គណៈកម្មការដោះស្រាយផលប៉ះពាល់ និងក្រុមហ៊ុនទំនប់វារីអគ្គិសនីសេសានក្រោមពីរ ក្នុងស្រុកសេសាន ខែត្រស្ទឹងត្រែង សម្រេចមិនឯកភាពសាងសង់ភូមិថ្មី ជូនពលរដ្ឋដែលបដិសេធមិនទទួលសំណងពីរក្រុមហ៊ុននោះទេ ដោយលើកហេតុផលថា ចំណាយធនធានច្រើន និងលំបាកក្នុងការផ្តល់សេវាសាធារណៈ។
អាជ្ញាធរឃុំស្រែគរ ឲ្យដឹងនៅថ្ងៃទី១១ វិច្ឆិកា ថា គណៈកម្មការដោះស្រាយផលប៉ះពាល់ខែត្រ និង ក្រុមហ៊ុនទំនប់វារីអគ្គិសនីសេសានក្រោមពីរ នៅបន្តព្យាយាមផ្សព្វផ្សាយគោលនយោបាយសំណងជូនពលរដ្ឋ ដែលបដិសេធមិនទទួលសំណងជាង ១០០គ្រួសារ រស់នៅភូមិស្រែគរ និងភូមិក្បាលរមាសចាស់ បើទោះបីជា ពលរដ្ឋមិនឯកភាពឲ្យក្រុមការងារខែត្រ និងក្រុមហ៊ុនស្រង់ស្ថិតិទ្រព្យសម្បត្តិក្ដី។
មេឃុំស្រែគរមកពីគណបក្សសង្គ្រោះជាតិ លោក សៀក មេគង្គ ឲ្យដឹងថា ក្រុមហ៊ុន និងគណៈកម្មការដោះស្រាយផលប៉ះពាល់ខែត្រ បានសាងសង់លំនៅឋាន ត្រៀមបម្រុងជូនពលរដ្ឋអស់ហើយ និងកំណត់ដីស្រែសម្រាប់ធ្វើកសិកម្ម ក្នុងមួយគ្រួសារទទួលបាន ៥ហិកតារ រីឯពលរដ្ឋបំបែកគ្រួសារទទួលបាន ២ហិកតារ។ លើសពីនេះ បើពលរដ្ឋចង់ប្ដូរឥរិយាបថចង់រស់នៅភូមិថ្មី ក្រុមហ៊ុននឹងសហការ ២៤ម៉ោង ចុះស្រង់ស្ថិតិផ្ដល់សំណងជូនពលរដ្ឋ ផ្អែកតាមគោលនយោបាយរបស់គណៈកម្មការដោះស្រាយផលប៉ះពាល់។ លោកបន្ថែមថា ទីតាំងភូមិថ្មីដែលពលរដ្ឋគ្រោងស្នើសុំបង្កើតភូមិថ្មី ជាតំបន់ហ៊ុមព័ទ្ធដោយទឹក លំបាកធ្វើដំណើរ គ្មានសាលារៀន និងមន្ទីរពេទ្យ ហើយផែនការស្ថាបនាហេដ្ឋារចនាសម្ព័ន្ធថ្មី នៅតំបន់នោះត្រូវចំណាយធនធានច្រើន បូកផ្សំពេលវេលាច្រើនផង បង្កប៉ះពាល់ការសិក្សារបស់កុមារ សុខភាពពលរដ្ឋ និងការផ្ដល់សេវាសាធារណៈ៖ «គេមិនអាចទៅធ្វើអីក្នុងភូមិចាស់ហ្នឹងបានទេ ពីព្រោះស្ពានស្រែពក គេផ្តាច់អស់រលីងហើយ ដល់អ៊ីចឹងគេឲ្យងាកមក គេរៀបចំភូមិថ្មី ត្រូវចំណាយលុយក្រុមហ៊ុន គេមិនអាចមានថវិកាទៅបង្កើតភូមិថ្មីទេ»។
លោក សៀក មេគង្គ បន្ថែមថា ទីតាំងភូមិថ្មី ដែលសហគមន៍ជាង ៥០គ្រួសារគ្រោងស្នើសុំបង្កើតជាភូមិថ្មី ដើម្បីរស់នៅជំនួសភូមិចាស់ គឺជាតំបន់គ្មានសេវាទូរស័ព្ទ និងផ្លូវលំបាកធ្វើដំណើរ។ លោកថា ពលរដ្ឋដែលក្រាញននៀលមិនទទួលសំណងពីក្រុមហ៊ុនកំពុងជួបគុណវិបត្តិច្រើនរួមមាន ខ្វះស្បៀងអាហារ បញ្ហាសុខភាព ផ្លូវលំបាកធ្វើដំណើរ កង្វះទឹកស្អាត ហើយកុមារ ៥០នាក់បោះបង់ការសិក្សា។
