ពលរដ្ឋរិះគន់ការបង្ហូរទឹកកខ្វក់ចូលក្នុងព្រែកកំពត បណ្ដាលឲ្យទឹកមានក្លិនមិនល្អ ។ ពួកគេស្នើដល់រដ្ឋបាលខេត្តកំពត និងអាជ្ញាធរពាក់ព័ន្ធ រៀបចំប្រព័ន្ធបង្ហូរទឹកកខ្វក់ឲ្យបានត្រឹមត្រូវ ដើម្បីទាក់ទាញភ្ញៀវទេសចរ។
ពលរដ្ឋមួយចំនួនរិះគន់អាជ្ញាធរខេត្តកំពត អសមត្ថភាពគ្រប់គ្រងការបង្ហូរទឹកកខ្វក់ចូលព្រែកកំពត ត្រង់ចំណុចចន្លោះស្ពានឥន្ទធនូ និងស្ពានថ្មថ្មី ដែលធ្វើឲ្យទឹកនៅតំបន់នោះ ប្រែជាពណ៌ខ្មៅ និងមានក្លិនមិនល្អ។
សកម្មជនចលនាមាតាធម្មជាតិ កញ្ញា មាន លីសា ប្រាប់វិទ្យុអាស៊ីសេរីនៅថ្ងៃទី១០ មេសា ថា ក្រោយពីកញ្ញាបានឃើញស្ថានភាពទឹកកខ្វក់បានហូរចូលដងព្រែកកំពត កញ្ញាបារម្ភពីសុខភាពពលរដ្ឋ ដែលរស់នៅក្នុងតំបន់នោះ ស្របពេលពួកគេស្រូបយកក្លិនមិនល្អជារៀងរាល់ថ្ងៃ។
កញ្ញា មាន លីសា៖ «នេះជារឿងធម្មតានៅពេលដែលរដ្ឋយើង អត់ដែលយកចិត្តទុកដាក់ជាមួយប្រព័ន្ធសាធារណៈឲ្យបានម៉ឹងមាត់ អ៊ីចឹងទៅធ្វើឲ្យកាកសំណល់ពីផ្ទះបាយ ដូចជាប្រភពទឹកដែលត្រូវបានបង្ហូរមក មិនមានអាងចម្រោះ ធ្វើឲ្យប៉ះពាល់ដល់ប្រភពទឹក»។
វីដេអូ និងរូបភាព ដែលវិទ្យុអាស៊ីសេរីទទួលបានថ្មីៗនេះ បង្ហាញថា ការបង្ហូរទឹកកខ្វក់ពណ៌ខ្មៅចូលដងព្រែកកំពត ស្ថិតនៅចន្លោះស្ពានឥន្ទធនូ និងស្ពានថ្មថ្មីក្នុងក្រុងកំពត ដែលមានចម្ងាយប្រមាណ១គីឡូម៉ែត្រពីសាលាខេត្តកំពត។
វិទ្យុអាស៊ីសេរី នៅមិនទាន់អាចទាក់ទងអភិបាលខេត្តកំពត លោក ម៉ៅ ធនិន ដើម្បីសុំការអត្ថាធិប្បាយជុំវិញបញ្ហានេះ បាននៅឡើយទេ នៅថ្ងៃទី១១ មេសា។
រដ្ឋបាលខេត្តកំពត បានរៀបចំហេដ្ឋារចនាសម្ព័ន្ធ និងកែលំអសោភ័ណភាពតាមបណ្ដោយមាត់ព្រែកកំពត ដោយកសាងរូបសំណាកសេះសមុទ្រ បញ្ឈរខ្លួនត្រង់ឡើងលើមានកម្ពស់៨ម៉ែត្រ បាញ់ទឹកតាមមាត់ និងចាក់ខ្សាច់បំពេញតាមមាត់ព្រែក ដើម្បីទាក់ទាញភ្ញៀវទេសចរ។
អភិបាលខេត្តកំពត លោក ម៉ៅ ធនិន ដែលត្រូវជាក្មួយប្រសាររបស់លោក ហ៊ុន សែន បានព្យាយាមបង្ហាញពីការយកចិត្តទុកដាក់ចុះពិនិត្យការដ្ឋានសាងសង់រូបសំណាកសេះសមុទ្រនេះ។
