ក្រុមកម្មករនៅក្រុមហ៊ុនប្រមូលសំរាមស៊ីនទ្រី (Cintri) ជួបទុក្ខផ្នែកជីវភាពជាខ្លាំងក្រោយពេលក្រុមហ៊ុនបញ្ចប់កិច្ចសន្យាការងារ។ ការលើកឡើងនេះបន្ទប់ពីក្រុមហ៊ុនថ្មីចំនួនពីរដែលទទួលសិទ្ធិប្រមូលសំរាមចំនួន ១០ខណ្ខ នៅរាជធានីភ្នំពេញមិនទទួលក្រុមកម្មករមួយចំនួនឱ្យចូលធ្វើការ ដែលផ្ទុយពីការអះអាងរបស់អាជ្ញាធររាជធានីភ្នំពេញកន្លងមក។
ក្រុមកម្មករលើកឡើងថា ក្រុមហ៊ុនថ្មីដែលទទួលបានសិទ្ធិប្រមូលសំរាមបន្តពីក្រុមហ៊ុនស៊ីនទ្រីបញ្ជាក់ថា មានកម្មករគ្រប់គ្រាន់ហើយ។ ពួកគាត់ព្រួយបារម្ភ បាត់បង់ការងារដែលធ្វើឱ្យប៉ះពាល់ដល់ជីវភាពគ្រួសារ។
អ្នកបើកឡានប្រមូលសំរាម លោក ឈុន នី រៀបរាប់ប្រាប់អាស៊ីសេរីថា លោកបាត់បង់ការងារ ក្រោយពេលក្រុមហ៊ុនស៊ីនទ្រីបានបញ្ចប់កិច្ចសន្យាការងារ កាលពីដើមខែកក្កដា ហើយលោកក៏បានដាក់ពាក្យសុំចូលបម្រើការងារនៅក្រុមហ៊ុនមីហ្ស៊ូដា (Mizuda) និងក្រុមហ៊ុនប្រាំបីរយ ស៊ុបភើរ (800 Super) ប៉ុន្តែក្រុមហ៊ុនទាំងពីរបដិសេធ ដោយខាងក្រុមហ៊ុនលើកហេតុផលថា មានកម្មករបម្រើការងាររួចហើយ។ លោកខកចិត្តចំពោះក្រុមហ៊ុនទាំងពីរមិនជ្រើសរើសកម្មករដែលធ្លាប់បម្រើការងារនេះតាមការសន្យារបស់អាជ្ញាធរកន្លងមក៖ «ខ្ញុំសំណូមពរដល់រដ្ឋាភិបាលដែលមានតួនាទីកាតព្វកិច្ចចាត់ចែងក្រុមហ៊ុនបំបែកក្រុមហ្នឹងបីសិចទ័រដែលដូចគាត់រៀបចំហ្នឹងឱ្យពួកខ្ញុំធ្វើការវិញផងបើដោះដូរៗតែក្រុមហ៊ុនបានហើយកុំមកដោះដូរពួកខ្ញុំអី ពីព្រោះពួកខ្ញុំមិនដឹងអីទេដឹងតែធ្វើការដាច់ខែបើកលុយ»។
លោក ឈុន នី ប្រាប់ថា លោកបានចូលបម្រើការងារប្រមូលសំរាមនៅក្រុមហ៊ុនស៊ីនទ្រី រយៈពេលជាង១១ឆ្នាំ ដែលលោកនិងកម្មករផ្សេងទៀតត្រូវប្រឈមបញ្ហាសុខភាព គ្រោះថ្នាក់ចរាចរណ៍ និងទទួលរងការគៀបសង្កត់ពីក្រុមហ៊ុន ប៉ុន្តែពួកគាត់មិនរាថយ ឬនឿយហត់នឹងការងារបែបនេះទេ។ លោកត្អូញត្អែរថា ស្ថានភាពជំងឺកូវីដ១៩ និងបាត់បង់ការងារបានរុញច្រានជីវភាពគ្រួសារលោកខ្វះចំណីអាហារហូបចុក បំណុលធនាគារ ៣៥០ដុល្លារក្នុងមួយខែ និងថ្លៃផ្ទះជួលជាង ៤០ដុល្លារក្នុងមួយជាដើម៖ «បញ្ហាខ្លាំងណាស់ពាក្យថា អនាម័យស៊ីនទ្រីហ្នឹងទីមួយបើបោសសំរាមមិនដឹងក្នុងផ្ទះហ្នឹងគេផ្ទុកអ្វី សារធាតុអីខ្លះទេប្រឈមគ្រប់យ៉ាង ទីពីរនោះគឺធ្វើការតាមបណ្តាលផ្លូវសាធារណៈមានឡានមានម៉ូតូ ប្រឈមគ្រោះថ្នាក់ចរាចរណ៍ជាក់ស្តែងបុកចូលគូថឡាន បាក់ឆ្អឹងបែកក្បាលហើយចាប់ថងសំរាមដែលដាក់គូថឡានមានមុតម្ជុលចាក់ថ្នាំគេក៏មាន មុតអំបែងក៏មានដើរមុខផ្ទះគេឆ្កែខាំក៏មានបាទ ប្រឈមគ្រប់សព្វបែបយ៉ាង»។
ស្រដៀងគ្នានេះដែរ កម្មករប្រមូលសំរាម ម្នាក់សុំមិនបញ្ចេញឈ្មោះប្រាប់ថា លោកបានចូលធ្វើការនៅក្រុមហ៊ុនស៊ីនទ្រីជាង ១០ឆ្នាំនេះបានជួយថែរក្សាបរិស្ថានទីក្រុងដោយមិនខ្លាចនឿយហត់ ក្លិន និងគ្រោះថ្នាក់នោះទេ។ លោកសោកស្តាយចំពោះក្រុមហ៊ុនបញ្ចប់កិច្ចសន្យាការងារ ព្រោះពេលនេះជីវភាពគ្រួសារលោកកំពុងប្រឈមបញ្ហារងទុក្ខលំបាក ចំណែកប្រពន្ធលោកទើបសម្រាលកូនរួចទៀត៖ «ជួយបរិស្ថានបានច្រើនជួយសំអាតទីក្រុងបានច្រើនមិនគិតពីការងារមិនថា គគ្រិចមិនថាស្អុយគគ្រក់ទេ សំខាន់ឱ្យតែពួកខ្ញុំមានការងារធ្វើអ៊ីចឹង ខាងសាលាក្រុងឮថាមិនឱ្យពួកខ្ញុំបាត់បង់ការងារដល់ពេលឥឡូវចុងក្រោយមក ពួកខ្ញុំបាត់បង់ការងារដដែល»។
ស្រដៀងនេះគ្នាដែរ អ្នកបើកឡានប្រមូលសំរាមសុំមិនបញ្ចេញឈ្មោះប្រាប់ថា លោកបានធ្វើការងារ នៅក្រុមហ៊ុនប្រាំបីរយ ស៊ុបភើរ (800 Super) ដោយបង្ខំចិត្តព្រោះខ្លាចបាត់បង់ការងារ ដោយសារក្រុមហ៊ុនថ្មីនេះផ្តល់កិច្ចសន្យាការងាររយៈពេលខ្លី និងមិនផ្តល់ព័ត៌មានពីចំនួនប្រាក់ខែទេ ដែលប្រឈមការដកចេញនិងខាតបង់អត្ថប្រយោជន៍ពីការងារជាដើម។ លោកថា ស្ថានភាពរីករាលដាលជំងឺកូវីដ១៩នេះ កម្មករប្រមូលសំរាមប្រឈមឆ្លងជំងឺ ប៉ុន្តែពួកគាត់ ធ្វើការងារប្តូរយកប្រាក់សម្រាប់ដោះស្រាយជីវភាពគ្រួសារ។ លោកក៏ស្នើឱ្យរដ្ឋបាលរាជធានីភ្នំពេញចុះពិនិត្យមើលលក្ខខណ្ឌការងារនៅក្រុមហ៊ុនប្រមូលសំរាមថ្មី នេះដើម្បីការពារសិទ្ធិស្របច្បាប់របស់កម្មករ៖ «អត់មានសហជីពទេចូលក្រុមហ៊ុនគេហ្នឹង គេប្រើតៃកុងឡានគ្រប់គ្រងកម្មករអ៊ីចឹងដំណើរការបើគ្រប់គ្រងមិនបានទេ គេបញ្ឈប់យើង ចូលក្រុមហ៊ុនថ្មីព្រួយបារម្ភដែរហ្នឹង បញ្ហាសុខភាពសម័យនេះសម័យកូវីដយើងដើរយកតាមផ្ទះយើងខ្លាចដែរហ្នឹង ប្រឈមនឹងជំងឺដែរហ្នឹងធ្វើទៅបើយើងក្រខ្សត់អត់មានលុយផងចេះតែទ្រាំទៅ»។
ក្រុមហ៊ុនប្រមូលសំរាមស៊ីនទ្រី បានបញ្ឈប់កម្មករជាងមួយពាន់(១.០០០) នាក់ កាលពីថ្ងៃទី១ កក្កដា ក្រោយពេលផ្ទេរសិទ្ធិប្រមូលសំរាមតាមខណ្ឌចំនួន ១០ឲ្យទៅក្រុមហ៊ុនចំនួន២ គឺក្រុមហ៊ុនមីហ្ស៊ូដា (Mizuda) និងក្រុមហ៊ុនប្រាំបីរយ ស៊ុបភើរ (800 Super)។
វិទ្យុអាស៊ីសេរីមិនអាចទាក់ទងអភិបាលរាជធានីភ្នំពេញ លោក ឃួង ស្រេង និងនាយករងក្រុមហ៊ុនស៊ីនទ្រី លោក សុខ ហ៊ួត ដើម្បីឆ្លើយតបជុំវិញដំណោះស្រាយ និងសំណើរបស់កម្មករ នេះបានទេ នៅថ្ងៃទី៩ កក្កដា ដោយទូរស័ព្ទចូលពុំមានអ្នកទទួល។ ប៉ុន្តែអភិបាលរងរាជធានីភ្នំពេញ កើត ឆែ ប្រាប់សារព័ត៌មានក្នុងស្រុកថា រដ្ឋបាលរាជធានីភ្នំពេញពុំអាចសន្យាធានាការងារដល់កម្មករទៀតនោះទេ។ លោកសុំឲ្យកម្មករដែលមិនទាន់មានការងារធ្វើ អាចទៅដាក់ពាក្យនៅក្រុមហ៊ុនថ្មីបាន តែការសម្រេចយ៉ាងណា គឺស្ថិតលើលក្ខខណ្ឌចង់បានរបស់ក្រុមហ៊ុនទាំងនោះ។
ទោះជាយ៉ាងណាក្រុមកម្មករអះអាងថា អាជ្ញាធររាជធានីភ្នំពេញហាក់ព្រងើយកន្តើយសម្របសម្រួលអំពីបញ្ហានេះ ព្រោះអាជ្ញាធរមិនបានឆ្លើយតបតាមការសន្យារបស់ខ្លួនកន្លងមកនោះទេ។ ពួកគាត់ទទូចឱ្យអាជ្ញាធរពាក់ព័ន្ធគួរចេញមុខដោះស្រាយបញ្ហានេះ ដើម្បីធានានូវជីវភាពពលរដ្ឋអំឡុងពេលវិបត្តិជំងឺកូវីដ១៩។