របាយការណ៍អាជ្ញាធរឃុំស្រែគរ អោយដឹងថា ពលរដ្ឋ ៦គ្រួសារថ្មីទៀត នៅឃុំស្រែគរ បានយល់ព្រមទទួលសំណង និងចាកចេញពីភូមិចាស់ ទៅរស់នៅភូមិថ្មី ហើយបច្ចុប្បន្នពលរដ្ឋរស់នៅឃុំក្បាលរមាសជាង ៥០គ្រួសារ បន្តរស់នៅទីទួលខ្ពស់ ព្រោះទឹកជំនន់បានពន្លិចលំនៅឋានពួកគាត់ទាំងស្រុង។
អ្នកភូមិដែលបដិសេធមិនទទួលសំណងពីក្រុមហ៊ុន រស់នៅភូមិស្រែគរ ជាជនជាតិភាគតិចឡាវ លោក ហ្វុត ឃឿន ធ្លាប់បញ្ជាក់ថា អ្នកភូមិសុខចិត្តស្លាប់ មិនចុះចាកចេញពីភូមិកំណើតដាច់ខាត និងនៅក្រាញននៀលមិនទទួលសំណងពីក្រុមហ៊ុន ត្បិតការជម្លៀសចេញពីភូមិកំណើត នាំឲ្យអ្នកភូមិបាត់បង់ប្រពៃណីវប្បធម៌ បាត់បង់ផ្នូរដូនតា ព្រៃជំនឿ និងបាត់បង់ទឹកទន្លេដែលជាប្រភពប្រាក់ចំណូលរបស់អ្នកភូមិមិនចេះរីងស្ងួត៖ «អត់មានគ្រូបង្រៀនតាំងពីចុងឆ្នាំ២០១៦ រហូតដល់ឆ្នាំ២០១៧ នេះ គឺពលរដ្ឋមានផលលំបាកយ៉ាងច្រើននៅក្នុងហ្នឹង»។
អ្នកឃ្លាំមើលបរិស្ថាន លោក ភូ ប៊ុនថាន់ យល់ថា បើអាជ្ញាធរ និងក្រុមហ៊ុនមិនឯកភាពស្ថាបនា ភូមិថ្មី តាមសំណូមពររបស់សហគមន៍ គឺជាករណីផ្ទុយពីប្រសាសន៍របស់ប្រមុខរដ្ឋាភិបាល។ លោកបញ្ជាក់ថា ការបដិសេធមិនទទួលយកការអំពាវនាវរបស់ប្រជាជន គឺជាចំណុចមួយធ្វើឲ្យពលរដ្ឋរស់នៅតំបន់នោះមិនសប្បាយចិត្ត៖ «ប្រសាសន៍របស់សម្ដេចនាយក គឺនិយាយថា យើងធ្វើតាមសំណូមពររបស់ប្រជាជន បើមិនធ្វើតាមប្រជាជន គឺមានន័យថា មិនធ្វើតាមសម្ដេចនាយកក្នុងពេលហ្នឹង»។
លិខិតជូនដំណឹងរបស់អភិបាលខែត្រស្ទឹងត្រែងលោក មុំ សារឿន ចុះថ្ងៃ១១ តុលា បញ្ជាក់ថា ក្នុងករណីដែលពលរដ្ឋមិនទទួលសំណង រាជរដ្ឋាភិបាល និងក្រុមហ៊ុនបានផ្ដល់ជម្រើសនានា ជូនពលរដ្ឋដែលចង់យកទីតាំងថ្មី ឋិតនៅក្បែរភូមិចាស់ និងធ្លាប់អាស្រ័យផលស្រាប់ ដែលជាទីតាំងមានសុវត្ថិភាព ដើម្បីសាងសង់លំនៅឋានថ្មីរស់នៅ។ លើសពីនេះ រាជរដ្ឋាភិបាល និងក្រុមហ៊ុនអះអាងថា នឹងបន្តសហការដោះស្រាយផលប៉ះពាល់ ផ្អែកតាមគោលនយោបាយសមស្របជូនពលរដ្ឋផ្ទាល់។
កាលពីចុងខែតុលា ឆ្នាំ២០១៧ លោកនាយករដ្ឋមន្ត្រី ហ៊ុន សែន បានសម្ពោធចុចកុងតាក់បិទទ្វារទឹកទំនប់វារីអគ្គិសនីសេសានក្រោមពីរជាស្ថាពរ ដោយលោកបញ្ជាក់ថា រដ្ឋាភិបាលនឹងអនុញ្ញាតឲ្យអ្នកភូមិដែលបដិសេធមិនទទួលសំណងរស់នៅភូមិស្រែគរ និងភូមិក្បាលរមាសចាស់ អាចតាំងទីលំនៅភូមិថ្មីបាន។ ក៏ប៉ុន្តែ មកទល់ពេលនេះ ក្រុមហ៊ុន និងអាជ្ញាធរមិនអនុវត្តតាមបញ្ជារបស់ប្រមុខរដ្ឋាភិបាលនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។