សកម្មជនបរិស្ថានទាមទារឱ្យក្រសួងពាក់ព័ន្ធលុបចោលគម្រោងសាងសង់អាងស្តុកទឹក ដែលនាំឲ្យមានការបំផ្លិចបំផ្លាញព្រៃឈើជាង ៧ពាន់ហិកតារ ស្ថិតក្នុងឧទ្យានជាតិជួរភ្នំក្រវាញខេត្តពោធិ៍សាត់។ ការទាមទារនេះ ធ្វើឡើងក្រោយក្រសួងធនធានទឹក និងឧតុនិយម បង្កើតគម្រោងសាងសង់អាងស្តុកទឹកមួយដោយស្ងាត់ៗក្នុងតំបន់ស្នូលនៃឧទ្យានជាតិជួរភ្នំក្រវាញ។
សកម្មជនបរិស្ថាន និងអង្គការសង្គមស៊ីវិល មិនគាំទ្រគម្រោងសាងសង់អាងស្តុកទឹក ក្នុងឧទ្យានជាតិជួរភ្នំក្រវាញកណ្ដាល ស្ថិតនៅភូមិសាស្ត្រ ឃុំរកាត ស្រុកក្រវាញ ខេត្តពោធិ៍សាត់ ជាង៧(៧.៣១២)ពាន់ហិកតារនោះទេ។ ពួកគាត់ស្នើឲ្យក្រសួងពាក់ព័ន្ធលុបចោលគម្រោងមួយនេះ ដោយសំអាងថា គម្រោងនេះធ្វើឲ្យប៉ះពាល់ព្រៃស្រោង ដែលមានដើមឈើធំៗ និងសត្វព្រៃជាច្រើនប្រភេទនៅតំបន់នោះ។
សកម្មជនរិះគន់គម្រោងអាងស្តុកទឹកនេះ
សកម្មជនសិទ្ធិមនុស្ស និងបរិស្ថាន កញ្ញា លឹម គឹមសួរ ប្រាប់វិទ្យុអាស៊ីសេរី នៅថ្ងៃទី២២ ខែកុម្ភៈថា គម្រោងអាងស្តុកទឹកខេត្តពោធិ៍សាត់នេះ គឺជាលេសរបស់រដ្ឋាភិបាល និងក្រសួងពាក់ព័ន្ធ ដើម្បីឲ្យក្រុមហ៊ុនឯកជន និងក្រុមឈ្មួញខិលខូចរកស៊ីអាជីវកម្មឈើទ្រង់ទ្រាយធំនៅតំបន់នោះតែប៉ុណ្ណោះ ពីព្រោះបច្ចុប្បន្នព្រៃឈើដែលមានតម្លៃនៅសល់តែតំបន់ឧទ្យានជាតិជួរភ្នំក្រវាញ។ កញ្ញាបន្ថែមថា សព្វថ្ងៃមានគម្រោងវារីអគ្គិសនីធំៗចំនួន២ ក្នុងខេត្តកោះកុង និងខេត្តពោធិ៍សាត់ ដែលកំពុងគំរាមកំហែងដល់ព្រៃឈើនៅតំបន់នោះយ៉ាងធ្ងន់ធ្ងរ ហើយប្រសិនបើរដ្ឋាភិបាលអនុវត្តគម្រោងអាងស្តុកទឹកខេត្តពោធិ៍សាត់មែននោះ រដ្ឋាភិបាលនៅតែគ្មានឆន្ទៈក្នុងការការពារធនធានធម្មជាតិដដែល។
កញ្ញា លឹម គឹមសួរ៖ «យល់ថាវាជាលេសមួយពីរដ្ឋាភិបាលក៏ដូចជាក្រុមហ៊ុនដែលចង់បានផលពីធនធានធម្មជាតិនៅតំបន់នោះ ដើម្បីរក្សាបាននូវគម្របព្រៃឈើ ក៏ដូចជាថែរក្សាព្រៃឈើនៅតំបន់នោះខ្ញុំគិតថារដ្ឋាភិបាលគួរតែបញ្ឈប់គម្រោងនឹង ហើយព្យាយាមសាកល្បងបកត្រឡប់មកទន្លេសាបវិញ ស្វែងវិធីសាស្ត្រសំអាតទន្លេសាបដើម្បីយកទឹកមកប្រើប្រាស់ ជៀសវាងជីកអាងស្តុកទឹកនៅក្នុងតំបន់មួយដែលធ្វើអោយរងផលប៉ះពាល់ដល់ធនធានធម្មជាតិយើង»។
ជុំវិញរឿងនេះ វិទ្យុអាស៊ីសេរី មិនអាចទាក់ទងប្រធានមន្ទីរបរិស្ថានខេត្តពោធិ៍សាត់ លោក អេង រស្មី ដើម្បីសុំការអត្ថាធិប្បាយបានទេ នៅថ្ងៃទី២២ ខែកុម្ភៈ។