ជុំវិញរឿងនេះ ប្រធានសហជីពវិស័យទេសចរណ៍នៃក្រុមហ៊ុនស៊ីនទ្រី លោក កៅ សាវ៉ាត លើកឡើងថា កន្លងមកកម្មករបានតស៊ូរាប់ឆ្នាំដោយប្រឈមគ្រោះថ្នាក់ ដោយមិនរត់ចោលការងារឡើយ។ លោកសោកស្តាយចំពោះអាជ្ញាធររាជធានីភ្នំពេញមិនស្វែងរកដំណោះស្រាយជូនកម្មករ។ មន្ត្រីសហជីពរូបនេះបញ្ជាក់ថា កម្មករដែលប្តូរទៅក្រុមហ៊ុនថ្មីត្រូវធ្វើការច្រើនជាងមុនចំណែកលក្ខខណ្ឌការងារក៏មិនច្បាស់លាស់ ដែលធ្វើឱ្យពួកគាត់ព្រួយបារម្ភពីសុវត្ថិភាពការងារដោយសារក្រុមហ៊ុនមិនទាន់មានសហជីពការពារសិទ្ធិកម្មករនៅឡើយ៖ «វាដូចអស់សង្ឃឹមត្រង់ថា ខាងសាលាក្រុងគេអ្នកធានាអះអាងហើយឥឡូវបែរលែងចេញមុខជួយហើយ ពួកគាត់អស់សង្ឃឹមកន្លែងហ្នឹង ក្នុងនាមប្រធានសហជីព គឺខ្ញុំចង់បានឱ្យសាលាក្រុងក៏ដូចរាជរដ្ឋាភិបាលជួយដោះស្រាយជូនកម្មករដែលគាត់កំពុងអត់មានការងារធ្វើ»។
កាលពីឆ្នាំ២០១៩ លោកនាយករដ្ឋមន្ត្រី ហ៊ុន សែន បានបញ្ជាឲ្យអាជ្ញាធរដកហូតសិទ្ធិប្រតិបត្តិការប្រមូលសំរាមពីក្រុមហ៊ុនស៊ីនទ្រី មកឲ្យរដ្ឋគ្រប់គ្រងដោយលោកយល់ថា សេវាកម្មរបស់ក្រុមហ៊ុននេះមានភាពខ្វះចន្លោះច្រើន។ លោកអះអាងថា រាជធានីភ្នំពេញមានសំរាមជាងបីពាន់(៣.០០០)តោន ក្នុងមួយថ្ងៃ។ ដូច្នេះលោកចង់ឲ្យសេវាកម្មសម្អាត និងប្រមូលសំរាមក្នុងទីក្រុងមានភាពល្អប្រសើរជាងមុន តាមរយៈការបែងចែកសិទ្ធិប្រមូលសំរាមទៅឱ្យក្រុមហ៊ុនផ្សេងទៀត។
ក្រុមកម្មករលើកឡើងថា រាប់ឆ្នាំមកនេះពួកគាត់បានជួបរឿងរ៉ាវជាច្រើនអំឡុងពេលបំពេញការងារជាកម្មកររទេះ បោស កើប ប្រមូល និងបើកបររថយន្ត ដែលពេលខ្លះពួកគាត់ត្រូវប្រឈមមុខគ្រោះដល់សុខភាព រងបួសដោយសារកាកសំណល់ និងគ្រោះថ្នាក់ចរាចរណ៍ជាដើម។ លើសពីនេះពួកគាត់បានបំពេញការងារទាំងយប់ថ្ងៃដោយមិនខ្លាចនឿយហត់ និងអត់ធ្មត់ដើម្បីសង្គមនិងសុខភាពប្រជាពលរដ្ឋ។ ពួកគាត់ស្នើឱ្យអាជ្ញាធរជួយដោះស្រាយទុក្ខលំបាកទាំងនេះដើម្បីធានានូវការយកចិត្តទុកដាក់ពីសំណាក់រដ្ឋាភិបាលចំពោះប្រជាពលរដ្ឋដែលកំពុងរងគ្រោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។