ជនជាតិដើមភាគតិចគ្រឹង ៣០១គ្រួសារ រស់នៅខេត្តរតនគិរីអំពាវនាវដល់តំណាងអយ្យការអមសាលាដំបូងខេត្តនេះ ឱ្យចាត់វិធានការច្បាប់ លើមេប៉ុស្តិ៍ឃុំតាអង ស្រុកកូនមុំ លោក លីម៉ានី គុលស័ក្ក ថា បានដោះលែងជនល្មើសម្នាក់ ដែលកាប់រំលំដើមឈើធំៗ ក្នុងព្រៃអារក្សរបស់សហគមន៍។
ជនជាតិដើមភាគតិចគ្រឹងទាំងនោះរស់នៅភូមិតាអងកាតេ ឃុំតាអង ស្រុកកូនមុំកំពុងកើតទុកមិនខុសចិត្តករណីនេះ និងទាមទារឱ្យតំណាងអយ្យការខេត្តរតនគិរី ផ្តល់ដំណោះស្រាយត្រឹមត្រូវតាមច្បាប់ ដើម្បីការពារព្រៃអារក្សបន្សល់ចុងក្រោយក្នុងសហគមន៍ដែលពួកគាត់ខិតខំអភិរក្សទុកជាព្រៃបម្រុងសម្រាប់អ្នកភូមិធ្វើពិធីបុណ្យទានបែបប្រពៃណី។
តំណាងអ្នកភូមិជាជនជាតិដើមភាគតិចគ្រឹង លោក សានី បូរី ប្រាប់វិទ្យុអាស៊ីសេរី នៅថ្ងៃទី៦ វិច្ឆិកាថា ព្រៃអារក្សឋិតនៅខាងក្រោយភូមិតាអងកាតេទំហំជាង ៣ហិកតារ មានដើមឈើធំៗរាប់ពាន់ដើមគឺជាអត្តសញ្ញាណភូមិកំណើតរបស់ពួកគាត់ ត្រូវបានជនល្មើសម្នាក់លួចអាររំលំដើមឈើធំៗ នៅពេលយប់អស់ជាង ៦០ដើម ដើម្បីទន្ទ្រានយកដីធ្វើជាកម្មសិទ្ធិ។
លោកចោទមេប៉ុស្តិ៍ឃុំតាអង លោក លីម៉ានី គុលស័ក្ក ថា មានចេតនាដោះលែងជនល្មើស ខណៈដែលអ្នកភូមិបានសាមគ្គីគ្នា លបចាប់ខ្លួនជនសង្ស័យទាំងយប់អធ្រាត្រ និងរឹបអូសភស្តុតាងមួយចំនួន៖
លោក សានី បូរី៖«ខ្ញុំគិតថាប្រហែលមានការឃុបឃិតជាមួយគ្នា បានជាដោះស្រាយបញ្ហាប៉ុណ្ណឹងៗ មិនរួច ហើយខ្ញុំចង់ឱ្យគេអនុវត្តតាមច្បាប់ និងរាយការណ៍អ្នកដែលប្រព្រឹត្តលើព្រៃការពារស្រុកខ្ញុំ»។
កាលពីថ្ងៃទី២៣ តុលាកន្លងទៅតំណាងអ្នកភូមិ ៤នាក់ បានផ្ដិតមេដៃដាក់ពាក្យប្ដឹងមេប៉ុស្តិ៍ឃុំតាអង លោក លីម៉ានី គុលស័ក្ក ទៅតំណាងអយ្យការអមសាលាដំបូងខេត្តរតនគិរី។ ពួកគាត់សរសេរក្នុងពាក្យបណ្ដឹងថា កាលពីយប់ថ្ងៃទី២១ ខែតុលា អ្នកភូមិ និងប្រជាការពារភូមិមួយក្រុមបានឃាត់ចាប់ខ្លួនជនល្មើសម្នាក់ឈ្មោះ កាភិត តាក់ ដោយបញ្ជូនទៅឱ្យប៉ុស្តិ៍នគរបាលឃុំតាអង ម៉ោង ៣យប់ ដើម្បីចាត់វិធានការច្បាប់ ក៏ប៉ុន្តែពេលព្រឹកឡើង ស្រាប់តែមេប៉ុស្តិ៍រូបនេះដោះលែងជនប្រព្រឹត្តឱ្យទៅផ្ទះវិញ។
