សហគមន៍​ឧត្តម​ស្រែពស់​ជិត ១០០​នាក់​លើក​គ្នា​ឃ្លាំមើល​អ្នកភូមិ ៧​នាក់ មក​បំភ្លឺ​នៅ​តុលាការ​កំពង់ស្ពឺ

0:00 / 0:00

ពលរដ្ឋ​ជិត ១០០ នាក់ នៅ​ថ្ងៃទី១៨ តុលា បាន​លើកគ្នា​មក​ឃ្លាំមើល ប្រជា​សហគមន៍​ឧត្តមស្រែពស់ ៧​នាក់ ដែល​មក​បង្ហាញខ្លួន​ក្នុង​សវនាការ​សាលាដំបូង​ខេត្ត​កំពង់ស្ពឺ​ពេញ​មួយ​ព្រឹក ក្រោម​បណ្តឹង​របស់​មន្ត្រី​យោធា "​ង​-៧០”។ ក្រុម​អ្នក​តវ៉ា​បាន​លើក​បដា​ទាមទារ​ឱ្យ​តុលាការ​ទម្លាក់​ការ​ចោទប្រកាន់​នេះ។

ក្រុម​ពលរដ្ឋ​ទាំងនោះ​រស់នៅ​ឃុំ​ត្រពាំងជោ ស្រុក​ឱរ៉ាល់ បង្ហាញ​ពី​ភាព​អយុត្តិធម៌ និង​ឈឺចាប់​ក្នុង​ចិត្ត ស្តាយស្រណោះ​ព្រៃ​សហគមន៍​ឧត្ដម​ស្រែពស់ បាន​បាត់បង់​ស្ទើរ​ទាំងស្រុង មិន​ត្រឹមតែ​គ្មាន​ដំណោះស្រាយ​ទេ ប្រជាសហគមន៍​ជាច្រើន​នាក់ បាន​ក្លាយ​ជា​ជនរងគ្រោះ​ជាប់​បណ្តឹង​នៅ​តុលាការ។

ប្រជា​សហគមន៍​ទាំងនោះ បាន​ឈរ​កាន់​បដា​នៅ​ខាង​មុខ​តុលាការ ដោយ​សរសេរ​ថា ពលរដ្ឋ​ការពារ​ធនធាន​ធម្មជាតិ ត្រូវ​មន្ត្រី​យោធា ឈ្មោះ អៀម ម៉ៅ ប្តឹង​ទៅ​តុលាការ អយុត្តិធម៌​ណាស់ លើ​សហគមន៍​ឧត្តមស្រែពស់ ខេត្ត​កំពង់ស្ពឺ។

សមាជិក​សហគមន៍​ឧត្តមស្រែពស់ ដែល​ជាប់​បណ្ដឹង​នៅ​តុលាការ គឺ​លោក លាង ប៉ន ប្រាប់​វិទ្យុ​អាស៊ីសេរី​ថា ពាក្យ​បណ្តឹង​នេះ​ជា​ល្បិច​របស់​មន្ត្រី​យោធា លោក អៀម ម៉ៅ ដើម្បី​លង​បន្លាច​ស្មារតី​ពលរដ្ឋ​ឱ្យ​រាថយ ក្នុង​ការ​ការពារ​ព្រៃឈើ។

លោក​បន្ថែម​ថា ពួក​លោក​បាន​ឆ្លើយ​បំភ្លឺ​នៅ​ចំពោះមុខ​ចៅក្រម និង​តំណាង​អយ្យការ​ថា សកម្មភាព​របស់​ប្រជា​សហគមន៍ ដើម្បី​ការពារ​ផលប្រយោជន៍​ជាតិ មិន​បាន​ប្រព្រឹត្ត​កំហុស​ដូច​ការ​ចោទប្រកាន់​ឡើយ។

លោក​ប្ដេជ្ញា​ថា នឹង​តស៊ូ​ទាមទារ​ដី​ព្រៃ​សហគមន៍​ឧត្តមស្រែ​ពស់ នៅ​សល់​ចុងក្រោយ និង​ដាំ​ដើមឈើ​ឡើង​វិញ។

លោក លាង ប៉ន៖ «សហគមន៍​ចេះតែ​បារម្ភ យើង​ពលរដ្ឋ​តែងតែ​ចួប​ការ​ស្តី​បន្ទោស​ជាមួយ​អាជ្ញាធរ និង​អ្នកមាន​លុយ​មានអំណាច​អ៊ីចឹង​ហើយ​។ មាន​វិបត្តិ​មិន​សូវ​មាន​អ្នករក​យុត្តិធម៌​ឱ្យ​យើង យើង​ចេះតែ​ប្រឹង​ដើម្បី​ទាំងអស់គ្នា»។

