សហគមន៍ឧត្ដមស្រែពស់ ឬព្រៃមេត្តាធម្មជាតិ នៅខេត្តកំពង់ស្ពឺ ស្នើដល់ក្រសួងដែនដី នគរូនីយកម្ម និងសំណង់ ចុះវាស់វែង និងចេញប្លង់កម្មសិទ្ធិដីព្រៃសហគមន៍ ខណៈក្រសួងរៀបចំចុះបញ្ជីដីធ្លីឲ្យបានរួចរាល់ នៅក្នុងខេត្តកំពង់ស្ពឺ។ មន្ត្រីអង្គការសង្គមស៊ីវិលថា ក្រសួងដែនដី គួរតែចុះបញ្ជីដីព្រៃមេត្តាធម្មជាតិឲ្យបានរួចរាល់ ដើម្បីបញ្ចប់វិវាទដីធ្លីរ៉ាំរ៉ៃ ដែលបង្កផលប៉ះពាល់ផ្នែកសេដ្ឋកិច្ច និងស្មារតីរបស់ប្រជាសហគមន៍។
សហគមន៍ព្រៃមេត្តាធម្មជាតិ ស្ថិតនៅភូមិពោធិ៍មាស ឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ ដែលមានវិវាទដីធ្លីរ៉ាំរ៉ៃជាមួយទាហាន នៃកងរថក្រោះ ង-៧០ ស្នើដល់ក្រសួងដែនដី ចេញប្លង់កម្មសិទ្ធិដីសហគមន៍ ដើម្បីបញ្ចប់វិវាទដីធ្លី និងឲ្យសហគមន៍មានសិទ្ធិពេញលេញ ក្នុងការដាំដុះដើមឈើឡើងវិញក្រោយពីទាហាន មកពីកងរថក្រោះ ង-៧០ ឈូសឆាយព្រៃសហគមន៍នេះស្ទើរតែទាំងស្រុង។
តំណាងសហគមន៍ព្រៃមេត្តាធម្មជាតិ លោក លាង ប៉ន ប្រាប់វិទ្យុអាស៊ីសេរីថា លោកត្រេកអរ ចំពោះក្រសួងដែនដី ដែលបានប្រជុំពិភាក្សា អំពីការរៀបចំចុះបញ្ជីដីធ្លីនៅខេត្តកំពង់ស្ពឺ។
លោក លាង ប៉ន៖ «សុំឲ្យខាងក្រសួងធ្វើបញ្ជីឲ្យច្បាស់លាស់ ដើម្បីឲ្យពលរដ្ឋការពារទុកជាសមូហភាពរួមហើយ និងដាំកូនឈើឡើងវិញដើម្បីថែរក្សាបរិស្ថានទាំងអស់គ្នា»។
ការស្នើសុំនេះ គឺបន្ទាប់ពីក្រសួងដែនដី នគរូបនីយកម្ម និងសំណង់ នៅថ្ងៃទី១ ខែវិច្ឆិកា បានប្រជុំពិភាក្សា ដើម្បីជំរុញការរៀបចំចុះបញ្ជីដីធ្លីឲ្យបានរួចរាល់ក្នុងភូមិសាស្ត្រខេត្តកំពង់ស្ពឺ។ រដ្ឋមន្ត្រីក្រសួងដែនដី នគរូបនីយកម្ម និងសំណង់ លោក សាយ សំអាល់ ថ្លែងថា ខេត្តកំពង់ស្ពឺជាខេត្តទី២ បន្ទាប់ពីខេត្តកំពង់ចាម ក្នុងការរៀបចំចុះបញ្ជីដីធ្លីឲ្យបានរួចរាល់ និងឲ្យភាគីទាំងអស់រៀបកម្លាំង ដើម្បីធ្វើកិច្ចការនេះ ឲ្យបានរួចរាល់ក្នុងអាណត្តិថ្មីនេះ។
