សកម្មជនបរិស្ថានស្នើដល់អាជ្ញាធរឲ្យលើកទឹកចិត្តដល់អាជីវករ កាត់បន្ថយការប្រើប្រាស់ប្លាស្ទិកវេចខ្ចប់ចំណីអាហារក្នុងពិធីបុណ្យអុំទូក។ ការស្នើសុំនេះធ្វើឡើងក្រោយពីពិធីបុណ្យអុំទូក និងតាំងពិព័រណ៍រយៈពេល៥ថ្ងៃ នៅខេត្តបាត់ដំបង បានបន្សល់ទុកកាកសំណល់ជាង១រយតោន។
សកម្មជនបរិស្ថានលើកឡើងថា ក្រោយបញ្ចប់ព្រឹត្តិការណ៍បុណ្យជាតិ ឬពិធីបុណ្យអុំទូកជាដើម តែងមានសំរាម និងកាកសំណល់ប្លាស្ទិកបន្សល់ទុកតាមទីសាធារណៈ ដែលប៉ះពាល់បរិស្ថាន សុខភាព សោភណភាពទីក្រុង អារម្មណ៍ភ្ញៀវទេសចរ ព្រមទាំងបង្កឲ្យមានក្លិនមិនល្អជាដើម។
សកម្មជនបរិស្ថាន អ្នកនាង លឹម គឹមស័រ ប្រាប់អាស៊ីសេរី នៅថ្ងៃទី២១ ខែតុលាថា បញ្ហាសំរាម និងប្លាស្ទិក ជាទំនួលខុសត្រូវរបស់មនុស្សគ្រប់គ្នា។ ប៉ុន្តែអ្នកនាង ស្នើដល់អាជ្ញាធរ ឲ្យបង្កើនការផ្សព្វផ្សាយ និងលើកទឹកចិត្តដល់ពលរដ្ឋ និងអាជីវករ ឲ្យកាត់បន្ថយការប្រើប្រាស់ប្លាស្ទិកឲ្យបានតិចតួចបំផុត។
អ្នកនាង លឹម គឹមស័រ៖«អាជ្ញាធរគឺមានតួនាទីជំរុញទៅលើក្រុមហ៊ុនទុកដាក់សំរាម និងប្រមូលសំរាមទាំងអស់ឲ្យធ្វើការងាររបស់ពួកគាត់ឲ្យមានប្រសិទ្ធភាព។ ចំណែកប្រជាពលរដ្ឋ គឺជាអ្នក ដែលចូលរួមក្នុងការសម្អាត ក្នុងន័យថា កុំអាងតែបង់លុយឲ្យក្រុមហ៊ុនសំរាមហើយយើងអត់ចូលរួមជួយ អីចឹងទោះបីជាយើងបង់លុយថ្លៃសំរាមក៏ដោយ ក៏យើងគួរតែចេះទុកដាក់សំរាម និងវេចខ្ចប់ឲ្យបានត្រឹមត្រូវតាមប្រភេទនៃសំរាម អ៊ីចឹងវាជួយកាត់បន្ថយការធ្វើការងារ ពេលវេលារបស់អ្នកប្រមូលសំរាម ធ្វើឲ្យពួកគាត់មានអារម្មណ៍ល្អ គាត់អាចធ្វើការងារបានយូរ ហើយសម្អាតបានល្អ»។
ការលើកឡើងនេះ ធ្វើឡើងបន្ទាប់ពីអនុប្រធានការិយាល័យសាធារណការ ដឹកជញ្ជូន អនាម័យ និងសណ្ដាប់ធ្នាប់សាធារណៈ ក្រុងបាត់ដំបង លោក ណយ ចេក ឲ្យដឹងតាមរយៈក្រសួងព័ត៌មានថា ក្រោយពិធីបុណ្យអុំទូករយៈពេល៥ថ្ងៃ កាលពីថ្ងៃទី១៣ ដល់ថ្ងៃទី១៨ ខែតុលា កាកសំណល់គ្រប់ប្រភេទចំនួន ១១៤តោន ដែលភាគច្រើនជាថង់ ស្នោ និងកាកសំណល់ផ្សេងទៀត ត្រូវបានបន្សល់ទុកនៅតាមទីសាធារណៈ និងដងស្ទឹង ។ លោកបន្តថា កាកសំណល់ទាំងនេះ បានកើនឡើងជិត ៥០ភាគរយ (៤៦%) ធៀបនឹងរយៈពេលដូចគ្នាកាលពីឆ្នាំ២០២៣។
វិទ្យុអាស៊ីសេរី នៅមិនទាន់អាចទាក់ទងអភិបាលក្រុងបាត់ដំបង លោក លាង វាសនា ដើម្បីសុំការអត្ថាធិប្បាយបន្ថែមជុំវិញបញ្ហានេះ បាននៅឡើយទេ នៅថ្ងៃទី២១ ខែតុលា។
រដ្ឋបាលក្រុងបាត់ដំបង ឲ្យដឹងថា ក្រោយបញ្ចប់ពិធីបុណ្យអុំទូករយៈពេល៥ថ្ងៃ កាលពីថ្ងៃទី១៨ ខែតុលា កន្លងទៅ កម្លាំងអនាម័យរបស់រដ្ឋបាលក្រុង ក៏បានចុះបោសសម្អាតបរិវេណកន្លែងប្រារព្ធពិធីអស់រយៈពេល១ថ្ងៃប៉ុណ្ណោះ។
