សកម្មជនចលនាមាតាធម្មជាតិចេញផ្សាយវីដេអូមួយដោយរកឃើញថា មានការបង្ហូរសារធាតុគីមីពីរោងចក្រចម្ការដូងប្រេងរបស់ អ្នកឧកញ៉ា ម៉ុង ឫទ្ធី ចូលទៅក្នុងព្រែកកំពង់សីលា ក្នុងខេត្តព្រះសីហនុ ដែលធ្វើឱ្យប៉ះពាល់ដល់ពលរដ្ឋ និងជីវចម្រុះធ្ងន់ធ្ងរ។ ប៉ុន្តែម្ចាស់រោងចក្រចម្ការដូងប្រេង ឧកញ៉ា ម៉ុង ឫទ្ធី ច្រានចោទចំពោះការលើកឡើងនេះ។
សកម្មជនចលនាមាតាធម្មជាតិ កញ្ញា លាង សុវណ្ណា ប្រាប់វិទ្យុអាស៊ីសេរីនៅថ្ងៃទី១៨ ខែមិថុនា ថា តាមរយៈការចុះសាកសួរពលរដ្ឋ និងមន្ត្រីមូលដ្ឋានគឺមានករណីពុលទឹកចាប់តាំងពីថ្ងៃទី១២ ខែមិថុនាដោយសាររោងចក្រចម្ការដូងប្រេងរបស់ ឧកញ៉ា ម៉ុង ឫទ្ធី បានបង្ហូរសារធាតុគីមីចូលតំបន់អភិរក្សជលផលព្រែកកំពង់សីលា ខេត្តព្រះសីហនុ។ កញ្ញាថា មានពលរដ្ឋប្រមាណ២០ គ្រួសារដែលបានពុលក្រោយបរិភោគត្រីងាប់ ខណៈដែលត្រី និងប្រព័ន្ធអេកូឡូស៊ីបានរងផលប៉ះពាល់ជាខ្លាំង។ «»
កញ្ញា លាង សុវណ្ណា ថា កញ្ញានឹងបញ្ជាក់ពីសារធាតុគីមីនេះតាមរយៈការធ្វើពិសោធន៍នៅពេលក្រោយ ប៉ុន្តែកញ្ញាទទូចដល់អាជ្ញាធរដែនដី និងក្រសួងពាក់ព័ន្ធចុះពិនិត្យលើករណីនេះ និងទាមទារឱ្យរោងចក្រចម្ការដូងប្រេងរបស់ លោក ម៉ុង ឫទ្ធី សាងសង់ប្រព័ន្ធប្រព្រឹត្តិកម្មទឹកឱ្យបានត្រឹមត្រូវ។
ជំទប់ទីពីរ នៃឃុំកំពង់សិលា លោក សុខ វ៉ុន អះអាងថា ការលើកឡើងរបស់សកម្មជនចលនាធម្មជាតិគឺជារឿងពិត ខណៈដែលលោកក៏ជាគ្រូពេទ្យជួយព្យាបាលពលរដ្ឋដែលពុលពីការបរិភោគត្រីនៅក្នុងព្រែកកំពង់សិលានេះដែរ។ លោកថា ផលប៉ះពាល់មិនត្រឹមតែលើពលរដ្ឋនៅឃុំកំពង់សីលា ប៉ុណ្ណោះទេ តែទឹកដែលហូរពីព្រែកនេះ នឹងបន្តរហូតដល់សមុទ្រ។ «»
ឆ្លើយតបចំពោះបញ្ហានេះ ម្ចាស់រោងចក្រចម្ការដូងប្រេង និងជាសមាជិកព្រឹទ្ធសភាមកពីគណបក្សប្រជាជនកម្ពុជា ម៉ុង ឫទ្ធី ច្រានចោលចំពោះលើកឡើងថា រោងចក្រដូងប្រេងរបស់លោកបង្ហូរសារធាតុគីមីចូលក្នុងព្រែកនេះ។ លោកយល់ថា ការពុលត្រីនេះគឺជារឿងធម្មជាតិដែលកើតឡើងយូរៗម្ដង។ «»
វិទ្យុអាស៊ីសេរីមិនទាន់អាចសុំការឆ្លើយតបរឿងនេះពី អ្នកនាំពាក្យក្រសួងបរិស្ថាន លោក ខ្វៃ អាទិត្យា និងអ្នកនាំពាក្យរដ្ឋបាលខេត្តព្រះសីហនុ លោក ឃាង ភារម្យ បានទេ នៅថ្ងៃទី១៨ ខែមិថុនា។
ប្រធានកម្មវិធីបណ្ដាញ និងតស៊ូមតិនៃអង្គការភាពជាដៃគូដើម្បីបរិស្ថាន និងការអភិវឌ្ឍ (PED) លោក សាន់ ម៉ាឡា លើកឡើងថា មន្ត្រីពាក់ព័ន្ធគួរតែចុះស៊ើបអង្កេត និងចាត់វិធានការច្បាប់ប្រសិនបើរកឃើញថា មានបុគ្គល ឬក្រុមហ៊ុនណាមួយបានបង្ហូរសារធាតុគីមីចូលទៅក្នុងព្រែកសាធារណៈនេះ។ «»
កន្លងមកសកម្មជនបរិស្ថានតែងរកឃើញថាក្រុមហ៊ុន រោងចក្រ ឬសណ្ឋាគារមួយចំនួននៅប្រទេសកម្ពុជាបានបង្ហូរទឹកកង្វក់ និងសារធាតុគីមីចូលទៅក្នុងស្ទឹង ព្រែក ទន្លេ និងសមុទ្រជាដើម។ ក្នុងករណីនៅពេលនេះ ពួកគេទទូចឱ្យអាជ្ញាធរពាក់ព័ន្ធចុះត្រួតពិនិត្យ និងរកវិធីដោះស្រាយដើម្បីការពារបរិស្ថានព្រែកធម្មជាតិ និងសុខភាពរបស់ពលរដ្ឋដែលរស់ពឹងអាស្រ័យនឹងព្រែកកំពង់សីលា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។