អាជ្ញាធរមិនទាន់ចុះសិក្សាវាយតម្លៃពីផលប៉ះពាល់នៅតំបន់នោះ
រហូតមកដល់ពេលនេះ អាជ្ញាធរពាក់ព័ន្ធមិនទាន់ចុះសិក្សាវាយតម្លៃពីផលប៉ះពាល់នៅតំបន់នោះ និងផ្សព្វផ្សាយគម្រោងអាងស្តុកទឹកទុកខេត្តពោធិ៍សាត់នេះ ជាសាធារណៈនៅឡើយនោះទេ បន្ទាប់ពីក្រសួងធនធានទឹក និងឧតុនិយម កាលពីខែកក្កដា ឆ្នាំ២០២៤ បាន គ្រោងយកដីព្រៃស្រោងក្នុងឧទ្យានជាតិជួរភ្នំក្រវាញកណ្ដាល នៅស្រុកក្រវាញ ខេត្តពោធិ៍សាត់ ជាង៧ (៧.៣១២) ពាន់ហិកតារ ដើម្បីធ្វើជាអាងស្តុកទឹកទុកដោយអះអាងដើម្បីប្រើប្រាស់ទៅតាមប្រព័ន្ធធារាសាស្ត្រនានាក្នុងខេត្តនេះ។
ទាក់ទិននឹងបញ្ហានេះ នាយកប្រតិបត្តិ នៃសមាគមបណ្ដាញយុវជនកម្ពុជា (CYN) លោក ហេង គឹមហុង លើកឡើងថា អាជ្ញាធរត្រូវសិក្សាវាយតម្លៃអំពីផលប៉ះពាល់ឲ្យបានត្រឹមត្រូវ និងត្រូវមានការចូលរួមពីគ្រប់ភាគីពាក់ព័ន្ធ។ លោកថា ប្រសិនបើគម្រោងមួយនេះបង្កឲ្យផលប៉ះពាល់ទៅដល់ធនធានធម្មជាតិ និងជីវចម្រុះនៅតំបន់នោះធ្ងន់ធ្ងរ រដ្ឋាភិបាលគួរតែពិចារណាលុបចោលនូវគម្រោងអាងស្តុកទឹកនេះ។
លោក ហេង គឹមហុង៖ «ជាចំណុចសំខាន់ដែលខ្ញុំគិតថាសំខាន់ត្រូវតែយកចិត្តទុកដាក់ក្នុងការវិភាគ ជជែកពិភាក្សាជាមួយពីភាគីពាក់ព័ន្ធបន្ថែមទៀតដែរ នឹងជាអ្វីដែរខ្ញុំលើកទឹកចិត្តអោយមានការគិតគូរ ហើយបើសិនជារកឃើញអំពីទំហំនៃផលប៉ះពាល់វាតិចជាងផលប្រយោជន៍ អាចប្រឈមមុខ វាផលប៉ះពាល់ដល់តំបន់ស្នូលជីវចម្រុះ តំបន់ដែលមានសក្ដានុពលគួរតែពិចារណាឲ្យមានការលុបចោលគម្រោងនេះ។
អត្ថបទដែលទាក់ទង៖
[ តើរាជរដ្ឋាភិបាលអាចបោះបង់មហិច្ឆតាសាងសង់ទំនប់វារីអគ្គិសនីអារ៉ែងឬទេ?Opens in new window ]
ឧទ្យានជាតិជួរភ្នំក្រវាញ ជាតំបន់អភិរក្សព្រៃឈើ និងសត្វព្រៃដ៏សំខាន់របស់កម្ពុជា ដែលមានផ្ទៃដីជាង៤សែន (៤០១.៣១៣)ហិកតារ ស្ថិតក្នុងភូមិសាស្ត្រជាប់ខេត្តកោះកុង ខេត្តពោធិ៍សាត់ ខេត្តកំពង់ស្ពឺ។ ឧទ្យានជាតិមួយនេះ សម្បូរទៅដោយ តំបន់ទេសចរណ៍ធម្មជាតិ តំបន់ការពារទេសភាព និងជាតំបន់វប្បធម៌ ប្រពៃណីរបស់ជនជាតិដើមភាគតិច និងព្រៃឈើដ៏សំខាន់ក្នុងការកាត់បន្ថយការប្រែប្រួលអាកាសធាតុ ដែលមានសត្វព្រៃកម្រគ្រប់ប្រភេទ ដូចជា ដំរីអាស៊ី ខ្លាពពក ក្រពើភ្នំ ខ្លាឃ្មុំធំ ខ្លាឃ្មុំតូច និងសត្វកែះ ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។