អត្ថបទស៊ើបអង្កេតរបស់សារព័ត៌មាន ម៉ុងហ្គាបេ (Mongabay) ថា ក្រុមហ៊ុន អង្គរ ផ្លាយវូត (Angkor Plywood) បន្តដឹកឈើចេញទៅប្រទេសវៀតណាម ដោយបានកែច្នៃជាគ្រឿងសង្ហារិមទៅលក់បន្តនៅប្រទេសចិន និងប្រទេសផ្សេងៗទៀត។ មន្ត្រីសង្គមស៊ីវិលស្នើឱ្យរដ្ឋាភិបាលចាត់វិធានការជាបន្ទាន់ទៅលើក្រុមហ៊ុនដឹកឈើដែលរងការចោទប្រកាន់រាប់ឆ្នាំមកហើយនេះ។
អត្ថបទស៊ើបអង្កេតរបស់ សារព័ត៌មានម៉ុងហ្គាបេ ដែលមានមូលដ្ឋាននៅសហរដ្ឋអាមេរិកបានចេញផ្សាយនៅពីថ្ងៃទី១៤ ខែតុលា ថា ក្រុមហ៊ុន អង្គរ ផ្លាយវូត (Angkor Plywood Co., Ltd.) របស់លោក ជា ពៅ បន្តដឹកឈើចេញទៅប្រទេសចិន និងប្រទេសវៀតណាមរហូតដល់ពេលបច្ចុប្បន្ន។
អត្ថបទដដែលឱ្យដឹងថា ក្រុមហ៊ុន អង្គរ ផ្លាយវូត បានលួចកាប់ឈើខុសច្បាប់ពីតំបន់ការពាររបស់កម្ពុជា និងបំពានច្បាប់ផ្សេងៗ តាមរយៈការនាំចេញឈើប្រណិតទៅក្រៅប្រទេសតាំងពីឆ្នាំ២០១១ មក។ ម្ចាស់នៃក្រុមហ៊ុននេះគឺ លោក ជា ពៅ បានសហការជាមួយអ្នកជំនួញជនជាតិចិនតៃវ៉ាន់ (Taiwan) គឺ លោក លូ ឈូឆាង (Lu Chu Chang) ដែលបានបង្កើតរោងចក្រអារឈើក្នុងដែនជម្រកសត្វព្រៃឡង់ក្នុងទំហំ៤៩ម៉ឺនហិកតារ ដោយបង្កឱ្យមានវិនាសកម្មព្រៃឈើ សត្វព្រៃ និងបំផ្លាញកន្លែងរស់នៅរបស់ជនជាតិដើមភាគតិច។
កន្លងមកអត្ថបទសារព័ត៌មាន ម៉ុងហ្គាបេ ក៏បានរាយការណ៍រួចដែរថា លោក លូ ឈូឆាង ក៏ជាម្ចាស់នៃក្រុមហ៊ុនកាប់ឈើក្រុមហ៊ុនស៊ីងបាយអូថេក (Think Biotech (Cambodia) Co., Ltd.) ដែលទទួលបានដីសម្បទានក្នុងទំហំ ៣ម៉ឺន ៤ពាន់ហិកតារ ក្នុងដែនជម្រកសត្វព្រៃឡង់នៃខេត្តក្រចេះ។ ប៉ុន្តែក្រុមហ៊ុនស៊ីងបាយអូថេក បានប្ដូរឈ្មោះទៅក្រុមហ៊ុន ហូលី ផ្លានថេសិន (Holy Plantation) កាលពីឆ្នាំមុន។ ចំណែក លោក ជា ពៅ ក៏ជាក៏មានទំនាក់ទំនងជាមួយម្ចាស់ក្រុមហ៊ុនកាប់ឈើចំនួនពីគឺក្រុមហ៊ុនPNT Co., Ltd និងក្រុមហ៊ុន Thy Nga Development Co., Ltd. ក្នុងដែនជម្រកសត្វព្រៃឡង់ នៃខេត្តព្រះវិហារដែរ។
អត្ថបទសារព័ត៌មាន ម៉ុងហ្គាបេ បានរកឃើញភស្តុតាងមួយចំនួនថា មានក្រុមហ៊ុនមួយចំនួនគឺជាប្រភពនាំឈើប្រណិតទៅកាន់ក្រុមហ៊ុនអង្គរ ផ្លាយវូត ហើយក្រុមហ៊ុននេះនាំឈើបន្តទៅក្រុមហ៊ុនចិន និងអាមេរិក នៅក្នុងតំបន់សេដ្ឋកិច្ចពិសេសក្រុងព្រះសីហនុ (SEZ)។ បន្ទាប់មកពួកគេកែច្នៃទៅជាបន្ទះឈើ ដែលក្រាលលើការ៉ូដើម្បីនាំទៅក្រៅប្រទេសជាពិសេសក្រុមហ៊ុនអាមេរិកឈ្មោះថា AHF Products។
