សកម្មជន​បរិស្ថាន ៣នាក់​ នៃចលនាមាតាធម្មជាតិ​ស្នើសុំដល់​តុលាការ​កំពូល​​ឱ្យ​ទម្លាក់​បទ​ចោទ

ក្រុម​យុវជន​ចលនា​មាតា​ធម្មជាតិ​ចំនួន​បី​នាក់ បាន​ចូល​បំភ្លឺ​នៅ​តុលាការ​កំពូល​រាជធានី​ភ្នំពេញ ពី​បទ «ញុះញង់» បន្ទាប់​ពី​បាន​បាន​ប្ដឹង​សាទុក្ខ។ ពួក​គេ​លើក​ឡើង​ថា សកម្មភាព​ការពារ​បរិស្ថាន​កន្លង​មក មិន​មែន​ជា​ការ​ញុះញង់​បង្ក​ភាព​វឹកវរ​ក្នុង​សង្គម​នោះ​ទេ។ អ្នក​ទាំង​បី​ស្នើ​តុលាការ​កំពូល​ឱ្យ​ផ្ដល់​យុត្តិធម៌ និង​ទម្លាក់​បទ​ចោទ ដើម្បី​ឱ្យ​ពួក​គេ​មាន​សិទ្ធិ​សេរីភាព​ពេញលេញ​ក្នុង​កិច្ចការពារ​បរិស្ថាន និង​ធនធាន​ធម្មជាតិ​បន្ត​ទៀត។

ក្រុម​យុវជន​ចលនា​មាតា​ធម្មជាតិ​ ៣នាក់ ​រួម​មាន​លោក ថុន រដ្ធា កញ្ញា ភួន កែវរស្មី និង កញ្ញា ឡុង​គន្ធា នៅថ្ងៃទី២២ ខែ​កក្កដា បាន​ឡើង​បំភ្លឺ​នៅ​តុលាការ​កំពូល ពាក់ព័ន្ធ​នឹង​បទ «ញុះញង់​បង្ក​ឱ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម»។ ការ​ឡើង​បំភ្លឺ​នេះ​ធ្វើ​ឡើង​បន្ទាប់​ពី អ្នក​ទាំង​បី​បាន​​ប្ដឹង​សារ​ទុក្ខ​ជំទាស់​នឹង​ការ​សម្រេច​របស់​សាលាឧទ្ធរណ៍​រាជធានី​ភ្នំពេញ ដែល​សម្រេច​ព្យួរ​ទោស​ពួក​គេ កាល​ពី​ថ្ងៃ​ទី៥ ​ខែ​វិច្ឆិកា ឆ្នាំ២០២១។

យុវជន​ចលនា​មាតា​ធម្មជាតិ លោក ថុន រដ្ឋា ប្រាប់​វិទ្យុ​អាស៊ី​សេរី​ឱ្យ​ដឹង​ថា នៅ​ក្នុង​តុលាការ​លោក​បាន​លើក​ឡើង​ពី​សកម្មភាព​ក្នុង​ការ​ការពារ​បរិស្ថាន​កន្លង​មក ថា មិន​មែន​ជា​ការ​បង្ក​ឱ្យ​មាន​ភាព​វឹកវរ និង​ញុះញង់​ដូច​ការ​ចោទ​ប្រកាន់​នោះ​ទេ។ លោក​បន្ត​ថា សកម្មភាព ដែល​លោក និង​ក្រុម​យុវជន​ដទៃ​ទៀត​ធ្វើ​កន្លង​មក គឺ​កើត​ចេញ​ពី​ក្ដី​ស្រឡាញ់ និង​ឆន្ទៈ​ក្នុង​ការ​ការពារ​បរិស្ថាន និង​ធនធាន​ធម្មជាតិ ដោយ​មិន​មាន​ការ​បង្គាប់​បញ្ជា​ពី​ជន​ណា​ម្នាក់​ឡើយ។ លោក​ស្នើ​ដល់​តុលាការ​ឱ្យ​ទម្លាក់​ចោល​បទ​ចោទ​ទៅ​លើ​រូប​លោក ក៏​ដូច​ជា​យុវជន​ដទៃ​ទៀត ដ្បិត​ថា សកម្មភាព​ទាំង​នោះ ក៏​មិន​បាន​ធ្វើ​ឡើង​ផ្ទុយ​ពី​ច្បាប់​រដ្ឋធម្មនុញ្ញ​របស់​ប្រទេស ប៉ុន្តែ​គឺ​ជា​សកម្មភាព​មួយ ដែល​គួរ​តែ​ត្រូវ​ទទួល​បាន​ការ​គាំទ្រ និង​លើក​ទឹក​ចិត្ត​ពី​រដ្ឋាភិបាល៖ « ខ្ញុំ​ស្នើ​ឱ្យ​តុលាការ​កំពូល ( ឱ្យ ) សម្រេច​ពិចារណា​ហើយ ពិចារណា​ទៀត ជា​ពិសេស ផ្ដល់​ក្ដី​អាណិត​អាសូរ​មក​ដល់​ខ្ញុំ​ផង។ ផ្ដល់​ក្ដី​អាណិត​អាសូរ​តាម​រយៈ​ការ​ផ្ដល់​យុត្តិធម៌​មក​កាន់​ខ្ញុំ សង​នូវ​ភាព​ស្អាតស្អំ​មក​កាន់​ពួក​ខ្ញុំ​ឡើង​វិញ ដើម្បី​ឱ្យ​ពួក​ខ្ញុំ​មាន​សេរីភាព​ពេញលេញ​ក្នុង​ការ​ធ្វើការ​ទៅ​លើ​ធនធាន​ធម្មជាតិ ប្រកប​ដោយ​ប្រសិទ្ធភាព​បន្ត​ទៀត »

