អាជ្ញាធរខេត្តកោះកុងអះអាងថា គម្រោងវិនិយោគកោះកុងក្រៅមិនទាន់មានជាក់លាក់នៅឡើយទេ ទោះជារដ្ឋាភិបាលបានប្រគល់សិទ្ធិវិនិយោគកោះទាំងមូលឱ្យទៅក្រុមហ៊ុនឯកជនហើយក៏ដោយ។ សកម្មជនបរិស្ថានថា ករណីនេះស្ដែងឱ្យឃើញថា ការផ្ដល់សិទ្ធិវិនិយោគកោះកុងក្រៅទៅឱ្យក្រុមហ៊ុនឯកជន ធ្វើឡើងដោយមិនត្រឹមត្រូវ។
អភិបាលខេត្តកោះកុង អ្នកស្រី មិថុនា ភូថង ថ្លែងក្នុងសន្និសីទសារព័ត៌មាននៅថ្ងៃទី១១ មិថុនាថា អ្នកស្រីមិនទាន់ដឹងថា តើគម្រោងវិនិយោគរបស់ក្រុមហ៊ុនកោះកុងអេសអ៊ីហ្សិត (Koh Kong SEZ) នឹងប៉ះពាល់យ៉ាងដូចម្ដេចខ្លះដល់បរិស្ថាន និងធនធានធម្មជាតិនៅតំបន់កោះកុងក្រៅនោះទេ ព្រោះពេលនេះកំពុងស្ថិតក្នុងដំណាក់កាលសិក្សាហេតុប៉ះពាល់បរិស្ថាន (EIA) នៅឡើយ។ ទោះជាយ៉ាងណា អ្នកស្រីបញ្ជាក់ថា គម្រោងវិនិយោគជាទូទៅត្រូវបានអនុវត្តតែទៅលើផ្នែកណាមួយប៉ុណ្ណោះនៃតំបន់ធម្មជាតិដែលរដ្ឋបានផ្ដល់ឱ្យក្រុមហ៊ុន មិនអាចគ្របដណ្ដប់ទាំងស្រុងនោះឡើយ៖ « ក្រុមហ៊ុនកោះកុងអេសអ៊ីហ្សិតដែលទទួលការវិនិយោគនេះ ក៏ប៉ុន្តែមិនទាន់បានរៀបចំគម្រោងដែលជាផ្លូវការនៅឡើយទេ ព្រោះត្រូវកំពុងតែស្ថិតនៅក្នុងការរៀបចំគម្រោង ដែលទាក់នឹងការវាយតម្លៃផ្នែក EIA ហើយផលប្រឈមហ្នឹងគឺសូមអភ័យទោស ពេលនេះឆ្លើយអត់ទាន់បានដោយសារនៅរង់ចាំការវាយតម្លៃរបស់ក្រុម EIA សិន » ។
រដ្ឋាភិបាលបានប្រគល់សិទ្ធិវិនិយោគកោះកុងក្រៅទាំងមូលដោយស្ងាត់ៗ កាលពីឆ្នាំ២០១៩ ទៅឱ្យក្រុមហ៊ុនកោះកុងអេសអ៊ីហ្សិត (Koh Kong SEZ) របស់ឧកញ៉ា លី យ៉ុងផាត់ ដែលជាសមាជិកព្រឹទ្ធសភា និងជាសេដ្ឋីបនល្បែងស្និទ្ធនឹងលោកនាយករដ្ឋមន្ត្រី ហ៊ុន សែន។
ព័ត៌មានស្ដីពីការប្រគល់សិទ្ធិវិនិយោគកោះធំជាងគេនៅស្រុកខ្មែរទៅឱ្យក្រុមហ៊ុន លោក លី យ៉ុងផាត់ នេះ ទើបតែត្រូវបានរដ្ឋាភិបាលទម្លាយជាសាធារណៈថ្មីៗ នេះទេ ក្រោយពេលក្រុមយុវជន និងសកម្មជនបរិស្ថាននាំគ្នាធ្វើយុទ្ធនាការទាមទារឱ្យរដ្ឋាភិបាលដាក់កោះកុងក្រៅជាតំបន់ការពារធម្មជាតិ។ ព័ត៌មាននេះទៀតសោត រដ្ឋាភិបាលគ្រាន់តែបញ្ចេញតិចតួចប៉ុណ្ណោះនៅក្នុងសេចក្ដីសម្រេចបង្កើតគណៈកម្មការត្រួតពិនិត្យការអភិវឌ្ឍនៅកោះកុងក្រៅ កាលពីថ្ងៃទី៨ មិថុនា។
