ផ្ទៃដីបឹងតាមោក ឬបឹងកប់ស្រូវជាង១២១ហិកតារទៀតហើយត្រូវបានលោកនាយករដ្ឋមន្ត្រី ហ៊ុន សែន កាត់ឲ្យក្រុមគ្រួសារមន្ត្រីខុទ្ទកាល័យរបស់លោក។ មន្ត្រីសង្គមស៊ីវិលបារម្ភថា ការលុបផ្ទៃបឹងតាមោកជាបន្តបន្ទាប់បែបនេះ នឹងធ្វើឲ្យទីក្រុងភ្នំពេញប្រឈមការលិចលង់ កង្កផលប៉ះពាល់បរិស្ថានកាន់តែធ្ងន់ធ្ងរ និងពលរដ្ឋ។
ផ្ទៃបឹងតាមោកត្រូវលុបទៀតហើយដើម្បីផ្ដល់ឱ្យកូនៗមន្ត្រីខុទ្ទកាល័យ របស់លោក ហ៊ុន សែន បន្ទាប់ពីមេប៉ូលិស មេទាហាន និងក្រុមឈ្មួញគ្រាក់ៗ។
អ្នកជំនាញអភិបាលកិច្ចទឹកលោក ហែម ឧត្តម លើកឡើងថា ក្រុមមន្ត្រីរបស់លោក ហ៊ុន សែន សឹងតែចាត់ទុកផ្ទៃបឹងតាមោក ជានំខេក ដែលពួកគេនាំគ្នាកាត់ជាចំណិតៗចែកគ្នាទទួលទាន។ លោកថា ទីក្រុងភ្នំពេញ កំពុងត្រូវការអាងស្តុកទឹក ដូច្នេះលោកបារម្ភថា ការបន្តលុបបឹងនេះ នឹងធ្វើឲ្យទីក្រុងភ្នំពេញ លិចលង់កាន់តែខ្លាំងថែមទៀត ហើយជីវចម្រុះនៅបឹងតាមោកក៏ត្រូវបំផ្លាញ៖ «រូបភាពដែលយើងដីហ្នឹងត្រូវបានកាត់បន្តឲ្យមន្ត្រីមុខផ្សេងៗគ្នាហាក់ដូចជាចែករំលែកនំខេកអ៊ីចឹងណា អ្នកណាឈ្មោះល្បីស្អុយឈ្មោះរឿងបញ្ហារំលោភដីអីអស់ហ្នឹងដូរមុខគ្នាចេញអ្នកណាផ្សេងមកអ៊ីចឹង»។
ស្រដៀងគ្នានេះដែរ ប្រធានគម្រោងសិទ្ធិលំនៅឋាន និងស្រាវជ្រាវនៃអង្គការសមាគមធាងត្នោត លោក ស៊ាង មួយឡៃ សង្ស័យថា ការស្នើសុំ និងការកាត់ដីបឹងនេះ អាចភាពមិនប្រក្រតី ឬអំពើពុករលួយ។ លោកជំរុញទៅរដ្ឋាភិបាល ស៊ើបអង្កេតឡើងវិញ ហើយជាងនេះទៅទៀត មុនពេលកាត់ដីទៅឲ្យបុគ្គលណាមួយ រដ្ឋាភិបាលត្រូវធ្វើដោយតម្លាភាព និងផ្សព្វផ្សាយឲ្យសាធារណជនបានដឹង៖ «មិនសមទំនងប្រជាពលរដ្ឋកាន់កាប់បុគ្គលដែលបានគាត់ទិញពីប្រជាពលរដ្ឋមូលដ្ឋានដើម្បីជាសំអាងឲ្យរដ្ឋាភិបាលកាត់បើសិនគាត់ទិញមែនគួរមានការស៊ើបអង្កេតពិតអត់ក្រែងជាករណីឃុបឃិតប្រព្រឹត្តអំពើពុករលួយត្រូវមានវិធានការដល់មន្ត្រីដែលពាក់ព័ន្ធ»។
ប្រតិកម្មរបស់អ្នកធ្វើការងារផ្នែកបរិស្ថានបែបនេះក្រោយពីលោកនាយករដ្ឋមន្ត្រី ហ៊ុន សែន បានចុះហត្ថលេខាលើអនុក្រឹត្យមួយ សម្រេចកាត់ដីបឹងតាមោកចំនួនប្រាំកន្លែង ក្នុងភូមិសាស្ត្រសង្កាត់ពន្សាំង និងសង្កាត់ពញាពន់ ខណ្ឌព្រែកព្នៅ រាជធានីភ្នំពេញ ទំហំជាង១២១ហិកតារ ទៅឲ្យកូនៗរបស់សមាជិកក្រុមលេខានាយករដ្ឋមន្ត្រី គឺអ្នកស្រី ជូ ដារ៉ារ៉េត។ អនុក្រឹត្យនេះត្រូវបានចុះកាលពីថ្ងៃទី៨ ខែវិច្ឆិកា ឆ្នាំ២០២១ ប៉ុន្តែ ត្រូវបានចុះផ្សាយដោយសារព័ត៌មានក្នុងស្រុកវីអូឌី (VOD) កាលពីពេលថ្មីៗនេះ។ មុនទទួលបានដីបឹងអ្នកស្រី ជូ ដារ៉ារ៉េត ក៏ធ្លាប់បានផ្ដល់ថវិកាជូនលោក ហ៊ុន សែន (១. ០០០)ដុល្លារ ដើម្បីទិញវ៉ាក់សាំងកូវីដ-១៩។
