អ្នកឃ្លាំមើល និងគណបក្សនយោបាយ ស្វាគមន៍ ដែលរដ្ឋាភិបាល សម្រេចនិរាករគម្រោងលុបបឹងតាមោក ឬបឹងកប់ស្រូវ នៅជាយរាជធានីភ្នំពេញ ទំហំប្រមាណ ៣០ហិកតារវិញ ដោយដោះដូរគម្រោងរដ្ឋជំនួស។ ទោះជាបែបនេះក្តី ពួកគេជំរុញឲ្យរដ្ឋាភិបាល បង្ហាញគម្រោងផែនការអភិវឌ្ឍន៍បឹងតាមោក ជាសាធារណៈ។
អ្នកឃ្លាំមើលបរិស្ថាន និងគណបក្សនយោបាយ លើកឡើងថា បឹងតាមោកនៅមានអត្ថប្រយោជន៍សំខាន់ផ្នែកបរិស្ថាន ដូច្នេះរដ្ឋាភិបាលគួរពិចារណាក្នុងការលុបចោលគម្រោងដទៃទៀត ដែលធ្វើឱ្យប៉ះពាល់ដល់ផ្ទៃបឹងធម្មជាតិមួយនេះ។
អ្នកជំនាញអភិបាលកិច្ចទឹក លោក ហែម ឧត្ដម សង្កេតឃើញថា បឹងតាមោក បានដើរតួនាទីសំខាន់ ក្នុងការរំដោះទឹកភ្លៀង និង ស្ដុកទឹកស្អុយចេញពីរាជធានីភ្នំពេញ ដូច្នេះ លោក ចង់ឲ្យរដ្ឋាភិបាល បង្ហាញគម្រោងអភិវឌ្ឍន៍បឹងតាមោក ជាសាធារណៈ ដើម្បីជាផលប្រយោជន៍ ពលរដ្ឋរស់នៅក្នុងក្រុងភ្នំពេញ។ ក្រៅពីនេះ លោកជំរុញឲ្យរដ្ឋាភិបាល បន្តលុបចោល គម្រោងលុបបឹងតាមោកដទៃទៀត ដើម្បីកុំឲ្យប៉ះពាល់ធ្ងន់ធ្ងរដល់បរិស្ថាន និងទុកបឹងនោះជាអាងស្ដុកទឹក ដែលបង្ហូរចេញពីក្រុងភ្នំពេញ៖ « មិនយល់ឃើញថា វាជាការផ្លាស់ប្ដូរឲ្យប្រសើរឡើងជាដុំកំភួនអ្វីទេ ព្រោះវា ( ប្រហែល ) ៨ ០០ហិកតារ តែនិរាករណ៍វិញ ៣០ហិកតារ។ ប៉ុន្តែវាហាក់ដូចជា មិនទាន់ឯកសារអ្វីច្បាស់លាស់។ មួយទៀត បើសិនខ្ញុំអាចឲ្យយោបល់ ទាក់ទងជាមួយនឹងក្រុមហ៊ុនបុត្រសម្ព័ន្ធអ្វីផ្សេងៗហ្នឹង វាអាចថា ជាការទំនាក់ទំនងនៃការបំបែកក្រុមហ៊ុន ដើម្បីបានសិទ្ធិសម្បទានដីហ្នឹង ដូចអ្វី ដែលយើងបានធ្វើទៅលើដីសម្បទានផ្សេងៗ។ អ៊ីចឹង អ្វី ដែលខ្ញុំហាក់ដូចជាមិនមានជំនឿថា ជាការផ្លាស់ប្ដូរឲ្យប្រសើរទេ»។
កាលពីថ្ងៃទី៤ មករា រដ្ឋាភិបាល បានសម្រេចលុបចោលគម្រោងចំនួន២ នៅបឹងតាមោក គឺគម្រោងសាងសង់អគារក្រសួងអភិវឌ្ឍន៍ជនបទ ដែលមានទំហំ ១៥ហិកតា ស្ថិតក្នុងខណ្ឌព្រែកព្នៅ និងគម្រោងសាងសង់អគារគណៈកម្មាធិការជាតិគ្រប់គ្រងគ្រោះមហន្តរាយ អគារគណៈកម្មាធិការសិទ្ធិមនុស្សកម្ពុជា និងអគារអាជ្ញាធរជាតិគ្រប់គ្រងសកម្មភាពមីន និងសង្គ្រោះជនពិការ ដោយសារមីន ចំនួន ១៥ហិកតារទៀត។
