ស្ថាបនិកចលនាមាតាធម្មជាតិ លោក អាឡិកហ្សង់ដ្រូ ហ្គន់ហ្សាឡេស ដេវិតសឹន (Alejandro Gonzalez Davidson) ត្រូវបានសមត្ថកិច្ចចាប់ខ្លួននៅវេលាម៉ោង ១ និង ៣០នាទីរសៀលថ្ងៃទី២៣ កុម្ភៈ នាភោជនីយដ្ឋានមួយក្បែរមាត់ទន្លេ ជិតផ្សាររាត្រី។
សកម្មជនសមាគមសេដ្ឋកិច្ចក្រៅប្រព័ន្ធ លោក សុខ សីហា ដែលបានឃើញហេតុការណ៍ចាប់ខ្លួននេះ ឲ្យដឹងថា សមត្ថកិច្ចក្រសួងមហាផ្ទៃ មួយក្រុមបានចាប់លោក អាឡិក និងកង់របស់លោកបញ្ចូលក្នុងរថយន្ត។
នៅវេលាម៉ោងប្រមាណជាង ២រសៀលនេះ លោក អាឡិក ត្រូវបានសមត្ថកិច្ចបញ្ជូនទៅកាន់អគ្គនាយកដ្ឋានអន្តោប្រវេសន៍នៅមុខអាកាសយានដ្ឋានអន្តរជាតិភ្នំពេញ ដើម្បីសាកសួរ។
ថ្មីៗនេះ លោក អាឡិក ដែលមានសញ្ជាតិអេស្ប៉ាញ ព្យាយាមសុំបន្តទិដ្ឋាការពីរដ្ឋាភិបាលដើម្បីសុំស្នាក់នៅបន្តការងារនៅកម្ពុជា ប៉ុន្តែត្រូវបានអាជ្ញាធរបដិសេធ។
ក្រសួងមហាផ្ទៃ បានលើកឡើងថា លោក អាឡិក បានប្រព្រឹត្តខុសនឹងលក្ខន្តិកៈរបស់អង្គការមាតាធម្មជាតិ ដែលតម្កល់ទុកក្នុងក្រសួងមហាផ្ទៃ ដោយញុះញង់ប្រជាពលរដ្ឋបិទផ្លូវសាធារណៈ និងមិនឲ្យក្រុមការងាររបស់អាជ្ញាធរចុះជួបប្រជាពលរដ្ឋ ក្នុងស្រុកថ្មបាំង ខេត្តកោះកុង។ ទិដ្ឋាការស្នាក់នៅកម្ពុជា របស់លោកបានផុតកំណត់កាលពីថ្ងៃទី២០ ខែកុម្ភៈ។
សូមស្ដាប់សេចក្ដីរាយការណ៍ផ្ទាល់របស់លោក សេក បណ្ឌិត ទាក់ទងនឹងការចាប់ខ្លួន លោក អាឡិក និងការបកស្រាយរបស់ប្រធានអង្គការវេទិកាអនាគត លោក អ៊ូ វីរៈ តាមការសាកសួររបស់អ្នកស្រី ខែ សុណង៖
មុនការចាប់ខ្លួនលោក អាឡិក ប្រមាណ ២ម៉ោង នៅថ្ងៃដដែលនេះ លោកនាយករដ្ឋមន្ត្រី ហ៊ុន សែន បានថ្លែងជាសាធារណៈក្នុងពេលចែកសញ្ញាប័ត្រដល់និស្សិត ព្រមានមិនឲ្យអ្នកនយោបាយ និងអង្គការសង្គមស៊ីវិល លូកលាន់រឿង អាឡិក នេះទៀត។ លោកនិយាយសំដៅមន្ត្រីបក្សប្រឆាំងដែលស្នើឲ្យព្រះមហាក្សត្រប្រទានកិច្ចអន្តរាគមន៍ឲ្យលោក អាឡិក នោះ។
លោក ហ៊ុន សែន បញ្ជាក់ថា សូមឲ្យជនបរទេសរូបនេះ ទៅក្រៅមួយរយៈសិនកុំបង្ករឿង៖ «អ៊ីចឹងទេ បើគ្រាន់តែធ្វើរដ្ឋអធិបតេយ្យមួយគ្រាន់តែគេបំពានដែរ ចាំបាច់ទៅធ្វើរដ្ឋធ្វើអី? មិនថា ជនបរទេសបំពានទេ ជនជាតិខ្មែរបំពានក៏ត្រូវតែមានទោសដែរ អំណាចរដ្ឋសង្ឃឹមថា រឿងអស់ទាំងនេះ ត្រឹមតែរដ្ឋមន្ត្រីមហាផ្ទៃ ដោះស្រាយបានហើយ។ គេទៅរំខានដល់ព្រះមហាក្សត្រហ្ន! ព្រះមហាក្សត្រទ្រង់ចេញលិខិតមកខ្ញុំព្រះករុណាខ្ញុំ ប្រាប់ឯកឧត្ដម ស ខេង ថា សរសេរព្រាងឲ្យខ្ញុំផង ប៉ុន្តែមិនសមទៅរំខានព្រះមហាក្សត្រ។ សមត្ថកិច្ចគេទុកឲ្យអ្នកបញ្ហាអន្តោប្រវេសន៍នេះ គឺរដ្ឋមន្ត្រីមហាផ្ទៃ ចាត់ចែងទៅវាចប់ហើយ»៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។