មេធាវី​ការពារ​ក្ដី លោក សំ ចំរើន ឱ្យ​ដឹង​ថា ការ​សាកសួរ​ដេញដោល​របស់​តុលាការ​ទៅ​លើ​ក្រុម​យុវជន​ទាំង​បី​នាក់ ហាក់​មាន​ភាព​ប្រក្រតី​នោះ​ទេ ហើយតុលាការនឹងប្រកាសសាលដីកានៅថ្ងៃទី២៩ កក្កដា​ខាង​មុខ​នេះ។ ដោយឡែក លោក​នៅ​មិន​ទាន់​ហ៊ាន​សន្និដ្ឋាន​ណា​មួយ​ទៅ​លើ​ដំណើរ​ការ​ក្ដី​នោះ​ទេ ដោយ​លោក​ថា ស្ថិត​នៅ​ក្នុង​ដំណាក់​កាល​រង់ចាំ​ការ​សម្រេច​របស់​តុលាការ​នៅ​ឡើយ។ ប៉ុន្តែ​លោក​បន្ត​ថា ប្រសិន​បើ​យុវជន​ទាំង​បី​មិន​អាច​ទទួល​យក ការ​សម្រេច​របស់​តុលាការ​នៅ​សប្ដាហ៍​ក្រោយ​បាន នោះ​នឹង​មាន​ការ​ពិភាក្សា​ទៅ​លើ​ដំណើរ​ការ​រឿង​ក្ដី​នេះ​បន្ត​ទៅ​ទៀត៖ « យើង​មិន​ចង់​មាន​បុរេ​វិនិច្ឆ័យ​ទេ ព្រោះ​រឿង​ក្ដី​យើង​ប្ដឹង​សាទុក្ខ ហើយ​នៅ​ក្នុង​ដំណាក់កាល​រង់ចាំ​ការ​វិនិច្ឆ័យ​ជា​ចុង​ក្រោយ​នៅ​ឡើយ។ អា​ហ្នឹង​យើង​ត្រូវ​ពិភាក្សា​គ្នា​ទៀត​ទៅ​លើ​លទ្ធភាព​ផ្លូវ​ច្បាប់​ថា តើ​យើង​អាច​ធ្វើ​បែប​ម៉េច​បាន។ ប្រសិន​បើ​លទ្ធភាព​ណា​មួយ​នៅ​ថ្ងៃ​នោះ យើង​មិន​ទទួល​យក​បាន យើង​នឹង​ពិភាក្សា​គ្នា »

វិទ្យុ​អាស៊ីសេរី​នៅ​ពុំ​ទាន់​អាច​ទាក់ទង​អគ្គលេខាធិការ​តុលាការ​កំពូល លោក​ស្រី ម៉ៅ ធីតា ដើម្បី​សុំ​ការ​បក​ស្រាយ​បន្ថែម​ជុំវិញ​រឿង​នេះ​បាន​នៅ​ឡើយ​នោះ​ទេ។

