ពលរដ្ឋស្នើដល់អាជ្ញាធរពាក់ព័ន្ធ ឲ្យបង្កើនការផ្សព្វផ្សាយអប់រំប្រជាពលរដ្ឋអំពីការប្រើប្រាស់ និងគ្រប់គ្រងសំរាមឲ្យបានត្រឹមត្រូវ ក្រោយព្រះរាជពិធីបុណ្យអុំទូក បានបន្សល់ទុកសំរាមជាង ១ម៉ឺនតោន ។
បន្ទាប់ពីព្រះរាជពិធីបុណ្យ អុំទូក បណ្ដែតប្រទីប និងសំពះព្រះខែ អកអំបុកបានបញ្ចប់ទៅ កាលពីថ្ងៃទី១៦ ខែវិច្ឆិកា សកម្មភាពប្រមូលសំរាម ចេញពីទីតាំងប្រារព្ធកម្មវិធីនៅមិនទាន់បានបញ្ចប់នៅឡើយ។
កូដករណាហ្គាវើលដ៍ អ្នកនាង ម៉ម សុវឌ្ឍិន ដែលបានលក់ដូរនៅតាមសួនក្នុងពិធីបុណ្យអុំទូក ប្រាប់វិទ្យុអាស៊ីសេរីនៅថ្ងៃទី១៧ ខែវិច្ឆិកាថា ពលរដ្ឋ និងភ្ញៀវទេសចរខ្លះ ដែលមកលេងកម្សាន្តក្នុងពិធីបុណ្យនេះ នៅពុំទាន់រៀបចំទុកដាក់សំរាមឲ្យមានរបៀបរៀបរយនៅឡើយទេ ខណៈក្រុមអនាម័យ តែងបោសសំអាតជាប្រចាំ ។ អ្នកនាង ស្នើដល់អាជ្ញាធរ និងក្រុមហ៊ុនប្រមូលសំរាមឲ្យផ្ដល់រង្វាន់លើកទឹកចិត្ត ជូនដល់កម្មករបោសសំអាត និងប្រមូលសំរាម ខណៈពួកគាត់ ពុំបានជួបជុំគ្រួសារ នៅថ្ងៃឈប់សម្រាកក្នុងពិធីបុណ្យជាតិ។
អ្នកនាង ម៉ម សុវឌ្ឍិន៖ «ជាក់ស្ដែងដែលបងឃើញគឺពិតមែនដោយសារ សំរាមប្រសិនបើគាត់ចេះចោលសំរាមដោយមានសណ្ដាប់ធ្នាប់ មិនធ្វើឲ្យអ្នកសំអាតមានច្រើនក៏បានដែរ ឲ្យតែយើងចេះទុកដាក់សំរាមឲ្យបានត្រឹមត្រូវ ប៉ុន្តែប្រជាជនខ្មែរយើងមួយចំនួន គាត់នៅអត់ទាន់យល់ពីរបៀបរបបចោលសំរាម។ អីចឹងត្រូវតែមានបុគ្គលិកច្រើនសម្រាប់សំអាតពីក្រោយពួកគាត់ហូប»។
ចំណែកសកម្មជនបរិស្ថាន អ្នកនាង លឹម គឹមស័រ ថ្លែងថា អាជ្ញាធរគួរអប់រំផ្សព្វផ្សាយពីបញ្ហាសំរាម និងប្លាស្ទិកឲ្យបានជាប្រចាំនៅតាមមូលដ្ឋាន ដើម្បីឲ្យពួកគាត់ផ្លាស់ប្ដូរទម្លាប់ប្រើប្រាស់សំរាមជាប្រចាំ និងកាត់បន្ថយផលប៉ះពាល់សុខភាព និងបរិស្ថាន។ អ្នកនាងស្នើដល់អ្នករៀបចំកម្មវិធីបុណ្យជាតិនីមួយៗ ឲ្យណែនាំដល់ពលរដ្ឋ និងអាជីវករ ឲ្យកាត់បន្ថយការប្រើប្រាស់ប្លាស្ទិក និងជំនួសមកវិញ នូវការប្រើប្រាស់ប្រដាប់វេចខ្ចប់បែបធម្មជាតិ ដូចជាស្លឹកឈូក ស្លឹកចេក និងស្លឹកត្នោតជាដើម។
អ្នកនាង លឹម គឹមស័រ៖«នៅក្នុងឆ្នាំហ្នឹង យើងឃើញថា មានសំរាមរហូតដល់១ម៉ឺនតោន យើងអត់ទាន់ដឹងថា តើរដ្ឋាភិបាលបម្លែងសំរាមហ្នឹងទៅជាអ្វី?តើរដ្ឋាភិបាលនឹងរៀបចំទុកដាក់សំរាមហ្នឹងដោយរបៀបណា?ចុះប្រសិនបើឆ្នាំក្រោយសំរាម ដែលយើងកំពុងតែមានអត់ទាន់បានរំលាយ ឬអត់ទាន់មានវិធានការផងស្រាប់តែមានសំរាមថ្មីមកទៀត អីចឹងប្រទេសយើងវានឹងជាទីលានចាក់សំរាមតែម្ដង ។ អីចឹងនៅត្រង់ចំណុចនេះ ខ្ញុំគិតថា រដ្ឋាភិបាល និងប្រជាពលរដ្ឋ គួរតែចូលរួមទាំងអស់គ្នា ដើម្បីធ្វើយ៉ាងណា បើមិនអាចកម្ទេចសំរាមហ្នឹងបានទេ យើងគួរតែមានវិធានការកាត់បន្ថយការប្រើប្រាស់សំរាម»។
