក្លាយជាពណ៌ជាខ្មៅ។ សកម្មជនបរិស្ថានអះអាងទៀតថា មានប្រជាពលរដ្ឋមួយចំនួនបាននាំគ្នាទៅនេសាទត្រី នៅក្បែរកន្លែងបង្ហូរទឹកស្អុយនោះ ដោយពួកគាត់អះអាងថាត្រីភាគច្រើនចូលចិត្តមករកស៊ីទីនោះ ព្រោះមានទឹកស្អុយ និងកាកសំណល់ដែលហូរចេញពីលូ។
ជុំវិញរឿងនេះ សកម្មជនបរិស្ថានលោក សាន់ ម៉ាឡា លើកឡើងថា បញ្ហានេះ គឺជាបញ្ហាមួយដែលបានកើតឡើងស្ទើរតែគ្រប់កន្លែងនៅតំបន់ទេសចរណ៍បែបសមុទ្រ ក្នុងប្រទេសកម្ពុជា។ លោកកត់សម្គាល់ថា អាជ្ញាធរពាក់ព័ន្ធមិនបានចាត់ទុកបញ្ហាបង្ហូរទឹកស្អុយចូលទន្លេ ឬសមុទ្រ ជាបញ្ហាអាទិភាពនោះទេ ខណៈដែលកម្ពុជាទទួលបានផលប្រយោជន៍ជាច្រើនពីវិស័យទេសចរណ៍នេះ។ លោកថា អាជ្ញាធរគួរតែពិចារណាដោះស្រាយបញ្ហានេះឱ្យមានប្រសិទ្ធភាព ដូចអ្វីដែលអាជ្ញាធរខេត្តព្រះសីហនុ បានវាយកម្ទេចចោលការសាងសង់សំណងរំលោភលើដីឆ្នេរសមុទ្រកន្លងទៅថ្មីៗនេះ៖
«បញ្ហាសំរាម ប្លាស្ទិក និងការបង្ហូរទឹកកង្វក់ចូលនៅតែបន្តកើតឡើងដែលមានជាការជះឥទ្ធិពលអាក្រក់ដល់ការមកលេងរបស់ភ្ញៀវទេសចរណ៍ជាតិ និងអន្តរជាតិ ហើយក៏ជាការបង្ហូរនូវភាពការខ្វះការទទួលខុសត្រូវរបស់មន្ទីរពាក់ព័ន្ធ ជាពិសេសអាជ្ញាធរខេត្តទាំងមូលទាំងម្ដង»។
ការបង្ហូរទឹកកង្វក់នៅតំបន់ទេសចរណ៍ឆ្នេរសមុទ្រនេះបានកើតមានស្ទើរតែគ្រប់កន្លែង ជាពិសេសហូរចេញពីសណ្ឋាគារធំៗ និងផ្ទះលំហែរបស់ក្រុមអ្នកមានលុយមានអំណាច។ ជាឧទាហរណ៍ដូចជា នៅខេត្តកំពត ព្រះសីហនុ និងខេត្តកោះកុងជាដើម។ ថ្វីដ្បិតបញ្ហាទាំងអស់នេះ សកម្មជនបរិស្ថាននៃចលនាមាតាធម្មជាតិធ្លាប់ធ្វើវីដេអូជាញឹកញាប់ស្នើឱ្យអាជ្ញាធរមូលដ្ឋាន ដោះស្រាយជាហូរហែក៏ដោយ ក៏សកម្មជនបរិស្ថានទាំងនោះ មិនត្រូវបានអាជ្ញាធរស្វាគមន៍នោះឡើយ ផ្ទុយទៅវិញអាជ្ញាធរបែរជាចោទប្រកាន់ពួកគាត់ថា ជាអ្នកធ្វើវីដេអូបំពុលសង្គម ដែលមានចេតនាចង់ធ្វើឱ្យប៉ះពាល់មុខមាត់ លោកនាយករដ្ឋមន្ត្រី ហ៊ុន សែនទៅវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។