ទាក់ទិនរឿងនេះ ប្រធាន​សមាគម​និស្សិត​បញ្ញវន្ត​ខ្មែរ លោក កើត សារ៉ាយ ថ្លែងថា ទោះបីជា​ពលរដ្ឋ​ភាគ​ច្រើន​មិន​មាន​ជំនឿ​ទៅ​លើ​ប្រព័ន្ធ​យុត្តិធម៌​នៅ​កម្ពុជា ក៏​លោក​ក្នុង​នាម​ជា​អង្គការ​សង្គម​ស៊ីវិល នៅ​តែ​ជឿជាក់​ថា និង​ឱ្យ​តម្លៃ​ទៅ​លើ​ប្រព័ន្ធ​តុលាការ ជា​ពិសេស គឺ​តុលាការ​កំពូល​នេះ​តែ​ម្ដង។ លោក​ជឿជាក់​ថា តុលាការ​នឹង​សម្រេច​ទម្លាក់​ចោល​បទ​ចោទ​ទៅ​លើ​យុវជន​ទាំង​បី​នាក់ ដើម្បី​ឱ្យ​ពួក​គេ​មាន​លទ្ធភាព និង​សេរីភាព​ពេញលេញ ក្នុង​ការ​ចូលរួម​សកម្មភាព​ការពារ​បរិស្ថាន និង​ធនធាន​ធម្មជាតិ​ម្ដង​ទៀត៖ « យើង​នៅ​តែ​ជឿជាក់ និង​នៅ​តែ​ឱ្យ​តម្លៃ​ទៅ​លើ​តុលាការ​នៅ​ស្រុក​ខ្មែរ ដែល​បាន​ជំនុំជម្រះ​លើ​សកម្មជន​បរិស្ថាន​នៅ​ព្រឹក​មិញ​នេះ នឹង​អាច​ផ្ដល់​នូវ​យុត្តិធម៌ លើកលែង​បទ​ចោទ​ទៅ​លើ​ពួក​គាត់ ហើយ​ផ្ដល់​នូវ​ភាព​ស្អាតស្អំ ដើម្បី​ពួក​គាត់​មាន​នីតិសម្បទា​គ្រប់គ្រាន់​ក្នុង​ការ​រស់នៅ​ជាមួយ​នឹង​សង្គម​ទូទៅ ដែល​ជា​ជាង​បច្ចុប្បន្ន​ពួក​គាត់​នៅ​ជាប់​នូវ​ការ​ត្រួត​ពិនិត្យ​របស់​តុលាការ »

យុវជន​ចលនា​មាតា​ធម្មជាតិ​ទាំង​បី​នាក់ រួម​មាន លោក ថុន រដ្ឋា កញ្ញា ឡុង គន្ធា និង​កញ្ញា ភួន កែវរស្មី ត្រូវ​បាន​ចាប់​ខ្លួន​កាលពី​ខែ​កញ្ញា ឆ្នាំ​២០២០ បន្ទាប់​ពី​ពួក​គេ​ថត​វីដេអូ​បង្ហាញ​ពី​ផល​ប៉ះពាល់​បរិស្ថាន និង​គ្រោង​ស្លៀក​ស ​ពាក់​ស ​ដើរ​ពី​វត្តភ្នំ​សំដៅ​ទៅ​ផ្ទះ​លោក ហ៊ុន សែន ដើម្បី​សុំ​បញ្ឈប់​ការ​លុប​បឹង​កប់​ស្រូវ ឬ​បឹង​តា​មោក។ សាលាដំបូង​រាជធានី​ភ្នំពេញ​សម្រេច​ផ្ដន្ទាទោស​ពួក​គេ​នៅ​ខែ​ឧសភា ឆ្នាំ​២០២១ ដាក់​ពន្ធនាគារ​ចន្លោះ​ពី ១៨​ខែ ​ទៅ ២០​ខែ ពី​បទ «ញុះញង់​បង្ក​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម»។

អ្នក​ទាំងបី​ត្រូវ​បាន​ដោះលែង​កាល​ពី​ថ្ងៃ​ទី​៥ ខែ​វិច្ឆិកា ឆ្នាំ២០២១ បន្ទាប់ពី​អនុវត្ត​ទោស​ក្នុង​ពន្ធនាគារ​បាន ១​ឆ្នាំ ២​ខែ​តាម​ការ​កំណត់​របស់​តុលាការ ដោយ​ទោស​នៅ​សល់​ត្រូវ​ព្យួរ និង​ដាក់​ឱ្យ​ពួកគេ​ស្ថិតនៅ​ក្រោម​ការ​ត្រួតពិនិត្យ​រយៈពេល ៣​ឆ្នាំ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។