តំណាងប្រជានេសាទនៅស្រុកឯកភ្នំ អះអាងថា ព្រៃលិចទឹកនៅតំបន់បឹងទន្លេសាប ក្នុងខេត្តបាត់ដំបង ជាច្រើនហិកតារ កំពុងរងការកាប់បំផ្លាញដោយអ្នកមានទ្រព្យនៅក្នុងមូលដ្ឋាន ដើម្បីយកដីធ្វើជាកម្មសិទ្ធិផ្ទាល់ខ្លួន ហើយពុំមានអាជ្ញាធរណាទប់ស្កាត់នៅឡើយទេ។ មេឃុំព្រែកនរិន្ទ សមត្ថកិច្ច បានចុះទៅស្រាវជ្រាវ ប៉ុន្តែរកមិនឃើញបទល្មើស។
ប្រជាពលរដ្ឋនៅស្រុកឯកភ្នំ ទទូចឲ្យអាជ្ញាធរពាក់ព័ន្ធចាត់វិធានការតាមផ្លូវច្បាប់ទៅលើជនល្មើសដែលទន្ទ្រានដីព្រៃលិចទឹកជាបន្ទាន់ ដើម្បីរក្សាព្រៃទុកជាជម្រកត្រីពងកូនបន្តទៀត។
តំណាងប្រជានេសាទខេត្តបាត់ដំបង លោក ហ៊ុត ហាន ឲ្យដឹងនៅថ្ងៃទី១៦ មករា ថា ប្រជាពលរដ្ឋអ្នកមានលុយកាក់ក្នុងមូលដ្ឋានប្រមាណ ៣នាក់ កំពុងនាំគ្នាទន្ទ្រានដីព្រៃលិចទឹកនៅបឹងកន្សែង ក្នុងភូមិអន្សងសក ឃុំព្រែកនរិន្ទ ស្រុកឯកភ្នំ ដើម្បីយកដីធ្វើជាកម្មសិទ្ធិផ្ទាល់ខ្លួន។ លោក ហ៊ុត ហាន សម្ដែងការព្រួយបារម្ភយ៉ាងខ្លាំងអំពីការកាប់ព្រៃលិចទឹកនេះ ថាអាចនឹងហិនហោចព្រៃក្នុងពេលឆាប់ៗ៖ «ខ្ញុំគិតថា កាលណាផ្ដល់ព័ត៌មានទៅហាក់មិនដំណោះស្រាយទេ ឃើញតែអ្នកកាប់ព្រៃនៅដដែល។ ក្ដីព្រួយបារម្ភរបស់ខ្ញុំគិតថា ថ្ងៃខាងមុខនឹងអស់ព្រៃកាន់តែធ្ងន់ធ្ងរ ព្រោះអត់មានចំណាត់ការអីច្បាស់លាស់ទៅលើអ្នកប្រព្រឹត្តនោះទេ ហើយអ្នកដែលហ៊ានចេះតែបានទៅ អ្នកដែលខ្លាចចេះតែអត់»។
លោកកត់សំគាល់ទៀតថា មូលហេតុនៃការបំផ្លាញព្រៃរនាមនេះ ទំនងដោយសារអាជ្ញាធរមិនអើពើទប់ស្កាត់ទើបធ្វើឲ្យជនល្មើសហ៊ានប្រព្រឹត្តដោយសេរីនោះ។
ឆ្លើយតបនឹងបញ្ហានេះ មេឃុំព្រែកនរិន្ទ លោក សេង យី មានប្រសាសន៍យ៉ាងខ្លីថា សមត្ថកិច្ចចុះទៅពិនិត្យមើលរួចហើយ គឺពុំមានអ្នកទន្ទ្រានព្រៃលិចទឹកដូចការចោទប្រកាន់ឡើយ៖ «ជលផលគេចុះទៅពិនិត្យពីម្សិលមិញ ម្សិលម្ង៉ៃ គេចុះទៅមើលជាមួយសហគមន៍ហើយ ដូចអ្នករាយការណ៍មកថា មានគេរុករានតែអត់មែនទេ»។
ទោះជាយ៉ាងណា តំណាងប្រជានេសាទ លោក ហ៊ុត ហាន អះអាងថា ព្រៃលិចទឹកដែលគេកាប់បំផ្លាញនោះស្ថិតនៅក្នុងតំបន់៣ ហើយធ្វើសកម្មភាពប្រមាណ២សប្ដាហ៍ហើយ គឺអស់ព្រៃប្រហែល ៣០ហិកតារ ម្យ៉ាងទៀតពួកគេបន្តសកម្មភាពមិនទាន់ឈប់នៅឡើយទេ។
អង្គការសម្ពន្ធភាពដើម្បីអភិរក្សធនធានជលផលប្រចាំតំបន់បឹងទន្លេសាប អ្នកស្រី នូ សារឹម មានប្រសាសន៍ថា ការកាប់ព្រៃលិចទឹកជាអំពើខុសច្បាប់ ហើយធ្វើឲ្យបាត់បង់ជម្រកត្រីពងកូនក្នុងរដូវវស្សា៖ «ធ្វើយ៉ាងណាសុំឲ្យបងប្អូនឈប់មានការកាប់រាន ហើយត្រូវទុកឲ្យដីព្រៃលិចទឹកដុះឡើងវិញ សម្រាប់ត្រីពងកូនសម្រាប់កន្លែងរកចំណីរបស់ត្រី និងសម្រាប់ជួយការពារខ្យល់ព្យុះ ព្រោះនៅលើពិភពលោកបញ្ហាខ្យល់ព្យុះបណ្ដាលមកពីការបាត់បង់ព្រៃឈើនេះឯង»។
តំណាងប្រជាពលរដ្ឋកត់សំគាល់ថា ប៉ុន្មានឆ្នាំចុងក្រោយនេះ មានការកាប់បំផ្លាញព្រៃលិចទឹកយកដីធ្វើកម្មសិទ្ធិនៅតំបន់បឹងទន្លេសាប ក្នុងឃុំព្រែកនរិន្ទ ប្រមាណពី ១០ ទៅ ៤០ហិកតារជារៀងរាល់ឆ្នាំ។ អ្នកស្រី នូ សារឹម លើកឡើងថា ប្រសិនបើអាជ្ញាធរមិនទប់ស្កាត់ការបំផ្លាញព្រៃទាន់ពេលទេ នឹងធ្វើឲ្យហិនហោចព្រៃលិចទឹក ហើយធ្វើឲ្យផលត្រីកាន់តែខ្សត់ទៅ ហើយនាំឲ្យប៉ះពាល់ដល់របរនេសាទរបស់ប្រជាពលរដ្ឋនៅតំបន់បឹងទន្លេសាបជាពុំខាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។