ក្រសួងបរិស្ថានប្ដេជ្ញាថា នឹងរក្សាល្អាងជប់ទឹកជាង ២០កន្លែង នៅឧទ្យានជាតិព្រះបាទជ័យវរ្ម័ន នរោត្តម ភ្នំគូលែន ក្នុងខេត្តសៀមរាបឱ្យគង់វង្ស ដើម្បីប្រជាជនយកទឹកប្រើប្រាស់ទូទាំងខេត្តនេះ។ ប៉ុន្តែពលរដ្ឋរស់នៅខេត្តសៀមរាបមើលឃើញថា ល្អាងជប់ទឹកមួយចំនួន កំពុងប្រឈមការគំរាមកំហែង ក្រោមរូបភាពទន្ទ្រានដីធ្វើកសិកម្ម និងការកាប់ទន្ទ្រានព្រៃឈើជាដើម។
រដ្ឋលេខាធិការ និងជាអ្នកនាំពាក្យក្រសួងបរិស្ថាន លោក នេត្រ ភក្ត្រា អះអាងថា ល្អាងជប់ទឹកជាង ២០កន្លែង ក្នុងតំបន់ភ្នំគូលែនក្នុងខេត្តសៀមរាបមានសារសំខាន់ណាស់ ក្នុងការផ្គត់ផ្គង់ទឹកជូនប្រជាជនរស់នៅទូទាំងខេត្តនេះ។
លោកថ្លែងបែបនេះក្នុង ក្នុងសន្និសីទសារព័ត៌មាន ស្ដីពី "សមិទ្ធផលសម្រេចបានរយៈពេល ៥ឆ្នាំកន្លងមក របស់ក្រសួងបរិស្ថាន" ដែលរៀបចំឡើងដោយ អង្គភាពអ្នកនាំពាក្យរដ្ឋាភិបាល ធ្វើឡើងនៅរាជធានីភ្នំពេញ នៅថ្ងៃទី៣០ សីហា។
លោក នេត្រ ភក្ត្រា បញ្ជាក់ថា ក្រសួងបរិស្ថាននឹងការពារតំបន់នោះឱ្យគង់វង្ស ដោយថែទាំព្រៃឈើ និងដាំកូនឈើឡើងវិញ ដើម្បីការពារប្រភពទឹក ដើម្បីផ្តល់ជូនពលរដ្ឋសម្រាប់ប្រើប្រាស់។
លោកថា នេះជាចំណុចមួយសំខាន់ ដែលកម្ពុជាកំពុងឆ្ពោះទៅមុខ ក្នុងដំណើរអភិវឌ្ឍន៍ មានកំណើនប្រជាជន កំណើនសេដ្ឋកិច្ច ចាំបាច់ត្រូវមានតម្រូវការទឹក ជារឿងសំខាន់ ដែលក្រសួងបរិស្ថានបានគិតគូរ ពីប្រភពទឹកសម្រាប់ប្រើប្រាស់ ផ្គត់ផ្គង់ប្រជាពលរដ្ឋទាំងមូលក្នុងខេត្តសៀមរាប៖ «ជុំវិញនៅខេត្តសៀមរាប គឺប្រភពទឹក ពីភ្នំគូលែន យើងត្រូវការពារតំបន់នោះឱ្យគង់វង្ស ទាំងថែរក្សាឈើ ដាំឈើឡើងវិញ ដើម្បីផ្តល់នូវប្រភពនូវប្រភពទឹកពេញលេញ។ កំណើនសេដ្ឋកិច្ច កំណើនអភិវឌ្ឍន៍តម្រូវការទឹក ក៏ជាចំណុចមួយចាំបាច់»។
ឆ្លើយតបរឿងនេះ ពលរដ្ឋរស់នៅខេត្តសៀមរាបបារម្ភថា ល្អាងទឹកជប់មួយចំនួន នៅភ្នំគូលែន កំពុងប្រឈមការគំរាមកំហែង ហើយអាចប្រឈមបាត់បង់នៅថ្ងៃអនាគត ខណៈដែលពលរដ្ឋ និង អ្នកមានអំណាចខ្លះបានទន្ទ្រានព្រៃ ដើម្បីរានយកដីធ្វើចម្ការដាំស្វាយចន្ទីអស់រាប់ពាន់ហិកតារ ដោយមានតំបន់ទឹកជប់ខ្លះទៀតគ្រប់គ្រងដោយឯកជន។