សមាជិក​សហគមន៍​ការពារ​ព្រៃឈើ​ឧត្ដម​ស្រែពស់ ៧​នាក់ ដែល​ចេញ​មុខ​ការពារ​ព្រៃ​សហគមន៍ ត្រូវ​តុលាការ​កោះហៅ​មក​ឆ្លើយ​បំភ្លឺ ក្រោម​បទ​ចោទ​ធ្វើ​ឱ្យ​ខូចខាត​ដោយ​ចេតនា មាន​ស្ថាន​ទម្ងន់ទោស រំលោភ​កម្មសិទ្ធិ គំរាម​សម្លាប់ និង​ជេរប្រមាថ។

សមាជិក​សហគមន៍​ម្នាក់ទៀត លោក ឃន រិទ្ធ បាន​ថ្លែងប្រាប់​ក្រុម​អ្នកកាសែត ក្រោយ​ចេញ​ពី​សវនាការ​ថា តំណាង​អយ្យការ​បាន​សួរនាំ​ពួក​លោក សំណួរ​ខ្លីៗ ថា​តើ​ប្រជា​សហគមន៍ បាន​គំរាម​សម្លាប់ និង​រំលោភ​កម្មសិទ្ធិ​របស់​គេ​ឬទេ?

លោក​សំណូមពរ​ឱ្យ​តុលាការ​រក​យុត្តិធម៌​ក្នុង​រឿង​នេះ ព្រោះ​សកម្មភាព​របស់​ប្រជា​សហគមន៍ ដើម្បី​ការពារ​ធនធាន​ធម្មជាតិ។

លោក ឃន រិទ្ធ៖ «ការពារ​ធនធានធម្មជាតិ រង​ការចោទប្រកាន់​របស់​អ្នក​បំផ្លាញ​ធនធាន​ធម្មជាតិ សម្រាប់​ខ្ញុំ គឺ​អយុត្តិធម៌»។

វិទ្យុ​អាស៊ីសេរី​មិនទាន់​អាច​ទាក់ទង​សុំ​ការ​បំភ្លឺ​រឿង​នេះ ពី​អ្នកនាំពាក្យ​អយ្យការ​អម​សាលាដំបូង ខេត្ត​កំពង់ស្ពឺ លោក វ៉ីត មឃៈ បាន​នៅ​ឡើយ​ទេ នៅ​ថ្ងៃទី១៨ តុលា ដោយ​ទូរស័ព្ទ​ហៅ​ចូល តែ​គ្មាន​អ្នក​លើក។

ចំណែក​មន្ត្រី​យោធា លោក អៀម ម៉ៅ ក៏​មិនទាន់​អាច​ទាក់ទង​បាន​ដែរ នៅ​ថ្ងៃ​ដដែល​នេះ។

កាលពី​ខែសីហា ឆ្នាំ​២០២១ កន្លងទៅ រដ្ឋាភិបាល​បាន​ចេញ​អនុក្រឹត្យ ឆ្វៀល​ដី​ព្រៃ​សហគមន៍​ឧត្ដម​ស្រែ​ខ្ពស់​មាន​ទំហំ​ជាង ២ រយ ៦០​សិប ហិកតារ (២៦២,២៤ ) ពី​ដែនជម្រក​សត្វព្រៃ​ភ្នំ​ឱរ៉ាល់ ក្នុងភូមិ​ពោធិ៍មាស ឃុំ​ត្រពាំងជោ ស្រុក​ឱរ៉ាល់ ខេត្ត​កំពង់ស្ពឺ ដើម្បី​បែងចែក​ជូន​គ្រួសារ​យោធិន "​ង​-៧០” កងរថក្រោះ ៤១​គ្រួសារ សម្រាប់​កសាង​លំនៅឋាន និង​បង្កបង្កើនផល។

ក្រោយ​ពី​អតីត​លោកនាយក​រដ្ឋមន្ត្រី ហ៊ុន សែន ស៊ីញេ​ឆ្វៀល​ដី​ព្រៃ​សហគមន៍​នេះ ពលរដ្ឋ​ជាង ៧០០​រយ​នាក់ បាន​តវ៉ា​ជាច្រើន​ដង​មិន​ពេញចិត្ត​ចំពោះ​គម្រោង​នេះ ព្រោះ​បំផ្លាញ​ព្រៃ សត្វព្រៃ និង​កន្លែង​គោរព​សក្ការៈ​របស់​អ្នក​រក្សាសីល​ជាដើម

