ប្រជានេសាទខ្លះរស់នៅតាមដងទន្លេសាប ក្នុងខណ្ឌឫស្សីកែវ ត្អូញត្អែរ ពីតម្លៃត្រីប្រហុកចុះថ្លៃ បើប្រៀបធៀបនឹងឆ្នាំមុនៗ ចំណែកឈ្មួញ ដែលធ្លាប់កុម្ម៉ង់ទិញ ក៏ធ្លាក់ចុះ ដោយសារតែវិបត្តិសេដ្ឋកិច្ច។
អស់រយៈពេលជាច្រើនឆ្នាំមកនេះ ប្រជានេសាទមួយចំនួននៅតាមដងទន្លេសាប តែងតែនិយម ប្រកបរបររកត្រីបែបប្រពៃណី ធ្វើជាត្រីប្រហុក ផ្អក ត្រីឆ្អើរ ឬទឹកត្រី សម្រាប់ទុកបរិភោគ និងយកលក់ ដោះស្រាយជីវភាព ។ ប៉ុន្តែ ឆ្នាំនេះ ខុសពីឆ្នាំមុនៗ ទោះបីថា ត្រីសម្បូរ តែតម្លៃចុះថ្លៃស្ទើរពាក់កណ្ដាល។
លោកស្រី ស្មាន ម៉ីសំ រស់នៅផែឡូនេសាទត្រីគីឡូលេខ៩ ខណ្ឌឫស្សីកែវ ត្ពូញត្អែអំពីការខ្វះអតិថិជនមកទិញត្រី។
លោកស្រី ស្មាន ម៉ីសំ៖«ឆ្នាំនេះត្រីកើនជាងឆ្នាំមុន តែវាធូរថ្លៃជាងឆ្នាំមុន។ ឆ្នាំមុនត្រីវាយហើយ ៤ពាន់ ៥រយ រៀល។ តែឆ្នាំនេះ ត្រីវាយហើយ ៣៧ ទៅ ៣៥ មិនទាន់វាយ ១៨ ទៅ ១៥ តាមកាលៈទេសៈ។ ទី២ទៀត សេដ្ឋកិច្ចធ្លាក់ចុះ។ ដូច្នេះ គ្មាន!អត់មានលុយ អត់សូវមានអតិថិជនមកទិញទេ ឥឡូវនេះ។ អ្នកស្រែ ដែលធ្លាប់ធ្វើច្រើនៗ ឥឡូវ ក៏ខ្សោយដែរ។ ដូចថា ទិញ ១តោន ថយមក ៥០០គីឡូ។ កាលឆ្នាំទៅម្នាក់៧តោន ៨តោនកម្ម៉ងយើង»។
កាលពីថ្ងៃទី១៩ ខែធ្នូ រដ្ឋមន្រ្តីក្រសួងកសិកម្មលោក ឌិត ទីណា បានអះអាងថា ឆ្នាំនេះ ផលត្រីកើនឡើងជាងឆ្នាំមុនប្រមាណ ៥% ដោយសារតែបទល្មើសនេសាទធ្លាក់ចុះ។
ពាក់ព័ន្ធនឹងរឿងនេះ ពលរដ្ឋលើកឡើងថា ឆ្នាំនេះ ត្រីមានការកើនឡើងមែនប៉ុន្តែ អាជ្ញាធរពាក់ព័ន្ធក៏គួរតែជួយរកទីផ្សារ ឱ្យបានថ្លៃជាងនេះ ដើម្បីពួកគាត់អាចបានចំណូលសមរម្យ ដើម្បីដោះស្រាយជីវភាព និងមានកម្លាំងចិត្តបន្តទៀត។
លោកស្រី ខរ នីខរ រស់នៅផែឡូត៍នេសាទត្រីគីឡូលេខ៩ ខណ្ឌឫស្សីកែវ ក៏ត្អូញអំពីការលក់ត្រីមិនសូវដាច់ដូចឆ្នាំមុន។
លោកស្រី ខរ នីខរ៖«ពីមុនរកបានយកទៅលក់ ពេលគេធ្វើការងារ(បានមានប្រាក់ចំណូល)ពេលហ្នឹងក៏លក់ដាច់ដែរ។ ដល់ឥឡូវ ជីវភាពឆ្នាំនេះ ដូចមិនដឹងម៉េចទេ។ ពីមុន លក់ដាច់ណាស់ មនុស្សមកច្រើនៗ បងប្អូនអ្នកស្រែចង់គាត់ចុះមកទិញច្រើន ឥឡូវអត់ទេ មកតែបួនប្រាំនាក់ ពីរបីនាក់។ ធ្វើហើយភ្លាមគាត់ទៅវិញហើយ»។
លោកស្រី យ៉ា អាហ្រ្វីនី រស់នៅផែឡូត៍នេសាទត្រីគីឡូលេខ៩ ខណ្ឌឫស្សីកែវដែរ.