ពលរដ្ឋរស់នៅខេត្តសៀមរាប លោក នង ធារ៉ា សង្កេតឃើញថា ល្អាងជប់ទឹកមួយចំនួន ដែលឋិតក្នុងតំបន់អភិរក្សឧទ្យានជាតិភ្នំគូលែន ហ៊ុមព័ទ្ធដោយចម្ការស្វាយចន្ទីគ្រប់គ្រងដោយឯកជន និងមានតំបន់ខ្លះទៀត មានការកាប់ទន្ទ្រានព្រៃយ៉ាងច្រើនសន្ធឹកសន្ធាប់។ លោកបានចុះដល់ទីតាំងជាក់ស្ដែង ប្រទះឃើញតំបន់ជប់ទឹកខ្លះ មានទឹកហូរគ្រប់រដូវ បែរជាមានចម្ការស្វាយចន្ទីរបស់ពលរដ្ឋជាច្រើនគ្រួសារអមសងខាង៖ «ទឹ កតែងតែហូរខួបប្រាំងវស្សាមានស្វាយចន្ទីប្រជាពលរដ្ឋដាំស្រូវ តំបន់ជុំវិញហ្នឹង វាកំពុងតែរងភាពប៉ះពាល់។ ពីមុនទឹកគូលែន ទឹកល្អឥតខ្ចោះចេញពីថ្ម ឥឡូវបែរជាមានជ័រចន្ទី»។
ល្អាងជប់ទឹក ភ្នំគូលែនរួមមាន ជប់ទឹកស្រះដំរី ជប់ទឹកអន្លង់ខៀវ តំបន់ជប់ទឹកវាលស្រែ និង ល្អាងជប់ទឹកអន្លង់មាសជាដើម មានទឹកផុសចេញពីក្រោមដីគ្រប់រដូវកាល ហូរឆ្ពោះតាមស្ទឹងសៀមរាប បឹង និងអូរជាច្រើនកន្លែង តម្រង់មកខ្សែទឹកខាងក្រោម អំណោយផលគាប់ប្រសើរដល់ពលរដ្ឋរាប់ម៉ឺនគ្រួសារទាញយកទឹកប្រើប្រាស់ធ្វើកសិកម្មគ្រប់រដូវមិនចេះរីងស្ងួត ជាពិសេសទាក់ទាញភ្ញៀវទេសចរ និងបង្កើតប្រព័ន្ធអេកូឡូស៊ីជាដើម។
សកម្មជនបរិស្ថាន នៃចលនាមាតាធម្មជាតិលោក ថុន រដ្ឋា មិនទាន់ជឿលើការប្តេជ្ញាចិត្ត របស់ក្រសួងសាមីទាំងស្រុងនៅឡើយទេ ហើយពួកលោក នឹងតាមដានរឿងនេះ ដោយយកចិត្តទុកដាក់។
លោកបញ្ជាក់ថា ពួកលោកនឹងចុះស្រាវជ្រាវប្រមូលព័ត៌មាន ពីស្ថានភាពល្អាងជប់ទឹកទាំងអស់ នៅភ្នំគូលែន និងពិនិត្យមើល ពីប្រសិទ្ធភាពការងាររបស់ក្រសួងបរិស្ថាន តើអនុវត្តបានកម្រិតណា? « ប្រសិនបើមានភាពមិនប្រក្រតី យើងស៊ើបអង្កេតឃើញថា វាគ្រាន់តែប្ដេជ្ញាចិត្តបានតែមាត់ វាមានតែរងការបំផ្លាញ ដែលយើងមើលឃើញ យើងគ្រាន់ផ្សាយព័ត៌មាន ឱ្យសាធារណជនបានដឹង ពីបញ្ហាទាំងអស់ហ្នឹង » ។
ឧទ្យានជាតិព្រះបាទជ័យវរ្ម័ន នរោត្តម ភ្នំគូលែនបានបង្កើតឡើង ដោយព្រះរាជក្រឹត្យកាលពី ឆ្នាំ១៩៩៣ មានផ្ទៃដីជាង ៣ម៉ឺន ៧ ពាន់ហិកតារ ( ៣៧៥០០) គ្របដណ្តប់លើភ្នំចំនួន៣ គឺ ភ្នំគូលែន ភ្នំក្បាលស្ពាន និងភ្នំហប់។
ឧទ្យានជាតិនេះ មានទឹកជ្រោះ ជ្រលង ភ្នំខ្ពង់រាប ប្រាសាទបុរាណ អាស្រមអ្នករក្សាសីល សត្វព្រៃ និងទីតាំងបុរាណស្ថានជាច្រើនកន្លែង ទាក់ចិត្តភ្ញៀវទេសចរ ទៅកម្សាន្ត ឋិតក្នុងស្រុកចំនួន៣ គឺស្រុកស្វាយលើ ស្រុកបន្ទាយស្រី និងស្រុកវ៉ារិន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។