សកម្មជនព្រៃឈើ ព្រះសង្ឃ សហគមន៍ និងអង្គការមិនមែនរដ្ឋាភិបាល រួមគ្នាធ្វើយុទ្ធនាការទាមទារឲ្យមានការល្បាតព្រៃដោយសេរី កុំឲ្យមានការគំរាមកំហែង ឬការរារាំងពីស្ថាប័នមានសមត្ថកិច្ច ជាពិសេស ក្រសួងបរិស្ថាន។ ពួកគេបានចាប់ផ្ដើមធ្វើយុទ្ធនាការនេះ កាលពីថ្ងៃទី២១ ខែមីនា នៅចំទិវាអន្តរជាតិព្រៃឈើ ដោយចាប់ផ្ដើមធ្វើនៅតំបន់ឧទ្យានជាតិជួរភ្នំក្រវាញ។
ប្រធានអង្គការប្រឆាំងអំពើពុករលួយ ទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋ លោក ជា ហ៊ាន ហៅការហាមឃាត់មិនឲ្យសកម្មជន អង្គការសង្គមស៊ីវិលចុះល្បាតព្រៃថា ជាករណីរំលោភសិទ្ធិអង្គការសង្គមស៊ីវិល។ លោកថា វាជាអំពើល្មើសច្បាប់ បើសិនជាកើតមានបទល្មើស ហើយក្រសួងហាមឃាត់តែសកម្មជនការពារព្រៃឈើមិនឲ្យចុះល្បាតព្រៃ៖ « យើងចង់បានផ្ញើសារមួយទៅស្ថាប័ននៃក្រសួងបរិស្ថានទាំងមូល សូមឲ្យមានការបើកចំហ បើកបេះដូងឲ្យទូលាយ ដើម្បីជូនសកម្មជន ក៏ដូចជាពលរដ្ឋ និងសហគមន៍ ចូលរួមទាំងអស់គ្នាការពារព្រៃឈើទាំងអស់គ្នា ពីព្រោះព្រៃឈើគឺជាទ្រព្យសម្បត្តិជាតិ។ អ៊ីចឹង ជាការល្អហើយ ដែលពលរដ្ឋគាត់យកពេលវេលា យកសម្ភារៈរបស់គាត់ដោយខ្លួនឯង ចុះល្បាតព្រៃការពារជាផលប្រយោជន៍ជាតិ។ គួរតែបើកចំហឲ្យមានការចូលរួមឲ្យបានច្រើន ដើម្បីការពារព្រៃឈើ។ បើយើងនៅតែបណ្ដែតបណ្ដោយឲ្យមានសកម្មភាពនៃការកាប់បំផ្លាញព្រៃឈើ និងនៅតែមានការចែកវណ្ណៈគ្នា ខាងសង្គមស៊ីវិល ខាងស្ថាប័នរដ្ឋាភិបាល មិនអាចរួមគ្នាបាន គឺមិនកើតទេ » ។
ការធ្វើយុទ្ធនាការនេះ សកម្មជនបរិស្ថាន ព្រះសង្ឃ សហគមន៍ និងអង្គការសង្គមស៊ីវិល គ្រោងនឹងបន្តធ្វើរហូតដល់ខែឧសភា។ ក្រៅពីធ្វើនៅតំបន់ឧទ្យានជាតិជួរភ្នំក្រវាញ ពួកគេក៏គ្រោងបន្តធ្វើនៅតំបន់ព្រៃឡង់ នៅខេត្តមណ្ឌលគិរី រតនគិរី និងខេត្តស្ទឹងត្រែង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។