ទោះជាយ៉ាងណា អ្នកសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា (CCHR) លោក វណ្ណ សូផាត មានប្រសាសន៍ថា ការដោះស្រាយវិវាទដីធ្លីរបស់ពលរដ្ឋ ជាតួនាទីរបស់ក្រសួងដែនដី បើទោះបីជាមិនមានការទទូចស្នើសុំពីពលរដ្ឋក៏ដោយ។ លោកបន្តថា ក្រសួងដែនដី គួរតែដោះស្រាយបញ្ចប់វិវាទដីធ្លីនេះ ឲ្យបានឆាប់តាមរយៈការចុះវាស់វែង និងចេញប្លង់កម្មសិទ្ធិដីព្រៃសហគមន៍។
លោក វណ្ណ សូផាត៖ «ខ្ញុំសង្ឃឹមថា ទោះបីយ៉ាងណាក៏ដោយ ក្រសួងដែនដី នគរូបនីយកម្ម ដែលជាឆត្រ នៃយន្តការដោះស្រាយទំនាស់ដីធ្លី នៃព្រះរាជាណាចក្រកម្ពុជាហ្នឹង លោកនឹងដុតដៃដុតជើងយ៉ាងម៉េចដើម្បីធ្វើឲ្យការវាស់វែងក្បាលដីនេះ គម្រោងនៃការវាស់វែងក្បាលដីនេះ អាចរួមបញ្ចូលទាំងក្បាលដីកំណត់ព្រំប្រទល់រវាងកងយោធពលខេមរភូមិន្ទ កងរថក្រោះ ង-៧០ហ្នឹង នឹងប្រជាសហគមន៍ព្រៃមេត្តាធម្មជាតិឲ្យបានរួចរាល់»។
ព្រៃសហគមន៍ឧត្ដមស្រែពស់ ឬព្រៃមេត្តាធម្មជាតិ ដែលមានទំហំ ជិត៩រយហិកតារ (៨៨៧) មានសត្វព្រៃកម្រជាច្រើនប្រភេទរស់នៅ រួមមាន ទោច ស្វា ក្ងោក មាន់ព្រៃ ឈ្លូស និង ស្វាជាដើម ត្រូវបានក្រុមអ្នកមានអំណាច មន្ត្រីយោធា ពលរដ្ឋ និងឈ្មួញខិលខូចមួយចំនួន ឈូសឆាយទន្ទ្រានដីព្រៃសហគមន៍ ដែលធ្វើឲ្យបាត់បង់ព្រៃឈើ និងសត្វព្រៃស្ទើរតែទាំងស្រុង បើទោះជាសហគមន៍បានរារាំងការឈូសឆាយនោះ ជាច្រើនលើកច្រើនសាក្ដី។ ជាងនេះទៅទៀត មិនត្រឹមតែគ្មានដំណោះស្រាយវិវាទដីធ្លីរវាងសហគមន៍ និងទាហាន នៃកងរថក្រោះ ង-៧០នោះទេ តំណាងសហគមន៍ព្រៃមេត្តាធម្មជាតិចំនួន ៧នាក់ កាលពីថ្ងៃទី១៨តុលា ត្រូវបានតុលាការខេត្តកំពង់ស្ពឺ បានកោះហៅឲ្យមកឆ្លើយបំភ្លឺ តាមពាក្យបណ្ដឹងរបស់លោក អៀម ម៉ៅ ដែលបានប្ដឹងតំណាងសហគមន៍ ក្រោមបទចោទធ្វើឱ្យខូចខាតដោយចេតនា មានស្ថានទម្ងន់ទោស រំលោភកម្មសិទ្ធិ គំរាមសម្លាប់ និងជេរប្រមាថ។
ទោះជាយ៉ាងណា តំណាងសហគមន៍ និងមន្ត្រីអង្គការសង្គមស៊ីវិល នៅតែទទូចដល់ក្រសួងដែនដី នគរូបនីយកម្ម និងសំណង់ ចុះវាស់វែង និងចេញប្លង់កម្មសិទ្ធិដីព្រៃសហគមន៍ឲ្យបានឆាប់ ដើម្បីរកដំណោះស្រាយវិវាទដីធ្លីជូនសហគមន៍៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។