មក​ទល់​ពេល​នេះ ដី​ព្រៃ​សហគមន៍​នេះ បាន​រលាយ​អស់​ស្ទើរ​ទាំងស្រុង ធ្វើ​ឱ្យ​សត្វព្រៃ​ជាច្រើន​ប្រភេទ​រួម​មាន ទោច ស្វា ក្ងោក និង​ឈ្លូស​ជាដើម ផ្អើល​ទៅ​តំបន់​ផ្សេង​។ រីឯ​ប្រជា​សហគមន៍ បាន​ដាំ​ដើមឈើ នៅ​តំបន់​ព្រៃ​រេចរឹល ដើម្បី​ស្ដារ​ព្រៃឈើ​ឡើងវិញ ក៏ប៉ុន្តែ​ត្រូវ​មន្ត្រី​យោធា ឈូស​កម្ទេច​អស់ ជាង ៧​ពាន់​ដើម (៧.០០០) កាល​ខែ​កញ្ញា​កន្លង​ទៅ។

ជុំវិញ​រឿង​នេះ មន្ត្រី​ពង្រឹង​សិទ្ធិអំណាច​សហគមន៍​មូលដ្ឋាន នៃ​សមាគម​ការពារ​សិទ្ធិមនុស្ស​អាដហុក លោក ប៉ែន ប៉ុណ្ណារ៍ យល់​ថា តុលាការ​គួរតែ​ផ្តល់​យុត្តិធម៌​ជូន​ប្រជា​សហគមន៍​ដែល​ស្រឡាញ់​ព្រៃឈើ ស្របតាម​ការ​ប្ដេជ្ញាចិត្ត របស់​រដ្ឋមន្ត្រី​ក្រសួង​យុត្តិធម៌ លោក កើត រិទ្ធ ដែល​ចង់​ឃើញ​តុលាការ​ផ្តល់​យុត្តិធម៌​ជូន​ជន​រងគ្រោះ។

លោក ប៉ែន ប៉ុណ្ណារ៍៖ «កូន​ខ្មែរ​ទាំងអស់​ត្រូវ​យក​គំរូ​តាម យើង​ជឿ​ថា ប្រព័ន្ធ​យុត្តិធម៌ នឹង​ផ្តល់​យុត្តិធម៌​ឱ្យ​គាត់​។ ការ​ប្តឹង​របស់​មន្ត្រី​យោធា ជា​សិទ្ធិ​របស់​គាត់ តែ​តុលាការ​ជា​អ្នក​ផ្តល់​យុត្តិធម៌»។

តំណាង​អយ្យការ និង​តុលាការ បាន​បញ្ចប់​ការ​សួរដេញដោល លើ​ប្រជា​សហគមន៍ ៧​នាក់ វេលា​ម៉ោង ១២​ថ្ងៃត្រង់ នៅ​ថ្ងៃ​ដដែល​នេះ ហើយ​អនុញ្ញាត​ឱ្យ​ពួកគាត់​ត្រឡប់​មក​ផ្ទះ​វិញ។

ព្រៃ​សហគមន៍​ឧត្ដម​ស្រែ​ពស់ ឬ​ហៅថា ព្រៃ​មេត្តា​ធម្មជាតិ គឺជា​ផ្នែក​មួយ​នៃ​ដែនជម្រកសត្វព្រៃ​ភ្នំ​ឱរ៉ាល់ ហើយ​បាន​ចុះបញ្ជី​ទទួលស្គាល់​ជា​ព្រៃ​អភិរក្ស​ពី​ក្រសួង​បរិស្ថាន​កាល​ពី​ឆ្នាំ​២០០២។

នៅ​លើ​ឯកសារ​ព្រៃ​នេះ​មាន​ផ្ទៃដី​ទំហំ ៨០០​ហិកតារ ក៏ប៉ុន្តែ​ព្រៃ​ជាក់ស្តែង​នៅ​សល់​ជាង ២០០ ហិកតារ​ប៉ុណ្ណោះ ត្រូវ​បាន​ក្រុម​មន្ត្រី​យោធា "​ង​-៧០” ឈូស​ឆាយ​បំផ្លាញ​បង្ហើយ​ចុងក្រោយ អស់​ស្ទើរ​ទាំងស្រុង​នៅ​រយៈពេល​ជាង ២​ឆ្នាំ​កន្លង​ទៅ​នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។