ជនជាតិដើមភាគតិចរស់នៅស្រុកកែវសីមា ខេត្តមណ្ឌលគិរី ត្អូញត្អែរថា អាជ្ញាធររបបលោក ហ៊ុន សែន បណ្តោយឲ្យក្រុមហ៊ុនចិន រ៉ុង ឆេង ធ្វើអាជីវកម្មរ៉ែមាសខុសច្បាប់អនាធិបតេយ្យ ប៉ុន្តែបែរជាគៀបសង្កត់ប្រជាជនខ្លួនឯង មិនឲ្យធ្វើអាជីវកម្មរ៉ែលក្ខណៈសហគមន៍ទៅវិញ។ កន្លងទៅអាជ្ញាធរខេត្តមណ្ឌលគិរី សម្រេចផ្អាកអាជីវកម្មរ៉ែមាសនៅតំបន់ចុងផ្លាស់ទាំងអស់ ក្រោយពីពលរដ្ឋខេត្តក្រចេះជាច្រើននាក់បានស្លាប់ និងរាប់រយនាក់ឈឺ ដោយសារពុលទឹកអូរ។
ជនជាតិដើមភាគតិចព្នង ឲ្យដឹងនៅថ្ងៃទី៣០ មិថុនាថា ពលរដ្ឋមួយចំនួនរស់នៅឃុំចំនួន ៣ ក្នុងស្រុកកែវសីមា បានជីកអណ្តូងច្រោះទឹកដោយខ្លួនឯង និងមានពលដ្ឋខ្លះចំណាយថវិកាផ្ទាល់ខ្លួន ទិញទឹកសុទ្ធមកបរិភោគជាប្រចាំ ខណៈដែលទឹកអូរធម្មជាតិ ដែលពួកគេប្រើប្រាស់ជាយូរមកហើយនោះ មានជាតិពុល។ អ្នកភូមិថា ពួកគាត់បានប្រមូលសត្វពាហនៈពីព្រៃមកចិញ្ចឹមនៅផ្ទះយ៉ាងប្រុងប្រយ័ត្ន ព្រោះនៅរយៈពេល ២ខែចុងក្រោយនេះ គោក្របីពួកគាត់ងាប់ជាបន្តបន្ទាប់ជាង ៦០ក្បាល ដោយសារពុលទឹកអូរ។
ជនជាតិដើមភាគតិចរស់នៅឃុំស្រែឈូក ស្រុកកែវសីមា ថ្លែងសុំមិនបញ្ចេញឈ្មោះ ឲ្យដឹងនៅថ្ងៃទី៣០ មិថុនាថា មកទល់ពេលនេះ ក្រុមហ៊ុនចិន រ៉ុង ឆេង នៅតែប្រើរំសេវបំផ្ទុះថ្ម នៅរណ្តៅរ៉ែមាស ចំនួន ៦រណ្តៅ និងមានរណ្តៅខ្លះ ក្រុមហ៊ុនបានបង្ហួរកាកសំណល់ចូលក្នុងទឹកអូរ។ រណ្តៅរ៉ែមាសនីមួយៗ មានជម្រៅរាប់រយម៉ែត្រទៅក្នុងដី។ ចំណែកមេឃុំចុងផ្លាស់ ក៏មានរណ្តៅរ៉ែមាសផ្ទាល់ខ្លួនឋិតនៅក្រោមផ្ទះរបស់គាត់ដែរ ដែលមានជម្រៅជាង ១រយម៉ែត្រ៖ «»។
បុរសដដែលបន្ថែមថា សហគមន៍ជនជាតិដើមភាគតិចមិនចិត្តសុខចិត្តរឿងនេះ មិនហ៊ានចេញមុខតវ៉ា និងទាមទាររកយុត្តិធម៌តាមផ្លូវច្បាប់នោះទេ ព្រោះខ្លាចអាជ្ញាធរធ្វើទុក្ខបុកម្នេញ។ កាលពីអំឡុងខែឧសភាកន្លងទៅ ពលរដ្ឋរស់នៅឃុំស្រែឈូកជាច្រើននាក់ បានពិភាក្សាគ្នា គ្រោងប្តឹងក្រុមហ៊ុនចិន រ៉ុង ឆេង ឲ្យទទួលខុសត្រូវ តែពួកគេបារម្ភខ្លាចអាជ្ញាធរធ្វើបាប ព្រោះកន្លងទៅនគរបាល និងអាជ្ញាធរបានគំរាមកំហែងអ្នកភូមិដែលចេញមុខតវ៉ា ដោយចោទពលរដ្ឋនោះថា ជាក្រុមបដិវត្តពណ៍៖ «»
អាស៊ីសេរីនៅថ្ងៃទី៣០ មិថុនា បានព្យាយាមទាក់ទងអភិបាលរងខេត្តមណ្ឌលគិរី លោក ម៉ឹង សុចាន់ថា តែទូរស័ព្ទហៅចូលគ្មានអ្នកទទួល។
នាយកទីចាត់ការអន្តរវិស័យ នៃសាលាខេត្តមណ្ឌលគិរី លោក យ៉ែម សុងហេង ដែលចុះតាមដានរឿងនេះបដិសេធថា ពុំមានសកម្មភាពអាជីវកម្មរ៉ែមាស នៅតំបន់ចុងផ្លាស់ទៀតទេ ខណៈដែលថ្នាក់ជាតិ បានប្រកាសផ្អាកអាជីវកម្មរ៉ែមាសទាំងអស់នៅតំបន់នោះ។ លោកថា អាជ្ញាធរខេត្ត និងមន្ត្រីជំនាញកាលពីពេលថ្មីៗ នេះ បានចុះទៅដល់ទីតាំងរ៉ែមាសនោះ ពុំឃើញមានក្រុមហ៊ុនចិនធ្វើសកម្មភាពរករ៉ែនោះទេ។ លោកបញ្ជាក់ថា អាជ្ញាធរបានចាត់ឲ្យមន្ត្រីជំនាញ ៤ក្រុម មកពីមន្ទីររ៉ែ មន្ត្រីបរិស្ថាន មន្ត្រីអាវុធហត្ថ និងនគរបាលមូលដ្ឋានផង ឲ្យឈរជើងតាមដានពីសកម្មភាពរ៉ែមាសនៅតំបន់នោះ៖ «»។