សារព័ត៌មានដដែលថា វៀតណាមជាប្រទេសគោលដៅជាច្រើនឆ្នាំដែលបានទិញឈើខុសច្បាប់ពីកម្ពុជា សម្រាប់កែច្នៃទៅជាគ្រឿងសង្ហារិមប្រណិតរួចលក់ទៅកាន់ប្រទេសប្រទេសចិន សហរដ្ឋអាមេរិក និងសហភាពអឺរ៉ុបជាដើម។
វិទ្យុអាស៊ីសេរីមិនអាចសុំការឆ្លើយតបពី អ្នកនាំពាក្យក្រសួងបរិស្ថាន លោក ខ្វៃ អាទិត្យា បានទេ នៅថ្ងៃទី១៤ ខែតុលា។
អ្នកសម្របសម្រួលគម្រោងនៃសមាគមបណ្ដាញយុវជនកម្ពុជា(CYN) លោក អូត ឡាទីន លើកឡើងថា ករណីក្រុមហ៊ុនស៊ីងបាយអូថេកដឹកឈើចេញទៅក្រៅប្រទេស គឺជារឿងដដែលៗ ដែលសកម្មជនការពារព្រៃឈើ សារព័ត៌មាន និងអង្គការក្រៅរដ្ឋាភិបាលតែងស្នើឱ្យរដ្ឋាភិបាលស៊ើបអង្កេតម្ដងហើយម្ដងទៀត។ លោកបារម្ភថាប្រសិនបើ រដ្ឋាភិបាលគ្មានវិធានការជាបន្ទាន់ទេ ក្រុមហ៊ុនទាំងនេះនឹងបំផ្លាញព្រៃឈើទាំងស្រុងនៅដែនជម្រកសត្វព្រៃឡង់។
លោក អូត ឡាទីន៖«សូមឱ្យចុះធ្វើបច្ចុប្បន្នភាព សិក្សាស្រាវជ្រាវទៅលើក្រុមហ៊ុនអង្គរ ផ្លាយវូត ហើយត្រូវតែសិក្សាឱ្យបានម៉ត់ចត់ ប្រសិនជាអាចគួរបិទអាជ្ញាប័ណ្ណក្រុមហ៊ុនមួយនេះដើម្បីកុំឱ្យក្រុមហ៊ុនមួយនេះបន្តនាំឈើចេញទៅបរទេសបន្តទៀត ហើយក្រុមហ៊ុនមួយនេះបើយើងពិនិត្យមើលទៅមានការសង្ស័យ និងការជាប់ពាក់ព័ន្ធទៅហ្នឹងការកាប់បំផ្លាញការនាំឈើចេញទៅបរទេសគឺគាត់កាប់ឈើចេញពីតំបន់ការពារធម្មជាតិ»។
របាយការណ៍របស់ អង្គការគំនិតផ្ដួចផ្ដើមសាកលប្រឆាំងឧក្រិដ្ឋកម្មឆ្លងដែនដែលមានអង្គការចាត់តាំង(Global Initiative Against Transnational Organized Crime) កាលពីឆ្នាំ២០២១ មានរកឃើញថា យ៉ាងហោចណាស់មានក្រុមហ៊ុនចំនួន ៥ រួមមានក្រុមហ៊ុន សំអឿន សុវណ្ណ (Sam Oeun Sovann Co., Ltd.) ក្រុមហ៊ុន ធី.អិន.ធី(PNT Co., Ltd.) និងក្រុមហ៊ុន ធីង៉ា អភិវឌ្ឍន៍ និងវិនិយោគ (Thy Nga Development Co., Ltd.) ជាដើម បានប្រមូលឈើពីតំបន់អភិរក្សយកទៅលក់ឲ្យក្រុមហ៊ុន អង្គរ ផ្លាយវូត (Angkor Plywood Co., Ltd.) ដើម្បីយកទៅផ្គត់ផ្គង់ឈើនៅទីផ្សារអន្តរជាតិ ដែលធ្វើការដឹកជញ្ជូនតាមរយៈកំពង់ផែអន្តរជាតិភ្នំពេញ ចេញតាមច្រកព្រំដែនអន្តរជាតិកម្ពុជា -វៀតណាម នៅតំបន់ក្អមសំណរ ខេត្តកណ្ដាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។