ក្រៅពីនេះ រដ្ឋាភិបាលក៏សម្រេចនិរាករលិខិតស្នើសុំដោះដូរ និងផ្ទេរកម្មសិទ្ធិដី ចំនួន ២ទីតាំងគឺ អគារក្រសួងអភិវឌ្ឍន៍ជនបទ និងអគារគណៈកម្មាធិការជាតិគ្រប់គ្រងគ្រោះមហន្តរាយ អគារគណៈកម្មាធិការសិទ្ធិមនុស្សកម្ពុជា អគារអាជ្ញាធរកម្ពុជាគ្រប់គ្រងសកម្មភាពមីន និងសង្គ្រោះជនពិការដោយសារមីន ជាមួយក្រុមហ៊ុន ធីភី ម៉ូរាល់គ្រុប (មិនមានឡាតាំង)។
រដ្ឋលេខាធិការប្រចាំការ នៃទីស្ដីការគណៈរដ្ឋមន្ត្រី លោក ហ៊ីង ថូរ៉ាក់ស៊ី មិនបានបង្ហាញហេតុផល នៃការនិរាករណ៍គម្រោងលុបបឹងតាមោកទំហំ ៣០ហិកតារនេះទេ។ តែក្នុងលិខិតចុះថ្ងៃទី៤ មករា របស់ ទីស្ដីការគណៈរដ្ឋមន្ត្រី បង្ហាញថា ស្ថាប័នរដ្ឋទាំងអស់នេះ នឹងត្រូវប្ដូរទៅនៅទីតាំងក្រសួងដែនដី និង ក្រសួងរ៉ែ និងថាមពល វិញ។ ឯទីតាំងក្រសួងអភិវឌ្ឍន៍ជនបទ នឹងត្រូវប្ដូរជាទីតាំងរបស់មន្ទីរដែនដីរាជធានីភ្នំពេញ។ រដ្ឋាភិបាល ក៏មិនទាន់បង្ហាញថា នឹងផ្លាស់ប្ដូរទីតាំងក្រសួងដែនដី និងក្រសួងរ៉ែ និងថាមពល ទៅកន្លែងណាផ្សេងវិញនោះទេ។
ប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន ឲ្យដឹងថា សេចក្ដីជូនដំណឹងនិរាករណ៍ គម្រោងកាត់ឆ្វៀលដី ទំហំប្រមាណ ៣០ហិកតារ របស់ទីស្ដីការគណៈរដ្ឋមន្ត្រីនេះ ជារឿងពិតប្រាកដ ប៉ុន្តែលោកមិនដឹងពីមូលហេតុទេ។ លោកបង្វែរឲ្យសួរអ្នកនាំពាក្យទីស្ដីការគណៈរដ្ឋមន្ត្រីវិញ។ អាស៊ីសេរី មិនអាចសុំការបញ្ជាក់រឿងនេះ ពីអ្នកនាំពាក្យទីស្ដីការគណៈរដ្ឋមន្ត្រី លោក ទិត សុធា និងលោក ឯក ថា បានទេ នៅថ្ងៃទី៦ មករា ដោយសារទូរស័ព្ទចូល តែមិនមានអ្នកលើកទូរស័ព្ទ។
អ្នកនាំពាក្យគណបក្សប្រជាធិបតេយ្យមូលដ្ឋាន លោក ឡឹក សុធា យល់ថា ការលុបចោលគម្រោងលុបបឹងតាមោក ទំហំត្រឹម ៣០ហិកតារ មិនទាន់គ្រប់គ្រាន់ទេ។ លោកចង់ឲ្យរដ្ឋាភិបាលលុបចោលគម្រោងទាំងអស់ នៅបឹងតាមោក ហើយរកទីតាំងផ្សេងទៀត សម្រាប់អភិវឌ្ឍន៍គម្រោងទាំងនោះ។លោក ឡឹក សុធា បន្តថា គណបក្សប្រជាធិបតេយ្យមូលដ្ឋាន នៅតែរក្សាជំហរទាមទារឲ្យរដ្ឋសភា