អ្នកឃ្លាំមើលផ្នែកបរិស្ថាន និងអាជ្ញាធរឃុំស្រែគររកឃើញថា ទំហំផលប៉ះពាល់ទំនប់វារីអគ្គិសនីសេសានក្រោមពីរ បានរីកធំឡើង នៅគ្រាដែលទំនប់នេះបានបិទទ្វារទឹកជាស្ថាពរជាងមួយខែមកហើយ បង្កឲ្យលិចភូមិស្រែគរ និងភូមិក្បាលរមាសចាស់ទាំងស្រុង។ អាជ្ញាធរឃុំស្រែគរថា ស្ថានភាពទឹកផ្នែកខាងលើទំនប់ បានរាលដាលដល់ភូមិស្រែគរថ្មី បណ្ដាលឲ្យលិចផ្លូវមួយចំនួន ហើយផលដំណាំពលរដ្ឋ១៥គ្រួសារបានរងការខូចខាត។
អាជ្ញាធរឃុំស្រែគរ ស្រុកសេសាន ខែត្រស្ទឹងត្រែង ឲ្យដឹងនៅថ្ងៃទី២៧ តុលាថា អាជ្ញាធរឃុំបានស្រង់ស្ថិតិពីផលប៉ះពាល់ផ្លូវ និងដីស្រែពលរដ្ឋដែលយល់ព្រមទទួលសំណង នៅភូមិស្រែគរថ្មីរួចហើយ ដើម្បីធ្វើរបាយការណ៍ រកមធ្យោបាយអន្តរាគមន៍ទៅក្រុមហ៊ុនឲ្យទទួលខុស។
មេឃុំស្រែគរ មកពីគណបក្សសង្គ្រោះជាតិ លោក សៀក មេគង្គ ឲ្យដឹងថា ផ្លូវលំមួយខ្សែនៅភូមិស្រែគរថ្មី បានលិចប្រហែលជាង ២រយម៉ែត្រ បង្ករាំងស្ទះដល់ការធ្វើដំណើរ បន្ទាប់ពីក្រុមហ៊ុនបានបិទទ្វារទឹកទាំងស្រុង រីឯផលដំណាំពលរដ្ឋនៅភូមិស្រែគរថ្មី ជាង ១០ហិកតារ ស្មើនឹង ១៥គ្រួសារខូចខាត។ លោកថា អាជ្ញាធរឃុំបានជូនដំណឹងទៅក្រុមហ៊ុនរួចហើយ ឲ្យចុះពិនិត្យបញ្ហានេះ តែពុំទាន់មានលទ្ធផលនៅឡើយ។ ចំណែកស្ថានភាពទឹកនៅភូមិស្រែគរចាស់ បានពន្លិចផ្ទះពលរដ្ឋជិត ១រយខ្នង ផ្ទះពលរដ្ឋខ្លះនៅសល់ដំបូលឡឹមៗ ផ្ទះខ្លះលិចទាំងស្រុង បណ្ដាលឲ្យខូចខាតទ្រព្យសម្បត្តិពលរដ្ឋមួយចំនួនជម្លៀសចេញមិនទាន់៖ «ក្នុងការចែកដីហ្នឹង ដីទឹកលិចនៅតែចែកដីឲ្យពលរដ្ឋដែរ មិនមែនតែប្រឈមតែភូមិចាស់ទេ ភូមិថ្មីក៏ប្រឈមដែរ»។
លោក សៀក មេគង្គ បន្ថែមថា នៅគ្រាដែលទឹកកំពុងគំរាមកំហែងជីវិតពលរដ្ឋ អ្នកភូមិប្រមាណ ៣គ្រួសារថ្មីទៀតបានយល់ព្រមទទួលសំណងពីក្រុមហ៊ុន និងបានរស់នៅភូមិថ្មី ដែលអាជ្ញាធរ និង ក្រុមហ៊ុនត្រៀមផ្ទះ និងដីស្រែចម្ការសម្រាប់ប្រគល់ជូន ដោះដូរជាគោលនយោបាយសំណង។
ពលរដ្ឋរស់នៅភូមិស្រែគរចាស់ ដែលបដិសេធមិនទទួលសំណងពីក្រុមហ៊ុន លោកស្រី សារុំ សាខុម ឲ្យដឹងនៅថ្ងៃទី២៧ តុលា ថា មកទល់ពេលនេះ អ្នកភូមិស្រែគរចាស់ បានមកតាំងទីលំនៅទីទួលខ្ពស់ និងដីចម្ការវិលជុំ បន្ទាប់ពីបានជញ្ជូនសម្ភារៈពីភូមិចាស់បានតិចតួច។ លោកស្រីបារម្ភថា នៅទីទួលខ្ពស់ ដែលអ្នកភូមិរស់នៅមានវិបត្តិខ្វះស្បៀងអាហារ និងទឹកស្អាត ហើយបច្ចុប្បន្នអ្នកភូមិបានប្រើប្រាស់ទឹក ក្នុងផ្ទៃអាងប្រើប្រាស់ប្រចាំថ្ងៃ ដូចជា ដាំស្ល និងបោកគក់ជាដើម។