ទាក់ទងនឹងបញ្ហានេះ អ្នកជំនាញបរិស្ថានកត់សម្គាល់ថា ការកើនឡើង នៃកាកសំណល់រាប់សិបតោន ស្មើនឹងជិត ៥០ភាគរយ ក្នុងពិធីបុណ្យអុំទូក នៅខេត្តបាត់ដំបងថ្មីៗនេះ បានបង្ហាញចំណុច២សំខាន់ គឺកម្សោយរបស់អាជ្ញាធរក្នុងការផ្សព្វផ្សាយអប់រំពលរដ្ឋឲ្យចេះទុកដាក់ និងវេចខ្ចប់សំរាមឲ្យបានត្រឹមត្រូវ និងការយល់ដឹងរបស់ពលរដ្ឋនៅមានកម្រិត ចំពោះការគ្រប់គ្រងសំណល់ និងប្លាស្ទិកជាដើម។
អ្នកស្រាវជ្រាវ និងឃ្លាំមើលធនធានធម្មជាតិនៅកម្ពុជា លោក សេង សុខហេង មានប្រសាសន៍ថា ប្រសិនបើអាជ្ញាធរពុំបានគិតគូរ និងផ្សព្វផ្សាយឲ្យបានទូលំទូលាយអំពីផលប៉ះពាល់បរិស្ថាន និងសុខភាពដល់ពលរដ្ឋ និងភ្ញៀវទេសចរ ដែលមកចូលរួមពិធីបុណ្យជាតិនានា ជាពិសេសពិធីបុណ្យអុំទូក ដែលនឹងប្រព្រឹត្តទៅនៅពាក់កណ្ដាលខែវិច្ឆិកាខាងមុខនេះទេ កាកសំណល់ និងសំរាមក្រោយពិធីបុណ្យនៅរាជធានីនេះ អាចនឹងកើតឡើងមិនខុសពីនៅខេត្តបាត់ដំបងឡើយ។
លោក សេង សុខហេង៖«អ្វី ដែលរដ្ឋគួរតែធ្វើ គឺការផ្សព្វផ្សាយអំពីផលប៉ះពាល់នៃសំរាម ឲ្យបានទូលំទូលាយ ជាជាងការផ្ដល់ឱកាសឲ្យការផ្សព្វផ្សាយទៅលើគ្រឿងស្រវឹង ឬក៏អ្វី ដែលអាចធ្វើឲ្យប៉ះពាល់ទៅដល់សុខភាពប្រជាពលរដ្ឋ ។ ប៉ុន្តែការអប់រំផ្សព្វផ្សាយអំពីសំរាម ហាក់បីដូចជា មានភាពតូចចង្អៀត ឬក៏មិនទាន់បានទូលំទូលាយ អីចឹងរដ្ឋគួរតែធ្វើឲ្យបានទូលំទូលាយ»។
ពិធីបុណ្យអុំទូកនៅខេត្តបាត់ដំបង បានបន្សល់ទុកសំរាមជាង ១រយតោន ប៉ុន្តែភ្ញៀវទេសចរ ដែលទៅកម្សាន្តក្នុងពិធីបុណ្យនេះ ហាក់កើនឡើងតិចតួច ។ របាយការណ៍មន្ទីរទេសចរណ៍ ខេត្តបាត់ដំបងឲ្យដឹងថា ក្នុងរយៈពេល ២ថ្ងៃ គឺកាលពីថ្ងៃទី១៦ និងទី១៧ ខែតុលា ភ្ញៀវទេសចរជាតិ-អន្តរជាតិ ជិត១លាន ២សែននាក់ (១.១៧៣.៣៨៦) បានទៅលេងកម្សាន្តពិធីបុណ្យអុំទូកនៅក្នុងខេត្តនេះ ។ មន្ទីរទេសចរណ៍ឲ្យដឹងទៀតថា តួលេខភ្ញៀវទេសចរនេះ បានកើនឡើងប្រមាណ៧ភាគរយ (៧.១១) ធៀបនឹងរយៈពេលដូចគ្នា កាលពីឆ្នាំ២០២៣ ដែលមានភ្ញៀវទេសចរ ជិត១លាន១សែននាក់ (១ ០៩៥ ៤៦២) បានទៅកម្សាន្តក្នុងពិធីបុណ្យអុំទូកនៅខេត្តបាត់ដំបង ។
សកម្មជន និងអ្នកជំនាញបរិស្ថាន ទទូចដល់រដ្ឋាភិបាលឲ្យបង្កើនការផ្សព្វផ្សាយអំពីផលប៉ះពាល់បរិស្ថាន និងសុខភាព ឲ្យពលរដ្ឋបានយល់ដឹងពីឥរិយាបថរស់នៅស្អាត កាត់បន្ថយការប្រើប្រាស់ប្លាស្ទិក និងគ្រប់គ្រងសំណល់គ្រប់ប្រភេទឲ្យបានត្រឹមត្រូវ។ ពួកគាត់ ក៏ស្នើដល់អាជ្ញាធរឲ្យពង្រឹងការផាកពិន័យចំពោះអ្នកគ្រប់គ្រង និងបោះចោលសំរាមមិនបានត្រឹមត្រូវ ព្រមទាំងពង្រឹងគោលនយោបាយភូមិឃុំ សង្កាត់មានសុវត្ថិភាព និងមានបរិស្ថានស្អាតផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។