សកម្មជនបរិស្ថានមាតាធម្មជាតិ កញ្ញា ភួន កែវរស្មី ថ្លែងថា ប្រសាសន៍របស់អភិបាលខេត្តកោះកុងបង្ហាញកាន់តែច្បាស់ថា ការប្រគល់សិទ្ធិវិនិយោគកោះកុងក្រៅទៅឱ្យក្រុមហ៊ុនឯកជននោះ ធ្វើឡើងដោយមិនត្រឹមត្រូវតាមច្បាប់។ កញ្ញាថា ការសិក្សាពីហេតុប៉ះពាល់បរិស្ថាននេះ គួរតែត្រូវបានធ្វើមុនពេលដែលរដ្ឋាភិបាលប្រគល់សិទ្ធិវិនិយោគទៅឱ្យក្រុមហ៊ុនលោក លី យ៉ុងផាត់ មិនមែនទើបធ្វើពេលនេះទេ។ កញ្ញាបញ្ជាក់ថា ក្រុមយុវជនមាតាធម្មជាតិនៅតែប្រកាន់ជំហរ ស្នើសុំឱ្យរដ្ឋាភិបាលដកហូតសិទ្ធិវិនិយោគកោះនេះពីក្រុមហ៊ុនឯកជនមកវិញ៖ « គម្រោងវិនិយោគហ្នឹង ខ្ញុំគិតថា វាជាការធ្វើគម្រោងមួយដែលរបៀបអត់មានតម្លាភាព អត់ត្រូវច្បាប់ ព្រោះថាអត់បានសិក្សាពី EIA ច្បាស់លាស់មុននឹងប្រគល់សិទ្ធិឱ្យគេ ហើយវាអាចនឹងជាការលួចលាក់លៀមក្នុងការផ្ទេរស្ងាត់ៗរវាងបុគ្គលណាម្នាក់ទៅជាមួយបុគ្គលណាម្នាក់ ដោយអត់មានការដឹងឮពីខាងប្រជាពលរដ្ឋ»។
នៅមុនពេលរដ្ឋាភិបាលទម្លាយព័ត៌មានស្ដីពីការប្រគល់សិទ្ធិវិនិយោគកោះកុងក្រៅទៅឱ្យក្រុមហ៊ុនលោក លី យ៉ុងផាត់ នេះ ក្រសួងបរិស្ថានបានប្រកាសជាសាធារណៈថា ក្រសួងបានសិក្សាពីសក្ដានុពលកោះនេះតាំងពីឆ្នាំ២០១៦ ហើយគ្រោងនឹងដាក់តំបន់នោះជា ឧទ្យានជាតិសមុទ្រនៅឆ្នាំ២០២១ ខាងមុខ។
អាស៊ីសេរីបានទាក់ទងអ្នកនាំពាក្យក្រសួងបរិស្ថាន លោក នេត្រ ភក្ត្រា ដើម្បីសាកសួរថា តើការវិនិយោគកោះកុងក្រៅទៅឱ្យក្រុមហ៊ុនលោក លី យ៉ុង ផាត់នេះ ប៉ះពាល់ដល់គម្រោងដាក់តំបន់នោះជាឧទ្យានជាតិសមុទ្រដែរ ឬក៏អត់ ប៉ុន្តែមិនទទួលបានការឆ្លើយតប គិតត្រឹមម៉ោងផ្សាយនេះ។
កោះកុង ឬអ្នកស្រុកនិយមហៅថាកោះកុងក្រៅ មានទីតាំងស្ថិតនៅឃុំជ្រោយប្រស់ ស្រុកកោះកុង មានចម្ងាយប្រមាណ ៣០គីឡូម៉ែត្រ ពីក្រុងខេមរភូមិន្ទ ទីរួមខេត្តកោះកុង។ សកម្មជនបរិស្ថានអះអាងថា កោះនេះមានផ្ទៃ ១០៣គីឡូម៉ែត្រក្រឡា និងសម្បូរដោយធនធានធម្មជាតិចម្រុះ រួមមានព្រៃឈើ ឆ្នេរខ្សាច់សក្បុស ទឹកសមុទ្រថ្លាឈ្វេង កូនភ្នំ ទឹកជ្រោះ ព្រមទាំងសត្វព្រៃ និងសត្វសមុទ្រជាច្រើនប្រភេទ។
សមាជិកបណ្ដាញយុវជនអ៊ិនវ័នអឹម (N1M) និងជាសកម្មជនបរិស្ថាន លោក សាន់ ម៉ាឡា ថ្លែងថា ការប្រគល់សិទ្ធិវិនិយោគកោះដ៏ឥតខ្ចោះទៅឱ្យក្រុមហ៊ុនដែលមានប្រវត្តិមិនសូវល្អបែបនេះ គឺជារឿងគួរឱ្យភ្ញាក់ផ្អើល និងគួរឱ្យព្រួយបារម្ភ។ លោកបញ្ជាក់ថា ក្រុមយុវជនកំពុងរៀបចំយុទ្ធនាការថ្មីមួយទៀត ដើម្បីទាមទារឱ្យក្រសួងបរិស្ថានបង្ហាញឯកសារសិក្សាអំពីសក្ដានុពលកោះកុងក្រៅ និងឯកសារស្ដីពីគម្រោងវិនិយោគរបស់ក្រុមហ៊ុនលោក លី យ៉ុងផាត់ លើកោះធម្មជាតិមួយនេះ៕