សហគមន៍ឧត្ដមស្រែពស់ ឬព្រៃមេត្តាធម្មជាតិ ដាក់ញតិនៅមន្ទីរដែនដី នគរូបនីយកម្ម និងសំណង់ ខេត្តកំពង់ស្ពឺ ដើម្បីស្នើឲ្យមន្ទីរចុះវាស់វែង និងចេញប្លង់កម្មសិទ្ធិដីព្រៃសហគមន៍។ មន្ត្រីអង្គការសង្គមស៊ីវិលថា អាជ្ញាធរ គួរតែពន្លឿនការវាស់វែង និងចេញប្លង់កម្មសិទ្ធិដីព្រៃសហគមន៍នេះ ដើម្បីកុំឲ្យចេញពលរដ្ឋបន្តតវ៉ា។
ការដាក់ញត្តិនៅថ្ងៃទី៨ វិច្ឆិកា មានពលរដ្ឋជិត១រយនាក់(៨៩) មកពី៤ សហគមន៍ចូលរួម រួមមានសហគមន៍ព្រៃមេត្តាធម្មជាតិ សហគមន៍ត្រពាំងជោ សហគមន៍អមលាំង និងសហគមន៍រស្មីសាមគ្គី។
ពលរដ្ឋអះអាងថា គោលបំណងនៃការដាក់ញត្តិនេះ គឺដើម្បីស្នើឲ្យប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកំពង់ស្ពឺ លោក តាប់ ម៉ាឡៃ ទប់ស្កាត់ការចុះបញ្ជីដីធ្លីកម្មសិទ្ធិបុគ្គល លើតំបន់ដីព្រៃ ដែលមិនទាន់មានដំណោះស្រាយ និងស្នើសុំចុះបញ្ជីដីទំហំជិត៩រយហិកតារ(៨៨៧)ជាកម្មសិទ្ធិសមូហភាព ដើម្បីគ្រប់គ្រង និងដាំដុះកូនឈើឡើងវិញបន្ទាប់ពីទាហាន នៃកងរថក្រោះ ង-៧០ ឈូសឆាយព្រៃស្ទើរតែទាំងស្រុង។
តំណាងសហគមន៍ព្រៃមេត្តាធម្មជាតិ លោក លាង ប៉ន ប្រាប់វិទ្យុអាស៊ីសេរីថា ការដាក់ញត្តិនៅថ្ងៃនេះ មានមន្ត្រីនៃមន្ទីរសុរិយោដីបានចេញមកទទួលញត្តិពីសហគមន៍។
លោក លាង ប៉ន៖ «សំណូមពរឲ្យគាត់ រកដំណោះស្រាយឲ្យសហគមន៍ឧត្តមស្រីពស់ឲ្យបានឆាប់បំផុតដោយសារចង់បានពន្លឿនការងារដំណោះស្រាយហ្នឹង ព្រោះពលរដ្ឋគាត់កំពុងតែជួបឧបសគ្គជាច្រើនអីចឹង ព្រោះខាងក្រសួងខាងលើគាត់ទុកឲ្យលោកអភិបាលខេត្តគាត់រកដំណោះស្រាយ»។
វិទ្យុអាស៊ីសេរី នៅពុំទាន់អាចទាក់ទងប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកំពង់ស្ពឺ លោក តាប់ ម៉ាឡៃ និងអភិបាលខេត្តកំពង់ស្ពឺ លោក វ៉ី សំណាង ដើម្បីឆ្លើយតបសំណើនេះបានទេ នៅថ្ងៃទី៨ វិច្ឆិកា។
ទាក់ទងនឹងការចុះបញ្ជីក្បាលដីនៅខេត្តកំពង់ស្ពឺនេះ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក សាយ សំអាល់ កាលពីថ្ងៃទី១ ខែវិច្ឆិកា បានប្រជុំពិភាក្សា ដើម្បីជំរុញការរៀបចំចុះបញ្ជីដីធ្លីឲ្យបានរួចរាល់ក្នុងភូមិសាស្ត្រខេត្តកំពង់ស្ពឺ ។ លោកក៏បានឲ្យភាគីពាក់ព័ន្ធទាំងអស់រៀបចំកម្លាំង ដើម្បីធ្វើកិច្ចការនេះ ឲ្យបានរួចរាល់ក្នុងអាណត្តិថ្មីនេះ។