របាយការណ៍អាជ្ញាធរឃុំស្រែគរអោយដឹងថា រយៈពេលប្រមាណ ៣ខែចុងក្រោយនេះ ពលរដ្ឋជាង ៦០គ្រួសារថ្មីទៀត នៅឃុំស្រែគរ បានយល់ព្រមទទួលសំណង និងចាកចេញពីភូមិចាស់ ទៅរស់នៅភូមិថ្មី ហើយបច្ចុប្បន្នពលរដ្ឋរស់នៅឃុំក្បាលរមាស ៥៧គ្រួសារ និងឃុំស្រែគរ ជាង៦០គ្រួសារនៅមិនទាន់យល់ព្រមទទួលសំណងពីក្រុមហ៊ុននៅឡើយ។
ពលរដ្ឋរស់នៅភូមិក្បាលរមាសចាស់ គឹម ឌឺង ជាជនជាតិដើមភាគតិចព្នង ឲ្យដឹងថា ស្ថានភាពទឹកនៅភូមិក្បាលរមាស បានលិចភូមិពលរដ្ឋ និងលិចផ្នូរកប់សពទាំងស្រុង។ អ្នកភូមិខ្លះបានធ្វើក្បូនបណ្ដែតទឹក និងប្រើប្រាស់ទូកជាមធ្យោបាយធ្វើដំណើរ។ លោកបារម្ភថា ស្ថានភាពទឹកនេះបង្កឲ្យពលរដ្ឋ លំបាកធ្វើកសិកម្ម កុមារបោះបង់ការសិក្សា និងគ្មានសេវាសុខាភិបាលជាដើម៖ «ប្រជាពលរដ្ឋគេជម្លៀសតាមទីទួលសុវត្ថិភាពខ្លួនឯង។ ក្បាលរមាសគេកំណត់ទីតាំងអស់ហើយ តែគ្រាន់តែមិនទាន់សង់ជាលំនៅឋាន»។
អ្នកស្រាវជ្រាវផ្នែកបរិស្ថាន លោក ភូ ប៊ុនថាន់ យល់ថា ទំហំផលប៉ះពាល់បានរាលដាលបង្កឲ្យលិចផ្លូវនៅភូមិស្រែគរថ្មី និងលិចស្រែពលរដ្ឋនៅតំបន់នោះ គឺជាសញ្ញាបង្ហាញថា ក្រុមហ៊ុន និងអាជ្ញាធរពាក់ព័ន្ធ មិនបានអនុវត្តគោលនយោបាយកាត់បន្ថយផលប៉ះពាល់បរិស្ថានឲ្យត្រឹមត្រូវនោះទេ ពោលគឺខ្វះចន្លោះច្រើន ហើយការសិក្សាលក្ខណៈបច្ចេកទេសក៏មិនបានច្បាស់លាស់ ដែលជាមូលហេតុនាំប៉ះពាល់ជីវភាពរស់ពលរដ្ឋ។ លោកយល់ថា គណៈកម្មការដោះស្រាយផលប៉ះពាល់ខែត្រ និងក្រុមហ៊ុន ត្រូវពន្លឿនដោះស្រាយបញ្ហានេះឲ្យបានលឿនបំផុត ដើម្បីសម្រាលការលំបាករបស់អ្នកភូមិ៖ «ក្រុមហ៊ុន ក៏ដូចជារាជរដ្ឋាភិបាលត្រូវរៀបចំផ្លូវហ្នឹង ឲ្យបានលឿនបំផុតតាមដែលអាចធ្វើទៅបាន»។
លិខិតជូនដំណឹងរបស់អភិបាលខែត្រស្ទឹងត្រែងលោក មុំ សារឿន ចុះថ្ងៃទី១១ តុលា បញ្ជាក់ថា ក្នុងករណីដែលពលរដ្ឋមិនទទួលសំណង រាជរដ្ឋាភិបាល និងក្រុមហ៊ុនបានផ្ដល់ជម្រើសនានា ជូនពលរដ្ឋដែលចង់យកទីតាំងថ្មី ឋិតនៅក្បែរភូមិចាស់ និងធ្លាប់អាស្រ័យផលស្រាប់ ដែលជាទីតាំងមានសុវត្ថិភាព ដើម្បីសាងសង់លំនៅឋានថ្មីរស់នៅ។ លើសពីនេះ រាជរដ្ឋាភិបាល និងក្រុមហ៊ុនអះអាងថា នឹងបន្តសហការដោះស្រាយផលប៉ះពាល់ ផ្អែកតាមគោលនយោបាយសមស្រប ជូនពលរដ្ឋផ្ទាល់។ ហើយបើពលរដ្ឋនៅពុំទាន់ទទួលសំណង គណៈកម្មការខែត្រ និងក្រុមហ៊ុនវារីអគ្គិសនីសេសានក្រោមពីរ នឹងមិនទទួលខុសត្រូវចំពោះការបាត់បង់ ផលប្រយោជន៍របស់ពលរដ្ឋនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។