លោកស្រី យ៉ា អាហ្រ្វីនី៖ «សូមបងប្អូនមកជួយទិញឱ្យបានច្រើន ព្រោះគីឡូម៉ែត្រលេខ៩ ឥឡូវវាស្ងាត់ពេក ហើយត្រីឥឡូវ ក៏ថោកដែរ។ ថោកមែនទែនហ្មង។ ពីមុនត្រីស្រស់ លក់បាន ២ពាន់ ៥រយ ឥឡូវ សល់តែ ១ជាង ឬ ១ពាន់ ៥រយរៀល » ។
វិទ្យុអាស៊ីសេរីពុំអាចទាក់ទង នាយខណ្ឌរដ្ឋបាលជលផលរាជធានីភ្នំពេញ លោក ងិន ឌី ដើម្បីបកស្រាយជុំវិញបញ្ហាត្រីចុះថ្លៃបានទេ នៅថ្ងៃទី២២ ខែធ្នូ។
ប៉ុន្តែលោកធ្លាប់ប្រាប់សារព័ត៌មានក្នុងស្រុកថា បច្ចុប្បន្ននេះ ត្រីមានតម្លៃចាប់ពី ១គីឡូប្រមាណ ១ពាន់ ៨រយ (១.៨០០ ទៅជាង ២ពាន់ (២.០០០) រៀល ហើយតម្លៃត្រីឡើងចុះជាក់ស្ដែង គឺវាអាស្រ័យលើត្រីសម្បូរ ច្រើន ឬតិចប៉ុណ្ណោះ។
ប្រភេទត្រី ដែលពលរដ្ឋយកធ្វើប្រហុក រួមមាន ត្រីស្លឹកឫស្សី និងត្រីរៀល។ ត្រីទាំងនេះចាប់ផ្ដើមបើកនេសាទ ពីថ្ងៃទី១៩ រហូតដល់ថ្ងៃទី២៥ ខែធ្នូ ដោយសារត្រី ចាប់ផ្ដើមផ្លាស់ទីចេញពីបឹងទន្លេសាប បឹង ស្ទឹង និងព្រែកនានា ចូលទន្លេសាប ទន្លេមេគង្គ និងទន្លេបាសាក់។ ជារៀងរាល់ឆ្នាំ ការប្រមូលផលត្រីនេះ បានជួយដល់ជីវភាពពលរដ្ឋជាច្រើន។
ផលត្រីដែលប្រមូលជាប្រភេទត្រីប្រហុកនៅឆ្នាំនេះ មានប្រមាណ ៧០ភាគ (៧០%) ជាប្រភេទត្រីស្លឹកឫស្សី ១០ភាគរយ (១០%) ជាត្រីឆ្វៀត និង ២០ភាគ (២០%) ត្រីចម្រុះ។ ចំណែកតំបន់ ដែលមានប្រភេទត្រីទាំងនេះច្រើន ស្ថិតនៅភូមិសាស្ត្រស្រុកពញាឮ ខេត្តកណ្ដាល និងខណ្ឌឫស្សីកែវ រាជធានីភ្នំពេញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។