អ្នកសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា (CCHR) លោក វណ្ណ សូផាត ប្រាប់អាស៊ីសេរីថា ការដាក់ញត្តិស្នើសុំកិច្ចអន្តរាគមន៍ពីអាជ្ញាធរ ដើម្បីចុះវាស់វែងដីព្រៃសហគមន៍នេះគឺជាសិទ្ធិរបស់ពលរដ្ឋ ដែលធានាដោយច្បាប់។ លោកបន្ថែមថា អាជ្ញាធរមូលដ្ឋាន ពិសេសគឺ អភិបាលខេត្តគួរតែផ្ដួចផ្ដើមគំនិតស្នើដល់អន្តរក្រសួង និងរដ្ឋាភិបាល ដើម្បីចុះបញ្ជីដីព្រៃសហគមន៍នេះ។
លោក វណ្ណ សូផាត៖ «អ៊ីចឹងខ្ញុំសង្ឃឹមថា ឯកឧត្ដមអភិបាលខេត្តលោកនឹងដុតដៃដុតជើង ពីព្រោះទាល់តែមានការចូលរួមពីថ្នាក់មូលដ្ឋាន និងថ្នាក់ក្រោមជាតិហ្នឹងដាក់ជាសំណើ ឬយោបល់ទៅខាងអន្តរក្រសួងក៏ដូចជា រាជរដ្ឋាភិបាលដើម្បីពន្លឿនក្នុងការដោះស្រាយហ្នឹងឲ្យបានឆាប់បើមិនអ៊ីចឹងទេ ខ្ញុំយល់ថា ប្រជាពលរដ្ឋគាត់មិនអាចឈប់ពីព្រោះថា ដរាបណាគាត់នៅមានជីវិត គឺថាគាត់នៅតែទាមទារធនធានធម្មជាតិ ដែលគាត់អាស្រ័យផលហ្នឹងឯង ព្រោះជីវិតប្រចាំថ្ងៃរបស់គាត់ពឹងផ្អែកលើធនធានធម្មជាតិហ្នឹងហើយ»។
ព្រៃសហគមន៍ឧត្ដមស្រែពស់ ឬព្រៃមេត្តាធម្មជាតិ ដែលមានទំហំ ជិត៩រយហិកតារ (៨៨៧) មានសត្វព្រៃកម្រជាច្រើនប្រភេទរស់នៅ រួមមាន ទោច ស្វា ក្ងោក មាន់ព្រៃ និងឈ្លូស ជាដើម ត្រូវបានក្រុមអ្នកមានអំណាច មន្ត្រីយោធា ពលរដ្ឋ និងឈ្មួញខិលខូចមួយចំនួន ឈូសឆាយទន្ទ្រានដីព្រៃសហគមន៍ ដែលធ្វើឲ្យបាត់បង់ព្រៃឈើ និងសត្វព្រៃស្ទើរតែទាំងស្រុង បើទោះជាសហគមន៍បានរារាំងការឈូសឆាយនោះ ជាច្រើនលើកច្រើនសាក្ដី។ ជាងនេះទៅទៀត មិនត្រឹមតែគ្មានដំណោះស្រាយវិវាទដីធ្លីរវាងសហគមន៍ និងទាហាន នៃកងរថក្រោះ ង-៧០នោះទេ តែតំណាងសហគមន៍ព្រៃមេត្តាធម្មជាតិចំនួន ៧នាក់ កាលពីថ្ងៃទី១៨តុលា ត្រូវបានតុលាការខេត្តកំពង់ស្ពឺ បានកោះហៅឲ្យមកឆ្លើយបំភ្លឺ តាមពាក្យបណ្ដឹងរបស់ទាហាន ង-៧០ លោក អៀម ម៉ៅ ដែលបានប្ដឹងតំណាងសហគមន៍ ក្រោមបទចោទធ្វើឱ្យខូចខាតដោយចេតនា មានស្ថានទម្ងន់ទោស រំលោភកម្មសិទ្ធិ គំរាមសម្លាប់ និងជេរប្រមាថ ពាក់ព័ន្ធនឹងការរារាំងគ្រឿងចក្រឈូសឆាយព្រៃ។
កាលពីខែមេសា កន្លងទៅក្រសួងរៀបចំដែនដី នគរូបនីយកម្ម និងសំណង់ បានចេញដីកាអម ជូនទៅអភិបាលខេត្តកំពង់ស្ពឺ ដើម្បីពិនិត្យជាសមត្ថកិច្ចដោះស្រាយវិវាទដីធ្លីរវាងប្រជាសហគមន៍ឧត្ដមស្រែពស់ ឬព្រៃមេត្តាធម្មជាតិ ជាមួយនឹងទាហាន ង-៧០ ក៏ប៉ុន្តែរហូតមកទល់នឹងពេលនេះ សហគមន៍នៅពុំទាន់ទទួលបានដំណោះស្រាយណាមួយនោះទេ។
ទោះជាយ៉ាងណា តំណាងសហគមន៍ និងមន្ត្រីអង្គការសង្គមស៊ីវិល នៅតែស្នើយ៉ាងទទូចដល់អាជ្ញាធរ ចុះវាស់វែង និងចេញប្លង់កម្មសិទ្ធិដីព្រៃសហគមន៍ឧត្ដមស្រែពស់ ឬព្រៃមេត្តាធម្មជាតិនេះ ឲ្យបានឆាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។