កោះហៅរដ្ឋាភិបាលទៅឆ្លើយបំភ្លឺ អំពីគម្រោងអភិវឌ្ឍន៍នៅលើបឹងតាមោកទាំងអស់។ លោកថា ក្រៅពីនេះ គណបក្សកំពុងសិក្សាពីផលប៉ះពាល់នានា ចំពោះការលុបបឹងតាមោក ហើយនឹងធ្វើសន្និសីទកាសែត នៅពេលខាងមុខ៖ « ទន្ទឹមនឹងនោះ យើងនឹងសិក្សាឲ្យបានជិតដិត ជាមួយនឹងស្ថាប័នមិនមែនរដ្ឋាភិបាល អង្គការ សង្គមស៊ីវិល និងសារព័ត៌មានមួយចំនួន ដែលធ្វើការរឿងបឹងតាមោកនេះ ឲ្យបានជាក់លាក់ ពីផលប៉ះពាល់ ជាអវិជ្ជមានទៅលើបឹងតាមោក និងទៅលើរាជធានីភ្នំពេញ មុននឹងយើងធ្វើការលម្អិតបន្ថែមទៀត ថាតើយើងត្រូវធ្វើយ៉ាងម្ដេច ? ប៉ុន្តែយ៉ាងណា ក៏ដោយ យើងមិនស្ងៀមស្ងាត់នៅត្រឹមហ្នឹងទេ ហើយយើងមិនឈរឱបដៃ មើលបឹងតាមោក ត្រូវបានលុបបាត់ចេញពីរាជធានីភ្នំពេញទេ»។
កាលពីមុន បឹងតាមោកមានទំហំសរុបជាង ៣ពាន់ (៣.២៣៩) ហិកតារ និងជាសម្បត្តិរដ្ឋ ប្រើប្រាស់ក្នុងការរំដោះទឹកស្អុយ និងស្ដុកទឹកកង្វក់ ដែលបង្ហូរចេញពីរាជធានីភ្នំពេញ។ ប៉ុន្តែ គិតត្រឹមចុងឆ្នាំ២០២០ រដ្ឋាភិបាលបានកាត់ផ្ទៃបឹងនេះយ៉ាងហោចណាស់ ជិត ១ពាន់ហិកតារ (ខ្ទង់ ៨០០ហិកតារ) ឲ្យទៅក្រុមហ៊ុនឯកជន ក្រោមហេតុផលសាងសង់អគាររដ្ឋ និងដោះដូរដីជាដើម។ ការកាត់ឆ្វៀលដីចុងក្រោយ គឺនៅចុងឆ្នាំ២០២០ រដ្ឋាភិបាលសម្រេចកាត់ផ្ទៃបឹងសរុប ជាងពីររយ (២៤២) ហិកតារ ប្រគល់ឲ្យប៉េអិមចំនួន ១៦គ្រួសារ ពលរដ្ឋផ្សេងទៀត ចំនួន ៤នាក់ និងគម្រោងបង្កើតសាខាមន្ទីរពេទ្យកាល់ម៉ែត្រ មួយគម្រោង។
របាយការណ៍របស់អង្គការសមាគមធាងត្នោត ចេញផ្សាយកាលពីចុងឆ្នាំ២០១៩ បង្ហាញការព្រួយបារម្ភថា ការបន្តចាក់ដីលុបបឹង ដើម្បីអភិវឌ្ឍន៍ទីក្រុងរណប និងបុរី នឹងបង្កផលប៉ះពាល់បរិស្ថាន និងសង្គមធ្ងន់ធ្ងរ។ អង្គការនេះរកឃើញថា បឹងធម្មជាតិ ក្នុងរាជធានីភ្នំពេញ មានទាំងអស់ចំនួន២៦ ក្នុងនោះបឹងចំនួន១៦ ត្រូវបានលុបទាំងស្រុង។ បច្ចុប្បន្ន បឹងចំនួន១០ ផ្សេងទៀត កំពុងត្រូវបានចាក់លុបផ្នែកខ្លះ។ ក្នុងនោះ បឹងដែលការពារដោយអនុក្រឹត្យ ក៏កំពុងប្រឈមការចាក់លុបដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។