សមត្ថកិច្ចខេត្តមណ្ឌលគិរី កាលពីថ្ងៃទី១ មិថុនា រកឃើញក្រុមហ៊ុនចិន រ៉ុង ឆេង បានប្រើរំសេវជាតិផ្ទុះ ធ្វើអាជីវកម្មរ៉ែមាស មិនត្រឹមត្រូវតាមលក្ខណៈបច្ចេកទេស។
ស្នងការខេត្តមណ្ឌលគិរី លោក ឡោ សុខា បានប្រាប់កាសែតក្នុងស្រុកថា រំសេវជាតិផ្ទុះជាង ១០តោន ភាគច្រើនជារបស់ក្រុមហ៊ុន រ៉ុងឆេង ស្តុកទុកក្នុងឃ្លាំងសុវត្ថិភាព និងត្រៀមទុកប្រើប្រាស់បំផ្ទុះថ្មក្នុងរណ្ដៅ ខណៈដែលអន្តរក្រសួងបានប្រកាសផ្អាកអាជីវកម្មទាំងអស់នៅតំបន់នោះ។
មន្ត្រីសង្គមស៊ីវិលបារម្ភថា អំពើពុករលួយកើតមានជាប្រព័ន្ធ ក្នុងវិស័យរ៉ែមាស អាជ្ញាធរអាចនឹងជួបឧបសគ្គក្នុងការស្វែងរកដំណោះស្រាយបញ្ហានេះ ហើយពលរដ្ឋនៅតែរងទុក្ខវេទនាដដែល។
ស្ថាបនិកអង្គការមាតាធម្មជាតិ លោក អាឡិកហន់ដ្រូ ហ្គន់សាឡេស ដេវិតសុន (Alejandro Gonzalez Davidson) ផ្តល់អនុសាសន៍ថា ប្រសិនបើរបបលោក ហ៊ុន សែន ចង់ស្តារវិស័យរ៉ែឡើងវិញ គួរតែអនុញ្ញាតឲ្យក្រុមហ៊ុនណាចេះទទួលខុសត្រូវពីផលប៉ះពាល់បរិស្ថាន និងសង្គម ជាពិសេស គឺប្រើប្រាស់សារធាតុហ្សានីត(Cyanide) ឲ្យបានត្រឹមត្រូវ ដើម្បីផ្តល់ប្រយោជន៍ដល់ពលរដ្ឋ និងសង្គមជាតិ ប្រសើរជាងការផ្តល់ឱកាសឲ្យក្រុមហ៊ុនចិន និងក្រុមហ៊ុនវៀតណាមរកស៊ីផ្លូវងងឹត ឬខុសច្បាប់ មិនគិតពីផលប៉ះពាល់អវិជ្ជមានដល់បរិស្ថាន និងអាយុជីវិតពលរដ្ឋ។ លោករកឃើញថា របបលោក ហ៊ុន សែន បានបរាជ័យក្នុងការអនុវត្តគោលនយោបាយគ្រប់គ្រងវិស័យរ៉ែនៅកម្ពុជា ព្រោះអាជីវកម្មរ៉ែភាគច្រើន គ្មានប្រយោជន៍សម្រាប់ពលរដ្ឋ និងសង្គមជាតិ គឺមានប្រយោជន៍តែក្រុមហ៊ុនចិន និងអាជ្ញាធរខិលខូចមួយចំនួនប៉ុណ្ណោះ៖ «»។
លោក អាឡិកហន់ដ្រូ បន្ថែមថា របបលោក ហ៊ុន សែន គួរតែបិទការនាំចូលសារធាតុហ្សានីត និងបញ្ឈប់ការប្រើប្រាស់សារធាតុប្រភេទនេះ ដើម្បីសង្គ្រោះបរិស្ថានធម្មជាតិ និងបញ្ចៀសហានិភ័យនានា។ លោកយល់ថា ការអនុវត្តយន្តការនេះ គឺជាការសម្រេចចិត្តមួយ មិនហួសពីសមត្ថភាពរបស់លោក ហ៊ុន សែន នោះទេ៖ «»។
កាលពីដើមឧសភាកន្លងទៅ ពលរដ្ឋរស់នៅខេត្តក្រចេះ និងខេត្តមណ្ឌលគិរី ជិត ២០នាក់បានស្លាប់ និងជាង ៣០០រយនាក់ឈឺ ដោយសារពុលទឹកអូរ និងទឹកព្រែកទេរ ដែលក្រុមហ៊ុនរ៉ែមាសខុសច្បាប់ទាំងនោះ បង្ហូរកាកសំណល់គីមីចូលក្នុងទឹក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។