វិទ្យុអាស៊ីសេរីមិនទាន់អាចទាក់ទងសុំការបំភ្លឺរឿងនេះ ពីមេប៉ុស្តិ៍ឃុំតាអង លោក លីម៉ានី គុលស័ក្ក បាននៅឡើយទេនៅថ្ងៃទី៦ តុលា។ រីឯស្នងការខេត្តរតនគិរី លោក អ៊ុង សុភាព និងព្រះរាជអាជ្ញាអមសាលាដំបូងខេត្តរតនគិរីលោក ងិន ពេជ ក៏វិទ្យុអាស៊ីសេរីមិនទាន់អាចទាក់ទងសុំការបំភ្លឺបានដែរនៅថ្ងៃដដែលនេះ។
ក៏ប៉ុន្តែជំនួយការភូមិតាអងកាតេ ឃុំតាអង អ្នកស្រី ឡាវ សុខឿន ទទួលស្គាល់ថា មេប៉ុស្តិ៍រូបនេះពិតជាបាន ដោះលែងជនល្មើសដែលលួចកាប់ទន្ទ្រានព្រៃទ្រង់ទ្រាយធំ ធ្វើឱ្យអ្នកភូមិជាង ៣០០គ្រួសារមិនសប្បាយចិត្តប្រាកដមែន។
អ្នកស្រីថា កន្លងទៅអ្នកភូមិជាង ១០០នាក់ បានលើកគ្នាតវ៉ាក្នុងភូមិដោយមិនពេញចិត្តចំពោះការដោះលែងនេះ។
លោកស្រី ឡាវ សុខឿន៖ « ខ្ញុំជាជនជាតិភាគតិចមួយភូមិត្រូវតែមានព្រៃអារក្សមួយទុកគ្រប់កន្លែងទាំងអស់។ តែមិនមែនតែភូមិខ្ញុំទេ គាត់ថាគាត់កាប់ឈើយកដីធ្វើកម្មសិទ្ធិគ្រប់គ្រង » ។
ជុំវិញរឿងនេះមន្ត្រីសម្របសម្រួលសមាគមការពារសិទ្ធិមនុស្សអាដហុកប្រចាំខេត្តរតនគិរី លោក ឌិន ខន្នី យល់ថា ករណីនេះគឺជាបទល្មើសជាក់ស្តែងសមត្ថកិច្ចត្រូវបញ្ជូនសំណុំរឿងទៅតុលាការ ដោយមិនត្រូវដោះលែងជនសង្ស័យឡើយ។ លោកថា ទង្វើរបស់មេប៉ុស្តិ៍រូបនេះ គឺខុសនីតិវិធីមន្ត្រីនគរបាលយុត្តិធម៌៖
លោក ឌិន ខន្នី៖«ខ្ញុំស្នើសុំធ្វើយ៉ាងណាឱ្យមានការហាមឃាត់តឹងរ៉ឹង និងបើកការស៊ើបអង្កេតជុំវិញករណីដោះលែងជនល្មើសឱ្យមានសេរីភាពនេះ ជាបទល្មើសជាក់ស្ដែងដែលប្រជាពលរដ្ឋគាត់បានឃើញ និងចាប់ទៅឱ្យហើយតែត្រូវដោះលែង»។
អ្នកភូមិបន្ថែមថា ប្រសិនបើព្រះរាជអាជ្ញាអមសាលាដំបូងខេត្តរតនគិរី មិនចាត់វិធានការតាមបណ្ដឹងរបស់ពួកគាត់នោះទេ ប្រជាសហគមន៍នឹងលើកគ្នាតវ៉ានៅតុលាការខេត្តនេះ ដើម្បីទាមទារឱ្យអនុវត្តច្បាប់ដល់ជនល្មើស ក្នុងបំណងព្រមានដល់អ្នកផ្សេងទៀត កុំឱ្យកាប់បំផ្លាញព្រៃអារក្ស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។