ក្រុមយុវជនស្រលាញ់បរិស្ថានប្រមាណ ៣០នាក់ នាំគ្នាធ្វើពិធីដង្ហែសាកសពព្រៃឈើ តាមដងផ្លូវ ចាប់ពីស្ថានទូតចិន យកញត្តិទៅដាក់ឱ្យក្រសួងបរិស្ថាន ដើម្បីស្នើសុំឱ្យរដ្ឋមន្ត្រីក្រសួងមួយនេះ បញ្ឈប់ការរឹតត្បិតសិទ្ធិអ្នកការពារព្រៃឈើ និងបើកចំហសេរីភាពសាធារណជនចូលល្បាតព្រៃឈើឡើងវិញ នៅព្រឹកថ្ងៃទី២៩ ខែកញ្ញា។
ពិធីនេះ មានសកម្មជនស្រលាញ់បរិស្ថានចូលរួមចំនួន៣២នាក់ក្នុងនោះ ស្រី១៥នាក់។ ក្រុមយុវជន បានស្លៀកពាក់សដើរជាពីរជួរ ក្បាលមានពាក់បូពណ៌ស ដោយនាំគ្នាដើរដង្ហែមឈូសសាកសពដើមឈើ ព្រមទាំងដៃកាន់ផ្កា និងបដាដែលសរសេរថា ''ពិធីហែសពដើមឈើ '' '' ព្រៃឈើ ជាសម្បត្តិរបស់យើងទាំងអស់គ្នា'' និង ''សោកនាដកម្មព្រៃឈើ'' ជាដើម ។ ក្រៅពីនេះ មានយុវជន ដើរតួនាទីជាអាចារ្យកាន់ទង់ព្រលឹង ដែលសរសេររៀបរាប់អំពីវិនាសកម្មព្រៃឈើ ។ ពួកគាត់រៀបចំពិធីហែសពព្រៃឈើនេះ ហាក់ដូចជាពិធីហែសពមែនទែន ដោយសារពួកគាត់មើលឃើញថា ស្ថានភាពព្រៃឈើនៅកម្ពុជា កំពុងរងការកាប់បំផ្លាញកាន់តែច្រើន បន្ទាប់ពីក្រសួងបរិស្ថាន ហាមឃាត់មិនឲ្យសហគមន៍មូលដ្ឋាន និងប្រជាពលរដ្ឋដែលស្រលាញ់ធនធានធម្មជាតិ ចុះល្បាតព្រៃឈើដូចមុន។ ពិធីនេះ ក៏មានការឃាត់ពីអាជ្ញាធរខណ្ឌចំការមនដែរ ចាប់តាំងពីចំណុចចាប់ផ្ដើម នៅមុខស្ថានទូតចិន ប៉ុន្តែក្រុមយុវជន បានជម្នះដង្ហែសាកសពដើមឈើនេះរហូតបានដល់ក្រសួងបរិស្ថាន ហើយមន្ត្រីរដ្ឋបាលក្រសួងនេះ ចេញមកទទួលយកញត្តិពីក្រុមយុវជន។
សូមលោកអ្នកនាងរងចាំស្តាប់សេចក្តីរាយការណ៍នេះពិស្ដារនៅក្នុងកម្មវិធីផ្សាយយប់នេះ!
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។