ការស្នើសុំនេះ ធ្វើឡើងបន្ទាប់ពីអភិបាលរង នៃអភិបាលរាជធានីភ្នំពេញ លោក ហួត ហៃ បានថ្លែងថា ក្រុមហ៊ុនប្រមូលសំរាម ចំនួន៣ក្រុមហ៊ុន បានប្រមូលសំរាមនិងសំណល់ប្លាស្ទិកជាង១ ម៉ឺនតោន (១០.៥០០) ក្នុងភូមិសាស្ត្ររាជធានីភ្នំពេញ ក្នុងរយៈពេល៣ថ្ងៃ នៃព្រះរាជពិធីបុណ្យអុំទូក និងបានដឹកជញ្ជូនសំរាមទាំងនេះ ទៅចាក់នៅទីលានចាក់សំរាម។ លោកថ្លែងបែបនេះ នៅមុខអ្នកចូលរួមទិវា «អនាម័យបរិស្ថានជាតិ ២៣ វិច្ឆិកា» ជាង១ពាន់នាក់ (១.០២៦) នៅសួនច្បារវត្តបទុមវតី ខណ្ឌដូនពេញ រាជធានីភ្នំពេញ កាលពីព្រឹកថ្ងៃទី១៧ ខែវិច្ឆិកា។
ជុំវិញបញ្ហានេះ អ្នកស្រាវជ្រាវ និងឃ្លាំមើលធនធានធម្មជាតិនៅកម្ពុជា លោក សេង សុខហេង មានប្រសាសន៍ថា ក្នុងពិធីបុណ្យអុំទូក នៅឆ្នាំនេះ ពលរដ្ឋមួយចំនួន បានយល់ដឹងពីការចោលសំរាម តាមទីសាធារណៈ ដែលអាជ្ញាធរបានរៀបចំ ក៏ប៉ុន្តែបរិមាណ នៃការចោលសំរាមពាសវាលពាសកាល នៅតែស្ថិតក្នុងចំនួនច្រើនដដែល។ លោកថា ដើម្បីដោះស្រាយបញ្ហានេះ អាជ្ញាធរពាក់ព័ន្ធគួរតែបង្កើនការផ្សព្វផ្សាយអប់រំអំពីផលប៉ះពាល់ និងការបែងចែក ការគ្រប់គ្រង និងការកែច្នៃសំរាមឡើងវិញ ហើយពលរដ្ឋក៏គួរតែស្វែងយល់ដោយខ្លួនឯងអំពីបញ្ហាអស់ទាំងនេះ។
លោក សេង សុខហេង៖«នៅតាមទីសាធារណ គឺឃើញមានការបិទស្លាកថា«ហាមចោលសំរាម»ហើយមានការព្រមាន ប៉ុន្តែការអនុវត្តហាក់បីដូចជា មិនសូវធ្វើឲ្យមានប្រសិទ្ធភាពប៉ុន្មានទេ គឺមានតិចតួចបំផុត អីចឹងអាជ្ញាធរគួរតែពង្រឹងវិធានការក្នុងការអនុវត្តច្បាប់ការផ្សព្វផ្សាយបន្ថែមទៀត ឲ្យបានកាន់តែទូលំទូលាយ ហើយនេះក៏ជាការចូលរួមចំណែកមួយក្នុងការវេចខ្ចប់ ក្នុងការទុកដាក់ ក្នុងការគ្រប់គ្រងសំរាមឲ្យមានរបៀបរៀបរយ»។
មន្ទីរសាធារណការ និងដឹកជញ្ជូន រាជធានីភ្នំពេញ ឲ្យដឹងថា កាលពីយប់ថ្ងៃទី១៦ ខែវិច្ឆិកា កម្លាំងកម្មករបោសសំអាត ជាង ៣រយនាក់ (៣៣០) និងក្រុមហ៊ុនប្រមូលសំរាម បានបោសសំអាត និងប្រមូលសំរាម ក្នុងបរិវេណទីតាំងប្រារព្ធព្រះរាជពិធីបុណ្យអុំទូក តាំងពីម៉ោង ១២រំលងអាធ្រាត្រ រហូតដល់ម៉ោង ៧ព្រឹកថ្ងៃ១៧ ខែវិច្ឆិកា។
គេសង្កេតឃើញថា ក្រោយការបោសសម្អាត និងប្រមូលសំរាម នៅលើដងផ្លូវតាមបណ្ដោយមាត់ទន្លេ គឺពុំសូវមានសំរាមឡើយ ហើយរថយន្តប្រមូលសំរាម និងរថយន្តលាងសម្អាតផ្លូវ នៅកំពុងបន្តសកម្មភាពរបស់ពួកគេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។