ជុំវិញករណីនេះ វិទ្យុអាស៊ីសេរីមិនអាចសុំការបំភ្លឺពី អ្នកស្រី ជូ ដារ៉ារ៉េត អ្នកនាំពាក្យក្រសួងបរិស្ថាន លោក នេត ភក្រ្តា អ្នកនាំពាក្យក្រសួងដែនដី លោក សេង ឡូត និងអ្នកនាំពាក្យរដ្ឋាភិបាលលោក ផៃ ស៊ីផាន បានទេ នៅថ្ងៃទី២១ មករា។
ទោះយ៉ាងណា លោក ផៃ ស៊ីផាន ធ្លាប់អះអាងថា រាល់ពេលមានការផ្ទៃបឹងតាមោកម្ដងៗ គឺមានការសិក្សាត្រឹមត្រូវពីស្ថាប័នពាក់ព័ន្ធ។
សកម្មជនបរិស្ថាន កញ្ញា ភួន កែវរស្មី សង្កេតឃើញថា កាលពីមិនទាន់មានការលុបបឹង នៅជុំវិញបឹងតាមោកឃើញមានពលរដ្ឋដែលអាស្រ័យផលនៅទីនោះលក់ត្រី ឬបន្លែ ប៉ុន្តែពេលនេះឃើញតែឡានដឹកដីជាច្រើនគ្រឿងតម្រៀបកន្ទុយគ្នាចូលទៅចាក់ដីលុបបឹង។ សកម្មជនបរិស្ថានដែលធ្លាប់ជាប់ពន្ធនាគារព្រោះការពារផ្ទៃបឹងតាមោករូបនេះ យល់ថា មុនពេលកាត់ផ្ទៃបឹងទៅធ្វើអ្វីមួយ រដ្ឋាភិបាលមិនត្រូវសិក្សាតែលើក្រដាសនោះទេ តែរដ្ឋាភិបាល គួរចុះសិក្សាឬសួរពលរដ្ឋដែលអាស្រ័យផលលើបឹងតាមោក និងមន្ត្រីអង្គការសង្គមស៊ីវិលដែលធ្វើការងារទាក់ទងបរិស្ថាន៖ «ក្ដីព្រួយបារម្ភរបស់យើងដូចជាមិនបានគេអើពើពីសំឡេងរបស់សកម្មជន សំឡេងពលរដ្ឋដែលមានការខ្វាយខ្វល់ពីបឹងតាមោករបស់យើងដែលត្រូវបានលុបផងកាត់ផងអត់ឃើញដំណោះស្រាយ ឬការឆ្លើយតបជាវិជ្ជមានណាមួយទេ ទោះបីជាយើងជាប់ពន្ធនាគារពាក់ព័ន្ធរឿងទាមទារកុំឲ្យមានការលុបបឹងតាមោក ឬក៏កាត់បឹងតាមោកទៅឲ្យអ្នកនេះអ្នកនោះតាមអំពើចិត្តហ្នឹងក៏បែរមកជាប់ទោស»។
សង្គមស៊ីវិល និងអ្នកធ្វើការងារផ្នែកបរិស្ថានលើកឡើងថា ការបន្តលុបបឹងតាមោក បង្កផលប៉ះពាល់ ដល់បរិស្ថាន ជីវចម្រុះ និងពលរដ្ឋជាដើម។ ពួកគេព្រួយបារម្ភថា ករណីនេះបង្កឲ្យមានការរំលោភសិទ្ធិមនុស្សផងដែរ។
នាយិកាមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព សរសេរលើហ្វេសប៊ុកដោយលើកជាសំណួរថា តើត្រូវពុះច្រៀកដីបឹងចែកគ្នាយ៉ាងនេះឬ? ក្រសួងក៏មានចំណែក ក្រុមហ៊ុនក៏មានចំណែក បុគ្គលឯកជនក៏មានចំណែក។ អ្នកស្រីបន្តថា តើនេះជាអភិបាលកិច្ចអ្វី ដែលត្រូវលេប និងលុបបឹងយ៉ាងនេះ?
ប្រធានគម្រោងសិទ្ធិលំនៅឋាន និងស្រាវជ្រាវនៃអង្គការសមាគមធាងត្នោត លោក ស៊ាង មួយឡៃ ដែលឃ្លាំមើលបញ្ហានេះ ឲ្យដឹងថា រដ្ឋាភិបាលបានកាត់ដីបឹងតាមោក ជាង១.៦០០ ហិកតារ ដែលស្មើនឹងជាងពាក់កណ្ដាលនៃផ្ទៃបឹងតាមោកជាង ៣.២០០ហិកតារ៕