សកម្មជនការពារធនធានធម្មជាតិ ជំរុញឲ្យរដ្ឋាភិបាលបញ្ឈប់ការប្រើវិធានការចាប់ចង ឬការធ្វើទុក្ខបុកម្នេញមកលើអ្នកបម្រើកិច្ចការសង្គម និងបរិស្ថាននៅកម្ពុជា។
ក្រុមអ្នកអភិរក្សបរិស្ថានវ័យក្មេងនៅកម្ពុជា ជំរុញឲ្យរដ្ឋាភិបាលស្រឡាញ់ធនធានធម្មជាតិរបស់ប្រទេស ហើយបើកសេរីភាពឲ្យពួកគេអាចថែរក្សាសម្បត្តិធម្មជាតិទាំងនោះឲ្យផុតពីការបំផ្លាញ ឬការធ្វើអាជីវកម្មដោយក្រុមនាយទុនទុច្ចរិតទាំងឡាយ។
សកម្មជនអង្គការមាតាធម្មជាតិពីររូបគឺលោក ឌឹម គុណឌី និងលោក ហ៊ុន វណ្ណៈ ដែលទើបត្រូវបានតុលាការខេត្តកោះកុង ដោះលែងឲ្យមានសេរីភាពនោះបានប្រាប់ទៅរដ្ឋាភិបាលកម្ពុជា ថាដើម្បីឲ្យធនធានធម្មជាតិរបស់ប្រទេសនៅគង់វង្សសម្រាប់ក្មេងជំនាន់ក្រោយបានស្គាល់ គឺត្រូវផ្ដើមចេញពីការបញ្ចប់នូវវប្បធម៌គំរាមកំហែងលើសកម្មជនការពារបរិស្ថានតែម្ដង។
សមាជិកអង្គការមាតាធម្មជាតិ លោក ឌឹម គុណឌី ប្រាប់អាស៊ីសេរីថា ប្រសិនបើរដ្ឋាភិបាលបញ្ឈប់ការធ្វើទុក្ខបុកម្នេញ និងការចាប់ចងក្រុមអ្នកអភិរក្សបរិស្ថានមែននោះ ក្រុមរបស់លោកនឹងរៀបចំពិធីសែនព្រេនដ៏ធំមួយ៖ «សម្រាប់មតិយោបល់អំពីការលើកទឹកចិត្តអ្នកការពារបរិស្ថាននៅកម្ពុជាវិញ ខ្ញុំយល់ថា យើងមិនទាន់ឈានដល់កម្រិតហ្នឹងទេ។ គ្រាន់តែអនុសាសន៍របស់រដ្ឋាភិបាលនៅមិនទាន់ដំណើរការនៅឡើយ។ ដូចក្រុមការងារខ្ញុំនិយាយអ៊ីចឹង ពួកយើងមិនចង់បានរង្វាន់ ផ្ទះវីឡា ឬឡានទំនើបអ្វីនោះទេ ពួកយើងសុំត្រឹមកុំមករារាំង គំរាមកំហែង ហើយចាប់ពួកគេយើងដាក់គុក ពួកយើងសឹងសែនក្បាលជ្រូកវិញនោះ»។
លោក ហ៊ុន វណ្ណៈ និងលោក ឌឹម គុណឌី ត្រូវបានតុលាការខេត្តកោះកុង ផ្ដន្ទាទោសដាក់ពន្ធនាគារក្នុងម្នាក់ ១ឆ្នាំ តែអនុវត្តទោសបាន ៥ខែ ហើយទោសដែលនៅសល់ត្រូវព្យួរ។ ជាងនេះទៅទៀត ពួកគេទទួលរងនូវការពិន័យជាប្រាក់ម្នាក់ ១លានរៀល ពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍ និងធ្វើឲ្យប៉ះពាល់ដល់សិទ្ធិខាងរូបភាពនៃបុគ្គល ដោយសារពួកគេបានជិះទូកថតរូបភាព និងវីដេអូសកម្មភាពកប៉ាល់ដឹកខ្សាច់ស៊ីលីកា (Silica) ពីរគ្រឿងក្នុងលំហសមុទ្រ នៅឃុំព្រែកខ្សាច់ ស្រុកគីរីសាគរ ខេត្តកោះកុង។
ដើមបណ្ដឹងក្នុងសំណុំរឿងនេះ គឺក្រុមហ៊ុនតំបន់សេដ្ឋកិច្ចពិសេសខេត្តកោះកុង របស់លោកឧកញ៉ា លី យ៉ុងផាត់ ដែលជាសមាជិកព្រឹទ្ធសភារបស់បក្សកាន់អំណាច និងជាអ្នកជំនួញរកស៊ីច្រើនមុខ រាប់ចាប់តាំងពីការបើកបនល្បែងស៊ីសង ចំការអំពៅ ការរកស៊ីនាំចេញខ្សាច់ពីខេត្តកោះកុង ទៅក្រៅប្រទេស និងមុខជំនួញជាច្រើនប្រភេទទៀត។
អាស៊ីសេរី នៅពុំទាន់អាចសុំការបំភ្លឺពីមន្ត្រីរដ្ឋាភិបាលជុំវិញបញ្ហានេះបានទេ ពាក់ព័ន្ធនឹងអនុសាសន៍របស់លោក ហ៊ុន វណ្ណៈ និងលោក ឌឹម គុណឌី ក្នុងការអភិរក្សធនធានធម្មជាតិរបស់ប្រទេសតាមរយៈការបញ្ឈប់ការគំរាមកំហែង ការចាប់ចង និងការបាញ់សម្លាប់។
សកម្មជនការពារបរិស្ថាននៅកម្ពុជា តែងរងនូវការគំរាមកំហែងដល់អាយុជីវិត។ ជាក់ស្ដែងករណីប្រធានអង្គការការពារធនធានធម្មជាតិ លោក ឈុត វុទ្ធី និងករណីមន្ត្រីការពារបរិស្ថានបីរូប រួមមានលោក សេក វឌ្ឍនា លោក តឺន សុខណៃ និងលោក ថុល ខ្នា ដែលត្រូវបានក្រុមជនដៃដល់ជាសមត្ថកិច្ចបាញ់សម្លាប់កាលពីដើមខែកុម្ភៈ ក្នុងខេត្តមណ្ឌលគិរី។
ទោះជាមានគ្រោះថ្នាក់ដល់អាយុជីវិតសម្រាប់កិច្ចការគាំពារធនធានធម្មជាតិយ៉ាងណាក៏ដោយ ប៉ុន្តែសម្រាប់លោក ហ៊ុន វណ្ណៈ សមាជិកអង្គការមាតាធម្មជាតិវិញ អះអាងថា ក្រុមរបស់លោកបានសច្ចារួចទៅហើយថា នឹងបន្តការឃ្លាំមើល និងការពារធនធានធម្មជាតិបន្តទៀតឲ្យបានគង់វង្សសម្រាប់ពលរដ្ឋខ្មែរទូទៅ និងពិភពលោក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។