ផ្ទុយទៅវិញ អាជ្ញាធរខេត្តជាប់មាត់សមុទ្រនេះ ហាក់មិនបានធុំក្លិនមិនល្អ បណ្ដាលមកពីការបង្ហូរទឹកកខ្វក់ចូលដងព្រែកកំពតនោះទេ ដែលការបង្ហូរនោះនៅមិនឆ្ងាយពីសាលាខេត្តកំពតឡើយ។
ចំណែកឯនៅត្រើយម្ខាងទៀត ទល់មុខសាលាខេត្តកំពត រដ្ឋបាលខេត្ត នៅមិនទាន់រៀបចំសណ្ដាប់ធ្នាប់ឲ្យបានល្អប្រសើរនោះទេ ដោយនៅមានសំរាមរាយប៉ាយ និងមានសំណង់រឹងតាមមាត់ព្រែក ដែលភាគច្រើនជាសណ្ឋាគារ ឬភោជនីយដ្ឋាន។
ប្រធានសហព័ន្ធសហជីពកម្មករនិយោជិតវិស័យទេសចរណ៍សេវាកម្មកម្ពុជា (CTSWF) លោក ម៉ម រិទ្ធី មានប្រសាសន៍ថា កន្លងទៅ ខេត្តនៅជាប់ឆ្នេរសមុទ្រមួយចំនួន ក៏មានការបង្ហូរទឹកកខ្វក់ចូលប្រភពទឹកបែបនេះដែរ។ លោកទទូចដល់ស្ថាប័នពាក់ព័ន្ធ គ្រប់គ្រងសំរាម និងទឹកកខ្វក់ឲ្យបានត្រឹមត្រូវ។
លោក ម៉ម រិទ្ធី៖ «រូបភាព(សេះសមុទ្រ)ហ្នឹងកើតឡើង ខ្ញុំគិតថា ខ្ញុំខាងវិស័យទេសចរណ៍ ខ្ញុំអបអរសាទរលើការច្នេះប្រឌិត ការបង្កើតនូវអ្វីថ្មី ដើម្បីទាក់ទាញភ្ញៀវទេសចរ។ ក៏ប៉ុន្តែខ្ញុំនៅតែលើកទឹកចិត្តថា កន្លែងណាដែលវាខ្វះខាត ដូចជាមានទឹកលូហូរចូលសមុទ្រ គឺយើងត្រូវតែមានការដោះស្រាយជាបន្ទាន់ ដើម្បីលុបបំបាត់នូវការកខ្វក់នូវបរិស្ថាន»។
ស្ថានីយប្រព្រឹត្តិកម្មទឹកកខ្វក់ខេត្តកំពតសាងសង់លើផ្ទៃដី ជិត១០ហិកតារ (៩.៨៤) និងបានដំណើរការកាលពីចុងឆ្នាំ២០២៣ គ្របដណ្ដប់លើផ្ទៃដីជិត ៤រយហិកតារ (៣៩៥.៧២) ក្នុងសង្កាត់ចំនួន៤ រួមមានសង្កាត់កំពង់បាយ សង្កាត់ក្រាំងអំបិល សង្កាត់កំពង់កណ្ដាល និងសង្កាត់កំពង់សំរោង ក្នុងក្រុងកំពត។
ទោះជាមានស្ថានីយប្រព្រឹត្តិកម្មទឹកកខ្វក់ ដែលចំណាយលុយប្រមាណ ២០លានដុល្លារ ក្រោមឥណទានធនាគារអភិវឌ្ឍន៍អាស៊ី (ADB) ក៏ដោយ ក៏ប៉ុន្តែទឹកកខ្វក់នៅតែបន្តបង្ហូរចូលដោយផ្ទាល់ទៅក្នុងព្រែកកំពត។
ពលរដ្ឋ សកម្មជនបរិស្ថាន និងអ្នកជំនាញទេសចរណ៍ នៅតែស្នើយ៉ាងទទូចដល់រដ្ឋបាលខេត្តកំពត និងអាជ្ញាធរពាក់ព័ន្ធឲ្យគ្រប់គ្រងកាកសំណល់ និងទឹកកខ្វក់ឲ្យបានត្រឹមត្រូវ ដើម្បីសុខភាពពលរដ្ឋក្នុងតំបន់ និងទាក់ទាញភ្ញៀវទេសចរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។